Jesusip inuunera ajoqersuineralu

Qilammit tusarliussat

BIBELI tamarmi oqaatigineqarsinnaavoq qilammit tusarliussaasoq, Ataatattap qilammiusup taassuminnga tunisimavaatigut ilinniagaqarniassagatta. Ukiulli 2000-ingajaat matuma siornagut inngilit ilaata ’Guutip saaniittartup’ tusarliussat marluk pingaaruteqartut nalunaarutigai. Inngili Gabrielimik ateqarpoq. Pisimasut nunarsualiarsimanernut pingaaruteqartorujussuit taakku marluusut misissoriartigik.

Tamanna ukioq 3 ukiunik naatsorsuisarnitta aallartinnerata siornagut pisimavoq. Judæap qatsissortaani Jerusalemimit ungasinngitsumiittumi Jehovamut palasiusoq Zakariasimik atilik najugaqarpoq. Nuliilu Elisabet utoqqaapput meeraqanngillallu. Zakarias Guutip naalaffiani Jerusalemimiittumi palasitut sulinissaminut tullinnguuppoq. Tassaniitilluguli tassanngaannaq inngilip Gabrielip tipigissaatilliiffiup talerpiata-tungaaniit saqqummerfigaa.

Zakarias annilaarpoq. Gabrielilli eqqissisarpaa, oqarlunilu: ’Guutip qinnutitit tusarpai. Elisabet ernertaarumaarpoq Johannesimillu atsissavat. Inuit Jehovamut saatsikkumaarpai.’ Zakariasilli tamanna upperisinnaanngilaa! Namminermi Elisabetilu utoqqaaqigamik meerartaarnissartik qularilluinnarpaa. Taamaattumik Gabriel oqarpoq: ’Upperinnginnamma oqajuitsunngorlutit oqassaarumaarputit ulloq tamatuma piffissaa nalliutserlugu.’

Taamaannerani inuit silataaniittut Zakariasip naalaffiup iluaniinnera sivisugilerlugu tupigusulerput. Kiisamili animmat oqalussinnaananilu paasissaasunik ussersorfigimmatik, paasivaat tupinnartumik misigisaqarsimasoq.

Zakariasip naalaffimmi kiffartuuteqarnera naammassimmat angerlarpoq. Erininarsinngitsoq Elisabet naartulerpoq!  Naartunermini qaammatit taakku siulliit tallimat angerlarsimaannarluni inunnit allanit avinngarussimavoq.

Takuuk! Gabriel saqqummeqqippoq. Massakkulli kimut saqqummeqqippa? Niviarsiamut inuusuttumut ueqanngitsumut saqqummerpoq. Arnaq Mariamik ateqarpoq, illoqarfimmi Nazaretimi najugaqarluni. Inngili sumik tusarliussassaqarpa? Gabriel ima oqarpoq: ’Naartulerumaarputit ernertaarumaarlutillu, Jesusimillu atsissavat,’ Gabriel oqarpoq. ’Kunngersuanngorumaarpoq, naalagaaffialu soraarfeqassanngilaq.’

Qularissanngilarput Gabrielip tusarliussat taakku nalunaarutigissallugit pingaarutissimassaqigai. Johannes Jesusilu pillugit atuagassiami uani saqqummersussani tulliuttuni atuaqqissaagut, kiisalu nalunaarutit taakku qilammeersut sooq taama pingaaruteqartiginersut paasissallutigik. 2 Timûtiuse 3:16; Lukas 1:5-33.

◆ Qilammit tusarliussat marluk pingaaruteqartuusut suut nalunaarutigineqarpat?

◆ Tusarliussat taakku kikkut tusarpaat, kiallu nalunaarutigai?

◆ Soorliuna tusarliussat taamak upperiuminaatsigisut? (wD 1/4 85)