Nuannaarnermik ilumioqangaarniaritsi

’Ajoqersukkat tipaatsunnermik anersaamillu illernartumik ilumioqangaalerput.’ — APUSTILIT SULIÁINIK AGDLAGKAT 13:52.

1. (a) Nuannaarneq sumit inerititaava? (b) Guuti sooq unnersiutigineqartariaqarpa?

NUANNAARNEQ! Anersaap inerititaanik allaatiginninnermini Paulusip kristumiutut pissuseq tamanna asanninnermut tulliutillugu taavaa. (Galâsiamiut 5:22-25) Nuannaarnerup tamatuma suna pissutigaa? Tusagassaq nuannersoq Guutip inngiliata ukiut 1900-t sinnerlugit matuma siorna savanik paarsisunut maniguuttunut tusarliusaa pissutaavoq: ’Ata, tipaatsunnartumik tusarlissavassi tipaatsungaarutissassinnik inuit tamarmik pissaannik; ilissinummi ullumi erniuvoq annaassisoq, tassa Kristus Naalagaq, Davidip illoqarfiani.’ Taava inngilerpassuit savanik paarsisunut takutipput inngililu siulleq ilagalugu Guuti unnersiutigaat oqarlutik: „Naalannarsili Guuti qutsinnermi, nunamilu inuit [Guutip] iluarisaasa akornanni eqqissineqarli.“ — Lúkarse 2:10-14, NV.

2, 3. (a) Guutip ernituani inuiannut utertitsisussatut aallartissimammagu sooq naleqqulluarpa? (b) Nunamiikkallarami sutigut allatigut Jesusip Ataatami siunertaa naammassivaa?

² Jehovap inunnik iluarinninnera takuneqarsinnaavoq Naalagaq Kristus aqqutigalugu annassut pilersimmagu. Guutip ernera angajulliliaq taanna ilisimassusiuvoq piviusoq. Pinngortitsinermi ataatani pillugu taanna oqarpoq: „Taava sanianiippunga sulillaqqissorsuullunga; uanga ullut tamaasa nuannarisaraanga. Saani nuannaartuinnarpunga, nunarsuaani nuna naggorissoq nuannaarutigalugu, inuillu erneri nuannaralugit.“ — Ussatit 8:30, 31, NV.

³ Taamaattumik Jehovap erneq taanna, inuit ernerinik taama nuannarisaqartigisoq, inuiannik utertitsisussatut aallartissimammagu naleqqulluarpoq. Qanoq ililluni tamanna Guutimik ataqqinaatissiissavaa? Tamatuma siunertami misinnangaartup naammassinnissaanut nunarsuarlu inunnik naapertuilluartunik eqqissinermillu nuannarisaqartunik inulersornissaanut periarfississavaa. (1 Mosesimik allakkat 1:28) Erneq Jesus nunamiikkallarami, erloqinarnerpaamik misilinneqarnermigut takutissimavaa inuup naammalluinnartup ilumoorluni Jehova Naalakkatut kisimi oqartussaasutut naalassinnaagaa, taamalillunilu Ataatami pinngortitaminut naalagaassussaviunera aalajangersarlugu. (Eprîarit 4:15; 5:8, 9) Jesusip assuarnaalluni inuunera kristumiunut ilumoortunut tamanut maligassaavoq tumai peqqissaartumik atuarsinnaaqqullugit. — 1 Pîtruse 2:21.

