Jobip agssuarnáissusia — sôĸ taima malungnartigâ?

„anerningerserdlunga agssuarnáissusera uvavnit saĸigtísángilara.“ — Jûpe 27:5.

1. Job kinauva, ĸanordlo nalúngilarput ilumut inûsimassoĸ?

JOB inuiait oĸalugtuarissauneráne angutauvoĸ malungnartoĸ. nunap pînik amerdlasôrparujugssuarnik pigingnigtuínáungilaĸ, ãmátaordle misigingneĸataussumik erĸartũssissûnermigut sujulerssuissûnermigutdlo atarĸineĸardlune. bîbilime agdlagsimavoĸ „angut táuna pavángarnitsanit tamanit pingârneru“ssoĸ. (Jûpe 1:3; 29:12-25) Noap Danielivdlo taineĸarneráne Jobísaoĸ taineĸarpoĸ angut iluardluínartoĸ. (Hisĩkiale 14:14, 20) ãmátaoĸ bîbilime Job kristumiunut maligagssaussutut oĸalugtuarineĸarpoĸ, taima agdlagsimaneratigut takutitsivdlune Job ilumut inûsimassoĸ. — Jâko 5:11.

2. Jobip Satanimit misilingneĸarnera ĸanga pisimassoĸ ĸanoĸ aulajangersínauvarput?

² Job Uzip nunâne, mãnákut Arabiamik taineĸartume, najugaĸarsimavoĸ. nauk Israelíkũngíkaluardlune, Job Jehovamik patdlorfigingnigtûvoĸ, sôrdlo Jehovap Satanimut tamána uparuarâ. Gûtip oĸausîsa „táussumatut ítoĸángingmat nuname; angut tamássa agssuarnaitsoĸ perĸusersuitsoĸ“, takutípât taimane Gûtip kivfânik malungnartumik avdlamik inûssoĸángitsoĸ. (Jûpe 1:8) taimáitumik Jobip Satanimit misilingneĸarnera pisimásaoĸ ungasigsumik erĸardlerissaisa, Israelíkut, Ægyptenime inugsiautaunerisa nalâne — agssuarnáissutsiminik aulajangiússissup malungnartup Josefip 1657-ime u.n.a.s. toĸunerata kingornagut Mosesivdlo agssuarnaitsumik inôriauseĸalernerata sujornagut.

3. kiap Jobimik agdlagkat agdlagpai, ĸanordlo ilivdlune tamákunínga pâsíssutigssarsisínausimava?

³ Moses Jobimik agdlagkanik agdlagtũnguatsiarpoĸ. ĸanordle ilivdlune Jobip misilingneĸarnera nalujungnaerniarsínausimásavâ? 1553-ime u.n.a.s. Ægyptenimit ĸimâssariaĸarnerme kingornagut Moses Midjanimi,  Uzip nunâta ungasíngitsuanĩtume, najugaĸalerpoĸ. (2 Môrsase 2:15-25; apustilit suliait 7:23-30) taimane Jobip inûnerme ukiue kingugdlît 140-t Jehovap Jobimut pivdluarĸússutigissai inûvfigai. (Jûpe 42:16) kingusingnerussúkut Israelíkut puilassuitsume angalaornermik naggatâta tungâne Uzip erĸânîngmata, Jobip inûnerata ukiue kingugdlît toĸuneralo Mosesip tusâmasínausimásavai.

Jobip kigdlilingmik ilisimassaĸarnera

4. (a) Jobip Jehova ĸanoĸ pâsíssutigssarsivfigisínausimavâ, sunalo píssutigalugo Abrahamip Isakivdlo kinguâve atássuteĸarfigisimásavdlugit? (b) ĸanoĸ ilivdlune Job agssuarnáissutsimigut malungnartúngorsimava?

