Pigissaarutinnik Jehova naalannartiguk

’ILA, uanga pigissaaruteqanngilanga. Inuusuttuuvunga suuteqanngingajallungalu.’ ’Ilinniarsimanera killeqarpoq. Jehova sumik tunisinnaavara?’ ’Innarluuteqarama Jehovap ajorinavianngilaanga.’ ’Utoqqaavunga; pisuussutinik katersinissannut kingusinaareerpunga.’

Ilanngutassiap uuma qulequtaa atuarakku eqqarsaatit tamakku arlaat eqqarsaatigaagit? Kisianni immaqa ilimagisannit pigissaarneruvutit. Jesusip Smyrnamut oqaasii eqqaamakkit: ’Ilisimavakka annikillisarnerit piitsuusutsillu naak pisuusutit.’ (sarĸúmersitat 2:9) Siusinnerusukkut Jesus qaqqami oqaluussilluni oqarpoq: ’Pequutinik nunami katersuiniassanngilasi . . . Pequutinilli qilammi katersuiniaritsi . . . Uummatissimi pequutisi najortarpaat.’ (Matîuse 6:19-21) Qiimmaallannartippiuk? Oqaatsit taakkua malillugit Ataatatta qilammiusup, Jehovap, erneratalu eriagisaannik immaqa pigisaqarputit. Tamakku suusinnaanersut misissoriartigik.

Inuusunnerup nersornaataa — nukiit ilungersorsinnaassuserlu

Qanoq ilillutik inuusuttut Jehova eriaginartumik kiffartuussinnaavaat? Ussatit 20:29-mi uppernarsarneqarpoq inuusuttut timikkut nukimikkut eriaginartunik isumalluutissarsiorfissaqartut. Ila nuanneqaaq takullugu inuusuttut inuusunnertik nukitillu Guutimut kiffartuussinermut atoraat!

Pereersimasut uterfigilaariartigik — 30-kkut aallartilaarneranni. Taamani inuusuttorpaaluit sallusuissut Bibelimeersoq tusarsimavaat. Nukappiaqqap 16-inik ukiullip atuagaq Bibelimut ilinniut Skabelsen, (Pinngortitsineq) Vagttårnip Peqatigiiffianit naqiterneqarsimasoq, ikinngumminit atorsimavaa. Kapitali „Den nye skabning“ („Pinngortitartaaq“) tikikkamiuk tunniulluinnarnermullu tunngasoq atuaramiuk inuunini sumut atussallugu paasivaa. Ingerlaannaq Jehovamut tunniulluinnarpoq. Ukiup tulliani atuagaq alla, „Det store Opgør“ („Akiuunnersuaq“) (atuagaq I), atuarpaa, paasillugulu Guutip aqqata kisimiillunilu oqartussaanerata aalajangersarnissaanut peqataasinnaaneq ajornanngitsoq. Tamatuma kissaateqalersippaa allamik atorfeqarnani kiffartuussinissamut. Ukioq tamanna pionerinngorniarluni qinnuteqarpoq, ullorlu manna tikillugu allamik atorfeqarani kiffartorpoq. Ilutaasa arlallit nunami inuunertik naammassereerpaat, sinneruttulli amerlasuut Ataatartik qilammiusoq uummatimikkut iluunngarlutik suli kiffartuuppaat.

Ullumikkut kristumiut inuusuttut piumassutsimik taamaattumik takutitsippat? Taamaalluinnarpoq! ’Årbogen’-mi (Ukiumoortumik nalunaarsuiffik-mi) nalunaarusiat takutippaat katersat kanernertut amerlatigisut pionerinut ilanngussimasut. (Tussiaat 110:3) Filippinerinit nalunaarusiap takutippaa nalinginnaasumik pionerit 13 procentii 20-t inorlugit ukioqartut. Allani aamma taamaappa? Aap. Assersuutigalugu, qeqertani Trinidadimi Tobagomilu 1986-imi septemberip aallaqqaataanit 1988-imi septemberip 30-anut 282-inik nutaanik pionerinngortoqarsimavoq; taakkua ilaat 48-t 20-t inorlugit ukioqartut. Ilaat ataaseq qanoq oqaluttuassaqarnersoq tusariartigu.