4. Jesusip qasusuissusia nuannaarnermik sumik kinguneqarsimava, tamatumalu sooq kajumissisittariaqarpaatigut?

⁴ Jesusip Ataatami piumasaanik iliornini nuannaarutigeqaa, nuannaarnerullu suli annerusup angunissaa ilimagalugu, soorlu apustili Paulusip takutikkaa Eprîarinut agdlagkat 12:1, 2-mi: ’Nikallujuerluta arpanniarta assoruunnitsinni uatsinnut siunertarititaasumi, uppernermillu aallarniisoq inerititsisorlu Jesus aarlorfigisigu; taassuma tipaatsuutissaq imminut saqqangiussaq pillugu ilalaarluni [nappagaq naalliutsitaaffik, NV] atorpaa, mitaatigineqarnini soqutiginagu, ingissimavorlu Guutip issiavissaarsuata talerpiata tungaanut.’ Nuannaarneq tassani eqqartorneqartoq sunaava? Tassaannaanngilaq nuannaarneq Jesusip Ataatami aqqa naalannarsisikkamiuk inuiaallu toqumit utertikkamigit misigisimasaa, aammattaarli kunngiunerminik palasiunerunerminillu inunnullu naalattunut nunarsuarmi paratiisiusumi naassaanngitsumik  inuunermik tunisinerminik nuannaaruteqarnera. — Matîuse 6:9; 20:28; Eprîarit 7:23-26.

5. Jesusip „qatanngutigai“ kikkuuppat, nuannaarnerlu asseqanngitsoq suna peqataaffigisinnaavaat?

⁵ Aap, Guutip ernerata inuiaat iluaqutissaannik kiffartuussinini nuannaarutigiuarsimavaa. Aamma Ataatani ilagalugu inunnik assuarnaatsunik katersanik ’qatanngutiminik’ taasaminik, toqunermillu kingorna qilammut makititaasussaasunik toqqaanini nuannaarutigaa. Taakkua Jesus ilagalugu nuannaarneq asseqanngitsoq angussavaat. ’Pilluartut iluartutullu’ nalunaarutigineqassapput ’Guutillu Kristusillu palasertarissavaat, kunngioqatigissavaallu ukiut tuusintillit.’ — Eprîarit 2:11; sarĸúmersitat 14:1, 4; 20:6.

6. (a) Qaaqqusissummik nuannaarnartumik sumik ’savat allat’ tunineqarpat? (b) Pisinnaatitaaffiit suut ’savat’ taakkua ilarpassuisa maannakkut allaat nuannaarutigisarpaat?

⁶ ’Savat allat’ amerlangaartut, kunngip naalakkersuisup immikkoortitai taakkuninngalu iluarinninnerminut ersiutaasutut talerpimmi tungaanut inissitai, ima qaaqquneqarput: ’Taava kunngip talerpimmi tungaaniittut oqarfigiumaarpai: „Qaagitsi Ataatama pilluaqqusai ukorsii, naalagaaffik silarsuup tunngavileqqaarneranit ilissinnut piareersimasoq kingornussarisiuk.“’ (Juánase 10:16; Matîuse 25:34) Immikkut pisinnaatitaaffiup nuannissusia! Naalagaaffiup nunami naalagaaffigisaanik kingornussisussat akornanni amerlasuut, tanitat assigalugit, suliassanik akisussaassuseqarfiusunik tunineqarput. Jehovap siulittuutigisimasaa eqquulluinnarpoq: „Savaatisi takornartat paarissavaat, nunani allamiut sulisorissavasi narsaatini naatsiivinnilu viinnequtilinni. Ilissili taaneqartassaasi [Jehovap] palasiinik, Guutitta kiffaanik atserneqassaasi.“ Taakku tamarmik Guutip pruffiitia isumaqatigalugu oqarput: „Uanga [Jehova] tipaatsuutigingaarpara, Guutiga qiimmattaatigaara annassut uannut atisaritimmagu.“ — Jesaja 61:5, 6, 10.

7. Sooq 1914-mingaaniilli ’ullormi’ immikkut ittumi inuuvugut?

⁷ Maanna ullormi immikkut ittumi inuuvugut. 1914-imiilli ullormi Kristusip kunngitut qilammiittutut naalakkersuiffiani inuuvugut,  soorlu Tussiaat 118:24, 25-mi allaatigineqartoq: „Tamassa ulloq [Jehovap] pinngortitaa, qiimmattarlutalu tipaatsuutigisigu. [Jehova], annaatsigut! [Jehova], pilluaatissitsigut!“ Ullup tamatuma pingaarnerusortaa piumaarpoq Jehovap upperisarsiornerit babylonimiorpaluttut tamaasa peersippagit Kristusillu nuliassaqatigiivi, tassa qatanngutit 144.000-t, kunngilu qilammiusoq kattutsippagit Guutip innuttai tamarmik tamanna pillugu ’tipaatsullutik qiimasussapput’. Tipaatsussapputtaaq kunngimik Messiasiusup inuiaat pigisani ilumoortut Harmagedonimi annaanniarlugit sorsuppat silarsuarmullu nutaassamut naapertuilluarfiusumut isertillugit. (sarĸúmersitat 19:1-7, 11-16) Neriuut nuannersoq tamanna oqaluussissutigigaangassuk Jehovap innuttani pilluaqqusarpai? Nalunaarusiap tulliuttup tamanna akivaa.

