Kajumissaqatigiilluta pisa ullussap qanillilernerani
Kajumissaqatigiilluta pisa ullussap qanillilernerani
’[Kajumissaqatigiilluta, NV] pisa; ullussaq qanillilersoq malugilerassiuk.’ — Eprîarit 10:25.
1, 2. Ullussaq suna qalliartorpa, Jehovallu innuttai qanoq iliortariaqarpat?
ULLUMIKKUT ’imermik inuunartumik piumasunik aggeqquseqataasut’ immikkoorniartuunngillat. Jehovap ullussarsua ajugaaffissaq qanilliartortillugu Bibelimi unnersuussutigineqartoq maleruarpaat: ’Misissoqatigiinniarta asanninnermut ajunngitsuliornermullu kajumissaaqatigiilluta, katisimasarfippullu qimannaveertigu, ilaat taamaattarmata; kisianni oqaaqqissaaqatigiilluta [imaluunniit: kajumissaqatigiilluta] pisa; annerusumilli taamaassaagut ullussaq qanillilersoq malugilerassiuk.’ — Eprîarit 10:24, 25.
2 Bibelimi siulittuutaasuni ersersinneqarpoq ’ullussaq’ tamanna tassaasoq ’Jehovap ullussaa’. (2 Pîtruse 3:10) Jehova qutsinnerussaartuummat, Guutiulluni ajugaqanngitsoq, ullussaa ullumit allamit akimorneqarsinnaanngilaq. (apustilit suliáinik agdlagkat 2:20) Ullussami tamatumani kisimi tamanut naalagaasussaanini aalajangersassavaa. Ulloq tamanna pingaaruteqarluinnartoq qanilliartorpoq.
3. Kristumiunut ukiuni hundredelinni siullerni inuusunut ullussaq qanoq qanilliartorpa, uagutsinnullu ullumikkut inuusunut qanoq qanitsigaa?
3 Kristumiut ukiuni hundredelinni siullerni inuusut apustili Paulusip oqaluttuussimavai Jehovap ullussaa qanilliartornerarlugu. Tamanna qilanaaraat, taamanikkumiilli suli ukiut 1900-nit sinneqartut ingerlasussaapput. (2 Tásalûníkamiut 2:1-3) Taamaakkaluartorli isumalluartussaapput, ullormi tamanna pinngitsoorani takkuttussaavoq, kristumiullu upperlutik aalajaatsumik suliuarunik, ulloq tamanna nuannersoq misigisinnaassavaat. (2 Timûtiuse 4:8) Taamanimiilli takuneqarsinnaasimavoq ulloq qanilliartortoq. Uagutsinnulli ullumikkut inuusunut Jehovap ullussaa qaninneroqaaq. Nuannaarutigisinnaavarput tamanna uppernarsarneqartarmat Bibelimi siulittuutit tupinnartumik eqquuttarnerisigut. Guutip aqqa, Jehova, qanittukkut naassaanngitsussamut illernarsisinneqassaaq. — Lúkarse 11:2.
Guutip aqqanit kajumissisinneqartut
4. sarĸúmersitat 19:6 naapertorlugu kina kunnginngussava, aqqalu qanoq nalunaarutigineqarpa?
4 Inuiaat kinguaariit tamarmik Guutip aqqa soqutigisariaqaraluarpaat. sarĸúmersitat 19:6 ima nipeqarpoq: ’Aliiluujaa, Naalagaq Guuterput ajugaqanngitsoq kunngiulermat.’ Nutsigaq tamanna naapertorlugu taanna tassaavoq Naalagaq, Guuti Ajugaqanngitsoq. Nutsikkalli tamatuma nutsigarpassuit nutaanerusut allat assigalugit Guutip kunnginngortup aqqa taanngilaa. Aterli suaarummi ’Aliiluujaa’-miippoq („Jah nersoruk“ imaluunniit „Jehova nersoruk“), nutsikkamilu qallunaatuumi atortussaatitaasumi bibelinilu qallunaatuuni allani oqaaseq tamanna atorneqarpoq. Bibelini ukiut ingerlaneranni nutserneqartarsimasuni Guutip aqqa isertuunneqarsimavoq. Soorluli takussagipput, Guutip innuttaanut qanga inuusunut ullumikkullu inuusunuttaaq kajumissaataasimaqaaq.