Charmaine Francis tusariartigu. „Mikisuusungali angajoqqaama Jehovamut kiffartuussinissannut taassumunngalu aalajaannissannut kajumissaartarpaannga. Anaanaga ataatagalu aperigaangata tusagassap nuannersup oqaluussissutiginera pillugu parnaarussaagaluarunik qanoq iliussanersunga, akisarpunga: ’Jehova kiffartuutissavara’. 13-inik ukioqarlunga tunniulluinnarpunga 14-inillu ukioqarlunga kuisillunga. Taamanimiilli atuanngiffeqarnerit tamaasa ikiort-pioneriusarpunga. 1983-imi pionerinngorpunga. Ukiumi pioneriuffinni siullermi nuannaarutigisannik anaanaq Jehovamut kiffanngornissaanik ikiorsimavara. Maanna qulingiluanik Bibelimik atuaqqissaaqateqartarpunga. Atuaqatigisartagara ataaseq kuisinnissaminut piareersarpoq, pingasullu allat ataatsimiinnernut ilaasarlutik.“

Tassa qularutissaanngitsumik ilissi inuusuttuususi erinartunik Jehovamik naalannaatissiissutigisinnaasassinnik peqarpusi. Pioneriunngikkaluarlusi pissutsit atukkasi naapertorlugit  Jehova naalannartissinnaavarsi. Immaqa ukiualuit suli atuartussaavusi. Taamaappat ilinniartitsisussi atuaqatissilu Jehova pillugu oqaluttuunnissaannik pitsaasumik periarfissaqarpusi. Christian Kalloop, qulinik ukiullip, atuagaq Livet — hvordan er det kommet her? Ved en udvikling eller en skabelse? (Inuuneq — qanoq ililluni takkuppa? Pinngoriartornikkut imaluunniit pinngortitaanikkut?) atuarfimmut nassarsimavaa. Qanoq kinguneqarsimava? Tamatuminnga soqutiginnittunut atuakkat arfineq-marluk tunisimavai. Ilittaaq taamaaliorsinnaavutit. — Naleqqiuguk Matîuse 21:15, 16.

Ajoqersuisorsuatta ilinniartippaatigut

Pruffiiti Esajas oqarsimavoq: „Guutip [Jehovap] tunivaanga ajoqersukkap oqaanik.“ Oqallorinnerminut Guuti pisuutippa Guutillu neriorsuutaa ima oqaatigalugu: „Anersaara ilinnut pisoq oqaatsikkalu illit qaninnut pisitakka nigussanngillat illit qaninnit imaluunniit kinguaassavit taakkualuunniit kinguaassaasa qarninit.“ (Jesaja 50:4; 59:21) Jesusip apostilii, ilinniarsimanngitsut inuusullu nalinginnaasut, anersaakkut ilisimassummik Guutip tunisimavai, ullumikkuttaaq inuusugut taamatut tunivaatigut.

1986-imi ’Årbogi’ meeqqat atuarfianni annikitsuinnarmik atuarsimasunut — atuarsimanngitsunulluunniit — qiimmaallannartunik paasissutissiivoq. Jehovap Nalunaajaasui nunani amerlasuuni atuarnermut ilinniartitsisarsimapput, inersimasut atuarnermut ilinniarnissaannut periarfissillugit. Aqqissuussinerit tamakku Jehovap pilluaqqusimavai! 1962-ip 1984-illu akornanni Nigeriami 19.238-t atuarnermut allannermullu ilinniarsimapput, maannakkullu Bibeli nipaqanngitsumik atuarsinnaavaat — pulaakkatillu taassuminnga atuffassinnaallugit. Pilluaqqusaalluarsimapput! Qatanngut angut ataaseq atuffarissingaarami ilagiit atuarnermut ilinniarfianni ilinniartitsisunngorsinnaasimavoq.

