Silarsuarmik naalliunnertaqanngitsumik neriuutissaq

NAALLIUUTIT tamarmik qanittukkut soraassasut? Timikkut sianissutsikkut misigissutsikkullu katsorsarneqarsinnaanngitsunik anniaateqartunut tamanut tusagaq ila nuanneq! Assersuutigalugu, kræftit ilaat, nappaat tic douloureux (nukilisitsineq) uummaserinerlu angina pectoris pissutigalugit timikkut anniarujussuarnernit aniguisinneqarsinnaasuugunik inuit millionilikkuutaat pilluangaassagaluarput. Inuit sianissutsikkut sualuttumik ajornartorsiutillit qularnanngitsumik anniaataarunnissaminnit allamik annerusumik kissaateqanngillat. Allallu millionilikkuutaat misigissutsikkut anniaatinit, siooranermik, aaliasunnermik, peqqissiminermik, isumaalunnermik pakatsisinneqarnermillu pissuteqarsinnaasunit, aniguisinneqarsinnaagaluarunik qiimmattassagaluarput. Kisianni sumilluunniit anniaataarukkusunnerpugut?

„Anniaammik sumilluunniit misigisaqarsinnaannginneq ajuvissuuvoq,“ timip pisataanik ilisimatooq Allan Basbaum San Franciscomi University of Californiameersoq oqarpoq. Pissutissaqarluarlunilu taama oqarpoq, timikkummi annersinnaaneq navianartorsiulernissamik kalerrisaarutaavoq.

Annersinnaanerup pingaassusia atuagassiami Time-mi ilanngutassiami atuarneqarsinnaavoq: „Nukapiaqqap aqqaneq-marlunnik ukiullip inequnartumik qungujunnera isikkuata sinneranut naakkinartumut akerlioqaaq. Talii niuilu iloqiaapput iluserlullutillu, soorlu saarngit manngertinngitsoornerannik nappaateqarsimasoq. Assaasa inuai arlallit amigaataapput. Seeqqumini ammaannartumik ikeqarpoq, qarluilu qungujulasut ikeqarlutik aagasapput. Soorlumi tassa unatarneqarsimagami aqqunartitersimasoq . . . Qaqutigoortumik sananeqaatimigut ajoquteqarluni inunngorsimagami annersinnaanngilaq. Uunartut navianartulluunniit malugisinnaannginnamigit assaasa inuai sequmissimapput uutitersimallutilluunniit. Saarngi nagguaalu iloqianngorsimapput pisukkaangami  arpakkaangamiluunniit nunamut tukkarsorpallaartarami. Seeqqumigut ammarsimavoq inngigissoq malugisinnaanngisani paarmorfigisimagamiuk. Niunilu napigaluaruniuk siffissaniluunniit pillutsikkaluaruniuk, annerpallaarnaviannginnami ikiortissarsiorluni nillianavianngilaq.

Pissutsit alianartut taamaattut ajunaarnerillu inuit millionilukkuutaat atugarliuutigisartagaat pissutigalugit inuit ilaasa Guuti pisuutinniapallattarpaat. Eqqortuuvali naapertuilluartuullunilu annikilliornernik tamakkuninnga tamanik Guuti avoqqaarissallugu?

Guuti pisuua?

Inuiaat maanna ukiuni 6000-ini timikkut, sianissutsikkut misigissutsigullu naalliuutinik atugarliuuteqareersimapput. Ukiut 1900-t matuma siornagut apustili Paulus eqqortumik allassimavoq: ’Pinngortitat tamarmik suli tamassa anersaameqatigiillutik erloqeqatigiipput.’ (Rûmamiut 8:22) Naak nipaallisaatit assigiinngitsorpassuit nakorsaataarniarfinni pisiarineqarsinnaagaluartut, naallu nakorsat tarnillu nakorsaat ilungersuuteqartaraluartut, suli naalliunneqaqaaq. Ilaasa anniaatitik pissutigalugit Guuti perloqqusimavaat, soorlu qangarsuarli Jobip nuliata Job taamaalioqqusimagaa! Jobilli paasivaa taamaaliornissaq sianiitsorpallannerussasoq eqqortuunanilu. — Job 2:9, 10.

Inuit maanna naalliuutigisaannut Guuti pisuutissallugu eqqortuunngilaq. Aap, pisuusut tassaanerupput sallutooq takussaanngitsoq siuaasavullu siulliit. Qanoq ilillutik?

Bibelimi takutinneqarpoq anersaap pinngortitaasup aallaqqaammut naapertuilluartuusimagaluartup, pissaaneq nuimassuserlu perusulersimagai. Inuit nunami pinngortinneqarmata, takorloorsimavaa nunarsuaq paratiisiusoq qanoq ililluni inunnik Guutimik ajugaqanngitsumik, Jehovamik, kiffartuussilluinnartunik ulikkaarumaartoq. Uummatiminit ajortunngorsimasumit killinneqarluni anersaaq pinngortitaasoq taanna Pinngortitsisumut pikitsitsivoq, nammineq inunnit pallorfigineqarusukkami. Peqqusersuumik ilumoortup muminneratigut siunertani ajortut qulaarpai. Taamaalilluni silamiut ajortilinngorput.

