Jesusip inuunera ajoqersuineralu

Meeraq neriorsuutigisaq

MARIA Josefilu Nazaretimut uteratik Betlehemimiiginnarput. Jesusip ullut arfineq-pingasunngormagit kipineqarpoq soorlu Guutip Mosesimut inatsisaani peqqussutigineqarsimasoq. Taamani aamma ileqquusimannguatsiarpoq ullut arfineq-pingajussaanni meeraq atserneqartarluni. Josefip Mariallu qitornartik Jesusimik atserpaat, soorlu inngili Gabrielip taama nalunaarfigisimagaatik.

Maanna qaammat ataaseq sinnilaarlugu ingerlareersimavoq, Jesusilu 40-nik ulloqarpoq. Angajoqqaavisamita maanna sumunnaanniarpaat? Jerusalemimi naalaffissuarmut. Taanna najugaqarfiannit ungasippallaanngilaq. Guutip Mosesimut inatsisai naapertorlugit arnaq nukappiaqqamik erninermi kingorna ullut 40-t qaangiuppata naalaffimmi ajortaajaqqussummik pilliuteqartussaavoq.

Marialumi taamaaliorpoq. Taamaallaalli timmissat marluk pilliutigai. Tamatuma Josefip Mariallu aningaasaqarnerat qanoq innersoq takutippaa. Mosesip inatsisaasa peqqussutigigaluarpaat savaaraq anguteralak, timmissanit naleqarneroqisoq, pilliutaassasoq. Kisianni anaanaasoq akissaqanngippat tuinnguaaqqat tuinnguaaqqalluunniit quluartartut marluk naammapput.

Naalaffissuarmi angutip utoqqaap Jesus kissumissiuppaa. Simeonimik ateqarpoq. Guutip nalunaarfigisimavaa Jehovap neriorsuutaa Kristus, imaluunniit Messias, takutinnagu toqussanngitsoq. Ulloq taanna naalaffissuarmut iserami Simeon anersaamit iluartumit Josefikkut Mariallu meeqqisaataannut ingerlanneqarpoq.

Jesus kissumiaatigalugu Simeonip Guuti qutsavigaa oqarlunilu: ’isima takummassuk annaassutigisat, inuiaqatigiit kiinaasa saanni piareersakkat.’  Tamanna tusaramikku Josef Marialu assut tupaallapput. Simeonip pilluaqquai Marialu oqarfigalugu ernera ’orlussutissaassoq makissutissaatitaallunilu Israelikkut ilarpassuinut’ aammalu Maria aliasuutip savissuartut ipittutut anniartikkumaaraa.

Pruffiiti arnaq 84-inik ukiulik, Anna, aamma taamani najuuppoq. Naalaffissuarmiittuaannartuuvormi. Taamaalinerani taakku ornippai, Guutilu qutsavigalugu aammalu tusaajumasut tamaasa Jesusimik oqaluttuutilerlugit.

Ila Josefip Mariallu naalaffissuarmi misigisatik nuannaarutigeqaat! Tamakkua tamarmik ilumut meeqqap Guutimit neriorsuutigineqartuuneranik uppernerat nakussatsippaat. Lukas 2:21-38; 3 Môrsase 12:1-8.

◆ Ullut qassissaanni Israelikkut nukappiaqqat inoorlaat atsertarsimagunarpaat?

◆ Israelikkut arnartaanut ernertaani 40-nik ulloqalerpat suna piumasarineqarpa? Mariap taamaaliornerata aningaasatigut atugarisaat qanoq takutippaa?

Pisimasumi tassani kia Jesus taannaasoq paasivaa, qanorlu? (wD 15/6 85)