Jesusip toqunera ilinnut qanoq isumaqarpa?

„SAKKUTOORPASSUIT sorsugiakaasarsimapput, umiarsuit sorsuutit sananeqartarsimapput, inatsisartut isumaqatigiinniartarsimapput kunngillu naalakkersuisarsimallutik — tamakkunanngali annerungaartumik inuit inuunerannut sunniuteqarsimasoq tassaavoq inuk taanna kisimi.” Atuakkiortoq James A. Francis Jesus pillugu taama allagaqarsimavoq.

Jesus pillugu inuit assigiinngitsunik isummertarput, Bibelimili oqaatigineqarpoq taanna Guutip ernerigaa imminut tunulliulluni allanut asannissutsiminik takutitsisimasoq. Jesus asanninnerup tamatuma pingaarutaanik ersersitsivoq imminut ima oqaatigigami: ’Soorlumi inuup ernera tikiutinngitsoq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ — Matîuse 20:28.

Utertinneqaatissaq tamanna suugami? Sooruna pisariaqartinneqarsimasoq? Kikkullu utertinneqaramik? Aap, Jesusip toqunera ilinnut qanoq isumaqarpa?

Utertinneqaatissaq suugami?

Utertinneqaatissaq tassaasarpoq kiffaanngissuseq anguniarlugu akiliutissaq. Assersuutigalugu inuk tigusaaqqasoq imaluunniit pillagaq iperagaatinneqarsinnaavoq aalajangersimasumik akiliuteqarnikkut. Anersaakkut ittumik iperagaatitsineq imaluunniit utertitsineq isumaqarpoq ajortimit tamatumalu malitsigisaanit aniguisitsineq. Tamanna pillugu Jesus toquvoq. Aposteli kristumiuusoq Paulus ima allappoq: ’Ajortimmi akissarsiarititaa tassa toqu, Guutilli saammaannermit tunissutaa tassa inuuneq naassaanngitsoq Kristus Jesusimi Naalakkatsinni.’ — Rûmamiut 6:23.

Akiliuteqarnikkut iperagaatitsineq aammattaaq Bibelip ilaani allani taaneqarpoq. Tussiaat 49:7-10 imaattunik oqaasertaqarpoq: „Taakkua isumalluaatigaat pisuussutitik, usorsitsaatigalugillu perpassuatik. Kialuunniit inoqanni akiliullugu aniguisissinnaanngilaa, kinaluunniit inoqammi utertitaassutissaanik Guutimut akiliuteqarsinnaanngilaq. Akiliutissarmi utertitsiniutissaq inummut angivallaassaqaaq naammanngilluinnassallunilu. Kialuunniit inoqanni inuuginnartissinnaanngilaa ilivermut aqqarnaveersillugu.“ Tassa Guuti utertinneqaatissamik tunniussisuuvoq,  inuk naammalluinnanngitsoq taamaaliorsinnaanngilaq.

Utertinneqaatissaq sooq pisariaqartinneqarpa?

Utertinneqaatissamik pisariaqartitsineq pinngorpoq taamani inuk siulleq, Adam, ajortuliormat. Naammalluinnartuulluni inuuneq naassaanngitsoq ajortuliornermigut pinngitsoorpaa, tassami toqusussanngorlugu naapertuilluartumik eqqartuunneqarami aammalumi naggataatigut toqulluni. (1 Mosesimik allakkat 2:15-17; 3:1-7, 17-19; 5:5) Adamip kinguaarimmatigut ajorti toqulu kingornussimavavut. ’Taamaattumik soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni,’ Paulus allappoq, ’taamalu toqup inuit tamakkerlugit tikikkai, tamarmik ajortuliormata.’ (Rûmamiut 5:12) Aap, ’Adamimi tamarmik toqupput’. (1 Korintumiut 15:22) Taamaattumik tussiaasiortoq David ilumoortumik oqarpoq: „Erniugamali ajortimioreerpunga, anaanama ilumiugilerpaanga ajortiliulluni.“ — Tussiaat 51:7.