⁴ Job misilingneĸarame, Gûtimik táussumalo sujunertainik kigdlilĩnarmik ilisimassaĸarpoĸ, taimane bîbilip atuagartaisa ardláinâtdlũnît sule agdlagsimángingmata. kisiánile Jehovap Abrahamimut, Isakimut, Jakobimut Josefimutdlo iliûserisimassainik Job ilisimassaĸarsimásaoĸ, Abrahamip ĸatángutâta Nakorip angajugdliliâ Uz Jobip sujuaissarisimangmago. ãmátaoĸ Uzip ĸatángutâta Betuelip Isakip nulia Rebekka panigâ, Josefilo erngutarĸiutigâ. (1 Môrsase 22:20-23) Jehovap Abrahamimut táussumalo kinguâvinut oĸauseĸautigisimassainik ilisimassane Jobip ĸularnángitsumik erdligisimásavai, Jehovamutdlo iluaritíkusugdlune. taimáikame Job agssuarnáissutsiminik aulajangiússissúngorpoĸ malungnartoĸ, perĸusersuitsûvdlune Jehovamutdlo túniutdluínardlune.

5. pingârtumik suna erĸarsautigalugo Jobip agssuarnáissusia naleĸángila?

⁵ Josefip Ægyptenime toĸunerata kingunerssuatigũngitsoĸ Jobip agssuarnáissusia ĸilangme takugssáungitsume Jehova Gûtip Satanivdlo akerdlerĩssutigilerpât. agssuarnáissusiatale akerdlerĩssutigineĸalersimanera Jobip ilisimángilâ. pingârtumigdlo nâgdliungnerminut suna píssutaussoĸ nalugamiuk agssuarnáissutsiminik uniorĸutitsíngínera taima malungnartigaoĸ. Gûtivdle kivfaisa tamatuma kingornagut inûjumârtugssat iluaĸutigssãnut, Jobip agssuarnáissusiata akerdlerĩssutigineĸarneranut atatitdlugit pisimassut Jehovap Mosesimut agdlautigineĸartípai.

Jobip agssuarnáissusia akerdlerĩssutigineĸartoĸ

6. (a) Gûtip Satanivdlo akornáne akerdlerĩssuteĸarneĸ ĸanoĸ atautsimĩnerme ĸilangme pisimassume ilisimaneĸartíneĸarsimava? (b) ĸanga akerdlerĩssut tamána autdlartípa, sunalo akerdlerĩssutigineĸarpa?

⁶ Jobimik agdlagkane agdlagsimassut takugssáungitsune pisimassut ulêrpait, ĸilangmilo Jehova Gûtip sâne íngilit atautsimĩneránik takungnigsínãgortíneĸarpugut. tássane Jehovap Satan najũtoĸ erĸaisípâ Jobitut „ítoĸángingmat nuname; angut tamássa agssuarnaitsoĸ perĸusersuitsoĸ, Gûte mianeralugo ajortordlo alardlugo pissartoĸ“. (Jûpe 1:8) akerdlerĩssuteĸarnera ersserĸigpoĸ, Jobip agssuarnáissusia ilángutdlugo akerdlerĩssutigineĸardlune. akerdlerĩssutdle nutâjúngilaĸ. akerdlerĩssuteĸarnera taitsiarneĸarsimavoĸ Satanip Adam Evalo Gûtimut tunússisingmagit, oĸardlunilusôĸ: ’periarfigssíneĸásagaluaruma ilingnik kivfartũssiungnaersísínáusaváka.’ — 1 Môrsase 3:1-6.

7. Jobip agssuarnáissusianut píssutausínaussut navsuiarniardlugit Satan ĸanoĸ oĸarpa, Djævelivdlo Gûte ĸanoĸ unangmigdlerpâ?

⁷ Gûtip kivfaisa atautsimĩneráne ĸilangme pisimassume, Jobip agssuarnáissusianut sût píssutausínaussut Satanip avdlatut ajornartumik navsuiarniartariaĸarpai. „Jûpip asulĩnaĸ Gûte mianerinerpâ?“ aperivoĸ. „tamagingnit ungalôrsimángínerpiuk táuna igdlualo pigissailo tamaisa? . . . kisiáne agssatit isagtíkaluásagitit,“ Satan unangmigdlerdlune oĸarpoĸ, „pigissai tamaisa agtordlugit; sâgdlutit [perdlorĸuju]mãngínerpâtit?“ — Jûpe 1:9-11.

8. (a) Satanip unangmigdlernera Jehovap ĸanoĸ iliûseĸarfigâ? (b) Satanip Job ĸanoĸ ilivdlugo sákortûmik erĸortítarpâ?

