ikíngutit ilumôrtut sôk ima pigssarsiariu-minaitsigípat?

„MILLIÛNINIK ikínguteĸarusugpunga.“ brasiliamiut erinarssûtaisa ilât nuánarineĸangârtoĸ taimatut oĸausertaĸarpoĸ. ikíngutdle sunarpiauva? inuit ilaisa oĸauseĸ táuna aulajangivigsimángitsumik isumaĸartítarpât, ilisarisimassat tamavîsa pineĸartítardlugit, aitsâtdle akerartúngigpatik. ikíngutdle ilumôrtoĸ tássáináungilaĸ ’ilisarisimassaĸ’. ikíngutigîngneĸ ilumôrtoĸ pivdlugo taigdliortoĸ Francis Bacon agdlagsimavoĸ: „nuánârneĸ mardloriautíngortítarpâ aliasungnerdlo agfáinángortítardlugo.“

âp, ikíngut ilumôrtoĸ ikíngúme inûneranik nuánernerulersitsissarpoĸ atoruminarnerulersitsissardlunilo, aliasûtinitdlo naláuneĸarnerane ikiuinialersardlune. ikínguteĸángitsoĸ pivdluardluínarsínáungilaĸ. inuitdle milliûniligpagssuit oĸartarput ikíngutinik ilumôrtunik pigssarsiuminaitsorujugssûngmat pakatsivdlutik.

suna píssutigalugo ikíngutit ilumôrtut pigssarsiariumináipat?

bîbilime sujuligtûtigineĸarpoĸ uvdlumíkut inuit inûjumârtut „ingmingnik asassut, . . . usorssitsâpilugtut, angneruniartut, . . . ĸujasuitsut, ilumôrfigeĸatigĩngitsut, píssusigssatut asangníngitsut, sáimajuitsut, mamardlîssut, ingmingnut nâlagkersorsínáungitsut, ĸiningassut, ajúngitsunik ûmigssuissut, kigdlũssissut, nangminĩnaĸ isúmamingnik atuiumassut, pingâkujugtut“. (2 Timûtiuse 3:1-4, NW) píssutsit taimáitut inungne atugaungârmata, tupingnángilaĸ ikíngutit ilumôrtuartut pigssarsiariumináissusiat! píssutsit ikíngutip ilumôrtup píssuserissariaĸagaisa ineriartortíneĸarniarnigssãnut avatangîssit akornutaussarput.

avdlanigtaordle akornutaussoĸarpoĸ. inuit ilaisa inûneĸ pingârtortailo ĸarssupĩnaĸissumik issigissarpait. ilaisalo ikíngutigîngnerup akia akilerumángilât. „sumitdlũnît pitungneĸarumángilanga!“ amerdlasût oĸartarput. nunap pînik pingârtitsivatdlârdlune isumaĸarneĸ ikíngutigîngnerpagssuarnik ake- ĸartarpoĸ. amerdlavatdlârtunik nunap pê — imalũnît ĸingmit ĸitsuitdlo — inungnut atássuteĸarnernit sagdliutíneĸarnerussarput. taimaingmat inungnik asangningnerat ĸarssupigtúngortarpoĸ. sôrdlo arnaĸ utorĸassâĸ oĸarsimassoĸ: „asangningnertik nivtartaraluarpât,  ĸanigdlivingnavêrsimavdlutigdle.“ ínugtaoĸatigîngne kíkúnik tamanik pákússinermik kuningnermigdlo ilerĸoĸartune agdlât ajorssartúngortut ikiortariaĸavigsut misigissarpât ikíngutimingnit ĸimagauvdlutik.

ãmátaoĸ pivfigssakíneĸ ikíngutigîngnernut akornutaussarpoĸ. uvdluínarne tuaviupilungnermit inugpagssuit ikíngutigîngnermik ineriartortitsiniarnigssamingnut pivfigssaĸartaríngitdlat imalũnît nukigssaĸaratik. ímaĸalo isumaĸartoĸarpoĸ ikíngutinik ĸaerĸussissarângamik avdlatut ajornartumik akisôrujugssuarnik savssaissariaĸardlutik, taimáitumigdlo isumaĸardlutik „ikínguteĸarnigssaĸ“ akigssaĸarfigíngíkigtik!

ĸarssupigtumik ikíngutigîngneĸ

ãma una aperĸutigineĸarsínauvoĸ: ikíngutitut taissagkavut ĸanoĸ ĸanigtigissumik ikíngutiginerpavut? akugtúngitsumik pissarpoĸ inûp avdlap inuk avdla soĸutigissarâ áiparme tunissisínaunera píssutigalugo, ĸanoĸ ítûnera píssutiginago. ikíngutigîngnerit taima ítut sivikíkajugput, amerdlanertigúme áipâ túniússagssaerúkune ernĩnaĸ ikíngutigineĸarungnáisaoĸ.

peĸatigĩssuteĸarneĸ soraiuitsumik ikíngutigîngnigssamut ĸularnavêrĸutáungilaĸ. avîsime Brazil Herald-ime „ikíngutingnârît“ mardluk sapâtit akúnerisa nânerine tamane imerniartarfît tugdlerîartut iserfigeĸátârdlugit imerujôĸatigîgtartut oĸalugtuarineĸarput. uvdlutdle ilãne kina ardlât nukigtunerunersoĸ angutivigtutdlo píssuseĸarnerunersoĸ saĸitsáissutigilerpât. oĸautsine ugpernarsarumavdlugit áipâta igdluínarssũne amunasuarpâ áiparminutdlo imaerdlugo. kingornagut inuartoĸ oĸarpoĸ „ikíngutingnâvine“ toĸúsimagine.

ilumôrtumik ikíngutigîngniaráine ajornartorsiuterpagssuit akornutaussorpagssuitdlo akingmivfigineĸartásáput. taimáikaluartordle tamavta inúngûseralugo ikínguteĸarneĸ atorfigssaĸartíparput. ikíngutit sume navssâgssáupat, ĸanordlo pigssarsiarineĸarsínauvdlutik?