Jobip agssuarnáissusia — kiap íssuarsínauvâ?

„ússerdlinga ússersaivfingnut iluartunut ilivdlunga, agssuarnáissusera Gûtimut misigerĸuvdlugo.“ — Jûpe 31:6.

1. sôĸ iluaĸutáusava Jobip maligagssiâ ĸiviardlugo, ãma sût aperĸutaulerpat?

JOBIP agssuarnáissutse ĸularíngilâ, taimáitumik Gûtimit misilingneĸarnigssane ajoríngilâ. táussuma maligagssiâ uvdlumíkut uvavtínut kãmagtûtauvdluarsínauvoĸ, pingârtumik Satanip Djævelip Gûtimik kivfartũssissut tamarmik agssuarnáissusiat tamaviârdlune akornuserniarmago. (1 Pîtruse 5:8) tamána nalúngínamiuk ajoĸersugkap Jakobip kajumigsârpâtigut „pruvfîtit . . . nâgdliússusiatigut erinitsajuíssusiatigutdlo maligagssariniar“ĸuvdlugit, ingangmik Job pivdlugo. (Jâko 5:10, 11) kiavdle Jobip agssuarnáissusia íssuarsínauvâ? uvagut? sutigut agssuarnáissutsiminik aulajangiússinermigut Job uvavtínut maligagssiuiva?

2. (a) ateĸ Job ĸanoĸ isumaĸarpa? (b) Jobip agssuarnaitsumik ingerdlausiatigut suna nãmagsineĸarpa?

² ateĸ Job isumaĸarpoĸ „Akerarissaĸ“, ilumúme akerarissauvoĸ. kisiáne Satanip unangmigdlernera Jehovap akueringmago Jobimigdlo igdlersuinine ungalutut ísimassoĸ pêrdlugo, ĸanoĸ ilioraluardlunilũnît Jobip Gûtimut agssuarnáissusia Satanip akornusersínausimángilâ. (Jûpe 1:1-imît 2:10 ilángutdlugo) tássûna Job akíssutigssaĸartitsivoĸ Satanip mítatigdlîvdlune oĸarsimaneranut inuit tamaisa Gûtimik kivfartũssiungnaersísínáusagine.  (ússatit 27:11) agssuarnáissutsiminik aulajangiússivdlune inôriautsimigut Job ĸilangmĩtunut nunamĩtunutdlo tamanut nalunaerpordlusôĸ: ’Sataniâ, sagdlussûvutit narrunartorssuaĸ, uvanga Jehova Gûtigigavko, ãma ĸanoĸ pissoĸásagaluarpatdlũnît táussumúnga agssuarnáissusera aulajangiúkumârpara!’ — Jûpe 27:5.

Jobitut ítut

3. kina ĸilangmĩkame igdlersugauva, táunalo pivdlugo aperĸutit sût aperĸutaulersíneĸarpat?

³ malugissariaĸarpoĸ Jehovap Satanivdlo akerdlerĩssutigissât ĸilangmĩtunut nunamĩtunútaoĸ pingâruteĸartoĸ, anersât silarssuãnútaoĸ túngavdlune. „kinguâgssaĸ“ neriorssûtigissaĸ, Gûtip sujunertaminik nuáningârtunik nãmagsingningniarnigssamigut sákugissagssâ, ĸilangmĩpoĸ Jehovap igdlersuineranit ungalôrsimavdlune. (1 Môrsase 3:15) kisiáne, igdlersugaujungnaersíneĸarune Jobip agssuarnáissusia íssuásanerpâ? takutísanerpâ angutip nãmagdluínartup, sôrdlo Adam nãmagdluínartûsimagaluartoĸ, Gûtimut agssuarnáissutse amigauteĸángitsumik aulajangiúsínaugâ? (1 Korintumiut 15:45) „kinguâgssaĸ“ táuna nuname tákugpat táussumínga naleĸángitsumik sákortússusilingmik misilînigssaminut Satan upalungaersaivoĸ.

4. (a) Satanip kina pingârnerpâmik akerarissarilerpâ, Gûtivdlo táuna igdlersordlugo ungalôrungnaersimagâ ĸanoĸ nalúngísínauvarput? (b) Jesusip Jehova sumik pigssaĸartípâ?