Ezekiel Ovbiagele qanoq ingerlasimanersoq tusariartigu. 1940-mi kuisikkami atuarsinnaanngilaq. Ilikkarpaali, siumukarlualerluni pioneeringorlunilu. Kingornagut, 1953-imi, nakkutilliilluni angalasartutut toqqarneqarpoq.

Ilikkagaqartuarsinnaanermut qassinik ukioqarneq apeqqutaangilaq. Imaattumik ussateqaraluarpoq: „Cirkusimi hestiutoqqaq isiginnaartitsissummik nutaamik ilikkartinneqarsinnaanngilaq.“ Immaqa ilumoorpoq. Kisianni inuit cirkusimi hestiunngillat. Utoqqalereeraluarluni — kissaatigilluaraannilu — Jehova ilisarineqarsinnaavoq kiffartuunnissaalu ilikkarneqarsinnaalluni. Taamaalisimasunik immaqa ilisarisimasaqarputit. Alice Okon Nigeriami Bibelimik atuarnissamut imarisaatalu neriuutip ilinniarnissaanut kajumissaarneqarsimavoq. Kajumissaarut naalassimavaa neriuuteqalerlunilu. Naak 80-inik ukioqaraluarluni ilikkagaqarnissaminut utoqqaavallaanngilaq. Aalajaatsumik uppersuseqalerpoq, qularnangitsumik Jehovap nuannaarutigisaanik. Ussatit 3:14-imi allassimavoq: „Ilisimassutsip pissarsiarinissaa sølvip pissarsiarinissaanit pingaarneruvoq, iluanaarutissartaalu kuultimit anneruvoq.“ Sallusuissut eqqortumik saqqummiusinnaagaanni oqaaserisat „puugutaasat sølviusut iipiliusartaattut kuultiusutut“ issapput. — Ussatit 25:11; Kulorsamiut 3:16.

Naak innarluuteqaraluarluni uppernikkut suliatigullu pisuujuneq

Innarluuteqarluni inunngorsimasup alliartornini ilutigalugu innarluuteqarnini paasinerujartortillugu immaqa neriuutaarukkiartorsinnaavoq. Aammattaarli inersimasunngoreerluni innarluuteqalerneq artornaateqarpoq. Neriuutissaqanngivippali? Naamik, innarluutillimmi aamma inuunermik naassaanngitsumik angusinissamut periarfissaqarput.

Sorsunnersuup siulliup nalaani Edward Stead Amerikami naalagaaffimmi Wyomingimi illoqarfeerannguami Arvadami hestinik atorniartarfiuteqarsimavoq, nulialu hoteleeraateqarsimalluni. Edwardili spaniamiut nappaataannik eqqorneqarsimavoq, timaata akiuussutissaarukkiartorneranik kinguneqartumik. Taamaattumik naggussamigut aseruuttoorluni nagguai tamarmik iloqianngorput, issiavimmilu kaamisartakkamiilerluni. Susinnaajunnaavippoq oqalussinnaallunili, assanilu aalatilaarsinnaallugit. Imminoornissani eqqarsaatigisimagaluarpaa, sallusuissummilli tusarlerneqarpoq — nuannaaqalunilu ilassivaa.

 Aallaqqaammut hotelip isaariaani issiasarpoq upperisartaanilu pillugu hotelimiittut oqaloqatigisarlugit. Atuagassianik bibelilersaarutinik quppiinissamut sapinngilaq inunnullu unittunut takutitsisinnaalluni. Ilaasa tusarnaassallugu nuannarisarpaat taasarlugulu palasi iloqiak. Kingorna illoqarfinni allani oqaluussiumallerpoq biilimilu immikkut sanaamik ineeraliortitsilluni. Ukiorpassuarni pioneritut taamatut immikkut ittumik kiffartuussivoq, pionerillu inuusuttut marluk-pingasut paarsisini ilagalugit Wyomingip Texasillu akornanni kilometerit tusindilikkuutaat angalaffigisarlugit. Inuutilluni ilisarisimasaminut qiimmassaajuarsimavoq.

