Gûte saĸeĸatigisínauvat

„MARDLUK isumaĸatigêrêrtínatik ingerdlaĸatigîgsínáupat?“ pruvfîte Amos aperivoĸ. (Aamorse 3:3, NW) Gûtip saĸeĸatiginigssânut ’isumaĸatigĩssuteĸarneĸ’ ajornángila?

âp! tássame Gûtip nangmineĸ sujugdliuvdlune ĸaerĸuvâtigut, ikíngutigerĸuvdlune. píngitsailineĸ ajorpâtigut. âp, kisiánile pitsauvdluínartumik píssuseĸarnermigut ingminut ĸanigdlisípâtigut. píngortitarssuarmilo Gûtip ajúngisârneranut ugpernarsauterpagssuaĸángínerdlune? „takugssáungíssusiame píssaunera ítuínartoĸ Gûtiússusialo silarssûp píngortitaorĸârneranit malungnar[put] suliainit pâsinardlutik.“ (Rûmamiut 1:20) sôrdlútaoĸ apustile Paulusip navsuiarâ apustilit suliáinik agdlagkane 14:17-ime: „[Gûte] ingminik nalunaiautigíngitsũngíkaluar[poĸ], ajúngitsumik pissarame ĸilangmit tunissardluse sialungnik ukiunigdlo naggorivfiussunik ũmatisilo ĸârsitdlartítardlugit tipaitsugtítardlugitdlo.“

taimáitumik angutit Enokitut Noatutdlo ítut kajumigdlutik akuerssíput Gûtip ikíngutigiumangmatik. pâsivât ’Gûtimut pigititagssaussut nâlangnaut atarĸinautdlo’. (sarĸúmersitat 4:11) tássa Gûtip ĸaerĸussineranut akuerssârput ugperdlutigdlo táussumúnga ornigutdlutik. „ugperssuseĸarnane Gûtimut iluaritíneĸ ajornaĸaoĸ, Gûtimut ornigútup ugperissagssaringmago tássaussoĸ, ujardlersinilo akilerumârai,“ Paulus agdlagpoĸ. (Eprîarit 11:6) Gûtimut ĸanigtumik píssuseĸarniaruvit, ivdlítaoĸ táuna ’isumaĸatigĩssuteĸarfigisínáusavat’. sôrdlo tugsiausiortoĸ oĸarsimassoĸ: „Pilluarpoq illit najortigiumallugu qinikkat, ineqartillugulu silarliutinni.“ — Tussiaat 65:5.

Gûtip nãmagserĸussai nãmagsiguvtigik aitsât táuna ikíngutigilersínaugavtigo, oĸausia bîbile atuarĸigsârtariaĸarparput, „Gûtip perĸussâ ajúngitsoĸ iluarissagssardlo nãmagdluínartordlo“ pâsiniardlugo. (Rûmamiut 12:2) „ajoĸersorneĸángíkuma ĸanoĸ ilivdlunga [Esajasip sujuligtûtâne agdlagsimassut] pâsísaváka?“ bîbilip pilerfiata nalâne Gûtimik ilumôrdlune ujardlersoĸ aperivoĸ. ímaĸa ivdlítaoĸ taimatut misigivutit. Gûtivdle isumagâ ajoĸersugkap Filipimik atigdlup angut táuna atássuteĸarfigísagâ sujuligtũmigdlo navsuiautdlugo. (apustilit suliait 8:30-35) uvdlumíkut ilumôrtumik ujardlersine Gûtip  soĸutigíngínerunerpai? nâgga! atuagagssiaĸ bîbililerssârutaussoĸ una atualeragko malungnarpoĸ Gûtip soĸutigigâtit! atuagagssiamik táussumínga ilingnut túniússissut ikiortigíkit Gûte ilisarineruniardlugo.

takugssáungitsoĸ issigeriaruk

Gûte ilisimassaĸarfiginerujartortitdlugo piviunerussutut isumaĸarfigiartúsavat. pâsiartorasuásavat píssaunerínáungitsoĸ, nukigssaĸarfĩnáungitsoĸ ateĸángitsuínáungitsoĸ, tássaussordle kináussusilik atilik. bîbilime tugsiaut 83:18-ime (NW) agdlagsimavoĸ: „pâserĸuvdlugo ivdlit, Jehovamik atilik, ivdlit kisivit ĸutsingneruvsârtutit nunarssuarme tamarme.“ (kalâtdlisũngortitame verse 19) inugtut Jehova píssuseĸarpoĸ, nuánarissaĸarpoĸ nuánaríngisaĸardlunilo — misigíssuseĸardlunilo! — takúkit Môrsasip agdlagaisa áipait 34:6, 7; Tussiaat 78:40.

