’Tusartoq [kinaluunniit] oqarli: „Aggerna.“’

 Allassimaffik Jehovap Nalunaajaasuisa ukiumi tulliuttumi najoqqutassaat ima nipeqarpoq: ’Tusartoq [kinaluunniit] oqarli: „Aggerna!“’ Nunani 200-nit amerlanerusuni kiffartornertik 1991-imi nangikkunikku oqaatsit taakku kajumississutigissavaat.

’Anersaarlu nuliassarlu oqarput: „Aggerna!“ Tusartorlu [kinaluunniit, NV] oqarli: „Aggerna!“ imerusuttorlu aggerli; piumasullu imeq inuunartoq akeqanngitsumik piliuk.’ — sarĸúmersitat 22:17.

1. ’Imeq’ suna imeqqullugu qaaqquneqarpugut?

QAAQQUSISSUT: „Aggerna!“ ilinnuttaaq tunngavoq. Aggerluni suna pineqarsinnaagami? Imeq imerusuersaatissaq. Imeq nalinginnaasoq pineqanngilaq, pineqartorli tassaavoq imeq Jesusip imertartarfiup eqqaani arnamik Samariamiumik oqaloqateqarnermini eqqartugaa: ’Imermik tunniukkumasannik imertoq imerusussaavilluinnassavoq, imeq taassumunnga tunniukkumasara iluani puilasunngorumaarmat puilaavassasoq inuunermut naassaanngitsumut.’ (Juánase 4:14) „Imeq“ tamanna Jesusip sumit pisimavaa?

2. ’Imeq’ tamanna kimit puilava, sunalu pereermat aatsaat kuulersinnaasimava?

² Apustili Johannes immikkut pisinnaatinneqarsimavoq puilasumik erngup tamatuma puilaffianik takusaqartinneqarluni. sarĸúmersitat 22:1-imi allappoq: ’Uannut takutippaa kuussuaq inuunartumik imilik, aligortut qaammaritsigisoq, Guutip savaaqqallu issiavissaarsuannit puilasoq.’ Aap, erngup aligortut qaammaritsigisup inuunartumillu imallip puilaffia tassarpiaavoq Inuunermik tunisisoq nammineq, Jehova, savaaraq, Jesus Kristus aqqutigalugu, tamatuminnga tunisisoq. (Naleqqiuguk sarĸúmersitat 21:6.) „Guutip savaaqqallu issiavissaarsuat“ taaneqarmat, imeq inuunartulik nalagaaffiup Messiasikkoortup 1914-imi pilersinneqarnerata, tassa Naalakkap ullussaata aallartinnerata, kingorna puilalersimassaaq. — sarĸúmersitat 1:10.

3, 4. Imeq tamanna sumut assersuutaava, kikkullu imersinnaavaat?

³ Imeq inuunartulik sumut assersuutaava? Nunarsuarmi paratiisinngortitaasimasumi naammalluinnartumik naassaanngitsumillu inuit inuunissaannik tuniumallugit Guutip aaqqissuussinerinut assersuutaavoq. Imeq inuunartulik Jesus Kristus aqqutigalugu inuunermik aaqqissuussanut tamanut assersuutaavoq. Aaqqissuussinerit tamakku ullumikkut tamakkiisumik pineqarsinnaappat? Naagga, aaqqissuussaaneq ajortoq maannakkut atuuttoq naalagaa takussaanngitsoq, Satan Diaavulu, ilanngullugu Guutip peeqqaarallassavaa. Kisianni Naalagaaffimmik tusagassamut nuannersumut tusarnitsigut naalannitsigullu, aammalu tamanna naapertorlugu inooriaaseqarnitsigut, „imeq“ maannakkut pineqarsinnaasoq imersinnaavarput. — Juánase 3:16; Rûmamiut 12:2.

