Nikallungarujussuarneq ajugaaffiginiaruk

„ARTORSAATIGISIMASARA annerpaaq,“ Lola oqaluttuarpoq, „tassaavoq neriuutaaruttutut misiginera pissutigalugu pisuusutut misiginera, isumaqarama Jehovap nalunaajaasua neriuutaaruttutut misigisussaanngitsoq.“ Paasinerluineq nalinginnaasoq tamanna tassaagajuppoq kristumiup nikallungarujussuartup ajugaaffiginiaqqaartariaqagaa. Lola nangippoq: „Taamatut misigininnik imminut avoqqaariunnaarama ajorunnaarnissaralu siunniukkakku, nikallungarujussuarnera ajornannginneroqisumik iliuuseqarfigisinnaalerpara.“ Pissutissaqanngilaq isumaqassalluni nikallungarujussuaraanni Guuti sumiginnarlugu.

Soorlu ilanngutassiap matuma siuliani eqqartorneqartoq nikallungarujussuarneq timikkut pissuteqarsinnaavoq. 1915-imili, nikallungarujussuarnerup timikkut nappaateqarnermut atassuteqartutut ilisimatuunit naqissuserneqanngikkallarmalli, Vagttaarnet-imi allassimavoq: „Kiserliornermik nikallunganermillu misigineq ilaannikkut inunnut tamanut pissusissamisoortarpoq . . . Nikallunganeq tamanna timikkut peqqiilliorneq pissutaalluni sualutsissinnaasarpoq.“ Nikallungajuaannaleraanni nakorsamit misissortinnissaq eqqarsaatigisariaqassaaq. Annikilliuikkaanni immaqa nakorsamut nikallungarujussuarnermik nappaatinik immikkut ilisimasalimmut ikiortissarsiortoqarsinnaavoq.

Naalli timikkut pissuteqanngikkaluartoq, piviusorsiorpasinngilaq isumaqassalluni Guutimut kiffaasoq nikallungasinnaananilu ajorusussinnaanngitsoq. Eqqaamajuk Hanna aalajaatsoq ’naallioqaluni qiangaartoq’. (1 Samuel 1:7, 10) Nehemiasittaaq ’qiavoq, ulluni qassiini aliasulluni’. (Nehemja 1:4; 2:2) Jobip ’inuunini qatsuteqaa’ misigalunilu Guutip najorunnaaraani. (Job 10:1; 29:2, 4, 5) Kunngi David oqarpoq anersaani qasoqisoq uummatinilu sakissamini aalariassaartoq. (Tussiaat 143:4) Apustili Paulusillu eqqaavai ’ilumigut ersinneq’ misigissutsikkullu ’qunutinneqarneq’. — 2 Korintumiut 4:9; 7:5, 6.

Naak taakku tamarmik Guutimut kiffaagaluarlutik aalajaatsut, tatisimaneqarnerit assigiinngitsut, annilaanganeq narrutsannartumillu pakatsisinneqarneq aliasuutigisimavaat. Guutilli qimassimanngivippai anersaaminilluunniit illernartumik arsaarnagit. Nikallunganerat anersaakkut amigaateqarnermik pissuteqanngilaq. Ilaanni David aliasungaarami ima qinuvoq: „Kiffat tipaatsutsiguk.“ Guutip David ’ullormi annikilliorfiani’ tuppallersarpaa kingumullu nuannaaleqqinnissaanut ikiorlugu. (Tussiaat 86:1, 4, 7) Ullumikkuttaaq Jehovap kiffani taamatut ikiussavai.

Nikallungarujussuarneq anersaakkut nappaateqarnerup sianissutsikkulluunniit amigaateqarnerup ilisarnaatiginngimmagu, kristumiup nalliuutini kanngussuutigalugu nipangiuttariaqanngilaa. Akerlianik naalliunneq tamanna ajugaaffiginiarlugu alloriarnerit pingaarnersaasa ilaat iliuuseriariaqarpaa. Suna?

