kristumiutut inersimassuíngornigssamik angorkusâgak akueriuk!
kristumiutut inersimassuíngornigssamik angorkusâgak akueriuk!
„ilumôrtumigdle oĸalugdluta, asangningníkut tamatigut agdliartorta niaĸorissamut, tamássa Kristusimut.“ — EVFISUMIUT 4:15, NW.
1, 2. (a) ’arnap timâta iluane inerítoĸ’ ĸanoĸ ilivdlune akigssarsiauva? (b) inôrdlât ĸanoĸ pinigssât ilimagineĸartarpa?
MÊRÁNGUIT perĸigsut ũmârigsutdlo tamanik nuánârtitsissarput. ĸuianartuliornere tivsinartúnguit kiap akiorsínauvai? mêránguit sumĩkaluarunigdlũnît tamanit soĸutigineĸartarput. tupingnángilaĸ angajorĸât ĸitornatik usorssisimârutigigait nuánârutigalugitdlo, nauk ĸitornaĸardlune ulapínaĸalunilo akornusersortínaraluartoĸ. ilumôrpoĸ ’arnap timâta iluane inerítoĸ tássaussoĸ akigssarsiaĸ’. — Tussiaat 127:3.
2 mêránguit nauk ineĸunaraluaĸissut, agdliartúngitsôrpata ĸanoĸ periartoĸásagaluarpa? nauk angajorĸâmingnit asangnigtumik pârineĸaraluardlutik ĸáumatit ingerdlanerisigut taimaigínarpata — ímaĸa agdlât ukiut ingerdlanerisigut avdlángorneĸ ajorpata — ajoĸuteĸarnerat ĸularnarungnáisaoĸ. „agdliartornerup“ „ûmássuseĸarneĸ“ naligâ — ûmássusigdlit tamarmik agdliartornigssât nautsorssûtigârput. agdliartorneĸ Jehovap píngortitsinermik píssauneranut ilisimássusianutdlo nalunaiautauvoĸ. — Lúkarse 2:52.
anersãkut ineriartorneĸ pissariaĸartoĸ
3. agdliartornigssaĸ suna Jesusip sujuligtûtigâ, tamánalo ĸanoĸ erĸũpa?
3 Jesusip sujuligtûtâ erĸûtitdlugo mãnákut agdliartorneĸ avdlatut ítoĸ pissarpoĸ. silarssuarme tamarme anersãkut „katerssuineĸ“arpoĸ. (Matîuse 9:37) ássersûtigalugo ukiume oĸalũssivfiussume 1984-ime nâlagauvfingmik oĸalũssissartut nunane arfinilingne ĸáumatit tamaisa avguaĸatigîgsitdlugit 100.000-init amerdlanerussut nalunaerutigineĸarpoĸ. ukiut pingasuínait tamatuma sujornatigut, 1981-ime, nunane mardluínarne oĸalũssissartut 100.000-it sivnerdlugit amerdlássuseĸarput. ukiune arfinilingne kingugdlerne Jehovap nalunaiaissuinut ilánguterĸámersut 827.144-t kuisíput, ilagîtdlo nutât 5000-init amerdlanerussut pilersíneĸarput. Jehovap suliarerĸussane tuaviûtigisimavâ. — Isaia 60:22.
4. Jehovap ínugtaisa silarssuarme tamarme agdliartornerata suna kingunerâ?
4 kisitsisit táukua takutípât uvdlumíkut Jehovap ínugtaisa ilagissartagait oĸalũssissartutdlo pingasûgângata ilât atauseĸ ukiut arfinigdlit kingugdlît ingerdlaneráne kuisítoĸ. ivdlit táukunúnga ilauvit? taimáikuvit, tauva sagdlusuíssúmik ilíniarningne ikiortigissangnut, ilagissartagkangnut kristumiûssunut tamanut, atâtangnutdlo ĸilangmiussumut, Jehova Gûtimut, nuánârutauvdluarputit. (ússatit 27:11) mêrángûp avdlorĸârneratut, Jehovamut túniutdluínarnigkut avdloriarnerit pisimassûvoĸ písanganartoĸ. tássauvoĸ sujumut ineriartordlutit iliûserissat. agdliartornermut erssiutauvoĸ.