⁴ Jesus Kristus ’kinguâgssauvoĸ’ ĸilangmíngãnît autdlartitaĸ. nunamut tikiungmat Satanip ingmíkut soĸutigilerpâ, pingârnerussumik akerarilerdlugo. Jehovap igdlersuinerminit ungalôrungnaersimagâne takutitdlugo, nápagkame nâgdliugtitauvfingme nivingagame Kristus nivdlingârpoĸ: „Gûtiga, Gûtiga, sôĸ ĸimagpinga?“ (Matîuse 27:46; Tussiaat 22:1) Gûtip igdlersuiungnaeratdlarnera nauk sákortûmik malugigaluardlugo, Jobitutdle Jesus ’ajortuliúngilartaoĸ, isumaitsutut iliúngilaĸ Gûtimut’. (Jûpe 1:22) Jobitut iliorpoĸ, Gûtimut agssuarnáissutse amigauteĸángitsumik aulajangiutdlugo, taimailivdlunilo takutitdlugo ’ingmisut nuname inoĸángitsoĸ’. (Jûpe 1:8) taimáitumik Jehova Gûtip Jesus akíssutigssarsivfigâ nãmagdluartumik nâgssáungitsumigdlo atassugssaussumik Satanip erĸúngitsumik únerdlũssíssutigissânut oĸarmat Gûte inungmik sákortunerpâmik misilingneĸarnermigut Gûtimut ilumôrtuartugssamik nunamut inigssitsisínáungitsoĸ.

5. (a) Satan ĸanoĸ iliortuáinarpa? (b) ĸilangmit igitaugame Satan ĸanoĸ iliorpa?

⁵ sulile angnerussumik akíssutigssarsiumavdlune Jesusip anersãkut ĸatángutai, tássaussut Jesus ilagalugo Gûtip peĸatigîgsortaisa arnatut ítut ’kinguâgssait’, Satanip únerdlûtigiuáinarpai. nâlagauvfiup ĸilangme pilersíneĸarnerata agdlautigineĸarneranut atatitdlugo, Satan pivdlugo bîbilime agdlagsimavoĸ: „ĸatángutivta únerdlûtigingnigtât igitau[voĸ], uvdlúkutdlo únuákutdlo Gûtivta sâne únerdlûtigingnigtartoĸ.“ kisiánile Satan únerdlûtigingnĩnángilaĸ, ãmátaordle akerartuivdlune sãssússisitsivoĸ! bîbilime navsuiarneĸarpoĸ ĸilangmit igitaunerme kingornagut ’kũkôriaussarssûp, tássa Satanip, arnaĸ kamautilerâ’ „autdlardlunilo kinguâgssaisa amiákue táuko Gûtip inássutainik maleruaissut Jîsusivdlo nalunaiautânik pigingnigtut sorssugkumavdlugit“. — sarĸúmersitat 12:7-12, 17.

6. (a) uvdlumíkut kíkut oĸalũssissarneĸ pingârneruvdlutik autdlúpât, kíkutdlo táukunúnga ilángúsimápat? (b) Satanip táuko tamaisa ĸanoĸ iliorfiginiarpai?

⁶ arnap „kinguâgssaisa amiákue“ tássáuput Jehovap nalunaiaissue tanitaussut uvdlumíkut nuname sivnerútut. táukua ’Jesusimik nalunaiautigingningneĸ’ pingârneruvdlutik autdlúpât, silarssuarme tamarme nalunaerutigalugo Jesus kúngitut igsiavíssârssuarminut ivertitaussoĸ píssutsinigdlo ârĸigssũssineĸ iluaitsoĸ mána ungasíngitsúkut sûjungnaersísagâ. (Matîuse 24:14; Dâniale 2:44) kisimĩngitdlatdle! inuit amerdlangârtut pingasunik milliûnilingnit amerdlanerussut táukunúnga ilánguterêrput peĸatigĩngorsimavdlutik atausiússuseĸartut, silarssuarme tamarme ilaussortaĸarfiussut, agssuarnáissutsimingnik aulajangiússissut. agssuarnáissutsimingnik aulajangiússissut táuko tamaisa Satanip kipisuitsumik malerssugarilersimavai, agssuarnáissutsimingnigdle aulajangiússinerat atâtâta ĸilangmiussup Jehovap nuánarâ. — 2 Timûtiuse 3:12; ússatit 27:11.