Qanoq innerit oqaluttuariuk

Iliuuseqarneq pitsaanerpaaq tassa sumik ajornartorsiuteqarnerluni allanut oqaluttuussineq. Ussatit 12:25-mi allassimavoq: „Isumakuluuteqarnerup inuk artorsaatissittarpaa, inussiarnersumilli oqaaserisat nuannaalersittarpaat.“ Allalli qanoq ilillutik uummatikkut misigissutsitit paasisinnaassavaat, isertuarnak oqaluttuarinngikkukkit? Misiginneqataalluni ikiuisinnaasoq oqaluttuukkukku, qularnanngitsumik paasissavat misigissutsit ajornartorsiutillu illit atorsimasavit assingi allat akiuuffigisimagaat. Aammalu misigissutsinik oqaatsikkut annissineq katsorsaataavoq. Misigissutsikkut annikilliuutit toqqortiinnarnagit annikkaanni uummammut oqilinarpoq. Nikallungasup nangaanani aappani, angajoqqaani ikinngutiniluunniit misiginneqataasinnaasoq anersaakkut naammattunik piginnaassusilik oqaluttuuttariaqarpaa. — Galâsiamiut 6:1.

 Mariep (ilanngutassiap matuma siuliani eqqartorneqartup) ajornartorsiutaanut pisooqataasimavoq misigissutsimigut annikilliuutini nikallungarujussuarnerminik kinguneqartut toqqorsimaannarsimagamigit. „Ukiut ingerlaneranni qallikkut pissusera qajannaalluinnartunngortissimavara,“ oqarpoq. „Imminut taama nikagitiginissara allat ilimaginngilluinnaraluarpaat.“ Marielli ilagiinni utoqqaanertat ilaat misigissutsiminik oqaluttuuppaa. Apersoqqissaarnermigut qatanngutip Marie uummammigut annilaangassutaanik oqaluttualersippaa imminullu paasinninnerulersillugu. (Ussatit 20:5) Qatanngutip unnersuussinerata pitsaasup Bibelimeersup toqqissisippaa. „Misigissutsikkut annikilliuutima nikallungarujussualerninnik kinguneqartut akiornissaannut ikiorneqarninnik aatsaat ilassinnippunga,“ Marie oqarpoq.

„Nunatut imissaaleqisutut“ misigisup utoqqaanertaq paasinnissinnaasoq oqaloqatigiguniuk puilasumik anersaakkut inuummarissinartumik nassaartutut misigissaaq. (Tussiaat 143:6; Jesaja 32:1, 2) Anersaakkut siunnersuisup sianisuup immaqa allaat nikallungasoq ikiorsinnaavaa pissutsit neriuuteqanngissorisai qanoq iliuuseqarfigisinnaanerai paasitillugu. (Ussatit 24:6) Allanilli oqaloqateqarneq naammanngilaq.

Inuttut piviusumik naleqarnerit akueriuk

Imminut nikagineq nikallungarujussuarnermut pissutaanerpaavoq. Meeraanermi pilluaatsuusimaneq kristumiut ilaat immaqa imminnut ataqqinikipput. Naalli timikkut, misigissutsikkut kinguaassiuutitigulluunniit atornerlunneqarsimaneq pisuulluni misigissutsikkut ’ikeqalersimagaluarluni’, inuttut nikanarnerulersoqarneq ajorpoq. Taamaattumik oqimaaqatigiissumik imminut isigineq anguniartariaqarparput. Apustili Paulus ima oqaassivoq: ’Nungullusi oqarfigaassi immissinnik isumassaq qaangerlugu isumaqarfigeqqunasi, kisianni immissinnik annerunianngitsumik . . . isumaqarfigeqqullusi.’ (Rûmamiut 12:3) Makitasuunngornissarput mianersuutiitigalugu, aamma akerlia sianigisariaqarparput. Guutip inuit ’erligisatut pigisamisut’ toqqarmagit, innuttai tamarmik taassumunnga erlinnartuupput. Immikkut pisinnaatitaanerup asseqanngissusia! — Malaki 3:17; Haggaj 2:7.

