Gûtimik mianeringningneĸ anguniardlugo ingminut sungiusarit

„ingminutdle sungiusarniarit Gûtimik mianeringningneĸ anguniardlugo.“ — 1 TIMÛTIUSE 4:7, NW.

1. suna píssutigalugo arpatdlarĸigsut ilât ajugáungitsôrpa?

NIVIARSIAK’ táuna atautsimôĸatigissaminit súkaniutdlutik arpagtartunit ingerdlatame ingmíkut ítume píkoringnerssautíneĸarpoĸ. ajugaoĸátârame nunarĸatimine píkoringnerpât ilagilersimavai. taimáitumik ĸularineĸángilaĸ píssartángorniúnerme pingârtume tássane táuna ajugáusassoĸ. kisiánile sungiusaissuata, atautsimôĸatigissaisa nangminerdlo pakatsíssutigât unangmíssutigalugo timerssortalernerminîtdle aitsât taima ajortigissumik angussaĸarame. suna píssutauva? „sungiusarnivne ĸasúkarama pissagssardlo sungiusardlugo tamaviârutigiungnaersimavdlugo,“ perĸusîleĸalune misiutigíngilâ. „sungiusaissup píngitsailiniaraluarpânga ĸasujaitdlisarnerorĸuvdlunga; sujôrasârtarpânga, uvangale tusarumángilanga.“ sungiusarnine sumigínarsimavâ, tamánalo píssutigínguatsiardlugo anguniagarigaluane píngitsôrpâ.

2. kristumiut tamarmik ĸanoĸ sungiusartariaĸarpat, sunalo pivdlugo tamarmik ĸanoĸ iliortariaĸarnigssartik pâserusúsavât?

² ivdlit kristumiûguvit, pingârtumigdlo inûsugtûguvit, pissagssamut pingârtumik sungiusartariaĸarputit. „[ingminut] sungiusarniarit Gûtimik mianeringningneĸ anguniardlugo.“ (1 Timûtiuse 4:7, NW) grîkerit oĸausiat kalâtdlisũngortoĸ ’sungiusarpoĸ’ (gymnaʹzo) atorneĸarângat sungiusarnerit ilungersornartut ánernartutdlo timerssortartut timerssortarfingme sungiusartagait pineĸartarput. Gûtimik mianeringningneĸ akigssartâlo pivdlugit apustile Paulus nangitdlune agdlagpoĸ: „tamáname sujunertaralugo erdloĸissarpugut ũmârigsumigdlo tamaviârdluta.“ (1 Timûtiuse 4:10, NW) píssuseĸ píngitsôrsínáungisarput tamána iliûseĸarata angusínáungilarput; Gûtimik mianeringnigtunik angajorĸâĸaraluaruvta tamána kingornússarinaviángilarput. inuk nangmineĸ ĸanoĸ iliortariaĸarpa? kristumiut tamarmik, ĸavsinik ukioĸaraluarunigdlũnît, tamána pâsissariaĸarpât.

Gûtimut ajúngitsumik atássuteĸarniarneĸ

3. (a) suna pivdlugo nangminêrdlune atuarĸigsârtarneĸ taima pissariaĸartigâ? (b) Gûtip píssusê sût ivdlit kajungernartípigit?

³ Gûtimik mianeringningneĸ ilâtigut tássaungmat Jehovap píssusînik ũmatíkut pingârtitsineĸ, píssusivê pâsissariaĸarpatit. Jehovap bîbilime tamatumínga nalujungnaersípâtigut. ivdlitdle nangmineĸ bîbile atuagkiatdlo bîbililerssârutaussut perĸigsârtumik atuarĸigsârtariaĸartarpatit, perorsarĸuvdlutit „oĸautsitigut ugpernerup ajoĸersûtauvdluartuvdlo maleruagkavit pîsigut“. (1 Timûtiuse 4:6) tássûna Jehovap alutornássusia ilisariniarsínáusavat. — Tussiaat 27:4.