ãmátaoĸ Gûte nâpertuivdluartunik maligagssaĸartitsivoĸ. sôrdlo ússatit 3:32-me agdlagsimassoĸ: „perĸuserdlugtuliortoĸ Jehovap maujugâ, perĸusersuitsutdle ángigissaĸarfigíngilai.“ (NW) „perĸusersuitsut“ Josef ilagât. bîbilime oĸalugtuarineĸarpoĸ ĸanoĸ Josefip nâlagâta ægyptenimiûssup Potifarip nuliata Josef kimigîserfigeĸátârâ kángunartuliorfigerĸuvdlune. itigartítarpâle oĸardlune: „ĸanoĸ taima ajortigissumik iliorsínauvunga Gûtimut ajortulivdlunga?“ — 1 Môrsase 39:9, NW.

Josefip Jehova piviussutut issigâ. Josefip Jehova ajúngitsumik mianerâ nangminêrdlunilo najũtutut issigalugo. tugsiautine erĸartorneĸartutut misigisimavoĸ: „[Jehova] takkunniitittuaannarpara, taanna sanileritillugu patajalernavianngilanga.“ (Tussiaat 16:8; ãma takûk ússatit 3:5, 6.) Moses tássunga ássingussumik ugpíssuseĸarpoĸ. táussuma ’takugssáungitsoĸ issigalugulusôĸ ugperssutse iperarnavêrsârpâ’. — Eprîarit 11:27.

taimáitumik Gûte saĸeĸatigísavdlugo ilisarssiniarneĸ nãmángilaĸ. Gûte saĸeĸatigalugo tássauvoĸ Gûtip piumassânut sujunertarissânutdlo sarĸúmersitaussunut nalerĸútumik inôriauseĸardlune. tássauvordlo sôrdlo apustile Paulusip oĸautigigâ: „taimáitumik nerigângavsilũnît imerângavsilũnît sugângavsilũnît Gûte nâlangnarserĸuvdlugo pissartáinaritse.“ — 1 Korintumiut 10:31.

Gûtip saĸeĸatiginerane iluaĸutaussut

pisungneĸ pivdlugo Sussman Goodelo atuagkiamingne The Magic of Walking-ime ima agdlagput: „pisungníkut nukît timivdlo nukinge ilevĸârnangârtumik atorneĸartarput. pisungneĸ tupingnartumik ássigĩngitsorpagssuarnik iluaĸutigssartaĸarame, nakorsanit perĸingnigssamigdlo ingmíkut pâsisimassalingnit nakorsaissarnertut akuerineĸarpoĸ.“ iluaĸutigssartaisa oĸautigineĸarêrsut saniatigut mákunúnga ãma iluaĸutauvoĸ: oĸimaitdlivatdlârnavêrsârnermut, sinigdluartarnermut, nukingnik ĸasúkarsimatitsinermut kîsalo ũmatilungnavêrsârnermut. pisungneĸ timimut taima iluaĸutautigigpat, ilimagisínauvarput Gûtip saĸeĸatiginerata amerdlanerungârtunik iluaĸutigssartaĸarnigssâ.