Jehova Guutip inuk siulleq, Adam, oqaluttuussimavaa orpik ajunngitsumik ajortumillu nalujunnaarutaasoq neriffigigaluarpagu toqumik kinguneqassasoq. (1 Moses 2:15-17) Adamilli nulia, Eva, tammartitaalluni naalanngitsinneqarpoq. Pulateriaarsuk aqqutigalugu salloqittaasup oqarfigaa: „Naamik, toqussanngivippusi. Guutiuna taama oqartoq nalunnginnamiuk neriffigigaluarussiuk isisi [Evap uiatalu] uisitaajumaartut Guutisullu ilerumaartusi ajunngitsoq ajortorlu nalujunnaassallugit.“ (1 Moses 3:1-5) Tamanna tassaavoq sallu siulleq, taamaattumillu anersaapiluk taanna ’sallunerit ataatagaat’. (Juánase 8:44) Edenip naatsiiviani pulateriaarsuk aqqutigalugu oqalummat, Bibelimi taaneqarpoq ’pulateriaarsutoqaq Diaavulumik Satanimillu taaneqartoq’. — sarĸúmersitat 12:9.

Ajortip inuit aliasuutinik naalliuutinillu atugaqalersippai. Oqaatsini eqqorlugit ullormi Adamip ajortuliorfiani Guutip ajortuliortut toqumut eqqartuuppai. Inatsisit naapertussagaanni, Jehovap isaani, ullormi tamatumani toqupput. (Naleqqiuguk Lúkarse 20:37, 38.) Edenimi arnaq siulleq ajortulioreermat Gutip oqarfigaa: „Naartuninni amerlaqisunik ippigusuuteqartittarumaarpagit. Anniarlutit ernisarumaarputit.“ (1 Moses 3:16) Edenip naatsiiviata avataani inuussutissarsiorniarluni Adam suleruluttariaqalerpoq, nuna paratiisitut inngilluinnartoq suliffigisariaqaramiuk. Jehova oqarpoq: „Kiakkiullugu nerisassarsiussaatit issumut uterserlutit, tassannga pigavit. Issumimmi pivutit issunngussaatillu.“ (1 Moses 3:17-19) Taamanimiilli inuit naalliuuterpassuarnik atugaqartariaqalersimapput.

Tassa naammalluinnanngissutsip, ajortip toqullu Adamimit kingornussatta naalliuutit  kingunerai. Apustili Paulusip ima allaatigaa: ’Taamaattumik soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ (Rûmamiut 5:12) Qujanartumilli Guutip oqaasiata naalliuutit uatsinnut akioruminarnerulersippai, tassanimi paasitinneqaratta suna pillugu Jehovap naalliuutit atuunnissaat akuerigallaraa neriorsoqqissaarneqarlutalu qanittukkut taamaatitinneqarumaartut. Jobip naapertuilluartup assuarnaassusia misilinniarlugu ’sallunerit ataataannit’, Satan Diaavulumit, naalliutsinneqarnera Jehovap akuerisimavaa. Diaavulup Job namminissarsiornini pissutigalugu asanninnerlu pissutiginagu Guutimik kiffartuussinerarpaa. (Job 1:8-12) Jobili Guutimut aalajaattuarpoq, taamaalillunilu uppernarsarlugu inuit naammalluinnanngitsut allaat uppernikkut misilinneqangaaraluarlutik asanninnermik tunngavilimmik Guuti kiffartorfigisinnaagaat ilumoorlutillu taassuma kisimi oqartussaanera aalajangiussinnaallugu. Job naammagittarnermigut assuarnaattuarnermigullu, Jehovap aqqanik illernarsisitseqataavoq Satanillu salluttuuneranik uppernarsaaqataalluni, taammaattumillu upperluartoq taanna akilerneqarluarpoq. (Job 42:12-17; Jâko 5:11) Jobimik oqaluttuaq eqqarsaatigalugu ilimagisinnaavarput Guutip siunertani naammassereerpagu, inuiaat naalliuutaat soraarsitaajumaartut. Qanoq ililluta tamanna qularinngissinnaavarput?