⁸ Satanip unangmigdlernera Jehovap akuerâ. Jobip agssuarnáissusia ĸularíngivigkamiuk Satan akivâ: „tássa pigissai tamaisa isumangnik píkit, táuna nangmineĸ kisiat isagtoĸinago.“ (Jûpe 1:12) ernĩnaĸ Satanip Job erĸortalerpâ. sabæerit sãssússiartortut Jobip ugsiutai 1000-it siutitûtailo arnavíssat 500-t tigdligpait, ûmassûtinik pârssissut tamaisa atausĩnaĸ pínago toĸutdlugit. tauva Satanip ingneĸ ĸilangmit tugtípâ Jobip savautai 7000-it pârssissaitdlo ilángutdlugit, atausĩnaĸ pínago,  nungutdlugit. tauva Satanip kaldæerit katerssat pingasut pitípai Jobip ĸatigagtûtai 3000-it autdlaruterĸuvdlugit, pârssissut tamaisa atausĩnaĸ pínago toĸutdlugit. naggatâtigut Satan anorerssuarmik pitorartitsivoĸ igdlo Jobip ĸitornaisa ĸuliussut nagdliútorsiorfigissât erĸortitdlugo, tamarmigdlo toĸúput. kingornisigut, ajunârnerne amiákûvdlutik inûssut tugdlerîgínardlutik aggerput Job tusagagssianik amîlârnartunik tusardleriartordlugo. — Jûpe 1:13-19.

9. Jobip atugardliortitaunerminik atugaĸarnera sûp artornarnerulersípâ, Jobivdle ĸanoĸ periauseĸarfigai?

⁹ ajunârnerssuit ila ánilârnangãssusê! kina tamákunúnga pissûssoĸ Jobip ilisimagaluarpago artornarsimásaĸaut. ilisimángilâle! naluvâ akerdlerĩssúme ĸilangme ingerdláneĸartume pingârnerssauvdlune Jehovavdlo atorâne takutíniardlugo inoĸartoĸ agssuarnáissutsimingnik aulajangiússisínaussunik nauk Satanimit nâpertuivdluángitsumik nâgdliugtíneĸartaraluardlutik. taimáitordle aliasungârdlune agdlâtdlo isumaĸardlune ĸanoĸ iliorníkutdlũnît Gûte ánaissaĸarnerminut pissûssoĸ, Job oĸarpoĸ: „[Jehovap] túniúkamigit [Jehovap] tiguvai, [Jehovap] arĸa ĸujanarsile.“ âp, „tamána tamât Jûpip ajortuliautigíngilâ, isumaitsutut iliúngilaĸ Gûtimut“. — Jûpe 1:20-22.

10. (a) Job pivdlugo Satan ãma sumik iliûseĸarĸuva, sunalo píssutigalugo Jehovap tamána akuerssíssutigâ? (b) Jobip nãkinangârnerata sût kingunerai?

¹⁰ íngilit atautsimêrĸingneráne Satanip ila nikanartitáussusia Job pivdlugo Jehovap erĸaisingmane: „sulilo agssuarnáissutse aulajangiúpâ.“ Satanile taimaitíngilaĸ. mãna unangmigdlerdlune oĸarpoĸ Job timâgut erĸúsavdlugo periarfigssíneĸarune, Jobip Gûte sâgdlugo perdlorĸúsagâ. Job taima erĸorneĸásagaluarune agssuarnáituásassoĸ tatigigamiuk, Jehova akuerssivoĸ, Satanile mianerssorĸuvdlugo Jobip inûnera tigorĸunago. tauva Satanip Job perdlungmit naláutípâ „ajússanik ajortunik isigaisa aluinit kavsseranutdlo agdlât“. (Jûpe 2:1-8) Job takuvsunarsingârmat akârnaitdlingârmatdlo erĸardlê ikíngutailo tunuarput, ilisarisimassaisalo mitagdlerpât. — Jûpe 12:4; 17:6; 19:13-19; 30:1, 10-12.

11. erĸorneĸarneĸ ãma suna Jobip atortariaĸarpâ, ãma nauk tamákunínga tamanik atugardliungâraluardlune agssuarnáissutsiminik aulajangiússinera suna pivdlugo taima tupingnartigâ?

