Bibeli qanoq oqarpa?

Inuuneq sumik siunertaqarpa?

INUPPASSUIT pisoorsuit tusaamasaasullu paasisimavaat „angusaqarluarneq“ tassaanngitsoq pilluarneq. Arlaannik maqaasisaqarput — sunaliuna?

Inuit ilaasa aningaasatigut iluanaarniarneq tusaamasanngorniarnerlu ulapputigingaaramikku sooq pinngorsimanersugut eqqarsaatigissallugu piffissaqanngillat, anguniakkaminnillu angusinertik uissuummissutigisinnaavaat. Qanorluunniit pisuujutigigaluaraanni tusaamasaatigigaluaraanniluunniit inuuneq siunertaqanngippat imaqanngitsutut issinnaavoq. Tamanna kunngip pisoorsuup Salomonip misigisimavaa: „Taavali eqqarsaatigilerpakka nammineq assannik piliarisakka tamaasa qanorlu assoroortigalunga sulisimanera; paasilerparalu sunaaffa tamarmik nungujasuinnaasut anorillu tiguniarsarineratut suallaataanngitsigalutik.“ — Nalunaajaasup oqaasii 2:11.

Amerlanersatta kunngip ilungersornertuup pikkorissullu angusimasaasa ilaannamininnguiluunniit angusimagaluarutsigik naammagissagaluarparput. (Nalunaajaasup oqaasii 2:4-9) Kisianni Amerikami Columbia Universitetimi misissuisut naapertorlugit nammineerluni angusaqarluarneq ’pilluarnermik misiginermut nalinginnaasumut attuumassuteqannginnguatsiarpoq’. Sunali ikiortigalugu pillualersinnaavugut? „Maleruagassanut atukkanut tatiginninneq,“ misissuisut oqarput, „upperalugulu inuunerput siunertaqartoq“. Inuit amerlavallaartut inuunerup siunertarisaa ajoraluartumik ujarunnaartarpaat, imminoornissartillu eqqarsaatigisalersarlugu.

1987-imi misissuineq naapertorlugu Amerikami ilinniarnertuut pikkorinnerpaat pingajui tamarmik imminoornissaminnut eqqarsaateqartarsimapput. Sooq? Tassa taakku angusaqarluarsimasorinaraluartut imminnut naammaginngillat, allanit annerusumik nersornartumik naammassisaqarnissartik ilungersuutigigamikku, imaluunniit avinngarusimasutut kiserliortutullu misigisimagamik. Inuk pilluassaguni pinngitsoornani imminut ataqqisariaqarpoq — inuunermik imaqarluartumik, inuunermik siunertalimmik imaluunniit naatsumik oqaatigalugu, inuunerminnut pissutissaqarluartariaqarpoq.

Pinngortinneqarnitsinnut siunertarisaq

Inuunerup nalaatsornerinnakkut pinngorsimannginneranut uppernarsaatissanik sivisuumik ujarlernissaq pisariaqanngilaq. Taamaattussaannartut isigisakkavut eqqarsaatigeriakkit — piluttap ilusiata aaqqissuulluagaanera, meeqqap inunngornera, avataarsuatta tupinnarluinnassusia. Sianissutsimut naapertuuppoq oqassalluni tamakku tamarmik pinngortinneqarsimasut, pinngortitsisullu pinngortikkamigit  siunertaqarfigigai. ’Takussaanngissusiami pissaanera ittuinnartoq Guutiussusialu . . . malunnarmata suliaanit paasinarlutik.’ — Rûmamiut 1:20.

Pinngortinneqarnitsinnulli suna siunertaava? Nakorsaq Canadamiu William Oslarimik atilik torrallaavillugu ima akissuteqarpoq: „Tamaaniippugut sapinngisatsinnik naammassisaqassalluta imaanngitsoq inuuneq sapinngisamik annertuumik iluanaarfiginiassallugu.“ (Uagut allanneri uingasunngorlugit erseqqissarpavut.) Kristumiu oqaatsit annerpaamik 25-t atorlugit akeqquneqartoq ima oqarpoq: „Oqarsinnaavugut pinngortitaasugut nuna tamakkerlugu paratiisinngortissallugu.“ * (1 Moses 1:28; 2:8, 15) Kisianni nuna paratiisinngortinnissaanut piginnaassuseqarpugut?

Aatsaat aallartilaarpugut!