5. aperĸutit sût inuit tamarmik ingmíkut ingmingnut aperĸutigísavait? suna erĸarsautigiguvtigo aperĸutit táuko akisínáusavavut?
5 taimanernĩme? kristumioĸatingnit asangnigtumik isumagineĸardlutit anersãkut aulajaitsumik ineriartuârnerit malungnarpa? ’uvanga taimáinersunga ĸanoĸ ilivdlunga malugisínaunerpara?’ ímaĸa aperivutit. ineriartorneĸ pivdlugo apustile Paulusip oĸausia erĸainiaruk: „mêraugatdlarama mêrĸatut oĸalugtarpunga mêrĸatutdlo isumaliordlunga mêrĸatutdlo erĸarsardlunga, mêraujungnaeramale mêrarpalugtut atorungnaerpáka.“ (1 Korintumiut 13:11) ukiut ingerdlanere píssutáinaunatik ãmátaordle ’mêrarpalugtut atorungnaer’amigit Paulus angutitut inersimavdluartúngorpoĸ. mêrarpalugtut sũpat?
6, 7. (a) „mêrarpalugtut“ ilât navianartorsiortitsineralo navsuiákit. (b) ’mêrarpalugtoĸ’ tamána ĸanoĸ erssertarpa? suna kingunerisínauvâ?
6 mêránguit erĸarsautimingnut atausĩnaĸ sivikitsuínarmik túngavigitísínauvât. erĸamingnĩtut tamavîsa soĸutigissarpait, ãmátaordle nalunartumik periartârtarput, avdlángujavdlutigdlo erĸigsisimanerdlo ajordlutik. nalunángitsumik anersãkut taimatut píssuseĸartuartoĸ navianartorsiúsaoĸ. ilimanarpoĸ inuk taimáitoĸ ’malingnit aulatíneĸásassoĸ tamanutdlo erĸârineĸardlune ajoĸersũmit nalingínarmit anordlersumit, inuit ímeráutarnerinit, ĸoĸagssîssut támartitsissut perĸusersûneránit’, sôrdlo Paulusip Evfisumiunut agdlagkamine 4:14-ime agdlauserigâ.
7 magdlit anorilo tássángáinaĸ tákútardlutigdlo pêrútarput. uvdlumíkut niorĸutigssiat ilarpagssuisa sivikitsuínarmik atorneĸarêrdlutik atornêrúnigssât nautsorssûtigineĸartarmat, uvdlume alutorissaussoĸ aĸago atugaujungnaersimásaoĸ, nuánarineĸartut sût tamarmik ĸângiutiangmata. igpagssaĸ pissariaĸardluínartutut issigineĸartut uvdlume ĸanganisángordlutigdlo puiugaussarput. alĩkusersûtit, atissat nutsatdlo ĸanoĸ issíkoĸarnere, avdlatdlo sûtdlũnît pineĸaraluarpata, sianĩssusigssâ — mêrarpalússusigssâlo — noĸavigsimavdlune nutâliaussut kingugdlersât piumavdlugit piniardlugitdlo, ernĩnardle pâsísavdlugo alutorissaugaluaĸ ilerĸorineĸarungnaertoĸ, pakatsisíneĸartoĸ-âsît. anersâp pê erĸarsautigalugit unerigkumángíssuseĸ taimáitoĸ ajunârnermik kinguneĸaratarsínauvoĸ. — takûk Jâko 1:6-8.
8. anersãkut mêránguit ãma suna píssuserissarpât, ĸanordlo navianartorsiortitsisínauva?