misigíssutsíkut kivdlingnangârtumik misigissaĸarnigssarput ilimagísángilarput. ĸinussarníkutdle ugperdlunilo suliaĸartarníkut „Gûtimut patdligú“kiartortitdluta, ’erĸigsineĸ Gûtip pia sianinernit tamanit angnerungârtoĸ’ misigisínãngulísavarput. (Jâko 4:8; Filípimiut 4:6, 7) ássersûtigisínauvarput arnaĸ isumatsangârsimanine píssutigalugo imertaĸissoĸ ikiarôrnartutoĸissordlo. kristumiûneraĸatigîngne ingmíkut ugperissarsiortut ilait ardlagdlit misiligkaluarpai. tauvale Jehovap nalunaiaissue ilagalugit bîbile atuarĸigsârtalerpâ. oĸarpoĸ: „ôĸátârutigisimassama ilaitdlũnît isumatsangârsimanivnut iluaĸutáungitdlat, Jehovavdle sujunertainik ilisarssilerama, inûnera piviussumik sujunertaĸalerpoĸ.“ âp, Gûte saĸeĸatigileruníko ingerdlauseĸalísáput ĸularnángitsumik anersãkut misigíssutsíkutdlo iluaĸutigssartaĸartumik. — ãma takûk Isaia 30:21.

iluaĸutigssartâ avdla arnamit silatûmit Abigajilimik atilingmit ersserĸigsarneĸarpoĸ. táuna kúnge Davidimut oĸarsimavoĸ: „inugdlo makigpat malerssorumavdlutit inũssutsitdlo ĸinugiumavdlugo, nâlagkama tarnâ ĸilerssũneĸarsimásavoĸ inûssunut ĸilertalianut [Jehovame] Gûtingne.“ tamána erĸarsautigeriaruk! David akerĸaminit sujôrasârneĸarângat inûnera Gûtip sernigssordlugo pârissarpâ, erdlingnartutut perĸigsârtumik ímússaussutut pârissaussutut. tamána ima pâsissariaĸángíkaluarpoĸ Gûtip kivfai tamatigut timíkut igdlersorneĸartásassut; ĸularutigssáungitsumigdle Gûtip saĸeĸatigissane sernigssortuásavai  soĸutigissaitdlo nâgssáungíssutsimut túngassut igdlersúsavdlugit! — 1 Sâmuale 25:29; ãma takûk tugsiaut 116:15, NW.

tássale imáingilaĸ kristumiut ajornartorsiutinit inuit nâpítagáinit naláuneĸarneĸ ajúsassut, sôrdlulusôĸ kristumiut naláuneĸatsailiordlutik inûsínáusassut. Salomon oĸarsimavoĸ ’pivfigssaĸ nalautsorníkutdlo pissut’ inungnut tamanut agtûmássuteĸartut. (akugdlîssup oĸausê 9:11) ássersûtitut taineĸarsínauvoĸ apustile Paulus ’kakitdlarnamik uviningmine kápúsimassoĸartoĸ’, tássa ímaĸa timíkut sángĩssuteĸarneranik. (2 Korintumiut 12:7, NW; Galâsiamiut 4:13-15) suleĸatâ Timoteus ãma „ajukulugtar“poĸ. (1 Timûtiuse 5:23) uvdlumíkútaoĸ kristumiut ilait náparsimassarput ilâtigutdlo nikatdlortardlutik isumatsagtardlutigdlo.

ãmátaoĸ Jehovap Gûtip ĸângiútartunik uvavtínik sukuluiaisínaussunik misilingneĸartítarpâtigut, sôrdlo pisimassoĸ Josef parnaerúneĸartíkamiuk. (Tussiaat 105:17-19) ilait ímaĸa sule inûsugtûvdlutik angutauserfigineĸardlutik malerssortimingnit toĸúneĸásáput, sôrdlo Stefanus pineĸarsimassoĸ. (apustilit suliait 7:57-60) Gûtivdle ikíngutai isumaĸángisáinásáput ĸimagauvdlutik. (ãma takûk Korintumiunut agdlagkat áipait 4:8, 9.) „Gûtime iluaitsũngíname sulinerse asangningnersilo . . . puiúsángilai.“ (Eprîarit 6:10) sôrdlo kristumio arnaĸ, ukiut ardlagdlit nâpertuivdluángitsumik parnaerússaunermine nikorfatitausimassoĸ, oĸarsimassoĸ: „ĸularíngivigpara Jehovamik kivfartũssinermíkut autdlússivdluardlutik aulajangersut pakatsisíneĸásángitsut. ũmativkut ilũngardlunga Jehova tatigâra neriorssuerĸigsârneralo ugperalugo: ’iperásángilavkit ĸimásanatitdlo.’“ — Eprîarit 13:5.