4. misigisimassat sût takutípât nangminêrdlune atuarĸigsârtarnerup pissariaĸássusia, aperĸutitdlo sût erĸarsautigerĸigsârtariaĸarpigit?

⁴ „Jehova pivdlugo ilisarssiartordlune táussumúnga ĸaningnerujartuínardlune misiginarpoĸ,“ pionere (avdlamik atorfeĸarane oĸalũssissartoĸ)  22-nik ukiulik oĸarsimavoĸ. „sujuligtûtinik atuaissarângama ĸanordlo erĸũsimanere pâsivdlugit, nersungârtarpara. nangminêrdlunga atuarĸigsârtarnera ikiûtigâra.“ 16-inik ukiulik sualugtumik isumatsangârsimassoĸ ilángússat nangeĸátârtut „Unge spørger“ (inûsugtut aperíput) atuagagssiame Vågn op!-ime sarĸúmersartut ilât erĸartordlugo ima agdlagpoĸ: „neriûtaerutínguatdlartunga ilángússaĸ táuna tákúpoĸ. ĸĩmatsangârnermit atuarungnaersínáungilara! atuaravko Jehovamut ĸaningnerungârtumik píssuseĸarnera misigilerpara, pâsitípângalo Jehova misigingneĸataussoĸ isumagssuingârtordlo. mãna sût tamarmik ingerdlavdluarput.“ atuagagssiautivut sarĸúmersut tamavîsa nâvigdlugit atuartarpigit? pivfigssaĸ nãmagtoĸ atortarpiuk isúmat ũmatitdlo nangminêrdlutit bîbilimik atuarĸigsârtarnigkut ineriartortíniardlugit, nauk ingminut nâlagkertariaĸaraluardlutit? nangmineĸ misigssuerĸigsârtaruvit pâsiniaerĸigsârtardlutitdlo sagdlusuíssúmik ilisimassaĸaravit angnerussumik ĸularíngínerúsavat. ilisimássuseĸ ũmatingnut tugpat, ĸularutigssáungingajagtumik kajumíssutigilísagit, ’Gûtimik mianeringningnermik ajoĸersûtaugamik’. — 1 Timûtiuse 6:3; Rûmamiut 12:2.

5, 6. ĸínutit ĸanoĸ ítut Gûtimut ĸanigdlisísavãtit? navsuiaruk.

⁵ Gûtimut ajúngitsumik atássuteĸásaguvta ãmátaoĸ ilumôrtumik ĸínutigissatdlo ingmíkôrtitârdlugit ĸinussariaĸartarpugut. taimatut ĸínuteĸartaruvit Jehovamut nangminêrdlutit ikíngutauneĸ ineriartortísínáusavat. kúkussarângavit Daviditut Jehova ĸínuvigisínaussariaĸarpat: „Eqqaanaveerigit inuusunninni ajortuliakka unioqqutitsisarnikkalu.“ (Tussiaat 25:7, 11) nalúsángilat perĸigsimiguvit avdlamigdlo isumatâruvit táussuma isumákêrfigísagâtit. sungiusarniarit ĸinussarângavit nãmagtumik pivfigssaĸarfiginiardlugo, ũmámiugissatit Jehovamut aniatíniardlugit. niviarsiaĸ Gûtimik mianeringnigtûssunit angajorĸâminit perorsagaussoĸ orĸardlugtûnine píssutigalugo erĸortumik ugperissarsiornermut peĸatauniángíkaluarpoĸ. tauva 22-nik ukiulik táuna oĸarpoĸ: „tauva únuit ilãne Jehova ilungersordlunga ĸínuvigâra: ’ikiúnga ilingnik kivfartũssiniarnigssamik kigsauteĸarĸuvdlunga, ilagîngne utorĸaunertat angajorĸâmalo uvavnut taimailiorĸussinerat píssutigĩnarnago.’“ inûnera angnertûmik avdlángulerpoĸ! nauk ivtoĸeraluardlune oĸalũssissarnermut tamatigut peĸataulerpoĸ. nuánârdlune oĸarpoĸ: „mãna Jehova angnerungârtumik tatigilersimavara, ikiũtuáinarnera nalúngínavko.“ — Tussiaat 62:8.