Adamip kinguaavisa ajortiliusut inuuneq naassaanngitsoq angussagunikku pisariaqarpoq ajortimit toqullu perloqqusineranit aniguisinneqarnissaat. Inuit naammalluinnartuunngitsut utertinneqaatissamik taamaattumik pilersitsisinnaanngillat, kisianni Jehova taamaaliorsinnaavoq, aammalumi asannissutsimigut taamaalioreersimavoq Jesus Kristusikkut. Suna pisiarineqarsimava utertinneqaatissamik tamatuminnga akilerlugu? Adamip ajortuliorami naassaanngitsumik inuunissaraluani aammalu pisinnaatitaaffiit siunissamilu periarfissat tamatuma kingunerisassai tamaasa annaavai. Naassaanngitsumik inuunissamut periarfissaq tamanna utertinneqarsinnaanngorpoq Jesusip utertinneqaatissamik pilliuteqarneratigut.

Utertinneqaatissaq sunik periarfissiinersoq

Inuiassuit ajortip akissarsiarititaanit, tassa toqumit, qulangersimaneqalermata naapertuilluassuseq anguneqarsimavoq. Taamaattumik utertinneqaatissaqalerneq Guutip naakkinnissusianik isumassuingaarneranillu takussutissaavoq. Inuk naammalluinnartoq Jesus pisinnaatitaaffippassuaqaraluartoq siunissaqarluaraluartorlu toqumut tunniunneqarpoq utertinneqanngisaannarlunilu, tassami inuttut uinilittut aalittullu makeqqitsitaannginnami, kisiannili anersaatut toqujuitsutut makeqqitsitaagami. (1 Korintumiut 15:50; 1 Pîtruse 3:18) Taamaattumik Jesusip inuunera pilliutaasoq pigisaqartuarpoq utertitsinissamut pissaanermik.

Jesus ajorteqanngitsuugami qanoq issutsimigut nallersuuppoq Adamimut naammalluinnartuusumut. Jesus toqunissani tikillugu Guutimut naalattuaannartuugami palasiuninngortinneqarpoq inuunermilu naammalluinnartup pilliutitut nalinga qilammut nassarlugu. (Eprîarit 9:24-26) Taamatut utertitsissutissamik akiliuteqarneq Guutip akuerimmagu Jesus Adamip kinguaavinik uppertunik aniguisitsisinnaalerpoq toqumit ajortimillu, pilliutimi nalinga inunnut taakkununnga iluaqutissatut atorlugu. (1 Korintumiut 6:20; 7:23; 1 Juánase 2:1, 2) Taamaalilluni Jesus ’naalatsimi tamarmik naassaanngitsumik  annannissaannut akisussaalerpoq’. (Eprîarit 5:8, 9) Tamanna naalattaasunut periarfissiivoq Guutip tungaanut naapertuilluartumik inissisimalernissaannut Guutip ernera ikiortigalugu.

Kikkut utertinneqarpat?

Utertinneqaatissaq kikkut iluaqutigissavaat? Tamatuminnga iluaquteqarsinnaapput inuit taamatut aaqqissuussinermik upperinnittut taamalu Guutimut pitsaasumik pissuseqalersut. Aalajaallutik Guutimut kiffartorunik ajortimit ajortillu akissarsiarititaanit toqumit aniguisinneqarsinnaapput, taamalu inuuneq naassaanngitsoq angusinnaalerlugu. — Juánase 17:3.

Inuup siulliup nammineq aalajangersinnaasimavaa Guuti naalassanerlugu naalassannginnerluguluunniit. Adamili aalajangerpoq naalakkumanani. Adam peqquserluffigineqanngilaq, toquvorli piaaraluni ajortuliorsimasutut. (1 Timûtiuse 2:14) Qanormi pippat Adamip kinguaavi? Taakkua marlunnik qinigassaqarput: Naammalluinnanngitsuugaluarlutik sapinngisartik naapertorlugu Guutimut kiffartorumasinnaapput, imaluunniit aalajangersinnaapput Pinngortitsisertik naalakkumanagu. — Josua 24:15.