7. suna píssagtíssutigalugo isumavdluarsínauvugut nauk Satanip sãssússinigssainik atugagssaĸaraluardluta?

 ⁷ ilumut erĸarsarnarpoĸ nalúngínavtigo, sôrdlo Satanip Job ajoĸusîumatûvdlune soĸutigissarigâ, uvagútaoĸ Gûtimut agssuarnáissutsivtínik aulajangiússiniartugut ajoĸusîumatûvdlune soĸutigissarigâtigut. tamánale isumatsautigissariaĸángilarput. sôĸ? „[Jehova] nagdligtuivdlunilo isumagssuinertoĸingmat,“ „iperásanatit ĸimásanatitdlo“. (Jâko 5:11; 5 Môrsase 31:6) âp, Jehovap napatísavâtigut. „erĸornavêrĸutauvoĸ agssuarnaitsumik saĸissunut,“ bîbilime agdlagsimavoĸ. (ússatit 2:7) tássale imáingilaĸ misilingneĸarnigssarput Jehovap akuerísángíkâ. akuerísavâ, sôrdlo Jobip misilingneĸarnera akuerigâ. „Gûtile ilumôrpoĸ,“ apustile Paulusip uparuarpâ, „táussuma artugkavsínik ússersínaviángilâse, kisiáne aniguinigssaĸ ússernartumut áipiutdlugo píngortísavâ ilivsínut artornarungnaersitdlugo.“ — 1 Korintumiut 10:13.

misilingneĸarângavta

8. Jobip maligagssiâ ĸanoĸ uvagut uvdlumíkut iluaĸutigisínauvarput?

⁸ pingârtumik sákortûmik misilingneĸarnivtíne Jobip agssuarnáissutsiminik aulajangiússinermigut maligagssiuinera uvagut iluaĸutigisínauvarput. Job ima nâgdliugtigigame toĸorusugpoĸ Sheol-imilo, tássa inuiait tamarmik ilerráne, torĸugaujumavdlune. (Jûpe 14:13) uvdlumíkut inoĸarpoĸ taimatut misigisimassunik, oĸaramik Jobip nâgdliungârneratut misigisimavdlutik. ímaĸa ivdlítaoĸ ilâtigut taimatut misigissarputit. nâgdliungnere atuardlugit tássausínauvoĸ sôrdlo ikíngúmit uvagut misilingneĸarnivtínit sákortunerussumik misilingneĸarsimassumit kajumigsârneĸardlune. nalúngínavtigo inûp avdlap misilingneĸarsimanine  aulajaitdlune atorsimagâ, misigeĸatigigâtigutdlo, uvagútaoĸ aulajáisínáusaugut.

9. inuit avdlat agssuarnáissutsimingnik aulajangiússinerat uvavtínut ĸanoĸ iluaĸutausínauva?

⁹ pissariaĸartitavut nalúngínamigit Jobimik agdlagkat Jehovap agdlangneĸartísimavai Jobitut agssuarnáissutsivtínik aulajangiússiniarnivtíne ikiorumavdluta. (Rûmamiut 15:4; Jâko 5:10, 11) Gûtip nalúngilâ sôrdlo timip pisatai nangminêrdlutik ĸanoĸ ilioriarsínáungitsut, taimatut kivfaisa ilumôrtut kivfaĸatitik utarĸissarigait. (1 Korintumiut 12:20, 26) atautsimêrssuarnerit „agssuarnáissutsimingnik aulajangiússissut“ ungasíngitsúkut pisimassut atuagagssiamik ûmínga atuartartut milliûniligpagssuit najûvfigisimassait erĸaeriartigik. najũsimassut erĸaimásavât ĸanoĸ nuánertigissoĸ inugparujugssuit inûnerme anguniagkatut pingârnerpautitdlugo Gûtimut agssuarnáissutsimingnik aulajangiússiniartut nâpeĸatigalugit. agssuarnáiniartuarnigssamut kãmagtûtauvdluarsimavoĸ najũtut nalúngingmássuk atautsimêrssuaĸatitik tûsintiligparujugssûssut — sulivfingmingne imalũnît atuarfingmingne — misilingneĸarnerit angnikitdliornartut atortitdlugit agssuarnáituartut! — 1 Pîtruse 5:9.