⁶ kristumiup inûsugtup ĸinussarnermine avdlamik atorfeĸarane oĸalũssissartúngorniarnine ingmíkut ĸínutigissarpâ. ĸínutine tusarneĸarmata pilerpoĸ: „ĸularíngilara Jehova ilumut piussoĸ isumagssorâtigutdlo! tamatuma  píngíkatdlarnerane isumaĸaraluarpunga Jehovamut píssuseĸardlunga, mãnákutdle ikíngutitut íneruvoĸ — ikíngutingnârâra.“ Jehova ĸínutivut akivdlugit takujuanartumik pissoĸartitsissaríngíkaluarpoĸ, ilungersoruvitdle ĸínutigissatitdlo nâpertordlugit iliortardlutit, táussuma asangnigtumik sujulerssuinera misigiumârpat. — Tussiaat 145:18.

tarnigkut ilerasûteĸarnavêrsârit

7. tarnip nalúngíssusia sunauva, sunalo pivdlugo ilerasûteĸarnavêrsârtariaĸarpit?

⁷ Paulusip Timoteus kajumigsâramiuk ’tarnimigut ilerasûteĸarĸunago’, apustilip nalúngilâ aulajangerdlune tamaviârtuartariaĸásassoĸ. (1 Timûtiuse 1:19) sôĸ? nalúngeĸatigingníssuseĸ pisínáussusiuvoĸ Gûtip inungmut íkússâ; ingminut misilîsínáussusiuvoĸ ĸanordlo iliorsimanernik ĸanordlo iliûseriniagkanik nalilîsínáussusiuvdlune. ilâtigut ’pasigdler’sarpâtigut, iliûserisimassarput ajornerardlugo, ilâtigutdlo ’igdlersor’tardluta, ĸanoĸ iliornerput ajúngínerardlugo. (Rûmamiut 2:15) malugssaríngíkunile nalilînerdliortásaoĸ. inuit tarnimíkut malugssaríngitsumik nalúngíssuseĸartut nauk ûmassutut nãkigtaitsutut ímaĸa ilioraluartut, nalúngeĸatigingníssusîsa nipaisa erĸartûtíngitsôrpait. „Gûte ilisaralugo oĸartarput“ agdlât, „suliamíkutdle miserratigissarpât“. ivdlit ĸanoĸ iliorsínauvit malugssaríngitsumik nalúngeĸatigingníssuseĸalernavêrsârdlutit? — Títuse 1:10-16.

8. ukiune untritilingne sujugdlerne inuit ilaisa ĸanoĸ iliordlutik ilerasûteĸángíneĸ ’isumákêrpât’?

⁸ Paulusip Timoteus oĸarfigisimavâ kristumiut ilaisa tarnimíkut ilerasûteĸángíneĸ ’isumákêr’simagât „oĸalugtuapalât“ ’oĸauserujuitdlo iluaitdlinartut’ soĸutigigamíkik. (1 Timûtiuse 1:4, 19, 20; 6:20; 2 Timûtiuse 2:16-18) tamáko nâlaoramíkik ugpernikitdlíput, taimáitumigdlo ugperníkut umîardlutik. Paulusivdle takutípâ tunússissut ajoĸersûtaisa saniatigut avdlátaoĸ „ajoĸersût perĸigsinartoĸ akerartor“ât. Timûtiusimut agdlagkamine sujugdlerne inuarneĸ, kángunartuliorneĸ angutitdlo anguteĸatimingnik arnatdlo arnaĸatimingnik atoĸateĸartarnerat taimaeĸataitdlo taivai.

9, 10. (a) áipagssiarît kristumiûssut tarnimik nalúngíssusiata malugssaríssusianik átássíngitsôrtut ĸanoĸ anusíngorsautigisínauvavut? (b) ĸanoĸ iliorsínauvugut tarnivta nalúngíssusia malugssaríssusêruterĸunago?