Jesus tikiussimavoq ’inuunini akissatut tunniutissallugu amerlasuut utertinneqaatissaannik.’ (Mákorse 10:45) Taakku ’amerlasuut’ kikkuugamik? Adam taakkua ilagigunanngivippaat, tassami inuusimagami naammalluinnartoq nammineq piumassutsiminik aalajangersimasoq Guuti naalakkumanagu, taamaattumillu piaaraluni ajortuliortutut toqusimalluni peqqissiminani. Kinguaarpassuimi milliardilikkuutaat qanoq pippat? Adamip asuliinnartitaanik utertitsissutissaq atorlugu Jesusip perloqqussut kingornuttaqattaagaq peerpaa Adamip ilaqutaanit. (1 Timûtiuse 2:5, 6 naleqqiuguk.) Tassa imaappoq: Utertitsissutissatut pilliutimi nalinga Jesusip atorpaa ’amerlasuut’ uppertut iluaqutissaannut.

Inuit uppertut utertinneqartut tassaapput juutit juutiunngitsullu, imaappoq inuit inuiannit assigiinngitsunit tamanit pisut. Paulus ima allappoq: ’Tassa soorlu ataatsip pinerlunneranit pillagassaatitaanissaq inunnut tamanut pisoq, taamattaaq ataatsip [naapertuilluarneranit naapertuilluartuutitaanissaq] inuussutaasoq inunnut tamanut pivoq.” (Rûmamiut 5:18) Qisummi kikiattugaalluni toqunermigut Kristusip juutit akilerlugit utertissimavai ’inatsisit perloqqussutaannit [peersillugit], [pillugit perloqqunarsigami], allassimammat: „Kinaluunniit qisummi nivingasoq perloqqunarsili.“’ (Galâsiamiut 3:13; 5 Mosesimik allakkat 21:23) Rûmamiunut agdlagkat 4:11-mi juutiunngitsut pineqarput, oqaatigineqarmat juutit siuaasaat Abraham kipineqanngikkallarami ’ataatanngorsimasoq kipineqanngisillutik uppertunut tamanut’ (NV). Tassa Jesusip utertitsissutissatut pilliutaa juutiusunut juutiunngitsunullu uppertunngortunut tamanut atuuppoq.

Taamaattumik Jesusip pilliutaa iluaqutigissagaanni apeqqutaavoq aqqut ingerlaviginiagaq sunaanersoq. Inuit piaaralutik ajortumik iliuuseqarniartut Adamitut pinngitsaalineqarsinnaanngillat utertitsissutissamik inuunermillu naassaanngitsumik peqqullugit. Soorluttaaq Kristus ima oqartoq: ’Ernermut uppertoq naassaanngitsumik inuussuteqarpoq; ernermulli naalasseriitsup inuussut takussanngilaa, Guutilli kamannerata qulangersimajuassavaa.’ (Juánase 3:36) Utertitsineq aammattaaq periarfissiivoq toqusimasut Guutimit eqqaamaneqartut makitinneqarnissaannik. (Juánase 5:28, 29) Naalattuunissaq qujamasuttuunissarlu aalajangiukkunikkit utertitsissutikkut naassaanngitsumik inuulersinnaapput. Kisiannili ’ulluni kingullerni’ inuusut periarfissaqarput toqunatilluunniit naassaanngitsumik inuulernissaminnut. — 2 Timûtiuse 3:1-5; Matîuse 24:3-14, 21, 34; Juánase 11:25, 26.

Qujamasunnissamut pissutissaqarpoq

Kinaluunniit utertitsissummik iluaquteqarusuttoq periarfissamik tamatuminnga pingaartitsisorujussuusariaqarpoq. Taamatut qujamasunnissamut pissutissaqarluarpoq. Utertitsissummi tamanna takussutissaavoq Guutip Kristusillu asanningaarnerannut.

Jehova Guutip asanningaarnini takutissimavaa utertitsissutissamik aaqqissuussigami ernermi toquneratigut. Jesus oqarsimavoq: ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu. Guutip erni silarsuarmut aallartinngilaa silamiut eqqartooqqullugit, kisianni silamiut taassumuuna annaqqullugit.’ (Juánase 3:16, 17) Guutip asannissusianik takutitsineq taamaattoq qujamasuutigisariaqannginnerluni?

