Bibelimi atuagassani pingaarnersaasut Tussiaatit 1-imiit 41 ilanngullugu

Tussiaasiortup Jehova unnersiutigaa

„Unnersiutiginnissutit.“ Tassaavoq Tussiaatit epriiarisoorlugu taaguutaat, ilalu naleqqulluassusia! Tussiaatit tamarmik katitigaallutik Jehovamik Guutimik unnersiutiginnissutaapput. Tussiaatini Jehovap pissusii suliaalu angingaartut oqaluttuarineqarput. Siulittuutinik imaqarput oqaluttuullutalu Guutip sunniineratigut allattut malersugaanerini, killuutigineqarnerini, nikallunganerini allaallu ilerasuuteqarnerini misigissusiinik. Kristumiut tamakkununnga assingusunik atugaqartut amerlasuut Tussiaatit pissatsissutigisarpaat.

Tussiaatit tallimanngorlugit immikkoortitaapput. Matumuuna immikkoortoq siulleq, Tussiaatit 1-imiit 41 ilanngullugu, sammissavarput.

Jehovap siunertaanut naalatsigitinneq

Tussiaat 1-imiit 14 ilanngullugu atuakkit. Tamakkunani Tussiaatit pingaarnersaasa ilaat sammineqaqqaarput, tassa: inatsisit pingaaruteqarnerat, kunngi Messiasiusoq tikiuttussaq pillugu siulittuutit, annikilliungaarnermilu ikioqqulluni qinnutit. Aammattaaq ilinniarparput naak iluaatsut siumukarallaraluartut, iluartut pilluaqqusaajumaartut.

◆ 2:1 — „Kingunissaqanngitsumik“ sumik inuiaat pilersaarlutik qatimaluppat?

Inuiaat qatimaluutigaat (tassa eqqarsaatigaat) namminneq oqartussaajuarniarnissartik, Jehovap Tanitaa ilassiniarnagu. Oqaatsit taakku ukiuni 100-linni siullerni u.n.a.k. eqquupput romamiut juutillu pisortaat suleqatigiilermata kunngi Jehovap tanitaa, Jesus Kristus, toqunniarlugu. (apustilit suliait 4:26-28) Pingaarnerpaamilli eqquupput 1914-imiilli, inuiaqatigiit tamarmik Guutip kunngiutitaa issiavissaarsuarmini issiasoq itigartimmassuk namminnerlu kisimiillutik oqartussaanertik ataavartinniarlugu.

◆ 2:12 (NW) — Soormi peqquneqarpat ’erneq kuneqqullugu’?

Bibelip pilerfiata nalaani kunissineq ikinngutaanermut ersiutaavoq illuminullu pulaartunut tikilluaqqussutaalluni. Versimi tassani Jehovap inuiaat peqquai Erneq, tassa kunngi Guutip tanitaa, kuneqqullugu, tassa ilasseqqullugu. — Tussiaat 2:2, 6-8.

◆ 9:13 — Suna pillugu Jehova „toqutsinermik akiniaa“va?

Eqqartuussisutut Jehovap ujarpai innuttaanik pisuunngitsunik toqutsisut. (1 Môrsase 9:5, 6; Lúkarse 11:49, 50) Aammattaaq pisuusut pillartarpai. Immikkulli periagaqarani pillaaneq ajorpoq. Tussiaasiortup Davidip qularunnaarsippaatigut „inukuluusut nillianerat puiorsimanngikkaa“. — Naleqqiukkit Pîtrusip agdlagaisa áipait 2:9.

◆ 11:3 — Sunaava „tunngaviusoq“ qajannarsisoq?

Innuttaaqatigiit tunngavii — naapertuilluarneq, inatsiseqarneq eqqissisimanissarlu — pineqarput. Innuttaaqatigiinnik aaqqissuussineq ajutuussappat naapertuilluarnermillu pineqarniarnissamut periarfissaarulluni, Guutimik mianerinnittoq qanoq iliussava? Jehova tatigiinnassavaa. Taanna qilammi issiavissaarsuarminiippoq, pisartut tamaasa nakkutigisarlugit, ilaginnaanerlu ajorluni.