⁹ uvdlumíkut angutauserneĸ kinguâgssiûtitigutdlo kángunartuliorneĸ filmitigut TV-kôrusiatigutdlo naĸitigkatigutdlo tamatigut erssersíneĸartarput. tamáko isumaliutigissaruvtigik nalúngeĸatigingníssuserput malugssaríssusêrúkiartuâratarsínauvoĸ. áipagssiarît inûsugtut kristumiûssut uvdlup kativfingmik sujunitsiánguagut kángunartuliortut tamána misigât. „TV-kut issigingnârtagkavut píssutautípáka,“ arnaĸ inûsugtoĸ misiutiginago oĸarpoĸ. „inuit agtûarujôrtut issigingnârtuáinaravtigik, taimailiorneĸ ajortutut issigiungnaeriartuârparput. issigingnârtarnermit sungiúparput. tauva nangmineĸ taimailiortalerpugut. ajússusia erĸarsautiginerusimásagaluarpara!“ malugitínagule ilerasûteĸalerpoĸ. angut inûsugtoĸ nangitdlune oĸarpoĸ: „tamatuma saniatigut uvanga sángĩssuteĸarpunga ingminut anissôrtíniartarama, taimailiortarnermalo tarnivkut nalúngíssusera malugssaríssusêrutíkamiuk ilerasûteĸarnera maluginago agtûarujôrtalerpunga kîsalo kángunartuliordluta.“ inungnut avdlanut maligagssiuivdluartutut nauk isumaĸarfigineĸaraluardlutik, alĩkusersordlutik issigingnârtagait ãmátaoĸ angutip issertortúkut mingungnartuliortarnera tarnaisa nalúngíssusiata malugssaríssusêrúkiartuârneranut píssutaoĸatáuput, sôrdlútaoĸ ûmassup amia malugssaríssusêrútoĸ saviminermik aumârtumik naĸitsivigineĸaĸátârune. — 1 Timûtiuse 4:2.

¹⁰ ivdlit tarnivit nalúngíssusia taimatut malugssaríssusêrúsínaunerpa alĩkusersordlutit issigingnârtagkavit atuagkavitdlũnît súnînerisigut? ilerĸupiloĸaruvit ilerasûteĸalernartumik, tamaviârpit soraerúniardlugo? ingminut igdlersorniardlutit iluaĸutausínaussumik iliûseĸarsínauvutit atuagkiat bîbilimut túngassut ivdlit sángĩssutigissangnik ingmíkut imaĸartut atuardlugit — atuarĸigtardlugitdlo — imalũnît sángĩssutit utorĸaunertardlo oĸaloĸatigĩssutigalugo. ilerasûteĸángíneĸ tuníssutauvoĸ erdlingnartoĸ Gûtimit pissoĸ, tamánalo iluaĸutigalugo Gûtimik mianeringningneĸ  ineriartortíniarsínáusavat. sunalũnît ilingnut ilerasûtaulersínavêrsâruk!

ajúngitsumik ilagissaĸartarit

11, 12. (a) Timûtiusimut agdlagkat áipáine 2:20, 21-me ĸanoĸ sujôrasârneĸarpugut? (b) ivdlit ĸanoĸ iliorsínauvit sujôrasârut tamána nâlaorniardlugo?