¹¹ sule atautsimik erĸorneĸarpoĸ! Jobip nulia ugpernikitdlivoĸ. nuliata oĸarfigâ: „sule agssuarnáissutsit aulajangiúniarpiuk? Gûte [perdlorĸuínauk] toĸuvdlutitdlo.“ Jobivdlo oĸarfigâ: „arnatut silaitsutut oĸalugputit; ajúngitsoĸ Gûtimit pigavtigo ajortoĸ ilagsísángínerparput?“ sôrdlo oĸalugtuame agdlagsimassoĸ: „tamána tamât Jûpip ajortuliautigíngilâ ĸardluminik.“ (Jûpe 2:9, 10) erĸaimaguvtigulo Job pâsitíneĸarsimángitsoĸ nâgdliungnerminut suna píssutaussoĸ, agssuarnáituarnerata ila tupingnássusia!

avdlap tungânit sãssúneĸarnera

12. (a) Jobimik tugpatdlersaiartortut kíkũpat? (b) Satanip angutit táuko ĸanoĸ sákugai Job sule misilingniardlugo?

¹² Satanivdle tamáko nãmagíngilai. autdlartitsivoĸ angutinik pingasunik ilisimassûsorineĸartunik; táukua ímaĸa Job nangmineĸ ilisarisimavât imalũnît „pavángarnitsanit tamanit pingârneru“nera tusâmavdlugo. Jobimit utorĸaunerungâtsiánguatsiarput. (Jûpe 1:3; 15:10; 32:6) ilait mardluk Jobip ungasingnerussumik erĸardlerai. Temaníkûssoĸ Elifaz Abrahamip kinguâvisa ilagât, Esaup erngutâ Teman sujuaissaringmago, Sjuákûssordlo Bildad Abrahamip ernerata Sjuap kinguâvisa ilagât. (Jûpe 2:11; 1 Môrsase 36:15; 25:2) Zofarip erĸardlerît kíkut nagguviginerai ĸularnaitsumik ilisimaneĸángilaĸ. aggerput Job tugpatdlersariartortûssârdlugo; imáipordle Satanip sákugai Jobip agssuarnáissusianik ajortumêrniainermine. sôrdlo politikerit kigdlisiuissûtitaisa ikíngutaussûssârdlutik parnaerússat ilumôrfigissagssamingnut ilumôrnerat ajortumêrtarât nâlagkersuissutdlo átavigissáinut tunússititdlugit, Satan neriugpoĸ ’tugpatdlersaiartortitaisa’ Job Gûtimut tunússitísagât. — Jûpe 16:2, 3.

13. (a) tikiúkamik Jobimut tikerârtut ĸanoĸ iliorpat? (b) oĸatdlíneĸ autdlartingmat, sût oĸatdlíssutigineĸarnerúpat?

¹³ tikiúkamik tikerâtit pingasut uvdlut arfineĸ mardluk únuatdlo arfineĸ mardluk oĸaratik igsiáput Jobip ániangârnera nikanarsagauneralo  sákortungârtoĸ issigalugit. (Jûpe 2:12, 13) kîsame Elifaz utorĸaunerúnguatsiartoĸ oĸalulerpoĸ, oĸaloĸatigîngnerit pingasunik ingmíkôrtulerdlugit ilúngunássusiat pingârnerussortaitdlo aulajangersardlugit. Elifazip, kingornagutdlo ikíngutaisa, oĸalugiautigissait únerdlûtaunerúput. únerdlũssissut pingasûssut tamarmik ingmíkut oĸalorêrângata Jobip akissarpai, únerdlûtinut píssutiginiagait narĸigssortardlugit. oĸaloĸatigîngnerup ingmíkôrtuisa pingajuáne Zofar oĸauseĸauteĸángilaĸ, oĸausigssaerúsimánguatsiardlune. tássa, Zofar mardloriáinardlune oĸalugpoĸ, Elifazile Bildadilo tamarmik pingasoriardlutik oĸalugput.

14. pingasûssut táukua Job únerdlûtigalugo taimáineráissutit ĸanoĸ ítut atorniarpait, Satanivdlo Jesus ússeramiuk periauseĸ tamákunúnga ássingussoĸ ĸanoĸ atorpâ?