Eqqarsaatigeriaruttaaq ’Guutip suleqataatut’ pisinnaatitaaffeqangaarnerput, tassa ajoqersuganngortitsinissamik kristumiutut suliaqarnermut peqataasinnaaneq. (1 Korintumiut 3:9; Matîuse 28:19, 20) Kristumiut amerlasuut nikallungarujussuarsimasut misigisimavaat suliap tamatuma inuttut naleqarnermik misiginertik pissatsissimagaa. „Kristumiunngoreeraluarlunga allaat naammanngitsutut misigisarpunga,“ Marie nassuinnarpoq. Oqaluussisarninili ingerlatiinnarpaa, ullullu ilaanni arnaq inuusuttoq qaratsamigut ajoqutilik Bibelimik paasisaqarusuttoq naapippaa. „Poqiitsunngorsimagami imminut naammagittarfiginnittoq pisariaqartilluinnarpaa,“ Marie oqaluttuarpoq. „Ima uannit sammineqarnissani pisariaqartitsigaa allaat uanga imminut naammanngissuseralu puiguvillugit. Uannit ikiorneqarnissani pisariaqartippaa, paasivaralu Jehova pissaaneqarfigalugu ikiornissaa sapernagu. Kuisinnera takullugu nuannaarutaavoq kajumissaataallunilu oqaluttuarineqarsinnaanngitsoq. Imminut nikaginera nungukkiartorpoq, nikallungarujussuarneralu sualuttoq qaangiuppoq.“ Aap, ’allanik imeruersaasoq nammineq imeruersarneqarumaartoq’ ilumoorluinnarpoq. — Ussatit 11:25.

Nikallungarujussuartulli amerlasuut arnatut kristumiutut nikallungarujussuartutut misigipput, taanna oqarpoq: „Naak illumi eqqiaaneq, iganeq inoroorsaarnerlu ilungersuutigigaluarlugit, taamaattoq kukkuninnguit suunngitsut pissutigalugit imminut avoqqaarisaqaanga.“ Imminut avoqqaarineq taama ingasatsigisoq imminut ataqqinermut aserorsaataavoq. Eqqaamajuk Guuterput paasinnittuusoq, aamma ’unnerluutiginnittanngilaq soraajuitsumik’. (Tussiaat 103:8-10, 14) Jehovap — uatsinnit naapertuilluarnermik paasisimasaqarneroqisup — kukkunitsinnik tamanik avoqqaarinngippatigut, kamaginniffigillutali, taava immitsinnut isumaqarfiginninnitsinni malittariaqannginnerparput?

Tamatta sanngiiffeqarpugut nukittuffeqarlutalu. Apustili Paulusip qanoq-iliuutsimi tamaasa piginnaassuseqarfigilluarnissaat naatsorsuutiginngilaa.  ’Oqaluttarnikkut ilisimaatsorpalukkaluaruma ilisarsinikkut taamaanngilanga,’ oqarpoq. Paulus oqalugiallaqqissorsuunngikkaluarluni imminut nikaginngilaq. (2 Korintumiut 11:6) Nikallungarujussuartuttaaq pikkoriffigisatik eqqaamasariaqarpaat.

„Qanilaartut ilisimassut pigaat,“ imaluunniit pisinnaanermik killeqarneranik ilisimannillutillu akuerinnittut. (Ussatit 11:2) Tamatta piginnaassutsitigut, qasusuissutsitsigut pissutsitigullu atukkatigut assigiinngilagut. Uummatikkut iluunngarluta kiffartuukkutsigu sapinngisatsinnillu iliorutta Jehovap naammagaa. (Mákorse 12:30-33) Guutiunngilaq kiffami tunniusimasut ilungersornerinik naammaginngittuaannartoq. Arnaq kristumiu Leoramik atilik, nikallungarujussuarnerminut akiuunnermini iluatsitsoq, oqarpoq: „Allanut naleqqiullunga pikkoriffigivallaanngisakka amerlaqaat, assersuutigalugu tusagassamik oqaluussisarneq. Sapinngisannilli iliorniartarpunga.“

Kukkunerit isumaqatigiinnginnerillu

Kukkorujussuarsimagaannimi? Immaqa Daviditut misigissuseqassaaq, taanna kukkusimanini ajortuliorsimaninilu pissutigalugit ’aliasuinnaq angalaartuarpoq’. (Tussiaat 38:4-7, 9) Misigissutsip tamatuma takutissinnaavaa isumakkeerfigineqarsinnaanngitsumik ajortuliorsimannginneq! Pisuusutut misigineq isumaqarsinnaavoq ajortuliortoq uummamigut peqqusersuitsuusoq peqqissumillu nalunngeqatiginnissuseqartoq. Pisuusutulli misigineq qanoq iliuuseqarfigineqassava? Isumakkeerfigeqqullutit Guuti qinnuigaajuk iliuuseqarlutillu kukkunerit iluarsiniarlugu? (2 Korintumiut 7:9-11) Taamaaliorsimaguit, qularissanngilat isumakkeerfiginnittuartartup illittaaq naakkinnittuliorfigissagaatit, ajortuliaq aammaaqqissanagu aalajangeruit. (Jesaja 55:7) Perorsaatissinneqarsimaguit, ’nikalloqinak, asasani Jehovap perorsartarmagit’. (Eprîarit 12:5, 6) Taamatut oqaassineq ajunngitsumik ingerlaleqqinnissamut ikiuineruvoq, inuttullu naleqassutsimut sunniuttarani.