¹¹ apustile Paulus ima agdlagpoĸ: „igdlumile angisûme [ilagîngne] kûltĩnarnik sîlvĩnarnigdlo pûgutaĸaráingilaĸ, ĸissungnigtaoĸ marrarnigdlo peĸartarpoĸ, ilait erdligissat, ilait erdligissáungitsut. taimáitumik táukunúnga ilángúnavêrsârtoĸ pûgutaujumârpoĸ erdligissaĸ, ivdlernartitaĸ, igdlup inuanut atugagssaĸ, iluartuliornernut tamanut piarêrsagaĸ.“ (2 Timûtiuse 2:20, 21) ikíngutitut ilagissartagkavta misigíssutsivut ĸanoĸ-iliornivutdlo angnertûmik súnertarpait. sôruname, ugpíngitsut ikíngutauvdluarnaviángitdlat. tamânile Paulusip takutípâ ilagît iluáne agdlât inoĸarsínaussoĸ ilagissartagapalâjussunik. ímaĸa taimáitut ilagissardlugit ĸuianartísavatit, súnîneratdle iluaĸutiginaviásángilat ’inûsugtut kajungerissait ĸimarratiginiardlugit’ imalũnît Gûtimik mianeringningneĸ ineriartortíniardlugo. kajumilersitsissunik ilagîngnut ilaussortaussunik ilagissartagaĸarniarit. versit 22-áne Paulus nangitdlune agdlagpoĸ: „iluarneĸ ugpernerdlo asangningnerdlo erĸigsinerdlo norĸáissutigíkit, ũmatimíkut minguitdlutik Nâlagkamik tordlorfigingnigtut peĸatigalugit.“ — nalerĸiuguk Filípimiut 4:8, 9.

¹² ássersûtitut taisínauvarput kristumio arnaĸ inûsugtoĸ nauk Gûtimik mianeringningnermik perorsagaugaluardlune nákáitôrtartoĸ. „ilagissartagkáka píssutaunerúput,“ oĸarpoĸ. pâsileramiuk inûnine sũssuseĸángitsutut ileriartortoĸ, avdlanik ikíngutitâlerpoĸ. túngavilingmik ima isumaĸarpoĸ: „ikíngutit Jehovamik asangnigtut ilagissarugkit, nalúngeĸatigingníssutsit malugssarigsûtísínáusavat nákáitôrnavêrdlutitdlo. [ilagissartagkatit] nâlángitsuliorneĸ maujugalugo oĸarângata, táukunatut isumaĸalersarputit.“ ilerĸordlugtũsangatínartunik ilagissartagaĸarnavêrsârdlune pûgutángorpoĸ pigingnigtiminut „atugagssaĸ, iluartuliornernut tamanut piarêrsagaĸ“. ukiut ĸulit avdlamik atorfeĸarane oĸalũssissartûgame oĸarpoĸ: „pâsilersimavara Jehovap sákugigânga inuit avdlat ikiorĸuvdlugit.“ — 2 Timûtiuse 2:21; ússatit 15:31.

13. ilagissartagkat ajúngínersut ĸanoĸ nalilerniarsínauvigit, sutigutdlo súnersínauvâtit?

¹³ taimáitumik ilagissartagkatit ilumôrdlutit nalilerniákit. iluarneĸ, ugperneĸ, túngaviussúkut asangningneĸ, erĸigsinerdlo norĸáissutiginerpait? kristumiutut autdlússivdluarpat? inuit taimáitut ilagissarnerugugkit ivdlítaoĸ ímaĸa maligagssángorsínauvutit oĸautsigkut, ilerĸugkutdlo, asangníssutsigkutdlo, ugpernigkutdlo, minguíssutsigkutdlo, sôrdlo Timoteus, Paulusip ĸanigtumik suleĸatigissâ, taimáitoĸ. ima pâsissariaĸángilaĸ maligagssaunerdlungnerussunut ilagserãngitsumik inugsiarnîtsumigdlũnît píssuseĸásassutit. ivdlit nuánârnigkut maligagssauvdlutit ímaĸa táuko kajumigsârsínáusavatit nardlumuínaĸ ingerdlarĸuvdlugit. — 1 Timûtiuse 4:12; Eprîarit 12:12-15.

Gûte kivfartũkumavdlugo taimaititsigit

14, 15. (a) itsarssuaĸ timerssortartut sungiusarnermik nalâne sumik piumavfigineĸartarpat? (b) kiap suliarerĸussâ sulíssutigísaguvtigo ardlãnik taimaititsissariaĸásaugut, kíkutdlo maligagssauvdluarpat?