¹⁴ Elifazip oĸalugiarnere avdlat oĸalugiarnerinit takinerúput, oĸausîlo avdlat oĸausînut nalerĸiutdlugit sukangnerpatdlãngitdlat. Bildadip oĸausê ánernarnerúput, Zofarivdlo sule ánernarneruvdlutik. taimáineráissutiginiagkatik nakutitseriaivdlutik iluarsartũtarpait Satanip sujunertâ nãmagsiniardlugo, tássa: Jobip agssuarnáissusia akornuserniardlugo. piviussûssut taissarpait, kisiáne erĸúngitsunut atortítardlugit kúkussumigdlo isumaĸartítardlugit. Jesus nakutíniaramiuk Satanip tamánarpiaĸ periauserâ. agdlagsimavfik oĸausertaĸartoĸ Gûtip íngiliata kivfâ arĸunartailísagâ íssuardlugo, Satanip Jesus kajumigsârpâ Gûtip ernerigâne ugpernarsarĸuvdlugo nâlagfingmit nákârdlune. (Matîuse 4:5-7; Tussiaat 91:11, 12) Job sivisungâtsiartumik Satanip ilerĸuatut taimáinerainernik taimáitunik tusagaĸartitauvoĸ.

15. Jobip angnikitdliortitauneranut Elifazip suna píssutaunerarpâ?

¹⁵ autdlarnerdlune oĸalugiarnermine Elifazip imáinerarpâ Jobip angnikitdliortitaunera Gûtip pitdlautigigâ ajortinit píssuteĸartoĸ. „ĸanga píngitsumik piunêrútoĸarpa?“ aperivoĸ. „sôrdlume ilait takussaraluaríka, piúngitsuliornerit [nautsîagssatut] agssatdlagterfigigamíkik erdloĸinartugssanigdlo siaruarterigamik tamákunínga katerssugaĸartartut.“ (Jûpe 4:7, 8) nangitdlune Elifazip Gûte kivfaminik tatigingníngínerarpâ. „ata, kivfane tatigisínáungilai,“ Elifaz oĸarpoĸ, „íngilinilo kúkussartûtípai; ímaĸa angnermik igdlune marraussune ineĸartut.“ — Jûpe 4:18, 19.

16. Elifazip sãssúsinera nangitdlugo Bildad ĸanoĸ oĸauseĸarpa, ássersûtdlo suna erĸúngitsumik íssuarpâ?

¹⁶ tugdliutdlune Bildad oĸalungníkut sãssússilerpoĸ. „minguitdlutitdlo perĸusersuíkuvit,“ oĸarpoĸ, „tauva eĸêrumârpoĸ ilingnut, inigissatdlo iluartulivfiussoĸ perdloĸángisísavâ.“ Bildadip uparuarpâ papêruse kûgârtuvdlo ivigai imermik pineĸarnatik panersertartut toĸujartortartutdlo, isúmanilo erĸortumik inerpâ oĸardlune: „taimáiput Gûtimik puiortartut.“ kisiánile ila kúkússusia ássersûsiaĸ tamána Jobimut atortíkamiuk oĸardlunilo: „ivdlernaitsuvdlo [tunússissup] neriugissâ nungúsavoĸ“! — Jûpe 8:6, 11-13.

17. oĸautsit kimigtût sût Zofarip oĸauserai?

¹⁷ Zofarip oĸausê sule kimigtunerúput. ’ĸanortoĸ Gûte oĸalugkile erĸarsáunilo ilingnut anitdlugo!’ oĸarpordlusôĸ. ’iliûserisimassatit Gûtip nalúngilai. pissagssarigaluangnit angnikingnerungârtumik pitdlarpâtit. ajortuliatit iperákit ajússutsitdlo taimaititdlugo, tauva torĸigsiumârputit amerdlasûnigdlo ikíngutigssarsísavdlutit.’ — Jûpe 11:4-6, 14-20.

18. oĸaloĸatigîngnerup ingmíkôrtuisa áipãne pingasûssut táukua Jobimik sãssússinertik ĸanoĸ nangípât?