5, 6. (a) Guutip aallartitsisimi aqqa Mosesip sooq ilisimasariaqarsimavaa? (b) Guutip aqqani Mosesip tikiunnerarnera israelikkunnut qanoq sunniussimassava?
5 Moses israelikkunnut, Ægyptenimi inussiaasunut, Guutip qutsinnerussaartup aallartimmagu kimit aallartitaanera apeqquserneqarsimavoq. Mosesip ilimagereerpaa Guutip aallartitsisimi aqqa juutinit naqisimaneqartunit paasiumaneqarumaartoq, taamaattumillu Mosesimik allakkat aappaat 3:15-imi allassimavoq: „Aamma Guutip Moses ima oqarfigaa: ’Israelikkut ima oqarfigissavatit: „Uannik ilissinnut aallartitsisoq tassa [Jehova] siuaasassi Guutiat, Abrahamip Iisaallu Jaakullu Guutiat.“ Tassa atera naassaanngitsumut aterisara, tassa ateriumasara kinguaariikkuutaani.’“
6 Israelikkut tamanna tusaramikku kajumissisimassaqaat. Guutip ilumoortutuap, Jehovap, aniguisinneqarnissaannik neriorsoqqissaarpai. Guuti atermi tunuliaqutaanik takutitsilerpat taassuminnga ilisarinninnerulernissaminnik qilanaarutiginnissinnaanertik kajumississutigisimassaqaat. Imaanngilarmi imminut ataqqinartingaarami ilisaritikkumanngitsoq. — 2 Mosesimik allakkat 3:13; 4:29-31.
7. (a) Sumit nalunngilarput Jesusip ajoqersugaasa Guutip aqqa nalunngissimagaat? (b) Guutip aqqa qanoq ililluni tunulliutinneqalerpa?
7 Guutip aqqanik, Jehovamik, tamatumalu tunuliaqutaanik ilisimanninnertik, Jesus Kristusip ajoqersugaasattaaq kajumissaatigisimaqaat. (Juánase 17:6, 26) Jesusip nunami kiffartornermini Guutip aqqa tunulliutinngilluinnarpaa, kissaateqanngilluinnarporlu nammineq atermi, Jesusip, pingaarnerutinnissaanik. Kristumiut upperisaannik ilumoortumik tunussinissamik siulittuut piviusunngormat aatsaat Guutip aqqa tunulliutinneqalerpoq, aap, kristumiut oqaasiinit tammarluinnarsimavoq. (apustilit suliáinik agdlagkat 20:29, 30) Guutip ernerata aqqa Ataatap aqqanit pingaarnerutinneqalermat kristumiuunerartut misigilerput Ataatamik pallorfiginninnissaq naleqqukkunnaariartuinnartoq. Ataatamissut isiginngilaat, taamaattumillu taassuminnga ataatatut isiginninnerup kajumissinartua amigaatigalugu.
8. Guutip innuttaasa Jehovap Nalunaajaasuinik taaguuteqalernertik qanoq misigaat?
8 Taamaattumik nuannaarutaaqaaq Bibelimik atuaqqissaartartut nunanit tamalaaneersut, Vagttårnip Peqatigiiffianut atasut, 1931-mi Jehovap Nalunaajaasuinik imminnut taagulermata. Taamatut taaguutitaarnertik Bibelimik atuaqqissaartartut nuannaarutissarsiffigiinnarnagu aammattaaq kajumississutigeqaat, taamanimiillu taamaattualersimavoq. — Naleqqiuguk Jesaja 43:12.
9. Kristumiut ilumoortut nalunaajaasuuffitsik qanoq misigiffigaat?
9 Taamaattumik Guutip, nalunaajaasuuffigisassamittut siulittuutigineqarsimasup, aqqanik Kristusip nunamiikkallarami iliorsimaneratut ilisimaneqalersitseqataanissartik ullumikkut kristumiut ilumoortut naleqquttutut isigaat. (sarĸúmersitat 1:1, 2) Aap, taanna kisiat Jehovamik ateqartutut kinaassusersivaat. — Tussiaat 83:18 .