¹⁴ Timoteusip nalâne timerssortartut sungiusarnermik nalâne „sût tamaisa taimaitíkatdlartarpait“, nuánârutigissarpagssuit ajorneragáungíkaluartut taimaitíkatdlardlugit. (1 Korintumiut 9:25) mianerssuardlutik ingmíkut aulajangigkanik nerissagssaĸartarput. taigdliortoĸ Horats ukiune untritilingne sujugdlerne u.n.a.s. inûssoĸ nâpertordlugo „arnat pinavêrsârpait vĩnisornavêrsârdlutigdlo“ „anguniagaĸ pilerigissartik angujumavdlugo“. tamatumúnga ássingussumik Gûtimik mianeringningneĸ  anguniardlugo ingminut sungiusarningne taimaititsinigssat pissariaĸásaoĸ. Timoteus pivdlugo Paulus ima oĸarpoĸ: „avdlamik táussumatut ilivsínik isumagingnigdluarumârtumik isumaĸateĸángínama, tamarmik nangminigssamingnik piniarmata, Kristusip Jîsusip pê pínagit. táunale . . . îvangkîliumut kivfartũsseĸati[gâra].“ — Filípimiut 2:19-22.

¹⁵ Timoteus perĸuneĸarpoĸ: „îvangkîliulerssârtup suliagssâ suliariniaruk, kivfartûtigissat nãmagtitdlugo kivfartûtigûk.“ (2 Timûtiuse 4:5) soĸutigissane nangminerissane ĸanoĸ kajungernaraluartut, tamáko taimaitípai Gûtip suliarerĸussâ nãmagtíkumavdlugo. ivdlítaoĸ taimailiorumavit? uvdlumíkut kristumiut inûsugtut bîbilime inássutigissaussunik píngitsôratik pissugssauvfeĸángíkatdlartut ilait angnerussunik ilíniagaĸarusugdlutik ilíniarĸigtarput imalũnît atorfíkât uvdloĸ nâvdlugo sulivfît akigssarsinarnerussut anguniardlugit, kristumiutut kivfartûteĸarniarneĸ inûnermingne pingârnerutitdlugo anguniarnago. taimatut isumagdlit ilâta písangavdlune atorfigssaminut íkúnigssane utarĸivâ. sulíngíkatdlarnerminile ĸaerĸuneĸarame aussaĸ tamât áiparît pioneriussut oĸalũssissarníkut suleĸatigai. nuánaringârpâ! tamatuma kinguneranik uvdloĸ nâvdlugo sulivfigssaraluane pilerinaraluartoĸ taimaitípâ uvdluvdlo iláinâ soĸutiginángínerussumik sulivfeĸalerdlune pioneríngorsínaujumagame. Timoteusitut isumaĸardlune mãna Jehovap nalunaiaissuisa ĸutdlersaĸarfiáne silarssuarme tamarme oĸalũssinermik nákutigdlîssoĸarfiussume kivfartûteĸarpoĸ. taimaititsiumássuseĸ asangningnermut piviussumut erssiutauvoĸ, taimaititsineruvdlo asangningneĸ taimáitoĸ sákortusisítarpâ, sôrdlo angutip táussuma pâsilerâ.

16. inûsugtut ilâtigut sunik taimaititsissariaĸásápat?

