Jesusip inuunera ajoqersuineralu

Jesusip inunngornera — sumi qangalu?

SOORMITAAVAANA Josef Mariap erningajalernerata nalerpiaani angalaniarsimasoq? Pissutaavoq Romami naalagaasoq, kaasari Augustus, aalajangersimammat inuit tamarmik illoqarfimmut inunngorfigisimasaminnukassasut naatsorsortikkiartorlutik. Taamaattumik Josef aamma illoqarfimmut inunngorfigisimasaminukarpoq, tassa Betlehemimut.

Inupparujussuit naatsorsortikkiartorlutik Betlehemiliaasimapput, Maria Josefilu allamik inissaqannginnamik nersutaasivimmut inissipput. Maani siutituut uumasuutillu allat akornanni Jesus inunngorpoq. Mariap annoraaminermut immuppaa nersutaatillu nerriviannut inissillugu.

Kaasari Augustusip inuit tamarmik naatsorsorneqarnissaannik aalajangernera qularnanngivissumik Guutip siulersuineranit pivoq. Taamaalilluni Jesus illoqarfimmi, Allakkani Illernartuni qangarujussuarli kunngissatut neriorsuutigisatut inunngorfissaatut siulittuutigineqareersimasumi, Betlehemimi, inunngorsinnaasimavoq.

Unnuaq taanna immikkut ittumik pisoqarpoq. Uumasunik paarsisut narsaammiittut qaamanermik qaammareqisumik qinngorfigineqarput. Tassaana Jehovap illernassusia qinngortoq! Jehovallu inngilia taakkununnga oqarpoq: ’Ilissinnummi ullumi erniuvoq annaassisoq, tassa Kristus Naalagaq, Davidip illoqarfiani. Mannalu nalunaaqqutigissavarsi: naalungiaq naniumaarparsi immussimasoq nersutaatillu nerrivianni innangasoq.’ Tassanngaannarlu inngilerpaaluit saqqummerput erinarsorlutillu: ’Naalannarsili Guuti qutsinnermi; nunamilu eqqissilit; inunnilu nuannarisaqarli.’

Inngilit qimammatik savanik paarsisut imminnut oqarfigipput: ’Betlehemimut piartorta pisimasoq tamanna takujartorlugu Naalakkap uatsinnut nalunaarutigiasa.’ Tuaviorlutillu aallarput inngilillu oqaatigisaanerpiaq Jesus nanillugu. Savanik paarsisut inngilip oqaaserisimasaanik oqaluttuummatik najuuttut tamarmik tupigusungaalerput. Oqaluttuarineqartut tamaasa Mariap tusarpai uummamminullu toqqorlugit.

Ullumi inuppassuit upperaat Jesus decemberip ulluisa 24-anni 25-anniluunniit inunngorsimasoq. Kisianni Betlehemimi qaammat taanna siallerajuppoq nillerlunilu. Savanik paarsisut ukiup taamaalinerani savaatitillu narsaammi unnuiniarsimanavianngillat. Aammattaaq ilimanaateqanngilaq romamiut kaasariata inuit pikitsitseqqajaareeqisut ukiuinnarsuarmi naatsorsortikkiartorlutik aallarnissaat piumasarisinnaagaa. Ukiakkut siusinnerusukkut Jesus inuusimasorinarpoq. Lukas 2:1-20; Migga 5:1. (wD 1/6 85)

◆ Sooq Josef aamma Maria Betlehemiliarpat?

◆ Pisut suut nalinginnaanngitsut pippat unnuami Jesusip inunngorfiani?

◆ Decemberip 24-anni 25-anniluunniit Jesus inunngorsimanngitsoq qanoq ililluta nalunngilarput?

 [Qupperneq 9-mi tamakkerlugu asseq]