ilungersornerme ĸasusuissârnigssamut ikiûtigssaĸ

ilumôrtuáinarniarneĸ ajornaitsũngilaĸ. Satanip íngilipiluisalo píssaunigdlit tamaviârdlutik sulíssutigât nakutíniardluta. (Evfisumiut 6:12) ãmátaoĸ píssutsit ârĸigssũssaunerat mãnákut atũtoĸ kajungernartuilo pileritsagtitsissûssut akiortariaĸarput. ukiune untritilingne sujugdlerne kristumio Demasimik atilik támalerpoĸ „píssutsit ârĸigssũssaunerat mãnákut atũtoĸ kajungerileramiuk“. (2 Timûtiuse 4:10, NW) naggatâtigut taineĸarsínauvoĸ uvinigput  ajortilik ajortuliorajugtûssoĸ. (Rûmamiut 7:21-23) ’Gûte saĸeĸatigi’uáinásaguvtigo súnînerit tamáko aulajaitsumik akiorniartuáinartariaĸarpavut.

Gûtile pingasunik súniuteĸardluartunik sákugssaĸartitsivoĸ ikiûtigisínaussavtínik: (1) oĸautsine, bîbile, uvavtínut pissariaĸartunik unersũssuteĸarfiussoĸ. (Tussiaat 119:105) (2) peĸatigîgsortane takugssaussut, tássa kristumiut ilagîgsait, anersãkut inũssutigssanik Gûtimêrsunik pigssaĸartitsissartut. (Matîuse 24:45-47; Evfisumiut 4:11-16) Vagttårnip peĸatigîgfia, atuagagssiamik ûmínga naĸiterisitsissartoĸ, Gûtip peĸatigîgsortainut táukunúnga ĸanigtumik atássuteĸarpoĸ. (3) anersâva iluartoĸ ĸinussarníkut, bîbilimik atuarĸigsârtarníkut ínugtainigdlo ilagissaĸartarníkut pigssarsiarissarput. pigssaĸartitaisa tamákua ilãnigdlũnît soĸutigingníngínigssaĸ kúkuneruvdluínásagaluarpoĸ. pruvfîtip Mikap oĸaorĸigsârpâtigut ’Gûte makitanavêrsârdluta saĸeĸatigerĸuvdlugo’. (Migga 6:8) tássa imáipoĸ pisínaunivut akimorniarnagit pâsivdlugulo Gûtimut ataguvta aitsât angussaĸardluarsínáusavdluta.

Gûte saĸeĸatigalugo ássersũneĸarsínauvoĸ mêrángûp atâtane anorerssuartume ingerdlaĸatigigâ. agssâ iperaraluaruniuk imalũnît aulajangerune nangminêrdlune angerdlarniardlune, ernĩnaĸ támásagaluarpoĸ. atâtanile ĸanigtuáinaruniuk isumangnarane tatigingnigdlunilo ingerdlaĸatigisínauvâ. uvagútaoĸ Gûtip aĸutsineranut oĸausiatigut peĸatigîgsortaisigutdlo erssersíneĸartartumut nâlagtariaĸarpugut. avdlanut atássuteĸarumángitsut támardluínartarput. kisiánile ’Gûte makitanavêrsârdluta saĸeĸatigiguvtigo’ anorerssuarme Harmagedonime piumârtugssame ánagtíneĸásaugut píssutsitdlo ârĸigssũssaunigssãne nutâme neriorssûtigissame toĸussoĸásaerfiussugssame ániauteĸarungnaerfiussugssamilo inûtíneĸásavdluta. (sarĸúmersitat 16:16; 21:3, 4; 2 Pîtruse 3:13) taimáitumik saĸeĸatigerĸuvdlune Gûtip asangnigtumik ĸaerĸussinera ilagsiniaruk! (wD 1/9 85)

[Qupp. 6-mi assiliartaq]

Gûtip oĸausia, anersâva peĸatigîgsortailo ikiortigisínauvavut Gûte ilumôrtumik saĸeĸatigiuarniardlugo