¹⁶ oĸalũssissartûgame apustiliuvdlunilo Paulusip pîtaiuitsumik atissaĸartariaĸarneĸ pingârtípâ. ivdlit ingmíkut atissaĸarneĸ imalũnît issíkoĸarneĸ mamiatsautausínaussut imalũnît oĸalũssiniarnerpit súnîvdluarnigssânut akornutausínaussut taimaitíkumásavigit? (1 Timûtiuse 2:7-10) nangitdlune Paulus ima agdlagpoĸ: „Gûte mianeralugo inûjumassut tamarmik ĸinugineĸásáput.“ (2 Timûtiuse 3:12) ivdlit sagdlusuíssut igdlersorumaviuk  nauk mitautigineĸásagaluaruvit, ímaĸa agdlât atuaĸatingnit nuánarineĸarnerit ilâtigut taimaititdlugo? erĸortumik anguniagaĸardlutit tamákua ardlãnigdlũnît taimaititsinerit Gûtimik mianeringningnermik ineriartortitsiniarningnut iluaĸutáusaoĸ, tássûnalo Jehovamik tatigingningniarnigssaĸ ilíniásavat, táussumalo ĸanoĸ isumaĸarneranik pingârtitsinigssaĸ ilíniardlugo.

sujumukartuarit

17. sujumukarniarnermigut Timoteus oĸalũssissartunut inûsugtunut uvdlumíkut inûssunut ĸanoĸ maligagssiuivdluarpa?

¹⁷ Gûtimik mianeringningnermik ineriartortitsiniarneĸ ingerdlajuáinartugssauvoĸ. Paulusip Timoteus oĸaorĸigsârpâ: „tamáko isumaliutigíkit ilerĸoralugitdlo agdliartússutsit tamanut malungnarserĸuvdlugo.“ (1 Timûtiuse 4:15) inuit ilait ilagîngnut kivfartortúngornigssamingnut utorĸaunertángornigssamingnutdlũnît inûsugpatdlâramik isumaĸarsínáuput sujumukarfigssaĸaratik, imáisorigamíko ilagîngne angnerussumik kivfartûteĸartitauníkut pisínautitauníkutdlo aitsât inûp sujumukarnera nalilerneĸartartoĸ. ilumôrpoĸ Timoteus anersãkut sujumukarsimanine piúkúnautigĩnarnago ãmátaordle utorĸáussutse píssutigalugo utorĸaunertángorsínautitaussoĸ. ilungersordlunile sujumukartuartariaĸarpoĸ, tássûnalo oĸalũssissartunut inûsugtunut tamanut maligagssiuivdluarpoĸ, ĸanoĸ-iliorníkutdlũnît sujumukarfigssaĸaraluartut. — 1 Timûtiuse 4:12, 13.

18. kristumiut inûsugtut sutigut sujumukarsínáupat?

¹⁸ tauva, Timoteus maligdlugo, ivdlit Jehovamik kivfartũssissutit ineriartortutit „ugpertunut maligagssángorniar“sínauvutit sagdlusuíssut inôriautsingnut súniuteĸangârĸuvdlugo oĸalũssissarnigkutdlo píkorigsiartorĸuvdlutit. mãnákorpiaĸ sujumukarsínauvutit píssutsit sôrdlo ilerĸutigut ingassáussinavêrsârneĸ, perĸigsârneĸ, inorôrsãssuseĸ, ilungersornerdlo ineriartortíniardlugit. utorĸaunertanut kivfaritítaruvit ilingnutdlo suliarerĸussait sûtdlũnît perĸigsârutigigugkit, misiligauvdlutit sulitdlarĸíssutsit takutíniardlugo sulíssutigisínauvat. (1 Timûtiuse 3:1, 2, 8-10) sujumukarnerit nauk inungnit avdlanit ernĩnaĸ takuneĸángitsôraluartoĸ, nalúsángilat Jehovap malugigâ. tauvalo inuit takulerumârpât. — 1 Timûtiuse 5:25.

19. nauk agsorornaraluartoĸ, suna pivdlugo Gûtimik mianeringningneĸ anguniardlugo sungiusartariaĸarpit?