8 „mêrarpalugtut“ ilagãtaoĸ mêránguit ajúngitsumik ajortumigdlo, erĸortumik erĸúngitsumigdlo ingmíkôrtitsisínáungínerat. tamatumúnga ássingussumik anersãkut mêránguatut ítut sule ’sungiusagaussumik sianíssuseĸángíkatdlarput, ajúngitsordlo ajortordlo ingmíkũssusîsigut ilisarisínaunagit’, tamánalo píssutigalugo apustile Paulusip kristumioĸatine kajumigsârpai ’inersimássúmut ingerdlaniarĸuvdlugit, kingumut túngaviliorĸunagit’. (Eprîarit 5:14; 6:1) anersãkut mêrángûssut sagdlusuíssutitut ilagsisimassamik ilumut sagdlusuíssutauneranik ĸularungnaersíne- ĸaĸátârtariaĸarput, erĸortumigdlo iliornigssatut ajoĸersorneĸautigissatik ilumut iliûserissariaĸaritik erĸaisíneĸaĸátârtariaĸardlutik. túngaviunerussunik agdlât nãmagsingningniarnigssamingnut ikiortariaĸartarput. ikiorneĸartuáinángíkunik ularússissarput, patajavdlutigdlo, ĸularnartunitdlo ugperneránut ajoĸutausínaussunit saperssisíneĸardluínartardlutik.
9. suna pivdlugo kristumiutut inersimavdluartúngornianut angorĸusâgaĸ akuerissariaĸarparput?
9 malugaiuk mêrĸat inersimassut ilârtuáinarait? ilârssineĸ mêrĸat pínguautigĩnartarpât. ĸularnángitsumik inersimassunik ilârssisínauvdlutik inersimassutdle inûnerata akissugssauvfigtânik erĸortitsissariaĸarnatik mêrĸat pínguautigĩnartarpât. tássa mêrauvdlune inûneĸ. (takûk Matîuse 11:16, 17.) agdliartortitdlunile ineriartortitdlunilo pissugssáussutsinik akissugssáussutsinigdlo erĸortitsissariaĸartarpoĸ. mêraĸ angorĸusâgaĸ tamána akuererĸuvdlugo ikiortariaĸarpoĸ. mêraunermine angorĸusâgkamik akuerssisínaunera inersimassúngorêrnigssamine iluagtitsinigssâta iluagtíngitsôrnigssâtalo ĸanoĸ agtiginigssãnut aulajangîssũsaoĸ. anersãkutdle inûnivta tungâtigut, tamavta ingmíkut kristumiutut inersimavdluartutut angorĸusâgkamik akuerssinigssarput erĸarsautigerĸigsãsavdlugo sule pingâruteĸarneruvoĸ. anersâmut atassûvdlune inersimavdluartûvdlunilo inûnerup akissugssauvfigtâ ivdlit erĸortíkumaviuk, agdlâtdlo erĸortíniardlugo ilungersordlutit? imalũnît nãmáinartumik pissarpit, ivdlit akissugssauvfigigaluit avdlanut tugtíniardlugo? — Galâsiamiut 6:4, 5.
kristumiutut inersimavdluarneĸ — sunauva?
10. suna pivdlugo Paulusip kristumiut eprîariussut kajumigsârpai „inersimássúmut ingerdlaniar“ĸuvdlugit?
10 apustile Paulusip kristumiut kajumigsâramigit „inersimássúmut ingerdlaniar“ĸuvdlugit, sunarpiaĸ pivâ? (Eprîarit 6:1) oĸautsit táukua ataĸatigissáinit pâsineĸarsínauvoĸ Paulusip kristumiut eprîarit „Milkisîtaup ilerĸuatut palasiunermik“, Jesus Kristusimik, amerdlasûnik oĸausigssaĸarfigigaluarai. misigâle artoratdlarât oĸautigiumassame ’navsuiarnigssâ ajornakulungmat’. (Eprîarit 5:10, 11) oĸautigiumassaraluaminut taorsiutdlugo imáitumik erĸaisípai: ’ímungmik pissariaĸalerpuse, nerissagssaĸ imerpalassũngitsoĸ sapileravsiuk. ímungmingme pissariaĸartoĸ oĸautsinik iluartunik sujuneĸángilaĸ, merdlertúngûgame, inersimassutdle nerissagssamik imerpalassũngitsumik pissariaĸarput, tássa misigissaĸartarníkut sungiusagaussumik sianíssusigdlit ajúngitsordlo ajortordlo ingmíkũssusîsigut ilisarisínauvdlugit.’ — Eprîarit 5:12-14; nalerĸiuguk Jûtarse 3.