⁴ ’Kuussuarmik inuunartumik imilimmik’ Johannes takutereeramiuk, Jesusip oqaluttuuppaa sooq inngilini aallartissimagini takusassaq tamanna nassartillugu. Taava Johannesip nalunaarut manna tusarpaa: ’Anersaarlu nuliassarlu oqarput: „Aggerna!“ Tusartorlu [kinaluunniit] oqarli: „Aggerna!“ Imerusuttorlu aggerli; piumasullu imeq inuunartoq akeqanngitsumik piliuk.’ (sarĸúmersitat 22:17) Taamaattumik Guutip kiffai imerusuttunik qaaqqusipput nunami naassaanngitsumik inuunissamik savaatimigut Jehovap aaqqissuussaanik imileqqullugit. — Juánase 1:29.

Imermik inuunartulimmik pisariaqartitsineqalerpoq

5. Inuiaat qanoq ilillutik Guutip aaqqissuussaanik tamatuminnga pisariaqartitsilersimappat?

⁵ Ajoraluartumik inuiaat siuaasaasa siulliit aqqut imminnik kinguaassaminnillu paratiisimi inuunermik naassaanngitsumik periarfissiisoq aqqutigiunnaarpaat. Aatsaat Adam silatuumik qinersilluni Pinngortitsisiminut naalappat inuit naassaanngitsumik inuusinnaassapput. Pinngortitamilli anersaajusumit pikitsitsiumatuumit sunnerneqarluni aqqummut inuiannik toqumut pisitsisumut Eva saappoq, uiatalu naammalluinnartup, Adamip, aqqummut toqumut ingerlasumut ingerlaqasiuppaa. Kinguaariinnut takkuttussanut timikkut siuaasaasutut iluamik oqaatigalugu Adam inunnut kinguaariinnut toqumik kingornussisitsisuuvoq. Taamaattumik Bibelimi oqaatigineqarpoq: ’Taamaattumik soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ (Rûmamiut 5:12) Adam Evalu ajortulioreernermik kingorna aatsaat kinguaassiulerput. — Tussiaat 51:7.

6. Sooq Guutip inuit imermik tamatuminnga imersinnaalersippai?

⁶ Taava Guutip paratiisimik inunnik naammalluinnartunik ulikkaartumik pilersitsinissaminik siunertani naammassisinnaajunnaarluinnarpaa? Apeqqut Bibelimi naaggaarneqarpoq! Siunertani naammassiumallugu Adamip maangaannartitaa ajunaarnersuarmik nassataqartoq aaqqinniarlugu Jehova iliuuseqalerpoq. Eqqortumik iliornerup naapertuilluassutsillu aallaavigimmanni pissutsinut taakkununnga akerliunngitsumik Jehova iliuuseqarpoq. ’Kuussuaq inuunartumik imilik’ ikiortigalugu inuiaat naalattut, inuunerup pilerfianit avissaartinneqarsimasut, inuunermik naammalluinnartumik tuneqqikkumaarpai. Jesus Kristusip  ukiuni tuusintini naalakkersuinerani kuussuaq tamanna tamakkiisumik kuussaaq, inuillu tamarmik, ilaatigut makititaasimasut, tamatumannga imersinnaassapput. — Naleqqiutikkit Hesekiel 47:1-10; apustilit suliáinik agdlagkat 24:15.

7. Suna tunngavigalugu ’imeq’ pineqarsinnaalerpa?

⁷ Jehovap nammineq inuuneq nuannaarutigaa, aammattaaq pinngortitami ilaannik inuunermik sianissuseqartumik tunisinissani nuannaarutigaa. Jehovap aaqqissuussai inuunartut Jesusip utertitsissutissatut pilliutaanik tunngaveqarput. (Mákorse 10:45; 1 Juánase 4:9, 10) Tamatumunnga ilaavortaaq Guutip oqaasia, Bibelip ilaani imermut assersuunneqartoq. (Evfisumiut 5:26) Inuit, aaqqissuussanik aappariit naammalluinnartut, Adamip Evallu, iluaqutissaannut Guutip pilersissimasaanik pinngitsuuisariaqarsimasut, Jehova Guutip akornutissaqarani oqarfigisinnaassavai: ’Aggeritsi!’

Nuliassaqatigiit oqarput: ’Aggerna!’

