Silarsuarmi nikallungarujussualernartumi nuannaalersinnaavutit!

MARIE isumagissaartuullunilu qiimasuuvoq. Arnaq taanna 32-nik ukiulik ukiut ikittut matuma siorna ilumigut ’toquvissutut’ misigisimammat upperiuminaappoq. Taamanili nikallungarujussuarneq nappaatigaa. „Soorlumi tassa nuiarsuaq taartoq arriitsuinnarmik qangattariartortoq,“ Marie oqaluttuarpoq. Aap, qujanartumik ajorunnaarpoq nuannaaqqilerlunilu.

Ukiut tamaasa inuit millionilikkuutaat silarsuarmi tamarmi nikallungarujussualernermit nukillaartinneqartarput! Nikallunganeq qaangiutiasoq, amerlanersatta ilaanikkut misigisartagaat, pineqanngilaq. Pineqartorli tassaavoq nikallungarujussuarneq sivisuumik atuuttartoq. Nikallungarujussualersup inuuneq soqutigiunnaartarpaa, sunaluunniit nuannaarutigisinnaajunnaartarlugu, neriuutaarulluinnartutut atorsinnaanngilluinnartutullu misigaluni. 1983-imi Silarsuarmi Peqqinnissamik Isumaginnittoqarfik ima nalunaarpoq: „Maannakkut qularutissaanngilaq nikallungarujussuarnermik nappaatit silarsuarmi tamarmi atuuttut.“

Bibelimik peqqissaartumik atuaqqissaarsimasut nalunaarusiaq taamaattoq tupiginngilaat. Bibelimi nalerput pillugu allassimavoq ’ullussani kingullerni ajornartunik nalliuttoqassasoq’. (2 Timûtiuse 3:1-5) Inuiaqatigiit immikkoortuisa ilaat siornatigut misigissutsikkut ajornartorsiorfimmi annertoqqutaasinnaasimagaluartut maanna nungulerput. Ilangutassiami „The Age of Melancholy?“-mik („Nikallungaffiup nalaa“-nik) qulequtaqartumi dr. Gerald Klermanip inuiaqatigiinni allanngorsimaneq tamanna nikallungarujussuarnermillu nappaateqartut amerliartornerat maannakkut pisoq imminnut atassuteqarluinnarnerarpai. Oqarpoq: „Innuttaaqatigiinni annertoqqutaasinnaasut nalinnginnaat pingasut tassaasimapput ilaqutariit, oqaluffik sanileriinnerlu. . . . Nalitta ilisarnaataa immikkut ittoq tassaavoq annertoqqutaasinnaasut taakkorpiat pingasut amerlanertigut nungulernerat.“

Mariep nikallungaarneranut ilaqutariit ataqatigiikkunnaarnerat pisuuvoq. „Arnassama oqaaseqarani qimammatigut, sumiginnarneqartutut misigivunga kiserliuummeqalungalu. 12-inik ukioqarlunga silarsuara aseroriataartutut ippoq,“ Marie oqaluttuarpoq. Tamatuma kinguninngua angerlarsimaffini qimaattariaqarsimavaa ataataami kanngunartuliorfiginiartalermani.  Oqarpoq: „Qularutiginngilluinnarsimavara pissusissattut ittuunanga, imminullu tatigiunnaavillunga.“ Taamatut nikalloriartornera nikallungarujussualerninnguusimavoq.

Ullut ilaanni Marie nikallungasorujussuusoq, Jehovap nalunaajaasuisa marluk kasuttorfigaat. Erniinnaq tusagassaq kajumissinartoq Bibelimeersoq soqutigingaalerpaa. „Siornatigut inuunerup siunertaqanngissusia pisullu annilaarnartut kisiisa maluginiartarpakka. Maanna qulariunnaarpara silarsuarmi nutaassami Guutip naapertuilluanngissutsinik tamanik atorunnaarsitsiffigisaani inuusinnaanissara. Guutip ikiuineratigut uangattaaq pilluaqqussutissamut tamatumunnga peqataasinnaavunga — inuunerup siunertaa paasisimavara.“ Jehovap Nalunaajaasuisa ataatsimiinnerini Mariep asanninneq piviusoq misigissutsikkullu annertoqquserneqarneq nanivai. (Juánase 13:34, 35) Ilagiinni utoqqaanertat ajunngitsumik siuneqarluartumillu unnersuussinerat ikiortigalugu, Mariep eqqarsariaatsini isumalluartuunngitsoq allanngortippaa. (Jâko 5:14) Nikallungarujussuarnera qaangiukkiartulerpoq. Silarsuarmi pisartut pissutigalugit, taassumatut, nikallungasorpassuit allat ’Jehovap nuannaarnera’ nanisimavaat sallusuissummik eqqortumik ilisarsineq Bibelimeersoq ujaramikku. — Nehemja 8:10; 1 Timûtiuse 2:4.