Nuannaarnermik anersaamillu illernartumik ulikkaartut
10-12. (a) Anersaap illernartup Jesusip ajoqersugai qanoq sunnertussaasimavai? (b) Jehovap Nalunaajaasuisa imminnut qanoq iliorfiginissartik kissaatigaat?
10 Jesus Kristusip apustiliminut naggataasumik oqaasii imaapput: „Taamaattumik aallaritsi inunnillu inuiaqatigiinnit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit, ajoqersorsigillu ilissinnut peqqusakka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaanut allaat.“ — Matîuse 28:19, 20, NV.
11 Malugiuk kristumiutut ajoqersukkat nutaat anersaap illernartup aqqani kuineqartussaammata. Anersaaq illernartoq tamanna kinaassusiliunngilaq, tassaavorli nukik Jehova Guutip Jesus Kristusi aqqutigalugu iliuuseqarnermini atortagaa. Nukik iliuuseqassutaasartoq tamanna Jesusip ajoqersugaanut tunniulluinnarsimasunut Jehova Guutip piinsip ulluani Jesus Kristus aqqutigalugu kuisimavaa. (apustilit suliáinik agdlagkat 2:33) Anersaamik illernartumik ilumioqangaalerput, anersaallu pissusiisa imaluunniit inerititaasa ilaat tassaavoq nuannaarneq, imaluunniit tipaatsunneq. (Galâsiamiut 5:22, 23; Evfisumiut 5:18-20) Nuannaarneq pissusiuvoq kajumississutaasoq, ajoqersukkallu nuannaarnermik anersaaq illernartumeersumik immertittussaapput. Paulus qinunermi ilaanni naleqqulluartumik oqarsimavoq: ’Guutip neriutsitsisup tamanik [nuannaangaartillisi] eqqissisillusilu uppernissinni, neriugisaqangaarlusi anersaap illernartup pissaaneragut.’ — Rûmamiut 15:13.
12 Anersaamik nuannaalernartumik tamatuminnga ilumioqangaarlutik nalitsinni Jehovap Nalunaajaasui, ilaatigut ’amerlangaartut’, kissaateqangaassapput pissutsit aaqqissuussaaneranni asanniffiunngitsumi matumani kajumissaqatigiinnissaminnik. Aammattaaq Paulusip eqqartorpaa kristumiut ’kajumissaaqatigiinnissaat’. — sarĸúmersitat 7:9, 10; Rûmamiut 1:12; 14:17.
Kajumissisinneqartutut misiginissatsinnut pissutissaalluartut
13. Qanoq ililluta allat kajumissisissinnaavavut namminerlu kajumissisinneqarluta?
13 Kristumiut nalunngilaat pissutsit aaqqissuussaaneranni naapertuilluassutsip tamarmiusup assortortaata naalagaaffigalugulu guutiuffigisaani inuullutik. Taamaattumik kissaatigissavaat silarsuaq tamakkerlugu ilagiinni kristumiuni, Jehova Guutip anersaavata illernartup naammangaartup iffigisaani, kajumissaqatigiinnissartik. (Eprîarit 10:24, 25; apustilit suliáinik agdlagkat 20:28) Kajumissisinneqartutut misiginissatsinnut pissutissaqarluarpugut. Aap, Jehova taassumalu ernera pillugit eqqorluartumik ilisimassuteqarnerput, aammalu nukimmik iliuuseqataasumik taakkua atortagaannik, tassa anersaamik illernartumik, pigisaqarnerput qujamasuutigeqaavut. Qujamasuutigaarputtaaq siunissami uagutsinnut neriuutigititaat, tamannalu guutisiornitsinni nuannaartitsisuuvoq. Apustili Paulusip atuartartut kristumiuusut upperisaminni illernarnerpaami kajumissaqatigiillutillu anersaakkut nakussassaqatigeeqquai. Taamaaliornerussappullugooq ’ullussap qanilliartornera assersuutaasukkut isigitillugu’. Kristumiuuneraqatigiit eqqunngitsumillu upperisarsiornerit tamaasa ilanngullugit nunami naalakkersuinikkut pissaanilinnit nungutinneqarpata, suli annerusumik kajumissaqatigiinnissarput pisariaqassaaq.