11. inersimavdluartûvdlune ĸanoĸ pâsissaria- ĸarpa?
11 tauva ima pâsissariaĸarpa inersimavdluarneĸ tássáinaussoĸ bîbilip itinerussortainik ilisimassaĸarneĸ? kristumiutut inersimavdluarnerup bîbilimik ilisimassaĸarneĸ pâsingningnerdlo ilagigaluarpai; tamánáináungilardle. oĸautsit apustile Paulusip atugai pâsiguvtigik oĸausîsa pingârtortât ersserĸingnerussumik pâsisínáusavarput. oĸautsip „inersimássut“ — ip grîkerisôrtâ tássauvoĸ teleiótes, oĸauserdlo píssusileríssut „inersimavdluartoĸ“ nugtigauvoĸ oĸautsimit téleios-imit. oĸautsit táukua nagguveĸatigât oĸauseĸ télos, isumaĸartoĸ ’naggat, nãmagtíneĸ imalũnît angussaĸ’. tamána tunuleĸutaralugo Expository Dictionary of New Testament Words-ime W. E. Vine-mêrsume navsuiarneĸarpoĸ oĸauseĸ „inersimavdluartoĸ“ (téleios) „isumaĸartoĸ angussaĸ (télos) anguneĸarsimassoĸ, suna ardlât nãmagtísimassoĸ, nãmagsineĸartoĸ, inârneĸartoĸ“. taimáitumik kristumio inersimavdluartoĸ tássauvoĸ anguniagkaminik aulajangersimassumik angussisimassoĸ. angussaĸ tamána sunauva?
12. Evfisumiunut agdlagkane 4:11-13-ime agdlagsimassoĸ nâpertordlugo inersimavdluartut ĸanoĸ itũsápat?
12 Evfisumiunut agdlagkamine 4:11-13-ime apustile Paulusip navsuiarpâ ilagît kristumiut niaĸuat Jesus Kristus amerdlasûnik periarfigssîsimassoĸ „iluartut“ anguniagkamik angussiniarneráne ikiorumavdlugit, anguniagaĸ tássa „tamavta apûtserdluta atausiússusigssamut, ugpeĸatigîgdluta Gûtivdlo erneranik ilisarsseĸatigîgdluta, angut inersimassoĸ nagdlersimavdlugo, Kristusip tamákigaisa angíssusiat nagdlersimavdlugo“. uvane agdlagsimassoĸ nâpertordlugo inersimaneĸ, imalũnît inersimavdluarneĸ (grîkerisut, téleios) atatíneĸáinángilaĸ erĸortumik ilisarssinermut, ãmátaordle atatíneĸarpoĸ ’ugperníkut atausiússusigssamut’ Kristusivdlo inersimássusiata angíssusianut nalerĸiússiníkut ingmivtínut nalilînigssamut.
13. suna pivdlugo kristumiutut inersimavdluartúngorsínáungitdlat ’ugperníkut atausiússuseĸ’ángíkunik?