Tamanna sumik ilinniarfigisinnaavarput: Tussiaammi 4:6-imi Guutimik mianerinnittut kajumissaarneqarput ’pilliutit iluartut pilliutigeqqullugit’. Davidip nalaani Israelikkut Jehovap tunisiviani pilliisariaqartarput. Aammattaarli eqqortumik siunertaqartariaqarput ilumoortumillu peqqissimisariaqarlutik. (Isaia 1:11-17) Kristumiut anersaakkut pilliigaangamik eqqortumik siunertaqartariaqarput Jehovallu maligassiai qutsinnerusut maleruartariaqarlugit. — Eprîarit 13:4, 5, 15, 16; 1 Pîtruse 2:1, 5.

Guuti naleqanngitsoq

Tussiaatit 15-imiit 24 ilanngullugu atuakkit. Tussiaatini tamakkunani Jehovamik unnersiutiginnissutit arlaliupput. Innuttaminik illersuisuuvoq (18), Pinngortitsisuuvoq Inatsisiliortorlu (19), Annaassisuuvoq (20), kunngimik qinikkaminik illersuisuuvoq (21), Paarsisuuvoq angisooq (23), Kunngiullunilu naalannaammik piginnittoq (24).

◆ 16:10 — ’Unneqqarissoq’ uani eqqartorneqartoq kinaava?

Bibelimik ilisimatuut ilaasa versi taanna unneqqarissunut nalinginnarnut tunngatinniartarpaat, uppernarsaatigalugu taallugu allakkat epriiarisuut ilaanni ’unneqqarissoq’ qasseersiut atorlugu allassimammat. Kisiannili versip taassuma allakkani griikerisuuni kristumiut allagaanni issuarneqarnerani ataasersiut atorneqarpoq, ’unneqqarissoq’ ataasiinnaq pillugu. Kinaava? Siulliutillugu David eqqarsaatigineqannguatsiarpoq. Siulittuutigineqartorli pillugu Peterip Paulusittaaq Jesus taavaat. — apustilit suliait 2:25-32; 13:35-37.

◆ 21:4 — Sunaava ’niaqorut kuultiusoq’?

Immaqa niaqorutiviuvoq, soorlu taanna guutipilummit Malkamip niaquanit peersitaq. (Naleqqiukkit Sâmualip agdlagaisa áipait 12:29, 30, NW.) Immaqaluunniit niaqorutiuvoq assersuutaannaasoq, Davidip ajugaanerata kunngiussusianik alutornaasiineranut assersuutaalluni. Siulittuutitulli takutinneqarpoq qanoq 1914-imi Jehovap Jesus naalagaassutsimik niaqoruseraa. ’Niaqorut kuultiusoq’ assersuutaavoq naalagaassusiata pitsaanerpaassusianut.

◆ 22:2 — Guutip David qimassimavaa?

Naagga, akeqqaminilli annikilliungaarnermigut David qimagaalluni misigivoq. Misilinneqangaarnermigulli inuttut periarnera uppernikinneranut ersiutaanngilaq, nangillunimi tatiginnilluni qinnuteqarpoq aniguisinneqarnissaminik. (Versit 17-20) Soqutiginarpoq Jesusip tussiaat taanna issuaaffigigaa nappakkami naalliutsitaaffimmi toqunngitsiartilluni. Aperigami ’sooq?’ Jesusip tatineqangaarnini ersersippaa aammattaaq sallusumik unnerluutigineqarnermini toqunneqaatigisamini pisuunnginnini nalunaarlugu.