Naalliuutit qanoq peerneqarumaartut

Jehovap isumagisimavaa inuit naalliuutaasa ataasiaataasukkut uteqqittussaanngitsumik soraarsinneqartussanngornissaat. Ernermi, Jesus Kristusip, utertitsissutissatut pilliutaa tunngavigalugu taamaaliorpoq. Jesus tassaavoq ’Guutip savaaraa silamiut ajortaannik [peersisoq, NV]’. (Juánase 1:29) Nunamut tikiussimanngilaq ’kiffartorfigeqqulluni, kisianni kiffartussalluni inuuninilu akissatut tuniussallugu amerlasuut utertinneqaatissaannik’. (Matîuse 20:28) Naalannginnami Adamip inuttut naammalluinnartutut inuunini, pisinnaatitaaffiit periarfissallu tamatuma nassatai tamaasa ilanngullugit, annaavai. Tamakkorpiaallu Jesusip utertitsissutitut pilliutaata utertippai. (1 Timûtiuse 2:5, 6; Eprîarit 7:26) Aap, ’silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ — Juánase 3:16.

Guuti neriorsuisimavoq naalliuutit soraarsitaajumaartut. Ajorti pissutigalugu naalliuuteqarunnaarfissaq siulittuutigalugu, apustili Johannes Guutimit isumassarsisinneqarluni allappoq: ’Qilak nutaaq nunalu nutaaq takuakka; qilak siulleq nunalu siulleq peermata, imarlu peqarunnaarluni. . . . Nipilu angingaartoq tusarpara qilammit oqartoq: „Takussagissi Guutip ineqarfia inunniittoq, taakkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaannit allarterumaarpai, toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq, siulliit peermata.“ Issiavissaarsuarmi issiasoq [Jehova Guuti] oqarpoq: „Ata, suut tamaasa nutaanngortippakka.“ Uannullu oqarpoq: „Allagit, oqaatsit tamakku sallusuillutillu ilumoormata.“’ — sarĸúmersitat 21:1-5.

Inuit naalattut Jesusip utertitsissutissatut pilliutaa qanittukkut tamakkiisumik iluaqutigilerumaarpaat. Naalagaaffiup inuit qangali imatut qinnutigisartagaata naalakkersuinerani tamanna piumaarpoq: ’Ataatarput qilammiusutit, aqqit illernarsili; naalagaaffiit tikiulli; peqqusat qilammisut nunamissaaq pili.’ (Matîuse 6:9, 10) Jesus Kristus naalagaaffimmi qilammiusumi naalakkersuissaaq akeqqami tamarmik, ilaatigut naalliuutit tamarmik, akeqqallu nunngutissaata, toqup, peersinnissaata tungaanut. — 1 Korintumiut 15:25, 26.

 Taamaattumik inuit naalattut qanittukkut manna misigissavaat: ’[Guutip] qulliit tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq.’ (sarĸúmersitat 21:4) Taamanikkussamut oqaatsit siulittuutaasut makku maannakkut anersaakkut eqquuttut, aamma timikkut eqquutisssapput: „Tarniga, nersoruk [Jehova], . . . taassuma isumakkeerfigaatit ajortuliannik tamanik, nappaatitillu tamaasa katsorsarlugit.“ „Nunatsinni ima oqartoqassanngilaq: ’Napparsimavunga!’“ — Tussiaat 103:1-3; Jesaja 33:24.

Qaqugu?

Tassa ungasinngitsukkut naalliunnernit aniguisinneqarumaarpugut. Aap, ullutsinni pissaaq; kinguaariit maanna inuusut misigissavaat. Bibelimi siulittuutit eqquuttarnerisa takutippaat pissutsit aaqqissuussaanerata ajortup maanna atuuttup naggatissaani inuusugut. Sorsunnerit, kaannersuit nunallu sajuttarneri aatsaat taama sualutsigisut, aammalu Jehovap Nalunaajaasuisa silarsuarmi tamarmi tusagassamik nuannersumik oqaluussinerat, nalunaaqqutinut naalagaaffiup qilammiusup naalannaassusiani Jesusip takussaanngitsumik ’najuunneranik’ takutitsisunut ilaapput. — Matîuse 24:3-14, 21, 34.

Qanittukkut ’qilak siulleq nunalu siulleq’, Satan Diaavulup pissutsinik aaqqissuussaa tamatumalu siulersueriaasia, peerutissapput. Inuit ’immatut’ mallersorsuartut ittut ajortut piujunnaassapput. Taamaattumik ’qilaat nutaat’, naalakkersuisut Guutip pilluaqqusaasa, ’nunamut nutaamut’, inuiannut naapertuilluartunut, naalakkersulernissaa qanittuararsuanngorpoq. — sarĸúmersitat 21:1; 2 Pîtruse 3:13.

Naalakkersuisut nutaat, Guutip naalagaaffiata, ataani pilluaqqussutissat tamakku eqqarsaatigalugit, isumalluarnissamut pissutissaqarluarpoq. Silarsuaq nutaassaq naalliuutinik toqumillu ilaqanngitsoq pillugu paasiniaaniarit. Ullup pilluaqqusaasup Jehova Guutimik asannittut naalattullu tamarmik silarsuarmi naalliuuteqanngiffiusumi inuuffissaata nalliuffissaa qaneqisoq qilanaarilerniaruk. (wD 15/7 90)