8. Kikkut siulliullutik ’imermik’ imersinnaatitaalerpat, qangalu?

⁸ ’Aggerna!’-mik oqaqqaartut tassaapput assersuutikkut Savaaqqap nuliassaanut ilaasut. Savaaraq tassaavoq Jehovap anersaakkut ernera angajulliliaq. (sarĸúmersitat 14:1, 3, 4; 21:9) Kristusip anersaakkut nuliassaa imminut oqarfiginngilaq: ’Aggerna!’, tassa nuliassamut ilaasut 144.000-iusut tamakkernissaata tungaannut Jehova Guutip katersussallugit suli amigaatigisaanut. Qaaqqusissut tamanna inunnut Harmagedonip kingorna nunami naammalluinnartumik inuunissaminnik neriugisaqartunut qaaqqusissutaavoq. (sarĸúmersitat 16:14, 16) Pissutsit aaqqissuussaanerata matuma naggatissaata nalaani, 1914-imiilli, Guutip anersaavata illernartup peqataaffigisaanik qaaqqusissut tamanna ’nuliassap’ tusarliuttarpaa.

9. Sumit nalunngilarput qaaqqusissut inunnut ikittuinnarnuunngitsoq qaaqqusissutaasoq?

⁹ Bibelip atuagartaani kingullermi kusanaqisumik ersersinneqarpoq ’amerlangaartut kisinneqarsinnaanngitsut’ Guutip naalagaaffianik tusagassamik nuannersumik oqaluussissutiginninnermut qisuariarumaartut naalakkersuinermullu kunngiussusseqartumut tamatumunnga aalajaatsumik aalajangerfiginnikkumaartut. (sarĸúmersitat 7:9, 10, 16, 17) Amerlangaartunut taakkununnga ilaavit? Taamaappat eqqaamajuk ’tusartoq kinaluunniit oqassammat: „Aggerna!“’

Anersaaq nuliassarlu oqarput: ’Aggerna!’

10. Imeq assersuutaasoq tamanna sumit pisimassava, sooq?

¹⁰ Soorli Guuti uissarlu assersuutaasoq sarĸúmersitat 22:17-imi eqqartorneqanngillat? Siullermik malugiuk versimi eqqaaneqanngimmat kia siulersuineratigut anersaaq iliuuseqartoq, anersaamilli eqqartuinerup Jehova Guutimik namminermik eqqaasippaatigut. Ataataq tunulliunneqanngilaq, taannami nammineq anersaaq illernartumut aallaaviuvoq. Aappassaanillu, Erneq Ataataminik suleqatiginnilluinnartuuvoq. Soorlu nammineq oqartoq: ’Erneq isumaminik qanoq-iliorsinnaanngilaq, kisianni ataataq taamaaliortoq takuguniuk.’ (Juánase 5:19) Iluamik oqaatigalugu qaaqqusissut oqaaseqaataavoq isumassarsiarititaasoq Jehova Gutimeersoq; aammattaaq inuit Jesus Kristus, ’oqaaseq’, aqqutigalugu Guutimit unnersuussutinik, ’oqaaseqaatinik isumassarsiarititaasunik’, tigusaqarsinnaapput. (sarĸúmersitat 22:6; takujuttaaq 22:17, NV, atuaqqissaarummi ilanngussaq; Juánase 1:1) Taamaattumik eqqortumik iliorluta uissaq, Kristus, qaaqqussissummut tamatumunnga atassuteqartipparput. Aap, qularutigissanngilarput uissap Ataataa, Jehova Guuti, uissarlu, Jesus Kristus, anersaaq illernartoq ikiortigalugu nuliassaq peqatigalugu qaaqqusimmata: ’Aggerna!’

11, 12. (a) Sukkut paasineqarsinnaasimava imernissamik qaaqqusissut allanut ingerlateqqinneqassasoq? (b) Tamatuminnga paasinninneq qanoq ililluni ukiut ingerlaneranni ersarissiartorsimava?

