Inuiaqatigiit nuannaartut

INUIAQATIGIIT nuannaartut! Ullumikkut inuiaqatigiiusut arlaat taamatut taasinnaavavut? Inuiaqatigiit arlaata nakuuserneq, pinerluttuliorneq, piitsuussuseq, mingutsitsineq, nappaatit, naalakkersuisut peqquserluttuliortarnerat upperisarlu pillugu uumissuinerit soraarsissimallugit nuannaarutigisinnaavaat? Inuiaqatigiit arlaata tamatuma angusinnaanissaa ilamagalugu nuannaarutigisinnaavaat? Naaggarluinnaq!

Silarsuaq tamakkerlugu qanoq isikkoqarpa? Mikhail Gorbatjov, Sovjetunionip præsidentia julip ulluisa 16-ianni 1990-imi oqarpoq: „Silarsuarmi nunat assigiinngitsut atassuteqaqatigiinnerisa ullui atuuttut naapput, nutaallu aallartillutik; isumaqarpunga ulluujumaartut eqqissinermik tutsuiginartumik ataavartumillu nassatartut.“ Atuagassiarli Time ullormi tassani saqqummersoq allappoq USA-mi atomip nukinga atorlugu qaartartut 120-t Moskvamut suli sammitinneqartut, qaartartullu ataasiinnaap illoqarfik nungutivissinnaagaa. Sovjetunionillu akiniaanissaminut piareersimanera qularnanngitsoq. Nunat Naalagaaffiit Peqatigiiffiat-nut ilaasortaasut arlaqartut ullumikkut atomip nukinga atorlugu qaartartuliorsinnaanissaminnut ilisimasaat naammapput. Kinali siulliulluni ’attataasamik toorsissanersoq’ isumaliuutigeruusaassallugu nuannernavianngilaq.

Inuiaqatigiit nuannaarluinnartut

Ukiut 3500-t matuma siornagut inuiaqatigeeqarsimavoq nuannaarnermik piviusumik ersersitsisunik — tassa itsaq Israel. Ægyptenimiut naqisimanninnerannit Guutip aniguisimmatik, qiimaqisumik ajugaasimaarummik erinarsorlutik Moses appeqatigaat, Guutertillu Aniguisitsisoq naalattuartillugu nuannaarnerat tamanna atajuarsinnaavoq. — 2 Mosesimik allakkat 15:1-21; 5 Mosesimik allakkat 28:1, 2, 15, 47.

Kunngi Salomonip aqutsinerata nalaani „Judakkut Israelikkullu sissap sioraasut amerlatigipput. Nerillutillu imerput nuannaarlutillu.“ Nuannaarnerup sakkortunerpaaffia pivoq oqaluttuarisaanermi illorsualiat alutornarnerpaartarigunagaat, tassa Jerusalemimi Jehovap naalaffissua sananeqarmat. — 1 Kunnginik allakkat 4:20; 6:11-14.

Ullumikkut inuiaqatigiit nuannaartut

Itsaq Israel ullumikkut inuiaqatigiinnut assersuutaavoq. Sorlernut? Inuit ilaasa immaqa naalagaaffik kangianiittoq Israel eqqaassavaat.  Inuiaqatigiiuppalli nuannaartut? Nutaarsiassat nalunaatsumik takutippaat inuiaqatigiit taakku sorsuuttuartut pilluanngivissut. Naalagaaffiit Peqatigiit-nimmi taasut. Peqatigiiffiup tamatuma nunat ilaasortani nuannaalersissimavai? Naagga, nuannaarneq piviusoq ullumikkut inuiaqatigiit politikki tunngavigalugu naalakkersuillit akornanni nassaassaanngilaq. Piumatuneq, peqquserlunneq, unneqqaserlunnerlu ulluinnarni atuupput, nunanilu amerlasuuni inuit inuuniaannarlutik pilluaallutik tamaviaaruluttaqaat. — Ussatit 28:15; 29:2.

Malugisariaqartumilli ullumikkut inuiaqatigeeqarpoq nuannaangaarnermik misigisaqartunik. Politikkimut tunngassuteqanngillat, naalakkersuisuisami qullersaat Kristus Jesus innuttaminut oqarsimavoq: ’Silamiut . . . ilaginngilaasi.’ (Juánase 15:19) Naalagaaffiit Peqatigiit atiinnarmikkut peqatigiiusut ilaasortamik ataasiussuseqartinnissaat angusimanngilaat, akerlianilli inuiaqatigiit taakku ’immikkut naggueqatigiinnik, immikkullu inuiannik immikkullu oqaasilinnik’ ataasiussuseqartitsipput. (sarĸúmersitat 7:4, 9) Ullumikkut inuiaqatigiit taakku 4 millioninit amerlanerupput, nunat FN-ip ilaasortaasa 159-iusut ilaasa 60-it innuttaannit amerlanerullutik. Inuit taakku 4 millioninit amerlanerusut assigiinngitsunik 200-t missaanniittunik inunnguutsiminnik oqaasiliupput, taamaakkaluartorli ataatsimoorussaminnik oqaaseqarput, „minguitsunik“. — Sefanja 3:9.

Inuit taama amerlatigisut nunanit assigiinngitsuneersut kulturikkullu assigiinngitsunik tunuliaqutaqartut ilumut ataatsimoorussaminnik oqaaseqarsinnaappat? Aap, oqaatsit ataasiutitsisut Guutip naalagaaffia naapertuilluartoq takkuttussaq pillugu tusagassamik ilaqarmata ajornanngilaq. Inuiaqatigiit nuannaartut taakku ’nunaarsuup isuaneersuupput’ Jehovap Nalunaajaasuisullu tamani tusaamaneqarlutik. (Jesaja 43:5-7, 10; Sakarja 8:23) Nunarsuaq tamaat angalaffigigaanni tikitat tamangajammik Jehovamut nalunaajaasoqassapput.

Jesaja 2:2-4-mi Guutip pruffiitiata allaaserai inuit inuiaqatigiinnit tamanit qanoq aniasut oqarlutillu: „Qaa, majuarta [Jehovap] qaqqaanut Jaakup Guutiata illuanukarluta, aqqutigeqqusaminik ajoqersussavaatigut ingerlavigeqqusamigut ingerlasinnaaleqqulluta.“ Ilungersortuullutik Jehovap oqaatsimigut, Bibelikkut, unnersuussutaanik ilassinneqqullugit inunnik allanik kajumissaaripput, taakkuttaaq Guutip piumasaanik iliuuseqarnissartik ilikkarniassammassuk. Inuiaqatigiit taakku aqqutikkut piviusumik eqqissineqarfiusukkut ingerlapput, innuttaasullu ’panatik saaffioreersimavaat assallatserummut savissaliaralugit qalugiusatillu saviliaralugit viinnequtilerissutitut, sakkunillu atuinissamut ilinniarunnaareersimallutik.’ Aap, inuiaqatigiiupput nuannaartut pilluartullu.

Nuannaarneq tamanna illittaaq peqataaffigisinnaavat. Ullormik qanilliartupallaqisumik Kunngip Kristus Jesusip inunnik naalakkersuisunillu nunamik aseruisunik piiaaffissaanik Paratiisimillu pilersitseqqinnissaanik ilinniarsinnaavutit. (Daniel 2:44; Matîuse 6:9,10) Soorlu atuagassiami uani quppernerni tulliuttuni ersersinneqassasoq, Jehovap nalunaajaasuisa inuiaqatigiittut ataasiussuseqartutut ullussat nuanningaartussat piviusumik eqqissineqarfiusussat piareersarfigalugit nuannaarutigilereerpaat. (wD 1/1 91)