Silarsuaq tamakkerlugu nuannaarneq

PRUFFIITINI Esajas aqqutigalugu Jehova oqarpoq: „Kiffakka uummammik iluunngaannit qiimmattassapput.“ (Jesaja 65:14) Oqaatsit tamakku ullumikkut misinnangaartumik Jehovap nalunaajaasuinut eqquupput! Nuannaarneq piviusoq tamanna ataasiussuseqarlutik Jehova Guutimik pallorfiginninnerannit allaaveqarpoq. Taanna ’Guutiuvoq  pilluartoq’, pallorfiginnittaasalu ’Jehova qiimasuutigaat’. (1 Timûtiuse 1:11; Sakarja 10:7) Pallorfiginninnerup nuannersup inuiaqatigiinni ataatsini ataasiussuseqartippai, Guutip naalagaaffianik tusagassamik nuannersumik oqaluusseqatigiinnermikkut silarsuarlu tamakkerlugu Guutiminnut unnersiutiginnissummik torlulaffiginninnermikkut. — sarĸúmersitat 7:9, 10:

„Nuannaarneq kimilluunniit uannit arsaarinnissutaasinnaanngitsoq“

Guutip aqqanik naalagaaffianillu oqaluussinertik Jehovap nalunaajaasuisa nuannaarutigeqaat. (Mákorse 13:10) Tussiaasiortup oqaasii malippaat: „Aqqa illernartoq qiimasuutigisiuk, [Jehovamik] ujarlersut tipaatsussapput.“ — Tussiaat 105:3.

Taamaaliornermi akornutit assigiinngitsut ajugaaffiginiartariaqartarpaat. Spaniami Isidro Jehovamut tunniulluinnarpoq, taamaattumillu allat Guutimik ilumoortumik oqaluttuukkusullugit. Lastbilinut aquttutut unnuami ungasiliartarami ullukkullu sinittarluni sulinngiffia killeqarpoq. Isidrop aquttut allat oqaluussiffiginissai kissaatigaa, qanorli ililluni?

Lastbilimi walkie-talkiemik ikkussivoq aquttut allat oqaluussinnaanngorlugit. Erniinnaq paasivaa kanal 13 atorneqajuitsuusoq aalajangerlunilu taanna atorniarlugu. Siunnersuutigimmagu radiokkut Bibeli oqaloqatigiissutigisinnaagitsik aquttut allat iluarivallaanngilaat. Ilaalli tusarnaarput. Erniinnaq tusaamaneqalerpoq, aquttullu Spaniamiut amerliartuinnartut kanal 13 naalaartalerpaat. Qanittukkut Isidrop tusarpaa minnerpaamik ataatsip Bibelimik atuaqqissaartarnini aallunnerulerniaraa.

Italiami angutip Jehovap nalunaajaasua bussimi oqaloqatigigamiuk Bibeli soqutigilersimavaa. Nuliata ikinngunni arnaq aqqutigalugu Jehovap nalunaajaasui atassuteqarfigilersimavai. Marluutillugit Bibelimik atuaqqissaaqatigineqartalerput, ilikkakkamillu allanut oqaluttuarinissaat pilerigaat. Aap, ima pileritigaat allaat angutip atorfimmini qaffatsitaanissaraluani naaggaarlugu, nuliatalu atorfimminit akissarsiorfigilluakkaminit soraarpoq, taamaaliorput Guutip naalagaaffianik tusagassamik nuannersumik oqaluussinissamut piffissaq sivisunerusoq atorumallugu. Taamaaliornerat kinguneqarluarpa? Aap, angut oqarpoq: „Sallusuissut ilikkareerlutigu nuliaralu nuannaarutigisatsinnik inuit 20-t Guutip siunertarisaanik eqqorluartumik ilisimassutsimik ilinniartissinnaasimavavut. Jehovamut kiffartuussereerlunga unnukkut angerlaraangama qasoqqasarpunga. Kisianni aamma pilluarpunga. Nuannaarnermik kimilluunniit uannit arsaarinnissutaasinnaanngitsumik Jehovap tunisimammanga qutsavigaara.“

„Nunap isuanut allaat“

Inuiaqatigiinnut nuannaartunut Guutip pigisaanut ilaasut tamatumunnga assingusumik aallussilluartuupput. Aamma ’nunap isuaniittut’ taamaapput. (apustilit suliait 1:8) Avannamut avinngarusimaqisumi Kalaallit-Nunaanni. Taamaakkaluartoq — allaat Ilulissani qaasuitsup killeqarfianiit kilometerit 320-t avannarpasinnerusumit — ilageeqarpoq 19-inik oqaluussisartoqartumik. Aappariit Italiamiut assigalugit inoqatitik tusagassamik nuannersumik tamatuminngarpiaq oqaluttuuttarpaat, siornalu Kalaallit-Nunaanni arfineq-marluk tunniulluinnarsimanerminnut ersiutaasumik kuisinnerat nuannaarutigeqaat.