10. (a) inûp atugkane ĸanoĸ erĸarsardlune erĸortumik isumaĸarfigíngitsôrsínaulersarpai? (b) Jobip suna nalornilerpâ?

¹⁰ ilâtigutdle atugkavut erĸortumik isumaĸarfigíngitsôrtarpavut, sôrdlo Jobísaoĸ taimailiorsimassoĸ. inuk nâgdliungârtoĸ isumatsangârtordlo ímaĸa oĸarumásaoĸ: ’sôĸ Gûtip tamákunínga atugaĸartípânga? sôĸ tamána pitípâ?’ ímaĸalo aperiumasínáusaoĸ: ’Gûte kivfartûtdlugo sumut iluaĸutauva?’ nâgdliugtitsissine nalugamiuk iluartûnerup mãnákut iluaĸutaunera Jobip aperssûserpâ, inuit ajúngitsut ajortutut agtigissumik, ímaĸalũnît ajortunit angnerussumik, nâgdliugtarmata. (Jûpe 9:22) Elihup oĸausê nâpertordlugit, Job oĸarsimavoĸ: „súkut iluanârnerpunga ajortuliarnavêrsârama.“ (Jûpe 35:3) angnikitdliornerputdle kiserdluínât sangmivdlugo erĸarsauteĸarnavêrsârtariaĸarpugut, atugkavut er- ĸortumik isumaĸarfigíngitsôrĸunagit Gûtimigdlo kivfartũssinerup iluaĸutigssâ aperssûserĸunago.

11. Elihup Job ĸanoĸ oĸardlune ajúngitsumik narĸigpâ?

¹¹ Elihup Job pissariaĸartumik narĸigpâ, pisimassut sujunertamingnut nalerĸutdluarnerat pissariaĸarneratdlo navsuiardlugit uparuaramiuk Jehova Jobimit ĸutsingnerungârtoĸ. (Jûpe 35:4, 5) Elihup takutípâ ĸanoĸ pissoĸaraluarpatdlũnît isumaĸarnavĩsassugut Gûtip soĸutigíngíkâtigut, ãma sunalũnît túngaviginiardlugo erĸarsarnavĩsassugut Gûte ajoĸuserniardlugo erĸorsínaugigput táussuma nâpertuivdluángitsumik iliorsimanerisut issigineĸarsínaussut patsisigalugit. „ajortuliaraluaruvit ĸanoĸ písaviuk?“ Elihup Job aperâ, „pinerdlungnitit amerdlagaluarpata súsaviuk?“ (Jûpe 35:6) âp, Gûtip avĸutigerĸussai ĸimagdlugit imalũnît táuna kivfartũkungnaerdlugo Gûte ajoĸuserniardlugo erĸorniásagugko, Gûte ajoĸusernago ingminut ajoĸusĩnásautit.

12. agssuarnáissuserput Gûtimut ĸanoĸ súniuteĸarsínauva?

¹² áipâtigut Elihup takutípâ erĸortumik iliortaruvta Jehovap nangmineĸ iluaĸutigísángíkâ. sôruname, agssuarnáituaruvta Gûtip nuánârutigísavâ, áipâtigutdle imáingilaĸ Gûtip patdlorfigingningnerput píngitsôrsínáungíkâ, sôrdlo takutitsiarneĸartoĸ Elihup Jobimut aperĸutânit: „iluartûguvitdlũnît sumik tunísaviuk, sunalũnît agssangnit písanerpâ?“ (Jûpe 35:7) Gûtip inûnermik tunivâtigut, táunalo píssutigalugo anersârtortarpugut aulavdlutalo piuvdlutalo. táussuma sût tamaisa pigai! (apustilit suliait 17:25; 1 nalunaerssûtigdlit 29:14) taimáitumik iluaitsûgaluaruvta iluartûgaluaruvtalũnît Gûtimut nangminermut súniuteĸarnaviángilaĸ. — Jûpe 35:8.

 narĸingneĸarnivtíne

13. (a) Jobip narĸingneĸarnine ĸanoĸ iliûseĸarfigâ? (b) tamavta suna sángĩssutigârput?