Naak uummatitta avoqqaarigaluaraatigut ima paasisariaqanngilaq Jehovap avoqqaarigaatigut. ’Uummativut taassuma saani tuppallersarsinnaavavut, uummatitta pillagassaatikkaluarpatigut Guuti uummatitsinnit annerummat suullu tamaasa ilisimallugit.“ (1 Juánase 3:19, 20) Jehovap ajortuliavut kukkunivullu kisiisa isiginngilai. Aamma qajassuussinerunissamut pissutaasut nalunngilai, inuunerput tamaat, pissutivut siunertavullu. Tamakku tamaasa ilisimagamigit ilumoorluta isumakkeerfigeqqulluta qinnutivut paasinnilluni tusarnaarsinnaavai, soorlu David tusarnaarsimagaa.

Allanut isumaqatigiinngissutit, allanillu qanoq isigineqarnermik pingaartitsivallaarneq,  imminut nikaginermik, immaqalu ilaatigut narrugineqartutut misiginermik, kinguneqarsinnaapput. Naammalluinnanngissutsimini kristumioqativit immaqa tusaannarlugu sukannerpaluttumik inussiarniippaluttumillu oqaluffigaatit. Isumaqatigiinngissuterpassuilli aaqqinneqarsinnaapput ajuallatsitsisoq toqqaannartumik oqaluttuuttaraani oqaasiinit qanoq attortinnerluni. (Naleqqiuguk Matîuse 5:23, 24.) Salomonilu ima siunnersuivoq: „Inuit oqaluuserisaat soqutiginiarpallaartaqinagit.“ Sooq? „Nalunngilammi nammineq qasseriaqalutit inoqatitit perloqqusarakkit.“ (Nalunaajaasup oqaasii 7:21, 22) Imminnut imaluunniit inunnut naammalluinnanngitsunut allanut piumaffiginnippallaaqinak. Isumakkeerfiginnikkasuartarit kamaginnittarlutillu. — Kulorsamiut 3:13.

Aammattaaq allat iluarineraatsit iluarinnginneraatsilluunniit inuttut piviusumik naleqarninnut pingaarnerusumik aalajangiisuunngilaq. Kristus taaneqarpoq ’inuit suutinngisaat’, ’inuit narrugisaat’. (Jesaja 53:3; Sakarja 11:13) Tamatuma inuttut piviusumik naleqarnera imaluunniit Guutip taassuminnga qanoq isiginninnera sunnerpaa? Naamik, Jesusitummi naammalluinnartuugaluaruttaluunniit, inuit tamarmik iluarisaannik iliorsinnaanavianngilagut.

Qasusuinnissamut nukissaq

Nikallungarujussuarneq naak ajugaaffiginiaraluarlugu ilaannikkut ataannarsinnaasarpoq. Misigissutsikkut anniarneq pissutigalugu kristumiut ilaat allaat Jonasitut misigisaqarsinnaapput, taanna oqarpoq: ’Toqunissara ajunnginnerutippara.’ (Jona 4:1-3) Jonasilli annikilliorneri atajuaannanngillat — anigorpai. Nikallungarujussuarneq pissutigalugu inuunerit artornarpallaarsorigukku, eqqaamajuk misilinneqarnerit taamaattut atuukkallaannartuusut, soorlu Paulusip misilinneqarneri taamaassimasut. (2 Korintumiut 4:8, 9, 16-18) Soraarumaarput! Neriuutaarulluinnartoqarsinnaanngilaq, Jehovami neriorsuivoq „inuummarissarumallugit nikallortut neriuutaaruttullu.“ — Jesaja 57:15.