Silarsuarmi tamarmi siuariarneq

8. (a) 1990 pillugu nalunaarusiaq qanoq ililluni nuannaarnermut anersaamullu illernartumut eqqaanarpa? (b) Nalunaarusiami pingaarnersat ilaat taakkit.

⁸ Jehovap nalunaajaasui ullumikkut ’neriugisaqangaarput anersaap illernartup pissaaneragut’. (Rûmamiut 15:13) Tamanna 1990-imi Naalagaaffimmik oqaluussineq pillugu nalunaarusiami sukumiisumik suliami takuneqarsinnaavoq. Nuannaarutigaarput oqaluussisartut amerlanerpaaffiat qaangeqqikkatsigu, tassa 4.017.213-t oqaluusseqataasimammata! Ukiut qulit kingulliit ingerlaneranni, ’savanik allanik’ katersuinerup nunani 212-ini silarsuarmi tamarmi annertussiartortuarfigisaani, siuariarneq 77 procentiusimavoq. Ukiut 15-it matuma siorna kuisissimasut amerlanerpaaffiat qangerneqarpoq, kuisissimasut 301.518-iummata! Ataatsimeersuarnerni amerlasuuni kuisittut tupinnangaartumik amerlapput, ingammik ataatsimeersuarnerni Jehovap nalunaajaasuisa Europap kangianeersut najuuffigisaanni. Taakkua ilarpassui inuusuttuupput, taamaalilluni uppernarsarlugu upperisarsiornerup utoqqaat peqatigalugit toqujumaarnissaanik socialistit oqaatigisaata eqqortuunnginnera.

9. (a) Angajoqqaat meeqqatik naalunngiannguunerannit ajoqersortaraangatigik sunik nuannersunik kinguneqartarpa? (b) Tamatuminnga assersuutinik najugarisanneersunik allaneersunilluunniit taasigit.

⁹ Inuusuttorpassuit kajumissaarut Tussiaat 32:11-miittoq maleruarpaat: „[Jehova] tipaatsuutigisiuk, nuannaarnermit suaaritsi iluartut ilissi. Assuarnaatsusi tamassi qiimmattarlusi nilleritsi!“ Malunnarpoq angajoqqaarpassuit meqqamik ’naalungiannguuneranit’ ajoqersornissaannik kajumissaarut malikkaat. (2 Timûtiuse 3:15, NV) Naqitikkat immiussallu meeqqanut naleqqussakkat atorneqarluartarput. Meeqqat atualeraangamik erininanngitsoq nalunaajaallualersarput. Assersuutigalugu, niviarsiaraq Japanimioq arfineq-pingasunik ukiulik oqaluttuarpoq: „Aasakkut atuanngiffiup kingorna ilinniartitsisora ornippara aperalugulu: ’Atuanngiffimmi ataatavit ilerfa takuniarpiuk?’ Akivoq: ’Aap, ataataga ajunngitsuuvoq, ukiullu tamaasa ilerfa takuniartarpara.’ Oqarpunga: ’Bibeli atuaqqissaartarukku Guutillu oqaasii naalallugit, nunami paratiisissami ataatat takoqqissinnaavat.’ Taavalu bîbilimik oĸalugtuautíka-mik tunivara. Maanna sapaatit-akunneri tamaasa anitsiarfissuarmi ilinniartitsisutta atuakkamit kapitali ataaseq klassimut atuffassissutigisarpaa.“