14. Kikkut kajumissaqatigiittariaqarpat, qanorlu ilillutik?
14 Nalunngilarput utoqqaanertat ilagiinni ilaasortaaffigisaminni savaatinik siulersortaasussaasut, kisianni kristumiut tamarmik kajumissaaqataasussaapput, soorlu Eprîarit 10:25-mi oqaaqqissaarutigineqartoq. Tassami tamanna kristumiunut piumasarisaavoq. Ilagiinni ilaasortaaffigisanni allanik kajumissaasarpit? Immaqa imminut aperaatit qanoq iliorlutit taamaaliorsinnaanerlutit. Ilumuunnginnerpali ataatsimiinnernut illit najuunnerit kristumiullu aaqqiissuussaanerannut peqataanerit imminni qatanngutinut allanut kajumissaataasarmata — soorlu ilagiit ataatsimiinnerinut aalajaallutik najuuttuaannartunik naapeqateqarneq ilinnut qularnanngitsumik kajumissaataasartoq? Puiussanngilallu taakkuttaaq illit aalajaattuarnerit kajumississutigisarmassuk. Taamaalilluni kristumiutut ingerlajuarnikkut inuunermilu ajornartorsiutinut atoruminaatsunullu nakkaannannginnikkut allanut maligassiuisoqarsinnaavoq.
Diaavulup nikallortitsiniaaneranut akiuugit
15. Sooq Diaavulu ’kamattorsuua’, kikkunnullu kamattorsuua?
15 Jehovap ullussaata qanillinera kisittaanngitsoq nalunngilarput — Satan Diaavuluttaaq nalunngilaa. sarĸúmersitat 12:12-imi oqaluttuarineqarpoq maanna nunami eqqanarsisoq ’Diaavulu uagutsinnut aqqarsimammat kamattorsuulluni, piffissakissutsi nalunnginnamiuk’. Soorlu versi 17-imi erseqqissarneqartoq kamannera ’Guutip inassutaanik maleruaasunut Jesusillu nalunaajaataanik piginnittunut’ sammivoq. Qularutissaanngilluinnarpoq Diaavulup nikallulersinniarsarimmatigut! Sukkullu saassutissalluta nalunngilluarpaa. Sanngiissutivut ajornartorsiutivullu nalunngilai, tamakkulu eqqorniarpai.
16. Sooq nikallortitsiniaaneq Satanip sakkugaa?
16 Sooq Diaavulup nikallulersitsiniaaneq sakkugaa? Iluatsitsinarajummat. Ersarissumik assortorneqarnermini malersorneqarnerminilu qasusuilluni akiuussimasoq allaat nikallortoornermut nakkaannartisinnaavaa. Jehova Guutip mitallernissaa Satanip kissaatigaa, uppernarsarniarsaraalu inunnik taassumunnga kiffartuussiunnaarsitsisinnaalluni. (Ussatit 27:11; naleqqiuguk Jobimik allakkat 2:4, 5; sarĸúmersitat 12:10.) Nikallortissinnaagunisigut Guutimut kiffartuussinitsinnik ilanngartuilersissinnaavaatigut imaluunniit allaat Naalagaaffimmik tusagassamik nuannersumik oqaluussiunnaarluinnartissinnaalluta. — 2 Korintumiut 2:10, 11; Evfisumiut 6:11; 1 Pîtruse 5:8.