Maannakkut inuusarnerput taama sivikitsigisoq piginnaanitta periarfissattalu tamaasa atorluarnissaat angumerisinnaanngilarput. Eqqarsaateriaruk qaratsatsinni 100 milliardit missaannik cellenik sianiutaasunik cellenillu allanik peqartugut. Oqaatigineqarpoq cellet tamakku imminnut 10⁸⁰⁰-t missaannik attaveqalersinnaasut. Taanna kisitsit avataarsuata tamarmi atomiinit 10⁷⁰⁰-riammik anneruvoq! Takorlooriaruk, qanoq ilikkagaqartigissagaluarpit eqqissiivillutit silarsuaq tamakkerlugu angalaffigisinnaasuugukku, piffissat soqutiginartitannut piumasannik atorlugu, piginnaassuseqarfigerusutatillu ineriartortillugit. Tamattami sianiginngisatsinnik piginnaassuseqarpugut periarfissaqarluarlutalu!

Kisianni qatsunnassanngila piffisaq piumasarput periarfissallu tamaasa pisinnaagutsigik? Aap, paasigaanni ulloq naallugu imminuinnaq eqqarsaatigiinnarsimalluni qanoq qatsunnartigisoq!

Tamanna Salomonip paasisimavaa, taamaattumillu imatut siunnersuisimavoq: „Pinngortitsisit eqqarsaatiginiaruk.“ Taamaaliunngikkaannimi ullussat pinngitsooratik tikiukkumaarput ima oqaatigineqarsinnaasut: „Nuannaarutissarsiffiginngilakka.“ Jesus assingusumik oqarsimavoq: ’Tunisineq tigusinermit pilluarnarneruvoq.’ — Nalunaajaasup oqaasii 12:1, 13; apustilit suliáinik agdlagkat 20:35.

Nalerisimaarnermut aallarniut

Marlunnik tamanit pingaarnerutittariaqakkatsinnik Jesus taasaqarpoq. Siullermik ’Jehova Guuterput asasariaqarparput’ aappassaanillu ’tullerput uatsittut asallugu’. Tamanna naasut akornanni uumasullu akornanni iluaqutaaqatigiilluni inuuneq pillugu ilisimasatsinnut naapertuuppoq. Uumassusillit atsinnerusut tamakku pinngortinneqarsimapput imminnut sakkortuumik pisariaqarteqatigiissillugit. Tamannalu eqqarsaatigalugu sianissutsimut naapertuutinnginnerpa uagut inuit, amerlasuunik piginnaassuseqarlutalu periarfissaqartugut, suleqatigiittussanngorluta pinngortitsisumullu, Jehovamut, kiffartortussanngorluta pinngortinneqarsimasugut? — Matîuse 22:37-39; Tussiaat 36:9.

Asanninnermik suliavut inunnut allanut Guutimullu uatsinnik atassuteqartitsisuusut inuunerput naassaanngitsumut siunertaqartissavaat. Aap, nuannaarluni tunisineq tassaavoq maannakkut ’nunamilu nutaassami’ inuunermi pilluarnartumut aallarniutaasoq. — Jesaja 65:17, 18. (gD 8/2 89)

[Quppernerup ataani ilanngussaq]

[Qupp. 29-mi ungalusaq]

Inuuneq naassaanngitsoq — Pilluaqqusaaneq imaluunniit perloqqusaaneq?

Ullorissanik ilisimatooq atuakkiortorlu dr. Robert Jastrow aperineqarsimavoq: „Inuuneq naassaanngitsoq inunnut pilluaqqusaanerussava imaluunniit perloqqusaanerussava?“ Akivoq: „Alapernaatsunut killeqanngitsumillu ilinniarusussusilinnut pilluaqqusaanerussaaq. Taakkununnga nuannerluinnassaaq ilisimassallugu soraajuitsumik ilinniagaqarluarsinnaallutik. Sunilli ilisimasariaqartunik pingaartunik tamanik ilisimasaqareersorinnittunut, matoqqasumillu isumalinnut, inuuneq naassaanngitsoq tassaassaaq perloqqusaaneq ajorluinnartoq. Piffissaq sumut atussanerlugu nalulluinnassavaat.“ — „Times-Advocate“, Escondido, California, februarip ulluisa 19-iat 1984.

[Qupp. 28-mi assiliartaq]

Qarasaq pinngortinneqarsimavoq uatsinnut iluaqutaasumik naassaanngitsumik sulisussatut