Tamanna sumik ilinniarfigisinnaavarput: Apustili Paulusip Tussiaat 22:23 issuarpaa tunngatinniarlugulu Jehovap aqqanik tusarliussinermini qatanngutimini tanitaasuni Jesus Kristusip siulersuineranut. (Eprîarit 2:11, 12) Tussiaat 22:28-mi siumut eqqartorneqarpoq Jehovap innuttai ilagalugit ’inuiaat eqqarleriissortaasa tamarmik’ Jehovamik unnersiutiginneqataanissaat. Ullumikkut amerlangaartut inuiaqatigiinnit tamaneersut Jesusip qatanngutai ilagalugit Guuti pallorfigaat. (sarĸúmersitat 7:9) Guutip aaqqissuussinera tamanna atassuteqarfigiuartariaqarparput.

 Jehovap pissaaneqangaarnera

Tussiaatit 25-miit 34 ilanngullugu atuakkit. Tussiaatini 25-mi 26-milu David nalunaarpoq assuarnaatsumik inuuseqarumagaluarluni. Taava Jehovamik ersisuilluni tatiginninnini oqaatigisarpaa, Tussiaallu 33-mi Jehovap pissaanera alutornangaartumik allaatigineqarpoq.

◆ 28:8 — Kinaava Jehovap ’tanitaa’?

Versimi tassani ’tanitaq’ tassaavoq Jehovap innuttai qinigaasut, soorlu oqaaseqatigiinnit sammiveqataasunit takuneqarsinnaasoq: „[Jehova] innuttaminut nakuussutaavoq.“ Oqaatsit taakku Hâpakuk 3:13-imi allassimasut assigalugit siulittuutaapput. Jehovap tanitaminik sinneruttuusunik Harmagedonimi annaassiumaarnissaa pineqarpoq.

◆ 29:5, 6 — Qanoq ilillugu Jehovap nipaata cederit qulloortiterpai?

Tussiaammi tassani Jehovap pissaanera takorloornarsisinneqarpoq nipaa kallernermut assersuunneqarmat. Anorersuaq Libanoniminngaanniit avannaaniittumit puilasuitsunut kujataaniittunut ingerlaarpoq, tamatigut mianernartuulluni. (Versi 9b) Anorersuup Libanonip cederii aalatippai, ’pissigartillugit nersuteeqqatut’, kallerullu innerata orpiit ilaat qulloortiterpai. Anorersuup inoqajuitsoq „sajutsippaa“ (versi 8), inoqajuitsup siorai aalallugit, sioqqat anniarnermit equsaartullusooq.

◆ 33:6 — Sunaava Jehovap „qarnata anersaaminera“?

Anersaamineq versimi tassani isumaqarpoq Jehovap anersaava iluartoq, tassa pissaanera sulissutiginnittoq. Soorlu uagut oqaatsivut anernerpullu ataatsikkut qanitsinnit anisartut, taamatut Jehovap oqaasia, imaluunniit peqqussutaa, uani anersaamineranut, imaluunniit anersaavanut, atatinneqarpoq. Guutip anersaani iluartoq sakkugaa seqineq, qaammat, ullorissallu, tassa qilammiut tamaasa, pinngortikkamigit. — Naleqqiukkit Môrsasip agdlagai sujugdlît 1:1, 2.

Tamanna sumik ilinniarfigisinnaavarput: Tussiaat 26:5-imi David oqarsimavoq ajortut katisimasarneri uumigalugit. Ullumikkut Jehovap Nalunaajaasuisa ajortut ilaginaveersaarpaat. (1 Korintumiut 15:33) Soorlu Davidip Guutip ineqarfia soqutigeqigaa, kristumiut ilumoortut nuannaarutigalugu katisimasarput Jehovap peqatigiissortaani. — Tussiaat 26:6-8; 122:1.

Jehova „unnersiutigineqarli“

Tussiaatit 35-miit 41 ilanngullugu atuakkit. Immikkooqatigiinni ukunani immikkut taaneqarsinnaapput Tussiaat 36, tassani Jehova taaneqarmat inuunerup puilaffianik, aammalu Tussiaat 37, tassani qularunnaarsinneqaratta ajoqersoruminartut akissarsiassaannik. Aamma immikkut taaneqartariaqarpoq Tussiaat 40 oqaatsinik Jesus Kristusimut siulittuutaasunik imalik.

◆ 35:19 — Suna pillugu Davidip akeraasa ’mitallerlutik qiviartassavaat’?