¹⁸ oĸaloĸatigîngnerup ingmíkôrtuisa áipãne  Jobip agssuarnáissusianik sãssússinerat Elifazip nangípâ. ’Gûtip íngilitdlũnît tatigíngilai, iligtut ítoĸ mingnerungârtumik tatigísavdlugo! iluaitsut ajornartorsiortuáinarput.’ (Jûpe 15:14-16, 20) taimáineragait Jobip aulajaitsumik akiormagit Bildad kamagdlune oĸarpoĸ: ’ĸáumarĸutit ĸamíneĸásaoĸ. inûsimanerit erĸaiungnáisaoĸ. Gûtimik puiortartut tamána atugagssarât.’ (Jûpe 18:5, 12, 13, 17-21) Jobip pigigsârsimanera erĸartutsiardlugo Zofar oĸarpoĸ: ’nalúngínerpiuk iluaitsut ĸĩmagtardlutik suaornerat sivikitsuínaussartoĸ, tunússissuvdlo tipaitsûtâ ĸângiutiassoĸ? iluaitsut kúkunere ĸilangmiup ulêrtarpai.’ — Jûpe 20:4, 5, 26-29.

19. (a) Elifazip oĸausê nâpertordlugit, inûp agssuarnáissusia Gûtip ĸanoĸ nalilerpâ? (b) Jobimik oĸalungníkut sãssússeĸatigîngneĸ Bildadip ĸanoĸ naggaserpâ?

¹⁹ oĸaloĸatigîngnerup ingmíkôrtuisa pingajugssât autdlarnerdlugo Elifaz aperivoĸ: ’inuk kinalũnît Gûtimut iluaĸutausínauva? ivdlit agssuarnaitsûgaluaruvit Gûtip iluaĸutigísanerpâ? Gutimut uterit,’ oĸarpoĸ, ’ilingnutdlo agtûmássuteĸartut iluarsardlugit. tauva iluarsiumârputit.’ (Jûpe 22:2, 3, 21-23) oĸalugdlutik sãssússinerat Bildadip naggaserpâ. ’nunamĩtoĸ kina minguitsûnerarsínauva?’ aperivoĸ. ’Gûte alutornarpatdlârmat táussumúnga nalerĸiutdlutik ĸáumat uvdloríssatdlo sôrdlo sũngitsut. inuk sule mingnerussumik, Gûtip issaine ĸugdlugiáinartut íkame!’ — Jûpe 25:2-6.

Job ingminut igdlersorpoĸ narĸingneĸardlunilo

20. (a) taimáineráissut nâgdliugtitauneĸ ajortinit píssuteĸartoĸ Gûtip pitdlautigigâ Jobip ĸanoĸ akivâ? (b) ĸanoĸ iliúsavdlune Job aulajangersimava, agssuarnáissusialo Gûtip ilumut pingârtíkâ ĸanoĸ nalúngísínauvarput?

²⁰ nauk nâgdliungâraluardlune ániartitsissime nakutitseriainíkut taimáineragáinut Job atausiáinardlunilũnît akuerssĩnángilaĸ. Gûtip nâgdliungneĸ ajortuliat perĸutigalugit pitdlautigigpago, Job aperivoĸ, tauva „sôĸ iluaitsut inûgínartarpat utorĸángordlutigdlo pisôrssuángortardlutigdlo?“ (Jûpe 21:7-13) Jobivdlo únerdlũssissuisa oĸausînut akerdliussumik Jehovap agssuarnáissutsimingnik aulajangiússissut ilumut pingârtípai, tássûname Satanip mítatigdlîvdlune kimigdlũnît Gûtimik kivfartũssiungnaersitsisínauneraineranut akíssutigssaĸartitsissarmata. (ússatit 27:11; Tussiaat 41:13) agssuarnáissuseĸardlune Jobip ĸularíngilâ, oĸarpordlo: „anerningerserdlunga agssuarnáissusera uvavnit saĸigtísángilara.“ (Jûpe 27:5) Job iliûserisimassane nâpertordlugit taimatut atugaĸartugssáungíkaluarpoĸ.