Timikkut innarluuteqarneq pillugu nikallungaguvit, Vagttårnet 15. november 1986-imeersup qupperi 22-miit 25-mut atuarnissaanut kajumissaarpatsigit. Qatanngutit angutit tassani eqqaaneqartut tamarmik utoqqaanertaapput, anersaakkut siunnersuisut, qatanngutinik timikkut peqqissunik anersaakkut kajumissartariaqartunik ikiuisinnaasut. Guutip isaani ilumut pisuujoqaat. — 1 Timûtiuse 6:18.

Esterleta Dick, 63-inik ukiulik, ukiuni 16-ini kuisimasutut oqaluussisartuusimavoq. 1978-imi tappiitsunngorsimavoq, taamaakkaluartorli ukiut kingullit marluk pioneriusimalluni. Qanoq ililluni tamanna ajornarsimanngila? Nammineq oqaluttuarteriartigu:

„Ullut ilaanni qatanngutip arnap inuusuttup pioneriusup pilerpaanga: ’Qatanngut Dick, ikiorti-pioneritut anguniakkatit angujuaannarpatit. Nalinginnaasumik pioneriuneq misilerusunngiliuk.’“

Esterletap qatanngutiminut akornutaaginnarnissani annilaangassutigaa, eqqaamavaali ilagiinni nakkutilliisup pioneritut kiffartuussineq qanoq kajumissaarutigitigigaa. „Misiliinnaqaara,“ oqaluttuarpoq, „ukiullu marluk pionerioreerpunga. Aqqusinerni oqaluussisarpunga pulaaqqittakkakkalu amerlaqaat. Aamma arfinilinnik Bibelimik atuaqqissaaqateqartarpunga. Anitinnanga pisassatsinnik allassimaffinnillu pineqartunik atuffatsittarpunga taamaalillunga atuaqqissaarnermi nassuiaasinnaaniassagama. Atuaqatigisartakkakka pingasut ataatsimiigiartarput ataaserlu kuisereerpoq.“

Kinaluunniit ’tunissuteqarsinnaavoq’

Anersaakkut pisuussutivut kisiisa tunissutigisinnaavavut? Naamik, kunngi David naalaffik sanassallugu piareersarami aperaaq: „Kikkut piareersimappat kajumillutik tunissutinik ullumi [Jehovamut] aatsinissaminut?“ (1 Israelikkut kinguaariit oqaluttuarisaanerat 29:5) Tamarmik taamaaliorsinnaasimapput. Ullumikkut amerlasuut, inuusuttut utoqqaallu, napparsimasut peqqissullu, Naalagaaffiup soqutigisaanik siuarsaaniarlutik atortussaatiminnik piumassutsiminnik tunisisarput. Nunagisami immikkoortortaqarfik najugarisamilu ilagiit aqqutigalugit tunisisoqarsinnaavoq. Taamaalilluni tamarmik, sapinngisartik naapertorlugu, tusagassamik nuannersumik oqaluussinermi aningaasartuutit matuneqarnissaannut peqataasinnaapput. — 2 Korintumiut 9:8-12.

Jehovamilli naalannaatissiuiniaraanni anersaakkut pisuussutit pingaarnerpaapput. Inuusuttut nukeqarput piumassuseqarlutillu. Misilittagakitsut qarlumik inerititaannik Jehovamik tunisinissartik ilinniarssinnaavaat. Timimikkut innarluutillit ilisarsissut, ilisimassut paasinninnerlu pisatik alliartortitsinnaavaat. Taakkualu ilarpassui allamik atorfeqaratik kiffartuunnaratik aammattaaq kristumiut ilagiivini paarsisuusinnaapput siunnersuisuusinnaallutillu. Tassa immaqa ilimagisannit pisuujuneruvutit taamaattumillu pigissaarutinnik Jehovap naalannartinnissaannik kajumissaarut malissinnaallugu. — Eprîarit 13:15, 16. (wD 1/7 90)