17. Nikallornerup qajannarsisitsisinnaassusia Mosesip nalaani qanoq erserpa?
17 Nikallornerup qajannarsinarluinnassusia israelikkut Ægyptenimiinneranni pisimasumit takuneqarsinnaavoq. Mosesip oqaluffigereeraanilu Faraop naakkittaatsup israelikkut sulinerat annertusisippaa naalliutsinnerulerlugillu. Guutip Moses peqquaa israelikkut neriorsoqqissaaqqullugit aniguisikkumaarini, innuttarilerumaarini, qimaanissaat isumannaarumaarini kiisalu nunamut neriorsuutigisaasumut eqqukkumaarini. Tamanna Mosesip Israelip kinguaavinut oqaatigaa, kisianni „tusarumanngilaat sulerulutsitaanermit neriuutaarussimagamik [imaluunniit: nikallorluinnarsimagamik]“. (2 Mosesimik allakkat 6:9) Taamatut qisuariarnerat allaat Mosesip nikalluutigaa, aatsaallu Jehovap kimigiiserfigalunilu kajumissaareermani Faraomut oqaloqqusinera naalappaa. — 2 Mosesimik allakkat 6:10-13.
18. Guutip innuttaasa Diaavulumit nikallortinneqarnissamut akiuunnissaat sooq taama pingaaruteqartigaa?
18 Satan Diaavulup nalunngilluinnarpaa nikallorneq Guutip kiffaanut qanoq qajannarsinarsinnaatigisoq. Soorlu Ussatit 24:10-mi oqaatigineqartoq: „Ullormi annikilliorfiusumi sapiissuseerukkuit taava nukikissimassaqaatit.“ Naggatissaq qanittuararsuummat anersaakkut nukittuujusariaqarpugut. Naammalluinnanngissutsitsinnut, sanngiissutitsinnut kukkunitsinnullu akiuunneq artornarsinnaaqaaq; tamannalu ilutigalugu sanngiissutivut Satanip atornerlunniarmagit ikiorneqarnissarput pisariaqartipparput.
Kristusip pilliutaa saammaannartitsissutaasoq isumalluarfigiuk
19. Nikallornissamut akiuunnitsinni suna iluaqutigisinnaavarput, sooq?
19 Jehovap Jesus Kristus aqqutigalugu utertitsissutissatut pilliutaa nalissaqanngitsumik pingaaruteqarpoq. Utertitsissutissamik isumalluarfiginnilluinnarnitsigut suut tamaasa nikallujuilluta atorsinnaavavut. Aaqqissuussamik tamatuminnga suusupaginninneq navianaateqarpoq. Naammalluinnanngitsuutilluta allatut ajornartumik kukkusarlutalu ajortuliortoortassaagut, kisianni nikallortariaqanngilagut nakkaannartariaqarnatalu, isumaqarnaveersaarlutalu neriuutaarulluinnartugut. Taamaappammi Satanimit nakkartinneqariaannaavugut. Nalunngilarput pilliut ajortitsinnut matoorutaasoq. Utertitsissutissap ajortit peersinnaavai. ’Amerlangaartunut’ ilaagutta atisatsinnik takisuunik savaaqqap aavanut errorlugit qaqorsaasinnaanerput upperilluinnarlugulu isumalluarfigisariaqarparput. — sarĸúmersitat 7:9, 14.
20. sarĸúmersitat 12:11 naapertorlugu qanoq ililluta Diaavulup uagutsinnik nikallortitsiniaanera ajugaaffigisinnaavarput?
20 sarĸúmersitat 12:10-mi Satan taaneqarpoq ’qatanngutitta unnerluutiginnittaat ullukkullu unnuakkullu Guutip saani unnerluutiginnittoq’. Unnerluutiginnittoq ajortoq nikallortitsiniaasorlu taama ittoq qanoq ililluta ajugaaffigisinnaavarput? Tamanna versi 11-mi akineqarpoq: ’Taakkua savaaqqap aavagut oqaatsikkullu nalunaajaatigisamikkut ajugaaffigaat; inuunertillu asanngilaat toqumut allaat.’ Taamaattumik Jehovap innuttaasa utertitsissutissatut pilliut, savaaqqap aava, isumalluarfigilluinnartuartariaqarpaat. Tusagassamik nuannersumik inunnut allanut tusarumasunut tamanut aalajangersimasumik akuttunngitsumik oqaluussisarnikkut nukissannik aallertarit.