21. Jobimik tugpatdlersaissûssârtut Elihup ĸanoĸ oĸarfigai, ãma Job pissariaĸartumik ĸanoĸ narĸigpâ?

²¹ sivisûmik oĸaloĸatigîngnerme oĸatdlítut oĸauserissait tamavîsa angutip inûsugtup Elihup nâlaorpai. tauva táuna oĸalulerpoĸ, oĸardlune Jobimik tugpatdlersaissûssârtut oĸausîsa ardláinaitdlũnît Jobip ajortuliorsimaneranut ugpernarsautáungitsut. (Jûpe 32:11, 12) tauva Jobimut sâgdlune oĸarpoĸ: „oĸautsisit tusâváka oĸaravit: minguípunga, pinerdlúngilanga, píngitsûvunga, ajortuliúngilanga; takuvat, patsisigssarsivigânga; ĸíngarssortigisorânga; . . . ata, tamatumûna píssutigissat iluartũngilaĸ.“ (Jûpe 33:8-13; 6:29; 13:24, 27; 19:6-8) ilumôrpoĸ; Jobip akitsisíniarnine pingârtípatdlârpâ. kisiánile, taima oĸarnermigut Gûte ajornerarneĸ ajorpâ, ãma Gûtip ĸanoĸ iliorumârnigssâta erĸortûnera tatigiungnaersimanago.

22. (a) Jehova nâlaorêramiuk Job ĸanoĸ iliorpa? (b) Jobimik tugpatdlersaissûssârtut Gûtip sumik piumavfigai, naggatâtigutdlo Jobip sût atugarai?

 ²² Elihup oĸalungnine naggaseriarmago anorerssuaĸalerpoĸ, Jehovalo nangmineĸ anorerssuarmit oĸalugpoĸ: „kina-una sujúnersũmik târtúngortitsissoĸ ilisarssíngitsutut oĸalugdlune? . . . pigínãngorsarit; aperssúsavavkit, ivdlit ajoĸersúnga.“ Jehova nâlaorêrdlugo, Jobip miserratigíngilâ isumaitsôrdlune, ilisarssivdluarnane, oĸalugsimavdlune, ’ivssumilo arssanilo igsiavdlune perĸigsimivoĸ’. tauva Jehovap Elifaz ikíngutailo mardlûssut ajornerarpai, Job ilitsersordlugo ĸínuterĸuvdlugit. tamatuma perêrneragut Job iluarsisíneĸarpoĸ pivdluarĸuneĸautigalugitdlo ernerit arfineĸ mardluk panîtdlo pingasut kussanartut nerssutautitdlo pigissaraluaminit mardloriáumik amerdlatigissut. tamatuma kingornagut ukiut 140-t inûgame Job „toĸuvoĸ utorĸauvdlune inûnerminigdlo nãmagsisimavdlune“. — Jûpe 38:1-4; 42:1-17.

23. Jobip agssuarnáissusia uvavtínut ĸanoĸ súniuteĸásava?

²³ ilumut, Job angutauvoĸ agssuarnáissutsimigut malungnartoĸ! nalujungnaersínausimángilâ Satanip ajoĸusîumatûvdlune unangmigdlerneragut torâgagssauvdlune. tamatuma Jobip agssuarnáissusia sule ersserĸigsarneruvâ, nauk isumaĸaraluardlune Gûtip nâgdliugtíkâne, Gûte tunúkumángilâ perdlorĸujumanagulũnît. ila tamatuma uvavtínut ilíniutigssauvdluarnera, uvagut nalúngínavtigo kina agssuarnáissutsivtigut misilingneĸartitsissûssoĸ! Job maligagssiâgut maligkumásavarput Jehovavdlo suliarerĸussâne ingerdláinardluta Gûtimut agssortuissup ĸanoĸ atugaĸartísagaluarpatigutdlũnît. (wD 1/3 86)

ivdlit akisínauvigit

□ sût erĸarsautigalugit Jobip agssuarnáissusia malungnangârpa?

□ kíkut Jobimut tikerârpat, sunalo angúsagât Satan neriugpa?

□ Job agssortorniardlugo pingasûssut táukua taimáineráissutit sût atorpait?

□ ĸanoĸ oĸardlune Job ingminut igdlersorpa, kisiánile ĸanoĸ narĸingneĸardlune?

□ suna inernerâ, uvagutdlo ĸanoĸ kivdlingneĸautigísavarput?

[Atuaqqissaarnermi apeqqutit]

[Qupp. 6-mi assiliartaq]

Satanip „tugpatdlersaissûsârtut“ pingasut autdlartípai Job Gûtimut tunússiserĸuvdlugo