Ima paasisariaqarpa Mariep nikallungarujussuarnera erniinnarluinnaq peeruttoq? Imaappalu kristumiu nikallungarujussuarnermik killinneqarsinnaanngitsoq? Apeqqutit tamakku akiniarlugit nappaat tamanna nassataalu amerlasuut misissoqqissaartariaqarpavut. Nikallungarujussuarnerup pissutivia paasigaanni ajugaaffiginiarnissaa allalluunniit akiuunneranni ikiornissaat ajornannginnerussaqaaq.

Nikallungarujussuarnermut sualuttumut pissutaasut

Nikallungarujussuarneq timikkut pissuteqarsinnaasarpoq soorlu nappaateqarneq, nerisalunnermik imaluunniit qinersit aammut akuliussaannik ajornartorsiuteqarnermik. Toqunartunit, mingutsitsinermit, nakorsaatinit timilluunniit sapigaanit sunnerneqarneq aamma pissutaasinnaapput. Bibelimili takutinneqarportaaq nammineq ’eqqarsaatit eqqissiviilliornartut’ pisooqataasinnaasut. — Tussiaat 94:19.

Nikalunngarujussuartut amerlanersaat, Marietut, annernartunik nuanninngitsunillu misigisimasaqartarput naqisimaneqarlutilluunniit. Amerlasuut tussiaasiortutut misigisaqarput: „Anniaatinik naammatseqigama . . . ilusimajuarpaannga imertut uligarlunga. Ikinngutikka eqqarlikkalu uannit peersippatit, [Jehova], peqatigisartakkakka taarmut aanngarsimapput.“ (Tussiaat 88:3, 17, 18) Tussiaasiortup misigineratut ajornartorsiutinit annaasaqarnermillu artorsinneqartutut misigipput, isumaqarlutillu inuunertik neriuutissaqanngitsoq. Immaqa taarsuarmi kisimiivilluttutut allaallu Guutimit qimagaasutut misigalutik.

Suna pissutigalugu ilaat ima nikallortigisarpat allaat nikallungajuaannalerlutik? Avataanit ajornartorsiutit kisimik pisuunngillat aammali annilaanganeq naammanngitsutullu misigineq — ajornartorsiutimik annaasaqarnermilluunniit aaqqinnissaat sapersorisarpaat. „Uummatikkut aliasunnerup nikallunganeq pilersittarpaa,“ Ussatit 15:13-imi allassimavoq. Uummatikkut aliasunnerup taama ittup pissutigigajuppaa atorsinnaanngitsutut misigineq imaluunniit inunnit allanit taamatut isigineqarsorineq. Angutip kristumiup, Epafroditusip, ukiuni hundredelinni siullerni inuusimasup tamanna misigisimavaa. Ilagiinnit aallartitaalluni angalanermini napparsimasorujussuanngorpoq. Kiisami ajorunnaarami ’isumakululerpoq nappartoq ilagiit tusarmassuk’. — Filípimiut 2:25-30.

Nikallungarujussuarnerup nagguia tassaagajuppoq imminut nikanaginermik misigineq, ’nikallunganermi saanernik aseroriartortitsisarpoq’ imaluunniit ’uangaassutsimik’ ajortumeerisarpoq. (Ussatit 17:22) Allanit qanoq isigineqarneq isumakuluutigivallaaraanni, ippinnaateqanngilluinnartuuniarsarigaanni, imaluunniit kamaassaqaraanni narrunarsarneqaraanniluunniit, allanik akerleriissuteqaraanni imaluunniit pisuusutut misigigaanni (piviusumik piviusuunngitsumilluunniit pissuteqarluni) uummatikkut aliasungaalersoqarsinnaavoq.

Tassa nikallungarujussuarneq amerlasuunik pissuteqarsinnaavoq. Taamaattorli Mariep kristumiunngorami piviusumik nuannaarneq anguaa. „Maanna kiisami neriuuteqalerpunga,“ oqarpoq. Marielli nikallungarujussuarnera sivisuulaartumik suli atuussimavoq. Qanoq ililluni nappaat taama ittoq ajugaaffigineqarsinnaavaa? (wD 1/3 90)