10. Atuagaq Inuusuttut aperipput qanoq ililluni iluaqutaava? Assersuutinik taasigit.

¹⁰ Inuusuttuaqqat amerlasuut atuagaq Inuusuttut aperipput — Akissutit atorsinnaasut, namminneq atuaqqissaartarnerminni aamma inuusuttunut allanut oqaluussisarnerminni atorluarsimavaat. Angajoqqaattaaq amerlasuut atuakkamik tamatuminnga pingaartitsinertik oqaartigisimavaat. Qatanngut arnaq Schweizimiu ikiorti-pioneriusoq aalajangersimavoq meeqqami atuaqataasa angajoqqaavi pulaarniarlugit. Angajoqqaanik arlalinnik oqaloqatigiinnilluarneranik kinguneqarpoq, atuakkallu 20-t (ingammik Inuusuttut aperipput) atuagassiallu 27-t agguaassimavai. Niviarsiaqqap atuartup Trinidadimiup ilinniartitsisuni atuakkamik tunimmagu, malitsigiinnarlugu anaanaata ilinniartitsisut 36-t akornanni atuakkat 25-t agguaassimavai. Qaammatip  tulliani immikkut suliniuteqarluni angajoqqaat ilisarisimasani naammattoorniarsarpai, atuakkallu 92 agguaallugit arlalinnillu Bibelimik atuaqqissaaqateqalerluni. Koreami ilinniartitsisup atuagaq Inuusuttut aperipput atorlugu naatsunik oqalugiarpoq uku qulequtaralugit: „Qanoq ilillunga atuarfimmi pitsaanerusunik karakteereqalersinnaavunga?“ aamma „Qanoq ilillunga ilinniartitsisunnut pitsaanerusumik attaveqalersinnaavunga?“ taavalu atuagaq neqeroorutigalugu. Atuartut atuakkat 39-t pereeraallu angajoqqaat ilaat naammagittaalliulerput. Atuarfiup naalagaata atuagaq misissorpaa ’pitsassuunerarlugulu’, panimminullu ataatsimik inniminniilluni.

Ilinniartitaaneq pitsaanerpaaq

11, 12. Vagttårnip peqatigiiffiata naqitigai ilinniartitsinermik pitsaanerpaamik imaqartut suut takutippaat?

¹¹ Amerlasuuttaaq paasisimavaat atuagassiaativut ilinniartitsinermi atorluarsinnaasut. Assersuutigalugu atuarfiit ilaata U.S.A.-miittup Vågn op!-it 22. juli 1990-meersut 1200-t (ikiaroornartumut crackimut tunngasortallit) inniminnersimavai ilinniartitsinermi atorniarlugit. Aammattaaq Jehovap nalunaajaasuisa meeraasa maligassiuilluartumik ileqqorinnerat maluginiarluarneqartarpoq. Thailandimi klassimi nipiliorajoqisumi ilinniartitsisup Racha 11-nik ukiulik allattarfiliaqquaa, ileqqorinneranillu nersorlugu oqarluni: „Ilissi sooq uuma maligassiaa malinngilisiuk? Eqiasuippoq, ilinniagassani isumagisarpai ileqqorillunilu.“ Oqaatsini ilavai: „Isumaqarpunga Rachatut Jehovamut nalunaajaasunngorussi aatsaat ileqqusi iluarsissasut.“ — Naleqqiuguk Ussatit 1:8; 23:22, 23.