¹¹ Qaaqqusissut: ’Aggerna!’ inunnut ’imermik inuunartumik’ imerusuttunut ukiorpassuarni tusarliunneqartarsimavoq. Inunnut nunami inuusussaassangatinneqartunut tusarliussaasumik nuliassaqatigiit 1918-imiilli oqaluussissutiginnilersimapput. Tamanna pivoq tamanut ammasumik oqalugiaatikkut „Inuit maannakkut  inuusut millionilikkuutaat toqunngisaannassapput“. Tamatumani neriuut saqqummiunneqarpoq inuppassuit Harmagedonimi aniguinissaannut taamaalillutillu Guutip naalagaaffiata Messiasikkoortup ataani nunami paratiisiusumi naassaanngitsumik inuunermik angusinissaannut tunngasoq. Oqalugiaammili ersarissumik innersuussutigineqanngilaq qanoq ililluni aniguisoqarsinnaanersoq, taamaallaalli eqqartorneqarluni naapertuilluartuusariaqarneq.

¹² Qaaqqusissut: ’Aggerna!’ amerlanerusunit tusarneqarsinnaaqqullugu Guutimik kiffartuussinissaminnik soqutiginnittunut tamanut 1922-mi ima tusarliussaqartoqarpoq: „Kunngi Naalagaaffialu oqaluussissutigikkit.“ 1923-mi nuliassaqatigiit paasivaat Matîuse 25:31-46-mi Jesusip assersuusiaani eqqartorneqartut ’savat’ ’savaasallu’ Harmagedonip siorna takkukkumaartut. 1929-milu Vagttaarnet 1. majimi ilanngutassiaqarpoq ima qulequtalimmik: „Qaaqqusissut saammaasoq,“ sarĸúmersitat 22:17 pingaarnerutillugu sammineqarluni. Tamatumani erseqqissarneqarpoq nuliassaqatigiit pisussaanerat qaaqqusissummik: ’Aggerna!’-mik tusarliinissaminnut. — Quppernerit 135-137. *

Savat allattaaq oqarput: ’Aggerna!’

13, 14. Qanoq ililluni 1930-kkunni ersarinnerulersimava aamma inuit allat imermik assersuutaasumik imersinnaasut?

¹³ Aammalu Vagttaarnet-imi 1932-uliinnaraa tikkuarneqarpoq aammattaaq ’savat allat’ oqartariaqartut: ’Aggerna!’ (Juánase 10:16) 1. oktoberimi saqqummersumi qupperneq 297-imi, immikkoortoq 29-mi, ima allassimvoq: „Jehovap Nalunaajaasui Jehup ilungersorneranut assingusumik pigisaqangaalerput, taakkualu Jonadabikkoqatigiinnik [savanik allanik] kajumissaarisariaqarput aggernissaannik Guutillu Naalagaaffiata qanillineranik oqaluussilluni suliamut peqataalernissaannik.“ sarĸúmersitat 22:17 issuareerlugulu immikkoortoq nangippoq: „Naalagaaffimmik tusagassamik nuannersumik oqaluussilluni suliamut peqataalernissaminnik namminneq kissaateqartunik tamanik tanitat kajumissaarisariaqarput. Naalakkap tusarliussaanik oqaluusseqataassagaanni Naalakkamit tanitaaneq pisariaqanngilaq. Jehovap Nalunaajaasuinut maanna tumannguernartuuvoq ilisimagamikku imermik inuunartumik inuppassuarnut, Harmagedonimi aniguisitaanissaminnut Jehovallu ajunngingaassusiata kingunerisaanik nunami naassaanngitsumik inuulernissaminnut periarfissalinnut, tunioraanissaminnut akuerisaallutik.“ *

¹⁴ 1934-miit sinneruttunit tanitaasunit tikkuarneqarpoq savat allat taakku maanna Guutimut tunniulluinnartariaqalersut, imermi kuisinnermikkut tamanna ersersillugu taavalu nuliassaqatigiit suleqatigalugit inunnik qilalersunik qaaqqusisariaqarlutik: ’Aggerna!’ Tassa ’savanik allanik’ qilalersunik ’paarsisup ataatsip’, Jesus Kristusip, ataani ’savaatitut ataasioqatigileqqullutik’ nuliassaqatigiit ersarissumik qaaqqusilerput. (Juánase 10:16) 1935-mi immikkut ittumik ataatsimeersuarnermi sinneruttut tanitaasut nuannaarutigisimaqaat paasigamikku inuppassuit ’savanut allanut’  ilaasut, oqarfigisatillu: ’Aggerna!’, tassarpiaasut ’amerlangaartut’ sarĸúmersitat 7:9-17-imi eqqartorneqartut. Tamanna inunnik allanik qaaqqusilluni suliniarnermik annertuumik aallarniisitsisuuvoq.