13 „ugpeĸatigîg“sut atausiússuseĸásáput. „ugperissaĸ atauseĸ“ ilíniarsimángíkatdlaramiuk ĸanoĸ iliûsigssanik, suna ajúngitsûssoĸ sunalo ajortûssoĸ, ilaitdlo ilángutdlugit, inuk nangmineĸ isumasiaĸarsimásaoĸ aulajangiússaĸarsimásavdlunilo. (Evfisumiut 4:4, 5) nangminerdle isumasiane aulajangiútuáinarunigit, anersãkut ineriartornigssane sapingajásavâ. Paulusip kristumiut ilagît itsarssuaĸ Korinthime ítut ilãne taivai ’Kristusime merdlertúnguit’ ãmalo ’uviningmut atassut’, ’angnerússivdlutigdlo saĸitsáutardlutigdlo avigsârtitersimangmata’, ilait Paulusimik malingnigtûnerarmata, ilaitdlo Apollosimik. (1 Korintumiut 3:1-4) taimáitumik ’ugperníkut atausiússuseĸarnerup’ kristumiututdlo inersimavdluarnerup ataĸatigîngnigssât nalunángeĸaoĸ. áipâ anguneĸarsínáungilaĸ áipâ anguneĸarsimángigpat. taimáitumik ingmivtínut aperissariaĸarpugut: silamiutut erĸarsariautsit erĸarsariauserisimassaraluavut taimaitísimanerpavut? erĸarsariautsíkut suliatigutdlo Jehovap ínugtai atausiússuseĸarfigísavdlugit pissariaĸássusia pâsinerparput? kristumiutut inersimavdluarnerup ’ugperníkut atausiússuseĸ’ ilagâ píngitsôrneĸarsínáungivigsoĸ. — Evfisumiut 4:2, 3.
14. inersimavdluarneĸ ãma sumut atássuteĸarpa?
14 kristumiutut inersimavdluarneĸ ãmátaoĸ „Kristusip tamákigaisa angíssusiá“nut atássuteĸarpoĸ. tamána ĸanoĸ pâsissariaĸarpa? Paulus nangitdlune oĸarpoĸ angíssusermut tamatumúnga ángútut mêraujungnaermata, mêrĸáme ’malingnit aulatíneĸartarput tamanutdlo erĸârineĸardlutik ajoĸersũmit nalingínarmit anordlersumit, inuit ímeráutarnerinit, ĸoĸagssîssut támartitsissut perĸusersûneránit’. nâgga, kisiáne sagdlusuíssúmik erĸortumik ilisimassaĸarput. Kristusimik asangningníkut agdliartorsimáput, Gûtilo malingniardlugo píssutsit avdlat, sôrdlo ilisimássuseĸ, nâpertuivdluarneĸ, píssaunerdlo, erssersítardlugit. (Evfisumiut 4:13, 14; Juánase 15:12, 13; 1 Korintumiut 1:24, 30; 2:7, 8; ússatit 8:1, 22-31) inugtut nãmagdluínángitsûgavta „Kristusip tamákigaisa angíssusiat“ angusínaunaviángilarput, malingniarsínauvarputdle, táussuma Gûtimik mianeringnigdlune píssusê ineriartortíniardlugit anguniagaĸardluta. (Kulorsamiut 3:9) anguniagkamik tamatumínga anguniainivtíne ilungersornivta inersimássúmut agdliartornerput naligísavâ.
asangningníkut agdliartorta
15. inersimavdluartúngorniat suna sujugdlermik sulíssutigissariaĸarpât?
15 „kristumiutut inersimavdluarnermut“ atássuteĸartut sangmigavtigik, ĸanoĸ anguneĸarsínaunigssâ nalujungnaertariaĸalerparput. sôrdlo takorêrsimagigput, Eprîarinut agdlagkane 6:1-ime agdlagsimassup takutípâ kristumiutut inersimássúmik angussiniarnivtíne aulajangersimassumut túngaviliortariaĸartugut. túngaviliorĸâruvta, inersimássúmut ingerdlaniardluta avdlat ilungersûtigilersínauvavut. túngavigssamut ilaussut ássigĩngitsut ’suliat inũssutáungitsut avdlamik isumatârutigissariaĸarnerat’ sujugdlerpârtarât.
16. „suliat inũssutáungitsut“ sût avdlamik isumatârutigissariaĸarpavut?