Kalaallit-Nunaanniit kilometerit tuusintillit ungasissusilimmi kiattut nunaanni qeqertami Mauritiusimi Indiske Ocean-imiittumi Anjineep nuannaarneq tamannarpiaq misigisimavaa. Aallaqqaammut Anjinee ajornartorsiorpoq. Niviarsissammi katinneqanngitsup hindunik Indiamiunik nagguillip kristumiut ataatsimiinnerannut ilaanera tamanullu Guuti pillugu oqaluussinera Mauritiusimi assuarnartutut isigineqarpoq. Anjineeli nikallunngilaq. Ullumikkut, ilumoortumik kristumiunngorneranit ukiut qulingiluat kingorna, eqqarliisa ilaasattaaq Bibeli atuaqqisaartarpaat.

Nunarsuup illua tungaani Hondurasimi Emilio ippoq. Suleqatini Bibelimik oqaluusserinnittut tusaavai aperalugillu oqaloqatigiinneranni ilaasinnaasoraluni. Atuarsinnaanngilaq, Bibelimilli atuffassisoqaraangat nuannareqalugu tusarnaartarluni. Sallusuissut Emiliop uummataanut pulajartortillugu, killeqanngitsumik imernini soraaruppaa, ileqqussallu tungaatigut minguitsumik inuulerluni. Jehovap nalunaajaasuisa atuarnermik allannermillu ilinniartippaat, ullumikkullu inuiaqatigiinni Guutip pigisaani nuannaartuni oqaluussisartuuvoq.

Hondurasimiit avannamut kimmut kilometerit tuusintillit ungasissusilimmi Alaskami eskimuup kristumiussuseq ilumoortoq tamannarpiaq ilikkarpaa. Anaanaq taanna illoqarfeeqqami avinngarusimaqisumi najugaqarpoq, allaffigeqatigiinnerlu kisiat Jehovap nalunaajaasuinut attaveqaatigaa. Bibelimik atuaqqissaaqatigineqarnera allakkatigoorpoq, maanna nikallujuilluni sanilini oqaluussiffigisarpai. Ila, misigisat taamaattutamerlangaaramik kisissanngitsutut ipput. Nunarsuaq tamakkerlugu inuit eqqortuliorusuttut aggiapput ’Jehovalu kiffartorfigaat tipaatsuummik.’ — Tussiaat 100:2.

’Asaqatigiipput’

Inuit aggiasut taakku tamarmik asaqatigiinneq inuiaqatigiinni Guutip pigisaani nuannaartuni nassaassaasoq kajungeralugu aggiapput. Jesus oqarpoq: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Kristumiutut asaqatigiinneq tamanna kristumiuni peqqusersuitsuni ulluinnarni takussaavoq, ingammik ajunaarnersuaqartillugu.

Afrikap ilaa, Jehovap Nalunaajaasuisa suliaannik inerteqquteqarfiusoq, panernersuarmik eqqugaasimavoq. Tituusintit toqupput nersutaatillu tamarmik ajunaarlutik. Jehovap nalunaajaasui qanoq aniguippat? Naasut sorlai nerisaraat avocadop kigutaallu nerisassioralugit! Guutilli ikiuineratigut ajornartorsiornerat pitsanngoriarnerujussuuvoq nunani allani Jehovap nalunaajaasuisa nerisassanik 25 tonsinik ilimaginngisamik nunamut eqqussinissaannut akuerisaammata. Naak oqaluussineq inerteqqutaagaluartoq ikiuutissat ikiugassanut apuunnissaat qulakkeerniarlugu sakkutuunik paarsisulerlugit angallanneqarput!

Aap, qatanngutigiittut asanninnermut uppernarsaat tamanna Jehovap nalunaajaasuisa Afrikamiut qiimmattaatigeqaat. Esajasip oqaasiisa eqquunnerat misigaat: „[Jehovap] talia ima naatsiginngilaq annaassisinnaanani, siutaalu ima matoqqatiginatik tusaasinnaanani.“ — Jesaja 59:1.

Inuiaat eqqisseqatigiittut

Inuit eqqortuliorusuttut inuiaqatiinnut Guutip pigisaanut nuannaartunut kajungertarput, silarsuup sorsukkumatuup aqqutaa qimassimammassuk ’saffiorsimammatigillu panatik assallatserummut savissaliaralugit’. (Jesaja 2:4) El Salvadorimi siornatigut sakkutuujusimasup illuani sakkutuujunermi nalaanit eqqaassutissarpassuaqaraluarpoq. Jehovap nalunaajaasuili Bibelimik atuaqqissaaqatigileramigit soqutigisai eqqissinarnerusunut sangupput. Naggataagut sakkutuussutsimut tunngasinnaasut tamaasa pigiunnaarpai oqaluussisarnerlu aallullualerlugu.