¹² Qatanngut arnaq inuusuttoq Dominikanske Republikimeersoq allappoq: „Sisamanik ukioqarlunga meeqqanut meeraaqqat atuarfiat upperisarsiortunit aqunneqartoq atuarnermik allannermillu ilinniarfigisimasara qimalerakku, ilinniartitsisumut mattuttuusumut arnamut atuagaq pâratîsime nuname nâgssáungitsumik inûsínauvutit tunniuppara, atuakkami allallunga: ’Qujamasungaarpunga atuarnermik allannermillu ilinniartissimagamma. Kissaatigissagaluarpara upperisara paasisinnaassagit uattullu nunami paratiisinngortussami naassaanngitsumik inuunissamik neriuuteqalernissat.’ Tamanna pissutigalugu atuarfimmit anisitaavunga. Ukiut qulingiluat tamatuma kingorna ilinniartitsisoq taanna naapeqqippara. Oqaluttuuppaanga palasip akerlilersoraluaqigaani qanoq ililluni atuagaq atuarsimagini. Illoqarfiit pingaarnersaannut nuussimavoq tassani Jehovap nalunaajaasuinik Bibelimik atuaqqissaaqateqarsinnaasimalluni. Ataatsimeersuarnermi ’Oqaatsit minguitsut’-mi marluulluta kuisippugut.“ Soorlu siulittuutigineqarsimasoq ’merlertunnguit qarninit’ oqaatsit ilisimassutaasut aninneqarsinnaapput. — Matîuse 21:16; Tussiaat 8:2, 3.

13. Inuusuttuaqqat amerlasuut Salomonip kajumissaarutaanut qanoq qisuariarpat, tamannalu nalunaarusiami qanoq takutinneqarpa?

¹³ Salomon ima kajumissinartumik siunnersuisimavoq: „Inuusutsillutit qiimasaarniarit, uummativit nuannarisai malillugit iliortarit; nuannaarniarit inuusunnerpit ulluini, isivillu alianaagisaat malillugit pisarlutit.“ (Nalunaajaasup oqaasii 11:9) Qiimanarpoq takullugu Jehovap nalunaajaasuisa akornanni meeqqat taama amerlatigisut siunnersuummik tamatuminnga malinnittut inuusuttuaraanertillu pioneritut Jehovamut kiffartorlutik inuunissaminnut piareersarfigigaat. Meeqqat atuarfianni naammassereeraangamik amerlasuut kiffartuussineq tamanna aallutilertarpaat suliassamik allamik taamatut pingaartigisoqannginnera paasilluarsimagamikku. Pionerit suli amerliartuinnarput, 1990-imilu 821.108-t kiffartuussinermut tamatumunnga peqataasimapput. Qatanngutit angutit arnallu 11.092-t Betelimiittut ilanngullugit, taakku tassaapput oqaluussisartut tamarmiusut 21 procentii.

14. Qatanngutivut arnat suliassaq annertooq suna naammassisarpaat, qanorlu nersortariaqarpat?

¹⁴ Soqutiginarpoq nunani amerlasuuni, soorlu assersuutigalugu U.S.A.-mi, pionerit 75 procentii arnaammata. Tamatuma erseqqissarpaa oqaatsit Tussiaat 68:12-miittut ilumoornerat: „[Jehova] peqqusivoq, arnallu amerlaqaat ajugaanermik nalunaariartortut.“ Qatanngutivut arnat nersorneqartariaqarput  oqaluussisarnerup annerpaartaa suliarisarmassuk. Bibelimik atuaqqissaaqateqarnermi ilinniartitsillaqqinnerata amerlasuut sallusuissummut sangutippai, arnallu katissimasut ilumoorlutik uiminnik ilagiinni amerlasuunik suliassaqartitaasunik tapersersuisut, nersugassaapputtaaq. — Ussatit 31:10-12; Evfisumiut 5:21-25, 33.

Bibelimik atuaqqissaaqateqarnermi siuariarneq

15. Nammineq misigisimasannik eqqaasaqarit Bibelimik atuaqqissaaqateqartarnerup kinguneqarluarsinnaaneranik takutitsisunik.