16 nalunángilaĸ „suliat inũssutáungitsut“ ilagigait uvíngup ajortilíngorsimassup suliai, kigdlilerneĸángíkunik toĸumik kinguneĸarumârtut. uniorĸutitsinerit sarĸumissut, sôrdlo kángunartuliorneĸ, mingungnartuliorneĸ, inûnerdlungniartarneĸ, gûtipilugsiorneĸ anersâlerinerdlo, ajortuliatut ilisarinasuartarpavut ingalangniardlugitdlo. uvínguvdle suliaisa, tássa „suliat inũssutáungitsut“, ilagáitaoĸ ilâtigut taineĸartartut ’inûp píssusê’ sôrdlo ĸíngarssuineĸ, saĸitsaineĸ, angnerússineĸ, kamatsangneĸ, saĸitsaigajungneĸ, agssuaringningneĸ, ingmíkôrniarneĸ, sínganerdlo. (Galâsiamiut 5:19-21) píssutsit taimáitut iperángíkunigit „inugtârdlo Gûte ássilivdlugo píngortitaĸ [atíngíkuniuk] iluartitdlugo ivdlernartitdlugulo ilumôrníkut“, kristumiutut inersimássut anguniardlugo sujuariarsínaunigssâ ilimanásángilaĸ. — Evfisumiut 4:22-24.
17. ãma sût taineĸarsínáupat „suliat inũssutáungitsut“? navsuiaruk.
17 uvíngup suliaisa saniatigut, „suliat inũssutáungitsut“ iperartariaĸagkavta ilagáitaoĸ suliat anguniagkatdlo anersãkut inũssutáungitsut, asulĩnaussut kingunigssaĸángitsutdlo. sôrdlo aningaussarsiorumatuneĸ, pisôrssuángorasuarniardlune pilerssârusiorneĸ. tássausínáuput angussaĸarusugpatdlârdlune ilíniartitaorĸingniarnermik pivfigssamik atuinartumik pilerssâruteĸarnerit, imalũnît inôĸatigîngnermut túngassunik iluarsainiaĸatigîngnut, erĸigsisitsiniaĸatigîngnut taimaeĸatáinutdlo peĸataorusungneĸ. tamáko tamarmik nersornartutut isumaĸarfigineĸarsínaugaluarput, kisiánile ’suliáuput inũssutáungitsut’ suleĸataussut anersãkut toĸunigssãnik kinguneĸaratarsínaugamik. kristumiutut inersimássúmik angussiniartut tamarmik „suliat inũssutáungitsut“ taimáitut avdlamik isumatârutigissariaĸarpait iperartariaĸardlugitdlo Jesusivdlo oĸaorĸigsârutâ una maligtariaĸardlugo: „Gûtivdle nâlagauvfia iluarnerdlo [Gûtip] pia piniarĸârtuáinarsigik.“ — Matîuse 6:33, NW.
18, 19. (a) Evfisumiunut agdlagkane 4:15-ime agdlagsimangmat ’ilumôrtumik oĸalúsassugut’, ĸanoĸ pâsissariaĸarpa? (b) tamána kristumiutut inersimássúmut ĸanoĸ atássuteĸarpa?
18 túngaviliorêrune, tauva? Paulus imáitumik sujúnersûteĸarpoĸ: „ilumôrtumigdle oĸalugdluta, asangningníkut tamatigut agdliartorta niaĸorissamut, tamássa Kristusimut.“ (Evfisumiut 4:15, NW) sujugdlermik malugârput Paulusip erĸartorâ ’ilumôrtumik oĸalugtariaĸarnigssaĸ’. taimatut oĸarnermigut oĸalungnerínaĸ píngilâ; erĸortumik isumaĸarpoĸ „sagdlusuíssúmik aulajangiússineĸ“. (Kingdom Interlinear) nugtigkane avdlane imáitumik nugtigaussarpoĸ: „sagdlusuíssut maligdlugo inûneĸ;“ „asangnigtumik sagdlusuíssúmik malingnigtuáinarneĸ — ilumôrtumik oĸalugtardlune, ilumôrtumik suliaĸardlune, ilumôrtumik inûvdlune.“ — Evfisumiut 4:15, Jerusalem-bîbile; The Living Bible.