Naak qinnutitit kinguneqanngitsutut ikkaluartut qinujuaannarit. David ilungersorluni qinuvoq: „Kappialanera tusaruk, Guuti, tusaaniaruk qinnutiga. . . . Qaqitissavarma qaarsumut uanga nammineq qaqiffigineq sapikkannut.“ (Tussiaat 61:2, 3) Qanoq ililluni Guutip ilutsinni nakuussutsimik nammineq angusinnaasorinngisatsinnik tunisarpaatigut? Eileen, ukiorpassuarni nikallungarujussuarnermut akiuussimasoq, oqarpoq: „Jehovap akiuukkunnaarsinngilaanga. Taamaattumik qularinngilara akiuuttuartillunga, ikiortuassagaanga. Sallusuissummik Bibelimeersoq ilisimasaqarnerma ilumut inuutissimavaanga. Assigiinngitsutigut — qinuneq, kiffartuussineq, ataatsimiinnerit, naqitikkat, ilaquttakka ikinngutikkalu aqqutigalugit — Jehovap akiuuttuarnnissannut nakussatsittarpaannga.“

Nappaat taama ittoq upperninnut misiliinertut isiginiaruk. ’Guuti ilumoortuuvoq,’ apustili Paulus neriorsueqqissaarpoq. ’Taassuma artukkassinnik ussersinnavianngilaasi, kisianni aniguinissaq ussernartumut aappiullugu pinngortissavaa ilissinnut artornarunnaarsillugu.’ (1 Korintumiut 10:13) Aap, ’pissaanermik angingaartumik’ Guutip tunissavaatit misigissutsikkut erloqinartut suulluunniit qasusuillutit atorsinnaalersillugit. — 2 Korintumiut 4:7.

 Silarsuaq nutaaq nikallungarujussuarfiunngitsoq

Guuti neriorsuivoq naalagaaffini qilammiittoq aqqutigalugu nunami pissutsit nikallungarujussuarnartut tamaasa soraarsissallugit. Oqaasii imaapput: „Nutaanngortissavakka qilak nunalu, pereersut eqqaamaneerutissapput eqqaaqqinneqarnatillu. Kisianni pinngortitakka soraajuitsumik tipaatsuutigineqarlutillu qiimmattaatigineqassapput.“ (Jesaja 65:17, 18) Oqaatsit tamakku siullermik eqquussimapput ukiumi 537-mi u.n.a.s., inuiaqatigiit Israelikkut nunagisaminnut utertinneqarmata. Taamanikkut Guutip innuttai erinarsorsimapput: „Sinnattuinnartutut ikkumaarpugut. Taava qanivut immerneqassapput illarnermik, oqqavullu qiimmattarnermik.“ (Tussiaat 126:1, 2) Misinnangaarnerussaaq siulittuutip tamatuma nuanningaartup annerusumik silarsuarmi nutaassami Guutip piani piviusunngornissaa takussallugu! — 2 Pîtruse 3:13; sarĸúmersitat 21:1-4.

Guutip naalagaaffiata (’qilassat nutaat’) ataani nunami inuiaqatigiit naapertuilluartut (’nunassaq nutaaq’) misigissutsikkut, timikkut anersaakkullu naammalluinnartunngoriartortinneqarumaarput. Tamanna isumaqanngilaq inuit taakkua qanga pisimasut tamaasa eqqaamassinnaanngikkaat, kisianni taamanikkussamut suliassaat nuanningaartut tamaasa eqqarsaatigalugit, qanga pisimasunik alianartunik eqqarsaatiginninnissaminnut pissutissaqassanngillat. Takorlooriaruk ullaat tamaasa isumalluarluni qiimallunilu itersinnaaneq, ullormut suliassat aallartinnissai kajungeralugit, nikallunganermillu akornuteqarnani!

Lolap, aallaqqaataani eqqartorneqartup, neriuutip tamatuma piviusunngornissaa upperilluinnarpaa. Oqarpoq: „Jehovap naalagaaffiata ajornartorsiut tamanna iluarsissagaa ilisimallugu iluaqutaaqaaq. Nalunnginnakku nikallungarujussuarnera atajuaannassanngitsoq.“ Aap, qularissanngilat Guutip erniinnaq nikallungarujussuarnermut naggataarutaasumik ajugaanissaq pisinnaanngortissagaa! (wD 1/3 90)