¹³ Jobip sujugdlermik Elihumit tauvalo Jehovamit narĸingneĸarnine ĸanoĸ iliûseĸarfigai? ilagsivai, perĸigsimivoĸ ’ivssume arssanilo igsiavdlune’. (Jûpe 42:6) âp, Job nikanartípoĸ, kúkusimanine miserratiginago. taimatut nikanartíneĸ nersornartíngínerparput? uvagúme? nauk Jobitut aulajaitdluta agssuarnáissutsivtínik aulajangiússissûgaluardluta, tamavta kúkussôrajugpugut, ardlâtigutdlũnît patajavdluta. (Jâko 3:2; Galâsiamiut 2:11-14) ĸanoĸ iliúsaugut kúkussôrsimanivtínik imalũnît nãmagdluínángíssutsivtínik inungmit avdlamit, ímaĸa inûsungnerussumit agdlât, sôrdlo Elihu Jobimit inûsungnerussoĸ, uparuarneĸaruvta? — Jûpe 32:4.

14. (a) narĸingneĸarângamik inuit ĸanoĸ iliorajugpat? (b) sût kúkunernut imalũnît erĸúngitsumik nalilînernut píssutaoĸatausínáupat, narĸingneĸarnermigutdlo Job ĸanoĸ iliordlune maligagssiuivdluarpa?

¹⁴ narĸingneĸardlune piuminartángilaĸ. (Eprîarit 12:11; ússatit 3:11, 12) píngitsûtíniarajugpugut. Jobitútaoĸ, ímaĸa piâraluta ajortuliorsimángilagut erĸúngitsumigdlũnît oĸarsimanata. ímaĸa ajúngitsumik píssuteĸarniartarpugut. ímaĸale ilisimassaĸardluarnata oĸarsimavugut, ímaĸalo pâsingningnikitdluta imalũnît misigingneĸataunata oĸartôrsimavdluta. ímaĸa oĸautsivut ámivta ĸalipautâ imalũnît inuiaĸatigĩssuserput píssutigalugo pingâkujugpasigtumik anísimavavut, imalũnît isumarput bîbilime túngaveĸángitsumik sukangnerpatdlârtumik aulajangiúsimavdlugo. ímaĸa uparuarneĸarpugut oĸautigisimassavta nangmineĸ isumarput aulajangersimassoĸ erssersínerugât inuitdlo avdlat ajoĸuserait anersãkut ũmâríssusîsigut navianartorsiortitdlugit agdlât. narĸingneĸaruvta miserratiginago Jobitut oĸásanerpugut ’sujunersíngisavut oĸautigisimavdlugit’, oĸauserisimassavutdlo utorĸatsíssutigalugit? — Jûpe 42:3, 6.

Gûte tatigalugo, pisũssutit tatiginagit

15. ĸanoĸ nalúngísínauvarput Jobip pisũssutit tatigissaríngíkai?

¹⁵ Jobip Gûtimut tatigingningnera Bildadip aperssûserpâ, taitsiardlugo Jobip Gûte puiorsimagâ avdlalo tatigilersimavdlugo. (Jûpe 8:13, 14) kisiánile nauk nunap pê amerdlasôrssuit pivdluarĸuneĸautigisimagaluardlugit, Jobip tamáko tatigissaríngilai. pigissaerutdluínarame agssuarnáissusia súnguamigdlũnît aulatíneĸángilaĸ. (Jûpe 1:21) naggatâtigut igdlersornermine Job oĸarpoĸ: „kûlte isumavdlûtigisimaguvko erdlingnartuliagssamut oĸardlunga: tatigâvkit, peĸûtíka tipaitsûtigisimaguvkitdlũnît amerdlaĸingmata, agssáka amerdlasôrssuarnik katerssugaĸarmata . . . mássalo tamánátaoĸ ajortuliaorĸajartoĸ erĸartũssissut isumagissagssât, taimailivdlunga Gûte tagpínga miserratigisimásagavko.“ — Jûpe 31:24-28.