¹⁵ Bibelimik ilinniartitsineq aamma siuariartorpoq, atuaqqissaaqatigiinnerillu qaammatit tamaasa agguaqatigiissillugit 3.624.091-iupput. Sallusuissutip Bibelimeersup inuup pissusia allanngortissinnaavaa, soorlu nunarsuup illua-tungaanit nalunaarusiami ersersinneqartoq. 1987-imi januarip aallartinnerani ujajaasimanini allakkanillu pingaartunik peqquserlulluni allanngortiterisimanini pissutigalugit qaammatit 25-t parnaarussaareersimalluni angut Australiamit anisitaalluni New Zealandimut pivoq. Ukiut 17-t sinnerlugit ikiaroornartut nioqqutigisimavai namminerlu atorsimallugit. Ukiup tulliani nuliata Jehovap nalunaajaasui ilagalugit Bibeli atuaqqissaalerpaa, paasisaqarneruleriartortillunilu pissutsini malunnartumik allanngortikkai uiata takusinnaalerpaa. Nuliaalluarnerulerpoq anaanaalluarnerulerlunilu. 1989-imi junimi nuliami kajumissaarutaa malillugu ataatsimeersuarnermut najuuppoq. Kingorna angerlarsimaffimminni Bibelimik atuaqqissaaqatigiittarnissamut akuersivoq, qallikkullu inooriaatsimigullu assut allanngoriartulerpoq. Ilaqutariit arfineq-marlunnik ilaasortallit tamarmik ataatsimiinnernut najuuttalerput. Angut taanna 1990-imi januarimi kuisippoq Paulusip unnersuussutaa pitsaasoq Evfisumiut 4:17-24-mi allassimasoq malerualereerlugulu.

16. (a) 1990-imi eqqaaniaanermut najuussimasut amerlassusiat sooq nuannaarutissaava? (b) Kisitsit tamanna sumut ersiutaava uagullu qanoq ililluta ikiuussinnaavugut?

¹⁶ Malugisariaqarpoq marlunngornermi aprilip ulluisa qulinganni 1990-imi Naalakkap unnukkorsiortitsineranik nalliuttorsiutiginninnermut inuit 9.950.058-t najuussimammata. Nunani 70-init amerlanerusuni najuuttut amerlassusiisa oqaluussisartut amerlassusiat minnerpaamik pingasoriaammik qaangersimavaat! Assersuutigalugu, Afrikami nunani arfineq-marlunni 62.712-inik oqaluussisartoqartuni naak suliarput inerteqqutaagaluartoq 204.356-t eqqaaniaanermut najuussimapput. Sorsuffiusumi Liberiami 1914-inik oqaluussisartoqartumi 7811-t eqqaanniaanermut najuupput. Haitimi oqaluussisartut amerlanerpaagamik 6427-uffigisaanni 36.551-t najuupput. Qeqertani siamasissuni Mikronesiamik taaneqartuni oqaluussisartut 886-iupput, eqqaaniaanermullu 3958-t najuussimapput. Sri Lankami 1298-nik oqaluussisartoqartumi eqqaaniaanermut 4465-t najuupput; Zambiamilu 73.682-inik oqaluussisartoqartumi najuuttut 326.991-iupput, tassa nunap inuisa 1/25-ii. Silarsuarmi tamarmi nalunaarusiap takuteqqippaa  inuit peqqusersuitsut millionilikkuutaat ’savat inaannut’ katersorneqarnissartik utaqqigaat. Peqqusersuitsuunerinnarli naammanngilaq. Bibelimik atuaqqissaaqateqartarnivut amerlisillugillu pitsaanerulersissinnaanerpavut taamaalillutalu soqutiginnittunut taakkununnga uppersuseq aalajaatsoq ineriartortitillutigu? Kissaatigaarput uatsinnut suleqataallutik uppeqatinngornissaat Jehovamillu unnersiutiginnittunngornissaat. Tamanna taakkununnga inuunermik kinguneqassaaq! — Tussiaat 148:12, 13; Juánase 17:3; 1 Juánase 2:15-17.

Nuannaarnermik ilumioqangaarluta

17. Ukiuni hundredelinni siullerni pisimasut suut nuannaarnitta attattuarnissaanut aalajangiusimanissaanullu nakussatsittariaqarpaatigut?