19 taimáitumik kristumiutut inersimássut anguniásaguvtigo inôriautsivtigut, oĸalugtautsivtigut, ilioriautsivtigut inungnutdlo avdlanut pissautsivtigut ilumũssuseĸ aulajangiútariaĸarparput. tássa imáipoĸ: uvdluínarne suliagssavtíne bîbilimik ilisimassavut atorniásavavut ilaginiardlugo „misigissaĸartarnermit sungiusagaussumik sianíssusigdlit ajúngitsordlo ajortordlo ingmíkũssusîsigut ilisarisínauvdlugit“. (Eprîarit 5:14) ivdlit taimailiortarpit? aulajangigagssaĸartarângavit bîbilime najorĸutagssat najorĸutariniardlugit erĸarsartarpit? kristumiutut inersimavdluartúngorniamut angorĸusâgaĸ akueriviuk, oĸautsíkut suliatigutdlo sagdlusuíssúmik aulajangiússivdlutit, imalũnît anersãkut mêráinaujuarumaneruvit, akissugssauvfeĸarnatitdlo nangmineĸ kigsautigissatit piumassatitdlo piniáinarumavdlugit?
20. inersimássúmut agdliartúsaguvta, asangningneĸ ĸanoĸ pingâruteĸartigâ?
20 Paulus oĸarpoĸ: „asangningníkut tamatigut agdliartorta niaĸorissamut, tamássa Kristusimut.“ (Evfisumiut 4:15, NW) tássane Paulusip oĸalûserissap pingârtortâ, tássa inûp ĸanoĸ iliornerminut píssutâ, tíkuarpâ. Korintumiunut agdlagkamine sujugdlerne 13:1-3-me Paulusip takutípâ suliat iluaĸutaugaluartut iluaĸutigssaerutdluínartartut inûp erĸortumik píssuseĸarane nãmagsigaluarpagit. taimáitumik ĸanordlũnît iliornivtínut suna píssutiginerigput misigssortariaĸartarparput. taimailiorniáinarnerpugut avdlanut takorĸuvdluta, avdlanut malugitíniarnermik píssuteĸardluta, isumaĸalersíniardlugit inersimavdluartûvdluta? imalũnît Gûtimik asangningnermit tugdlivtínigdlo asangningnermit taimailiorniarnerpugut? asangningneĸ píssutigiguvtigo ’tamatigut agdliartú’saugut, kristumiúngordluta patajaitsut, tatiginartut inersimavdluartutdlo, ’niaĸorissaĸ, tamássa Kristus’ akuerivdluínardlugo. (wD 1/5 85)
uko navsuiarsínauvigit?
□ „mêrarpalugtut“ sût ilagait, sunigdlo navianartoĸarpat?
□ ’ugperníkut atausiússuseĸ’ ãma „Kristusip tamákigaisa angíssusiat“ ĸanoĸ ilivdlutik inersimássúmut atássuteĸarpat?
□ kristumiutut inersimássúmut agdliartúsaguvta „suliat inũssutáungitsut“ sut iperartariaĸásavavut?
□ ĸanoĸ iliordluta ’asangningníkut tamatigut agdliartorsínauvugut niaĸorissamut, tamássa Kristusimut’?
[Atuaqqissaarnermi apeqqutit]
[Qupp. 9-mi issuagaq]
ukiune kingugdlerne arfiniliussune
— nalunaiaissúngortut nutât 827.144-t kuisíput
— ilagît nutât 5000-it sivneĸartut pilersíneĸarput
— mãnákut oĸalũssissartut pingasûgângata ilât atauseĸ ukiut táukua ingerdlaneráne kuisípoĸ
[Qupp. 11-mi assiliartaq]
uvdlumíkut inugpagssuit nunap pînik piniáinarnatik oĸalũssissarneĸ piumaneruvât