Illoqarfeeraq najugarisaa naalakkersuisunut akerliusunit tiguarneqarmat tigusaavoq — sakkutuujunikutut nalunaarutigineqarsimagunarluni. Sakkutuujunnaarsimanili nassuiaavoq, Jehovamullu nalunaajaasunngorsimanerarluni. Illumini sakkoqarnerarlugu pikitsitsisut pasillerpaat, ujarlerfigigaluaramikkuli nassaanngillat. Pikitsitsisullu naalagaata angalasarneranik eqqaamiui apersorpai. Amerlanertigullu oqartarput: „Ullut tamaasa aqqusinermi angalaartarpoq Bibelilu pillugu oqaluttuussilluni.“ Angut iperagaavoq. Qularnanngitsumik aallussilluarsimanerata inuunera annaappaa.

Afrikamiit oqaluttuarineqarpoq sakkutuut marluk Jehovap nalunaajaasui ilagalugit Bibelimik atuaqqissaartartut pillugit. Aappaa naalakkersuisunut sakkutuujuvoq, aappaali pikitsitsisunut sorsoqataalluni. Naggataagut marluullutik aalajangerput ’panatik assallatserummut savissaliaralugit saffiorniarlugit’ sakkutuutullu tunuarlutik. Jehovap nalunaajaasuisa ataatsimiinnerannut orniguteqqaaramik, sakkutuup pikitsitsisunut ilaasup aappi aperaa: „Maani sulerivit?“ Akivoq: „Illimmi, maani sulerivit?“ „Taava imminnut pakkupput nuannaarnermillu qiallutik. Maanna eqqisseqatigiillutik naapissinnaalerput,“ oqaluttuaq taama naavoq. Sakkutuujusimagaluit qularnanngitsumik Guutimut qinusimapput: ’Aammit akiniagassamit annaannga, Guuti-aa, Guutiga annatsitsisiga, taava oqara qiimmattassaaq  iluarsutsit pillugu.’ — Tussiaat 51:16, nutsigaq nutaanngitsoq.

„Annikilliornera takoreerpat“

Tussiaasiortoq qinusimavoq: „Unneqqarissutsit qiimmattaatigalugulu tipaatsuutigissavara. Annikilliornera takoreerpat, annikilliuutinni ikiorparma.“ (Tussiaat 31:8) Ullumikkut amerlasuut nuannaarutigaat Guutip oqaasia annikilliornerminni ikiortigisaramikku. Frankrigimi Jehovap nalunaajaasuata arnaq skizofrenimik (tarnikkut nappaatit ilaannik) nappaateqartoq Bibelimik atuaqqissaaqatigisarpaa. Arnaq sivisungaatsiartumik tarnikkut nakorsartittarsimavoq, iluaqutaanngitsumik. Atuaqqissaartalerneranit sapaatip-akunnera qaangiuttoq tarnip nakorsaa aperivoq: „Arnap oqaluttuai Bibelimeersut paasivigit?“ Sapaatip-akunnerat tulliani Bibelimik atuaqqissaarneq tarnip nakorsaata allaffiani ingerlanneqarpoq, nakorsaq tusarnaartillugu.

Atuaqqissaareermata tarnip nakorsaa oqaluussisartumut oqarpoq: „Ukiut ingerlaneranni napparsimasuutima upperisaat soqutigisarsimavakka, malugisimavaralu upperisarsiornerit tamakku arlaannaalluunniit ikiorsiisinnaanngitsoq. Ilissinnili allaavoq. Fru P.-ip sapaatip-akunneranut marloriarluni ornittarpaanga, soorunami akiliilluni, taamaakkaluartoq illit Bibelimik ilinniartitsinivit pitsaasunillu siunnersuinivit uannit angusaqartinneruvaatit, allaallu akeqanngitsumik. Fru P. pitsanngoriartorpoq, taamaatinniaqinasi. Pisariaqartissagukkulu suleqataanissara piareersimaffigaara.“

Bibelimi allassimavoq: „Pilluarput inuit ilinnut qiimmattaatiginnittut, [Jehova], saqipput kiinnavit qaamasuani aqqit qiimmattaatigittuinnarpaat.“ (Tussiaat 89:16, 17) Jehovap nalunaajaasuisa tamarluinnarmik oqaatsit taakkua ilumuussusiat nalunngilaat. Tamakkerlutik silarsuaq kaajallallugu Jehova unnersiutiginneqataapput. Amerliartuinnartut inuiaqatigiinnit Guutimut unnersiutiginninneq tamanna peqataaffiginiarlugu aggiapput. Soormi taakkununnga ilanngukkuit nuannaarnerlu misigalugu! (wD 1/1 91)

[Qupp. 7-mi assiliartaq]

Jehovap nalunaajaasuisa Europap kangianiittut maanna namminneq oqaatsitik atorlugit „Napasuliaq Alapernaarsuiffik“ pisinnaallugu atuaqqissaarsinnaallugulu kiffaanngissuseqalernertik nuannaarutigaat.