¹⁹ puiornavêruk Gûtimik mianeringningnermik ineriartortitsinigkut nangminêrdlutit Jehovamut iluarissaussumik píssuseĸalernigssat. anersãkut sungiusángitsôruvit ánaissaĸásautit arpagtartup perĸusîleĸissup ilángússap tamatuma autdlarĸautâne erĸartorneĸartup ánaisimassânit angnerungârtumik. Gûtimik mianeringningnermik ineriartortitsiniarneĸ agsorornarpoĸ. silarssuarmile tamarme inûsugtorpagssuit tipaitsugtut suaorráput: INGMINUT AKILERSÍNAUVOK’! Gûtimik mianeringningnermik píssuseĸaleruvit mãnákut tugdlûsimârnartumik inôriauseĸalísautit, perĸigsimíssutigissaĸaratit, nâgssáungitsumigdlo nuánârnigssamik pivdluarnigssamigdlo neriûtigssaĸalísavdlutit. taimáitumik sungiusartuarit. sapíngisangnik ilungersortuarit: artornartorsiorângavit agdlât ingerdláinarit. tugpatdliutigisínauvat erĸarsautigalugo ’Gûtip sáimáussingârtup . . . nangmineĸ pigínãngorsardluardlusilo aulajangersitdlusilo píssagtitdlusilo túngavilersúsagâse. táussuma píssauneĸ pigâ nâgssáungitdluínartumik’. — 1 Pîtruse 5:10, 11. (wD 15/8 85)

uko akisínauvigit?

□ Gûtimut ajúngitsumik atássuteĸartuásaguvta suna ilungersûtigissariaĸarparput?

□ ilerasûteĸarnavêrsãsaguvta sût pissariaĸarpat?

□ Gûtimik mianeringningneĸ ineriartortíniardlugo Timûtiusimut agdlagkat áipáine 2:20-22-me agdlagsimassoĸ ĸanoĸ maleruarneĸarsínauva?

□ kristumiut inûsugtut ĸanoĸ ilivdlutik sujumukarsínáupat?

[Atuaqqissaarnermi apeqqutit]

[Qupp. 11-mi ungalusaq]

Gûterput asangnigtoĸ — píssusîsa ilait

□ misigíssuseĸarpoĸ; taimaingmat uvagut ĸanoĸ-iliornivta aliasugtísínauvât imalũnît tipaitsugtísínauvdlugo. — Tussiaat 78:40; ússatit 27:11.

□ inuit ĸagdlíkut píssusiussoĸ issigissarpât, Gûtile „ũmámut issigissaraoĸ“. — 1 Sâmuale 16:7.

□ soĸutigâtigut kajumigsârdlutalo isumanerdlûtivut ingminut piserĸuvdlugit; ’angnikitdliornartúkut pissaunavêrfiuvoĸ.’ — Nâgûme 1:7; 1 Pîtruse 5:7.

□ taineĸarpoĸ ’Gûte pivdluartoĸ’; kivfaminik kajumigingnigtûvoĸ. — 1 Timûtiuse 1:11; Tussiaat 35:27.

□ nâpertuivdluángitsumik iliûseĸarneĸ ajorpoĸ kináussusersiornerdlo ajordlune. — Jûpe 34:10; apustilit suliait 10:34, 35.

□ ajortoĸ iluarineĸ ajorpâ, uvagutdle perĸigsimiguvta kúkunerdlo sángĩssutdlũnît iluarsaruvtigo, isumákêrfigiumásavâtigut; ’ajortuliavta naligssãnik iliorfigísángilâtigut, iluaitsuliatsivnigdlo akiniaivigísanata.’ — Tussiaat 86:5; 103:8-14.

□ igtôrnata sâgfigisínauvarput, píngortitanilo ilumôrtut kajumigsârpai pigínáussusê atorĸuvdlugit. nauk nangmineĸ kigdleĸángitsumik ilisimássuseĸaraluardlune, kivfame kigsautigissait sujúnersûtaitdlo tusarumassarpai. „makitajuínerpit angisûtísavarma,“ kúnge David agdlagpoĸ. — tugsiaut 18:35, NW (kalâtdlisũngortitame verse 36); 1 kúngit 22:19-22.

[Qupp. 14-mi assiliartaq]

kristumiut ilarpagssuisa oĸalũssissarneĸ akigssarsinarnerussumik sulivfeĸarnermit tipaitsûtigingârneruvât