Epriiarisut allassimaqqaasiaq naapertorlugu taaneqarput ’akeqqakka peqquserlunnermiittut’. Tassa isumaqarpoq ilumuunngitsunik pissuteqarlutik uumiginnittuusut. David iliuuseqarsimanngilaq uumissuissutissaannik, qinnutigaalu periarfissarsissanngitsut tulluusimaapiluutigissalluni. (Versi 19a) Taava qinuvoq: „Mitallerlutik qiviartanngikkilinnga,“ taama oqarluni qinnutigalugu akeqqami ajoqusiiumatuut uumissuillutik pilersaarutaasa iluatsinnginnissaat. (ússatit 10:10; 16:29, 30) Jesusip versi taanna issuarpaa uumissortiminut tunngatillugu. — Juánase 15:24, 25.

◆ 36:4 — Ajortoq tassani pineqartoq silatuumik iliortarsimagaluarpa?

Paasineqarsinnaavoq inuk taanna ileqqumigut allanngorsimasoq pissuserigaluanilu taamaatissimagaa. Immaqa silatuumik iliortarsimagaluarpoq ajunngitsuliortarsimagaluarlunilu. Taamaaliorninili taamaatissimavaa, tunussisunngorluni. Silatuut aqqutaaniit tunuarsimasut ilagaat kunngi Saul, taassuma David uumigilermagu. (1 Sâmuale, kapitali 18) Bibelimik paasiniaasut ilaat isumaqarput Davidip Tussiaat 36-mi allassimasut oqaaserigamigit Saul eqqarsaatigisimagaa.

◆ 40:7 — Oqaatsit „tamatuminnga ilisimatereerparma“ qanoq isumaqarpat?

Isumaqarsinnaapput Jehovap David ikioraa unnersuussutit Guutimeersut naalaaqqullugit, imaluunniit Jehovap siutit naalakkiutaanut Davidip naalaarniarnissamini atugassai pinngortissimagai. Soqutiginarpoq nutsikkami Septuaginta-mik taaguutilimmi oqaatsit taakku imatut nutsigaammata: „Timissannik piareersaavutit.“ Nutsikkamut taamaattumut suna pissutaagaluarpalluunniit, isumavia epriiarisut allassimaqqaasiani allassimasumut assinguvoq, versimi tassani naalattariaqarneq erseqqissarneqarmat. (Naleqqiukkit Sâmualip agdlagai sujugdlît 15:22; Húsia 6:6.) Paulusip versi taanna Jesus Kristusimut tunngatinniarpaa. (Eprîarit 10:5-10, NW) Paulusip Septuaginta-mi nutsigaq najoqqutarimmagu, oqaatsit „timissannik piareersaavutit“ „allakkat illernartut tamarmik Guutip sunniineratigut isumassarsiarititaa“sut ilagilereersimavaat. — 2 Timûtiuse 3:16, NW.

Tamanna sumik ilinniarfigisinnaavarput: Tussiaat 37 amerlasuunik ilinniutigisinnaavarput, eqqarleriinni ajortuni inuugatta. Naak ajortuliortut siumukaraluartut, usorissanngilavut malinniassanagillu. ’Eqqissillutali’ Jehova utaqqisariaqarparput, isornartorsiornata, isumalluarlutali taanna tatigalugu piffissarititani nalliuppat uagut pilluta iliuuseqarumaartoq. — Tussiaat 37:5, 7.

Aap, Tussiaatit amerlasuunik kaammattuutaasunik tuppalliutaasunillu oqaasertaqarput. Tussiaatini siulliusuni 41-usuni takutinneqaqqattaarpoq atukkavut annikilliornaraluartillugilluunniit Jehovap iperassanngikkaatigut. Atuareerlugit oqaatsit Tussiaat 41-p naggasiutigisai atorlugit oqaaseriumassavavut: „Unnersiutigineqarli [Jehova] Israelip guutia, naassaanngitsumit naassaanngitsumut. Amen, amen.“ (wD 15/8 86)