15. Qanoq ililluni ’anersaaq’ inunnik ’aggeqquseqataava’?

¹⁵ Nuliassaqatigiit Guutip anersaava naapertorlugu iliorput oqaramik: ’Aggerna!’ Anersaani ikiortigalugu Guutip oqaatsimini allagaasuni siulittuutit isumaat saqqummersippaa, taamaalillunilu nuliassaqatigiit sinneri qaaqqusissummik tamatuminnga tusarliinissaannik kaammattorlugit. Siulittuutit qaaqqusissummut tunngaviusut Guutip anersaavata isumassarsiaritissimavai. Taamaattumik Kristus nuliassaalu aqqutigalugit ’savanut allanut’ oqartoq: ’Aggerna!’ tassarpiaavoq taassuma anersaava. — sarĸúmersitat 19:10.

16. Anersaaq nuliassarlu ullumikkut qaaqqusinermut qanoq attuumassuteqarpat?

¹⁶ Ulloq manna tikillugu anersaaq, nuliassarlu sinnerlugu, ’sinneruttut’, ’[oqartuarput, NV]: „Aggerna!“’ ’Sinneruttut’ savanik allanik taakkuninnga peqqusipput inunnik suli allanik qaaqqusinissaannik. ’Imermik inuunartumik’ ullumikkut pineqarsinnaasumik inunnik allanik erliguussissanngillat. ’Anersaap nuliassallu’ peqqusinerat: ’Tusartoq oqarli: „Aggerna!“’ naalattariaqarpaat. Imerusuertut tamarmik qaaqqusissut ingerlateqqittariaqarpaat. Nagguik, inuiaassuseq, oqaatsit upperisarluunniit apeqqutaatinnagit kikkunnut tamanut tusarliuttariaqarpaat, qaaqqusissut nunarsuarmi inunnut tamanut tunngammat. Jehovap Nalunaajaasuisa inuit sumiikkaluartullunniit ’imermik inuunartumik’ imernissaannik neqeroorfigalugillu ikiorpaat.

17. ’Imeq’ suna ullumikkut pineqarsinnaava?

¹⁷ Aap, Savaaqqap, Jesus Kristusip, nunarsuaq tamakkerlugu ’amerlangaartut’ ’puilasunut inuunerup piinut’ siulersorpai. (sarĸúmersitat 7:17) Imiunngilaq mingutsitaasimasoq, imiuvorli sukuluitsoq, nillataartoq peqqinnartorlu puilaffimminit imertariaannaq. Imeq assersuutaasoq Bibelimi ajoqersuutinik ilumoortunik paasinninnermuinnaanngitsoq assersuutaavoq, aammattaaq ’amerlangaartut’ naammalluinnartuulluni pilluarlunilu naassaanngitsumik inuunermut maannangaaq siulersorniarlugit Jesus Kristus aqqutigalugu Guutip aaqqissuussaanut tamanut assersuutaavoq.

Maanna oqaluusseqataagit

18. Qaaqqusineq ullumikkut qanoq siammarsimatigaa?

¹⁸ ’Amerlangaartut’ maanna millioninik arlaqartunik amerlassuseqalereerput, ilungersortuullutillu tusagassaq nuannersoq nunarsuarmi inuit najugarisaanni tamarsuarmi oqaluussissutigaat. Tusagassamik nuannersumik tamatuminnga, maanna nunanut 212-inut anngussimasumik, oqaluussissutiginneqataanertik aalajangersimasumik nalunaarusiarisarpaat. Jehova Guuti, Piffissalersuisorsuaq, kamagittarluni pissutsit aaqqissuussaanerata naggatissaanik atuutititsisillugu qaaqqusissut tusarliunneqartuassaaq. Taassuma nalunngilaa piffissaq qaqugu naajumaartoq, qaqugulu Bibelimi siulittuutitigut uteqattaartuarsimasamisut kikkut tamarmik imminik ilisarsilerfissaat nalliutissasoq. — Hesekiel 36:23; 38:21-23; 39:7.