21. Qanoq ililluta Satanip iliorneratut qatanngutivut nikallortoortissinnavavut?
21 Ilaannikkut, immaqa sianiginngisatsinnik, Satanip iliorneratut qatanngutivut nikallortoortissinnaavavut. Qanoq ililluta? Isornartorsiorpallaarnerisigut, piumaffigivallaarnerisigut imaluunniit iluarniarpallaarnitsigut. (Nalunaajaasup oqaasii 7:16) Inuit tamarmik ippinnaateqarlutillu sanngiissuteqarput. Satanip iliorneratut tamakku atornerlunniarsarissanngilavut. Taarsiulluguli qatanngutivut Jehovallu innuttai peqatigiissortatut isigalugit kajumissinartumik oqaluuserisartigik. Immitsinnut nukittorsartuarnissarput nikallortitsinnginnissarpullu kissaatigaarput.
Ulloq qanilliartortillugu kajumissaqatigiinneq
22, 23. (a) Sooq utoqqaanertat kisimik kajumissaasussatut isigisariaqanngilavut? (b) Ilagiinni kristumiuni nakkutilliisut qanoq ililluni kajumissarneqarsinnaappat?
22 Ulloq qanilliartortillugu immissinnut kajumissaqatigiinnissarsi aalajangiusimalluinnarsiuk. Aalajaallusi maligassiuinissigut oqaatsissigullu tuppallersaataasukkut allanut kajumissaasuugitsi. Jehova Naalagarlu Jesus Kristus tamatumani malissigik. Kajumissaanissaq ilagiinni utoqqaanertat kisimik suliassaattut isigeqinasiuk — taakkuttaarmi kajumissarneqarnissartik pisariaqartippaat. Savaatit sinneri allat assigalugit sanngiissuteqarlutillu qajannaateqarput, aammattaaq taakkununnga silarsuarmi ajortunngorsimasumi ilaquttanik pilersuinissaq imaannaanngitsuuvoq. Aammattaarlu, Paulusip oqarneratut, taakku ’ilagiinnik tamanik ernumassuteqarput’. (2 Korintumiut 11:28, 29) Nungullarnartumik suliaqarput taamaattumillu kajumissarneqarnissartik pisariaqartippaat.
23 Ilagiinni kristumiuni siulersortaasunut kajumissinartoq alla tassaavoq taakkuninnga suleqatiginninnerput. Taakku suleqatigigutsigik Eprîarit 13:17-imi unnersuussut malissavarput: ’Siulersortisi naalassigik tusartarlugillu, tarnisi piggammatigik aperineqarunik akisussaallutik; tipaatsullutik taamaaliorsinnaaqqullugit anersaameqqunagillu, tamanna iluaqutigissannginnassiuk.’
24. Ukiuni nikallorfiusaqisuni makkunani qanoq iliortariaqarpugut, sooq?
24 Ukiuni nikallorfiusaqisuni inuuvugut. Soorlu Jesusip siulittuutigisimagaa ’inuit ersinermik inuillu najugaannut piumaartussanik ilimasunnermit tumanngussapput [imaluunniit: iluaallissapput]’. (Lúkarse 21:25, 26) Ajornartorsiutinik ernumatsannartunik nikallornartunillu takkuttoqartarmat pisariaqarpoq ’immitsinnut kajumissaqatigiinnissarput, ullussaq qanillilersoq malugileratsigu’. Tásalûníkamiunut agdlagkat sujugdlît 5:11-mi Paulusip unnersuussutaa pitsaasoq malitsigu: ’Oqaaqqissaaqatigiillusi ineriartoqatigiigitsi tamassi immikkut, soorlumi pisartusi.’ (wD 15/12 90)
Qanoq akissavit?
□ Sooq kristumiut qangarnit maannakkut imminnut kajumissaqatigiinnerusariaqarpat?
□ Jehovap innuttaasa taassuma aqqanik ilisimanninnertik qanoq kajumississutigisimavaat?
□ Tamatta immikkut qanoq ililluta kajumissaqatigiissinnaavugut?
□ Sooq Satanip iliorneratut qatanngutivut nikallortoortinnaveer- saartariaqarpavut?
[Atuaqqissaarnermi apeqqutit]
[Qupp. 17-mi assiliartaq]
Ilagiinni savaatinik kajumissaanissamut utoqqaanertat siulersortaapput