Toqup aqqutaanit inuunerup aqqutaanut

UKIORPASSUARNI ikiaroornartunik atuinerma inuunera takussunarsisimavara. Ikiaroornartunik sakkukinnernit aallarteqqaaraluarpunga naggataatigulli sakkortunernik atuilersimallunga, soorlu LSD-mik. Inuttut innuttaasutullu atugarisatigut ajornartorsiutinit kiffaajunnaarsitaanermut ikiaroornartut assersuutaasutut ilersimapput. Ajoraluaqisumik inuusuttut allat toqup aqqutaatigut ingerlaninni ingerlaqataanissaannik kajumissaartarsimavakka.

Ikiaroornartunik tuniniaasartutut ilisimaneqarama politiinit alapernaarsorneqartuarpunga. Nassuerutigisariaqarpara annilaangasaraluarlunga, nalunnginnakkumi tigusaassagaluaruma ukiorpassuarni parnaarussaasariaqassallunga. Naallu taama annilaangassuteqaraluarlunga inuunerlunnera qimassinnaanngilara.

Angajoqqaama ikiorniaraluarlunga isumakkut nappaatillit angerlarsimaffiannut inissippaannga. Neriuutigaat nakorsaatit oqaloqatiginnittarnerillu atorlugit ajornartorsiutinnik aniguisinnaassara. Angerlarsimaffimmit tamatumannga aniinnartunga angajoqqaama paasivaat allaat nakorsaatit atorlugit ajornartorsiutiga aaqqinneqarsinnaanngitsoq. Ikioqqinniarlunga misileeqqikkaluarput tamatumuunalu palasimik oqaloqateqartillunga, tamannali aamma iluaqutaanngilaq. Palasip takkuani marihuanamik pujortarlungalu imerpunga soorlulusooq peqanngitsoq. Naatsumik oqaatigalugu, inuunera allanngortikkusunngilara.

Aappassiara, Oriana, taamatut inuuninnut assut akerliuvoq qimanneqarnissaralu kissaatiginngeqaara. Soorlulu tamanna allanngornissannut patsisissaalluassagaluartoq. Taamaattorli isertortumik ikiaroortarnera ingerlatiinnarpara. Oriana napparsimanerarlunga salloqqittaannartarpara. Naggataatigulli eqqortumik oqaatigalugu inuttut naakkinarsisorujussuanngorpunga. Imminut neriorsortuarpunga ikiaroortarnera taamaatissallugu taamaatinnissaalu sapinngilluarlugu, iluaqutaanngilarli. Toqullu aqqutaanut ingerlajuarsinnarpunga.

Piaartumik Oriana katikkusoqigakku inissianik iluarsaasartumik qaaqqusivugut inigisarput iluarsartuutitinniarlugu. Iluarsaasartup nulia Jehovamut nalunaajaasuuvoq, upperisaminillu oqaluttuuppaatigut. Aallaqqaammut eqqartugai Orianap uannut naleqqiullugu soqutigineruai, kingusinnerusukkulli paasilerpara Jehovap nalunaajaasuisa Guutip nunarsuarmik tamarmik qanittukkut paratiisinngortitsinissaa inuillu eqqisseqatigiillutik naassaanngitsumik maani inuunissaat upperilluinnaraat.

Aalajangerpunga arnap oqaaserisai nammineerlunga paasiniarniarlugit, tassa ilumut Jehovap Nalunaajaasui imminnut asaqatigiillutillu ataqqeqatigiinnersut. Taamaattumik Orianalu rigssaliliarpugut. Nutsakka takisuut atisakkalu torinngikujuttut ittorutigikujuppakka, tikilluaqqusaanittali angerlarsimasutut misigitilersippaanga. Misigaanga inuit taakku tatigilluinnarsinnaallugit. Erseqqivippoq asanninneq ilumoortoq ataqqeqatigiinnerlu taakkunani piviusunngoreersimasut.