16. (a) ingmivtínut ĸanoĸ misiligtariaĸarpugut? (b) tatigissine Gûtip sumik neriorssorpai?

¹⁶ uvagúme sût tatigâvut — Jehova imalũnît nunap pê pigissavut? oĸimailutaivingne erĸortûssune oĸimailutarneĸaruvta, sôrdlo Job oĸimailutarneĸarumavdlune oĸarsimassoĸ, tamatumûna agssuarnáissuserput Gûtip pâsísanerpâ? inûnerme soĸutigissavta pingârnerpârtarinerpât agssuarnaitsûvdluta inôriauseĸarumavdluta Satanip mítatigdlîvdlune taimáineraineranut Jehova akíssutigssarsisíkumavdlugo? imalũnît nuánârniarumatússuserput pigissaĸarumatússuserputdlo nãmagsiniardlugit soĸutiginerunerparput? nersornássusigssaralua Jobitut iliorsínauguvta Jehovavdlo ũmatâ tipaitsugtitdlugo táuna tatigalugo, ingassagtumik pingârtínata nunavdlo pê pigisínaussavut pingârtípatdlârnagit! Jehova neriorssuivoĸ tatigiguvtíne, ingminut pingârtitaunerussut sagdliutíkuvtigik, iperásanata ĸimásanatalũnît. — Matîuse 6:31-33; Eprîarit 13:5, 6.

kinguâgssiûtitigut ilerĸugssat

17. Jobip „tugpatdlersaissuisa“ Job únerdlûtiginiardlugo sût taitsiarpait, ilerĸugssatigutdle ilerĸune Jobip ĸanoĸ oĸautigai?

¹⁷ Jobip ilumũngitsumik tugpatdlersaissuisa torĸardlugo únerdlûtigíngíkaluarpât kinguâgssiûtitigut kángunartuliortûnerardlugo, ĸavsêriardlutigdle pasinarsĩnardlugo oĸautigissarpât issertortúkut ajortuliortartoĸ, tamánalo píssutigalugo Gûtip pitdlarâ. pigigsârtûgame, „pavángarnitsanit tamanit pingârnerugame“, áiparîngnerme avatâtigut atoĸateĸarniarnigssaminut  Job periarfigssaĸartarsimásaoĸ. (Jûpe 1:3; 24:15) Gûtip kivfai avdlat, Jobip nalâta sujornatigut kingornatigutdlo, atoĸatigîngnermut túngassumik ússigauvdlutik nákáinartarput. (1 Môrsase 38:15-23; 2 Sâmuale 11:1-5) Jobile ingminut igdlersorpoĸ kángunartuliorsimaneragaunine ilumũngínerardlugo, nalunaerdlune: „issíka angerfigeĸatigãka; suvdlunga niviarsiaĸ nalunaerssúsagiga? ũmatiga támartísimagaluarpat arnamut, alapernaerssuisimagaluarumalo tugdlima matuata kigdlingane . . . kángunartuliáusangmat tamána ajortuliauvdlunilo erĸartũssissut isumagissagssât.“ — Jûpe 31:1, 9-11.

18. suna píssutigalugo kinguâgssiûtitigut agssuarnaitsuliortuarneĸ taima artornartigâ, sunale píssutigalugo pivdluásaugut tamákunûna agssuarnaitsuliortuaruvta?

¹⁸ Gûtip kivfaisa agssuarnáissusiánik issertortúkut aseroriartortitsiniarnermine Satanip periausînit tamanit kángunartuliornermut ússînerit kinguneĸardluarnarnerpãnguatsiarput. (4 Môrsase, kapitale 25) Job agssuarnáissusiatigut maligsínauviuk kinguâgssiûtitigut kángunartuliornermut ússigaunerit tamaisa akiordlugit? ilumut unangmigdlerneruvoĸ, pingârtumik silarssuarme atoĸatigîngnermik pileritûvfioĸissume matumane kángunartuliornerit atugaungârfiáne. erĸarsautigiugdle pivdluássusigssarput navsuerĸuneĸaruvta Jobitut isumavdluardluta oĸarsínáusaguvta: „agssuarnáissusera Gûtip ilisarísavâ“! — Jûpe 31:6, NW.

sût ikiortigisínauvavut

19. agssuarnáituásaguvta sût píngitsôrata pissariaĸartípavut?