Eqqarsaatigiuttaaq Jehovap utertitsissutissamik pilersitsinerminut atatillugu asannissusiata  qanoq ititiginera. Guutip ernera nunarsuarmukartinneqanngikkallarami, tassanilu inuttut naammalluinnartutut inuulluni toqullunilu, qilammiissimavoq. Taanna tassa ’pinngortitat tamarmik siornatigut erniusoq. Taassumuunami suut tamarmik pinngortitaapput qilammiittullu nunamiittullu, ersitsullu ersinngitsullu.” (Kulorsamiut 1:13-16) Jehovap ernini taanna asasorujussuuaa. Kisiannili Jehovap inngilit imminut kiffartortut ileqqorissullu millioniliusut ilaannik sorliugaluartumilluunniit nunamukartitsinissani sullugaa. Inuiannut asanninnera ima angitigaaq allaat ernituani nunamut aallartillugu.

Aammattaaq isumaliutigiuk Jesusip asanningaarnera utertitsissutaaneratigut takutinneqartoq. Jesus qilammi anersaajulluni Guutip pinngortitsimmat taassuma sanianiissimavoq. (Ussatit 8:22-31) Inunnut asannittuugaluarluni taassumunnga qilak qimassallugu ajornaatsuinnaasimanngilaq, qilammimi pilluaqigami Ataatani inngilerpassuillu naapertuilluartut ilagalugit. Guutip ernarata qilammiusup takusinnaasimavai ajussuseq nunamiittoq aammalu ajortip toqullu inuiannik aserorterinerat. Jesusillu ilisimavaa utertitsissutissamik toqusariaqarluni. Taamaattorli ’pissutsi iperarpaa kiffap taattua atillugu inuillu assigilerlugit, inuttullu pissuseqarluni malunnarsigami imminik nikanarsarpoq naalaannarluni toqumut allaat.’ Aalajaassutsini tamanna pissutigalugu Jesus makititaavoq qilammi ataqqinartumik inuunermut. (Filípimiut 2:5-11) Utertitsissuteqarnermut atatillugu Jesusip asanningaarsutsimik ersersitsinera tamanna illit pingaartippiuk?

Qanoq iliussavit?

Tuluk palasiunersuaq Richard Chichesterimeersoq (inuusoq 1198-1253 miss.) qinusimavoq angutit arnallu ”Jesus Kristus ilisarinerulissagaat, asanerulissagaat malilluarnerulissallugulu“. Jesusillu utertitsissutissamik pilliuteqarnerata pissutissaqarlualersippaatigut taassuminnga ilisarsinerulerlutalu, asanninnerulerlutalu malinnilluarnerulernissatsinnut.

Utertitsissummik pilliuteqartoqarsimanngikkaluarpat ajortilittut toquinnassagaluarpugut sumik neriuutissaqarata, tassami ’toqup iguutaa tassaammat ajorti’. (1 Korintumiut 15:56) Iguut (igutsaap kapuutaa) taanna atorlugu kapineqarsimasutut ikkatta toqumit nalaanneqariaannaavugut, qanorlu iliortariaqarpugut toqumit annassagutta? Guutip Jesus Kristusikkoortumik annaassiniarnera paasisariaqarparput. Taavalu ersersittariaqarparput utertitsissutissaq upperigipput. Qanoq ililluta? Tassa utertitsissutissaq uummatitsigut pingaartillugu, Guutimut tunniulluinnarluta allallu oqaluttuullugit annannissamut periarfissamik angeqisumik tamatuminnga.

Taamaaliornikkut ilannguffigineqarsinnaapput ’amerlangaartut’ ’annikilliornartumit angisuumit pisut, atisatillu takisuut savaaqqap [Jesus Kristusip] aavanit erroraat qaqorsarlugillu’. (sarĸúmersitat 7:9, 14) Tamakku neriuutissaqarput paratiisimi nunamiittumi naassaanngitsumik inuulernissaminnut. (Lúkarse 23:43) Inuppassuit pilluartut taakku ilannguffigisinnaavatit Jesusip toqunera nalilissuartut pingaartikkukku. (wD 15/3 90)

[Qupp. 4-mi assiliartaq]

Jesus ajorteqanngitsuugami Adamip aallaqqaammut qanoq issusianut nallersuuppoq

[Qupp. 6-mi assiliartaq]

Illit Jesusip toqunerata pingaaruteqarnera paasiviuk?