Ulloq taanna aallarnerfigalugu kristumiut ataatsimiinnerinut aalajangersimasumik najuuttalerpunga, Jehovallu Nalunaajaasui ikiortigalugit Bibeli atuaqqissaartalerlugu. Nujaajartippunga atisarisartakkalu allanngortillugit. Ilungersoreeqalunga pujortassaarpunga ikiaroornartullu taamaatillugit. (2 Korintumiut 7:1) Inuuninnili allamik annertuumik ajornartorsiuteqarpunga. Maluginngisannik imigassaq pinngitsoorsinnaajunnaarsimavara. Imeraangama ileqqussarinngisannik iliortarpunga. Inuit oqqatilertarpakka Orianalu assut sinngagilersarlugu. Isumatsattorujussuanngorpunga. (Ussatit 23:29-35) Ileqqupalaaq tamanna qaangerusullugu annertuumik ilungersuuteqalerpunga, Jehovamillu  ikiorneqarnikkut qinunikkullu pissatsinneqartarnikkut aammalu qatanngutinnit kristumiunit ikiorluarneqarnikkut ileqqupalaaq anigorpara.

Nuliaralu augustip ulluisa 23-ianni 1974-imi kuisippugut. Qujanartumik sallusuissut iluaqutigalugu inuunerup siunertavia nanivarput. Imminut tatigeqqilerama suliffinni ataqqineqarnerulerpunga. Nuliaralu aningaasarsiorluarpugut, taavali paasilerparput kiffartuussinermut iluartumut piffissakippallaarluta. Jehova qaninnerusumik attaveqarfigilerumagutsigu inuunitsinni allanngortitsisariaqarpugut — taamaaliunngikkuttami sallusuissummut asanninnerput siulleq milliartulersinnaavoq. Taamaattumik 1979-imi pionerinngorpugut (piffissap annertooq atorlugu oqaluussisartunngorpugut taamaalillutalu oqaluussineq inuunitsinni pingaarnerutilerlugu.

Sooq taama aalajangersimavunga? Aap, sallusuissutip qaamanera nanisimanngitsuugukku ullumi sumiissagaluarpunga? Toqup aqqutaatigut ingerlagallarama ingiaqaterpassuama ullumikkut imigassaq pinngitsoorneq sapileqqavaat, imaluunniit ilaqutaqaratik inuupput, ilaat parnaarussivimmiillutik imaluunniit toqoreersimallutik. Bibelilli oqariartuutaata uanga aniguisissimavaanga. Katsornaaneq piumassuseqarluarnerlu naammanngillat. Pissutissaqarluartariaqarpoq, tamannalu pineqarsinnaavoq Pinngortitsisumik, Jehovamik, piviusumik ikinngutiginnileriartornikkut. Maanna qamannga pisumik kissaateqarpunga sapinngisara tamaat atorlugu ikiaroornartumut inussiaasut imaluunniit ajornartorsiutiminnik arlaannik aniguiniartut ikiorniassallugit. Tamannarpiaq pissutaavoq nuliaralu kristumiutut kiffartornitsinni taama aallussilluartiginitsinnut. Maanna ilagiinnut nakkutilliisutut Italiap avannaani sulivunga. Immikkullu pisinnaatitaaffigisimavarput inuppassuit inuunerup aqqutaanik nanisinissaannik ikiorsimagatsigik, taakkunannga pingasut uanga ikiaroornartunik atuinerlunnermut ingerlatilersimasaraluakka.

Ilumoorpoq ikiaroornartumik atuinerlunneq siusinnerusukkut kingusinnerusukkulluunniit toqumik imaluunniit inuunermik siunertaqanngitsumik kinguneqarsinnaammat. Jehova Guutimut qujamasungaarama qanoq oqassallunga naluaraluunniit! Aqqummit taartumit ingerlaffigigaluannit aniguisissimavaanga aqqumullu qaamasumut inuunermut — inuunermut naassaanngitsumut — ingerlasumut innersuussimallunga! — Ruggero Polottimit oqaluttuarineqarpoq. (wD 1/8 89)