¹⁷ Qanorluunniit misilinneqaraluarluta nuannaarnitta attattuarnissaa aalajangiusimatigu. Stefanusip misigisaatut ajornakusoortigisumik misilinneqarunanngikkaluarpugut, taamaattorli maligassiaa uatsinnut kajumissaataasinnaavoq. Misilinneqaraluarluni allaat nuannaarnini attattuaannarsinnaasimavaa. Akeraasa takuaat ’kiinaa soorlu inngilip kiinaa’. Misilinneqarnerani Guutip najorpaa. Sapiilluni nalunaajaavoq, ’anersaamillu illernartumik ilumioqangaarluni’ nalunaajaasutut toqutaavoq. Paulusip Barnabasillu oqaluussiffigilermatik inuiaat ’tipaatsulerput, Jehovallu oqaasia unnersiutigalugu’. Malersuisoqaqqilerpoq. Tamatumali kristumiut nikallortinngilai. ’Ajoqersukkat tipaatsunnermik anersaamillu illernartumik [ilumioqaannarput, NV].’ (apustilit suliait 6:15; 7:55; 13:48-52) Sunillunniit akeqqatta atugaqartissagaluarpatigut, ulluinnarnilu sunilluunniit misilinneqaraluarutta, nuannaarneq anersaamit illernartumit pisoq annaanngisaannassavarput. Paulus ima siunnersuivoq: ’Neriugitsi tipaatsullusi; naalliukkaangassi ilalaaritsi; qasusuillusi qinugitsi.’ — Rûmamiut 12:12.

18. (a) ’Jerusalem nutaaq’ sunaava, sunalu pillugu Guutip innuttaasa taanna nuannaaqatigisariaqarpaat? (b) ’Qilaat nutaat nunallu nutaap’ inuiannut pilluaqqussutissat suut nassatarissavaat?

¹⁸ Nuanningaartumik neriuutissaqarpugut! Jehovap innuttani tamaasa oqarfigai: „Nutaanngortissavakka qilak nunalu, pereersut eqqaamaneerutissapput eqqaaqqinneqarnatillu. Kisianni pinngortitakka soraajuitsumik tipaatsuutigineqarlutillu qiimmattaatigineqassapput.“ Naalakkap Kristusip ’Jerusalem nutaaq’ (tassa Guutip qilammi peqatigiissortaani illoqarfittut pingaarnertut ittoq, ’Jerusalem tappinnga’) peqatigalugu maanilu nunami silarsuarmi nutaassami inuiaqatigiit peqatigalugit inuiaat naammattorsuarmik nuannaartissavai. (Galâsiamiut 4:26) Toqusimasut makinissaannik, inuillu naalattut naammalluinnartunngornissaannik nunarsuarmilu paratiisiusumi naassaanngitsumik inuunissaannik neriuut nuanningaarpoq — nuannaarnissamut pissutissavik. Jehovap nammineq ’Jerusalem qiimmattaatigaa innuttanilu tipaatsuutigalugit’, pruffiitiatalu Guutip innuttai ima kajumissaarpai: „[Jerusalem] tipaatsoqatigisiuk! Tamarmik taassuminnga nuannarinnittut qiimmattarlit, . . . tamassi tipaatsoqatigisiuk.“ (Jesaja 65:17-19; 66:10; sarĸúmersitat 14:1; 20:12, 13; 21:2-4) Nuannaarnermik anersaamillu illernartumik ilumioqangaartuarta Paulusip kajumissaarutaa maleruaatigalugu: ’Naalakkami tipaatsuttuinnaritsi; aammalu oqarpunga tipaatsugitsi.’ — Filípimiut 4:4. (wD 1/1 91)

Uteqqiinnissamut apeqqutissat

□ Qasusuilluni nuannaartuarnissamik Jesusip qanoq maligassippaatigut?

□ Tanitat ’savallu allat’ suna nuannaarutigisinnaavaat?

□ Maannakkut inuusuttut utoqqaallu qanoq ilillutik sallusuissut nuannaarutigisarpaat?

□ Qinnut ’Jehova, pilluaatissitsigut!’, qanoq akineqarpa, 1990 pillugu nalunaarusiaq eqqarsaatigalugu?

□ Qaqugu qanorlu ililluta nuannaarnermik ilumioqangaassaagut?

[Atuaqqissaarnermi apeqqutit]

[Qupp. 11-mi assiliartaq]

Jehovap inngiliata Naalakkap Kristusip inunngornera ’nuannaarnermik angisuumik tusagassaq’-tut oqaluussissutigaa