¹⁹ Jobimik agssuarnáissusiatigut malingningniarneĸ ajornaitsũngilaĸ, uvdlumíkúme Satanip agssuarnáissuserput akornuserniardlugo Jobip agssuarnáissusianik akornusîniarsimanermisut tamaviârtigingmat. taimáitumik pissariaĸardluínarpoĸ sákutũssutit Gûtip pê tamaisa atísavdlugit. (Evfisumiut 6:10-18) tamána ilâtigut isumaĸarpoĸ erĸarsautivtigut Gûte iligissariaĸarigput, Jobip erĸarsartausiatut erĸarsartauseĸardluta, uvagut ilaĸútavutdlũnît ĸanoĸ iliorângavta táussumúnga iluaritíniardluta sianigalugo. (Jûpe 1:5) taimáitumik bîbilimik atuarĸigsârtarneĸ, ugpeĸativtínik nâpeĸatigingnigtarneĸ ugperissavtínigdlo inuínarnut nalunaerutigingnigtarneĸ pissariaĸardluínarput. — 2 Timûtiuse 2:15; Eprîarit 10:25; Rûmamiut 10:10.

20. (a) suna neriûtigalugo misilingneĸarnivtíne napássutigisínauvarput? (b) agssuarnáissutsimingnik aulajangiússiuartut akigssarsiagssât tugsiausiortup taissâ suna pisínauvarput?

²⁰ kisiánile misilingneĸarnivtíne pingârtumik napássutigisínauvarput Jobip napássutigisimassâ — isumavdlûtigigamiuk inûneĸ mána tássáungitsoĸ tamarme. „inuk toĸugune kingumut ũmásava?“ Job aperivoĸ. akivdlunilo oĸarpoĸ: „ĸaerĸussísassutit, uvangalo akísagivkit.“ (Jûpe 14:13-15) táussumatut ĸularutigssáungitdluínartumik isumavdlûtigiguvtigo Jehovap kivfane ilumôrtut toĸussunit makitíkumârai, píssagtísínáusaugut Satanimit misiligaunigssavut ĸanoĸ íkaluartutdlũnît atúsavdlugit. (Eprîarit 6:10) ĸangarssuardle bîbilime tugsiausiortoĸ agdlagsimavoĸ: „uvangame najúmiumârparma agssuarnaisitdlunga, kĩnavitdlo sânîtíkumârparma nâgssáungitsumik.“ (tugsiaut 41:13, kal. ator.) ĸanortoĸ sujunigssaĸ pivdluarnartoĸ tamavta ingmíkut atugagssaritigo — Jehovamit nâgssáungitsumik napatitauvdluta atatitauvdlutalo agssuarnáissutsivtínik aulajangiússissûvdluta kivfaringmatigut! (wD 1/3 86)

uko akisínauvigit?

□ kíkut Jobitut ísimápat, sutigutdlo ingmingnut sanigliúneĸarsínáupat?

□ Jobip misilingneĸarnermine ĸanoĸ periauseĸarnera uvagut sumik ilíniarfigisínauvarput?

□ narĸingneĸarame Job ĸanoĸ iliorpa, uvagutdlo tamána sumik ilíniarfigisínauvarput?

□ nunap pê kinguâgssiûtitigutdlo ilerĸugssat pivdlugit Job ĸanoĸ maligagssiuivdluarpa?

□ sût ikiûtigalugit Jobitut agssuarnáissuserput aulajangiútuarsínauvarput?

[Atuaqqissaarnermi apeqqutit]

[Qupp. 10-mi assiliartaq]

ivdlit Jobitut ilâtigut ĸularissarsimaviuk agssuarnáitûjuarnerup iluaĸutaunera?