19. Sooq oqarsinnaavugut ’imeq’ akeqanngitsumik neqeroorutigineqartoq?

¹⁹ Taamaattumik suli piffissaqarallartillugu ’amerlangaartunut’ ilaasut nuliassaqatigiit sinneri peqatigalugit qaaqqusipput: ’Aggerna! Imeq inuunartoq akeqanngitsumik piuk!’ Tusagassamik  nuannersumik annassutaasussamik oqaluussissutiginnittut akissarsiutiginagu sulipput; silarsuaq tamakkerlugu Naalagaaffimmik tusagassamik siaruarterillutik kiffartornertik akissarsiutiginngilaat.

20. ’Erngup’ pineqarsinnaanera qanoq kinguneqarpa?

²⁰ Imeq inuunartoq maanna nunarsuarmi sumi tamaani pineqarsinnaavoq, tamatuminngalu perusuttut pisariaqartitatik tamaasa pisinnaavaat taamaalillutillu annassinnaallutik. Inuiaat utertitaasimasut nunarsuarmi maani, paratiisinngortitaasimasumi naassaanngitsumik inuusinnaalissapput. Taamalilluni Jehovap siunertaa naleqangaartoq piviusunngussaaq. Pinngortitsisup nunarsuaq asuliinnaq pinngortinngilaa, pinngortippaali siunertaralugu tamakkerluni Edenip naatsiivinngornissaa, nuannaarnerup paratiisinngornissaa, naammalluinnartunit Guuti assilillugu pinngortitanit najugarineqartoq.

21. Guutip nunarsuarmik siunertaa qanoq ililluni naammassineqassava?

²¹ Silarsuarmi nutaami taama ittumi inuuneq misigissallugu ilumut immikkorluinnaq pisinnaatitaaffiullunilu nuannerluinnassaaq! Taava inunnut aappariinnut siullernut Guutip suliassiissutigisimasaa Mosesimik allakkat siulliit 1:27, 28-mi allassimasoq tamakkiisumik naammassineqassaaq. Ajunaarnerup inuit eqqormagit qujanartumik Jehovap akuliulluarnera pissutaalluni, nunarsuaq naalakkersuisunik tamatuminnga paratiisinngortitsisussanik naalakkersorneqalissaaq, inuiannillu naammalluinnartunik ulikkaassalluni. Aap, Guutip piliani tamaasa qimerluussavai, takussavaalu ajunngilluinnartut! Illit taamanikkussamut ilaassavit? Maannakkut pingaartitsillutit imermik inuunartumik akeqanngitsumik pisalersimanerit tamatumunnga aalajangiisuussaaq. ’Aggerna!’ Naammatsillutit imerit! Imermik inuunartumik, kuulersimasumik ukiunilu tuusintini naalagaaffissami tamakkiisumik kuuttussamik, imerusuersarit. Qaaqqusissummillu nuannersumik tamatuminnga tusartut tamarmik oqarlik: ’Aggerna!’ (wD 15/12 90)

[Quppernerup ataani ilanngussat]

Qanoq akissavit?

□ ’Imeq’ sarĸúmersitat 22:17-imi eqqartorneqartoq sunaava?

□ ’Imeq’ tamanna kimit puilava?

□ Sooq ’imeq’ tamanna pinngitsoorneqarsinnaanngila, kuulinnginneranilu sumik pisimassava?

□ ’Anersaap’ eqqartorneqarnerata suna ersersippaa, ’nuliassarlu’ qanoq pingaaruteqarpa?

□ Kikkut ’imermik’ tamatuminnga imersinnaappat, qanorlu kinguneqassava?

[Atuaqqissaarnermi apeqqutit]