Kiffartornissamut piukkunnaateqarpit?

„Pisinnaassuserput Guutimit pivoq.“ — 2 Korintumiunut agdlagkat 3:5.

1. Ilagiinni kristumiuusuni inunnut qanoq ittuusunut inissaqanngila?

JEHOVA GUUTI Jesus Kristusilu suliumatuujupput. Soorlu Jesus oqartoq: ’Ataataga manna tikillugu sulimmat uangattaaq sulivunga.’ (Juánase 5:17) Guutip sulerusunngitsut iluaagai, allallu pissaaneqarfigerusuinnarlugit akisussaaffeqalerusuttut iluaagalugittaaq. Ilagiinni kristumiuusuni eqiasuttunut namminissarsiorpaluttumillu anguniagaqartunut inissaqanngilaq. — Matîuse 20:25-27; 2 Tásalûníkamiut 3:10.

2. Sooq maanna angutit ilagiinni akisussaaffimmik tigusinissaat taama pisariaqartigaa?

² Jehovap nalunaajaasui ’Naalakkap suliaanik naammassisassaqangaarput’, pingaartumik ulluni makkunani amerlangaartut eqqortumik pallorfiginninnerup ’qaqqaa’-nukaasillugit. (1 Korintumiut 15:58; Jesaja 2:2-4) Angutit anersaakkut inerisimalluartut ilagiinnilu akisussaaffimmik tigumminnissinnaasut amigaatigineqaqaat. Angutit tamakkua namminissarsiorpaluttumik anguniagaqartuunngillat anneruniartuunatillu; namminneq ataqqinarsisinneqarnissartik pinnagu Jehovap ataqqinarsisinneqarnissaa anguniagaraat. (Ussatit 8:13) Nalunngilaat Guutip ilagiinni akisussaaffimmik nammagaqarnissaminnut pisinnaassuseqartikkaatik, soorluttaaq taanna ’angerutsimut nutaamut kiffartorsinnaanngortitsisoq.’ — 2 Korintumiut 3:4-6.

3. Utoqqaanertat ilagiinnilu kiffartortut suna tunngaviusumik akisussaaffigaat?

³ Ukiuni hundredelinni siullerni kristumiut assigalugit ullumikkuttaaq anersaamit illernartumit Jehovallu peqatigiissortaanit angutit utoqqaanertat ilagiinnilu kiffartortut toqqarneqartarput. (apustilit suliait 20:28; Filípimiut 1:1; Títuse 1:5) Utoqqaanertat tassaapput Guutip savaataanik anersaakkut ittumik paarsisut, taakkuninngalu sernissuerpaluttumik nakkutilliisut. Taama sulinerminni ilagiinni kiffartortunit, anersaakkut nakkutilliinermik toqqaannartumik suliaqanngikkaluartunit, ikiorneqartarput. (1 Pîtruse 5:2; naleqqiuguk apustilit suliait 6:1-6.) Soorluttaaq Guutip ernera tikiuttoq kiffartussalluni, taamattaaq angutit toqqarneqartut taakkua uppeqatiminnik kiffartuussinissaq kissaatigaat. (Mákorse 10:45) Angutaaguit kristumiuusoq, illittaaq isuma taamaattoq pigaajuk?

Piukkunnaatit assingi

4. Angutinut ilagiinni akisussaaffimmik tunineqartunut piumasaqaatit ingammik sumi allanneqarsimappat?

⁴ Ilagiinni oqartussaaffimmik tunineqartunut piumasaqaatit Paulusimit eqqartorneqarput, pingaartumik 1 Timûtiuse 3:1-10, 12, 13-mi aammalu Títuse 1:5-9-mi. Piukkunnassusermut piumasaqaatit ilaat utoqqaanertanut ilagiinnilu kiffartortunut assigiipput. Piumasaqaatit taakkua maanna eqqartorniarpavut. Silamiulli paasinnittaasiannik pinata, taamanikkut ukiuni hundredelinni siullerni allakkat Jehovap innuttaanut tunngatillugit allanneqarfiisa nalaanni pissusiusut tunngavigalugit qimerloortariaqarpavut. Piumasarineqanngilaq piumasarisaasunik unioqqutitsinngilluinnarluni malinninnissaq, taamaakkaluarpammi kiffassatut piukkunnassuseqarnissaq apeqqutaanavianngikkaluarmat. (1 Juánase 1:8) Angutaaguilli kristumiuusoq, soormi nammineq inuttut piukkunnassutsitit misissoqqissaanngiligit, maannakkut ilagiinni akisussaaffeqarnerit akisussaaffeqannginnerilluunniit apeqqutaatinnagu?

5. Isornaassuseq qanoq paasisariaqarpa?

⁵ Isornaatsoq; ilaginngisatsinnit unnersiutigisaassasoq; assuarnaatsoq. (1 Timûtiuse 3:2, 7, 8, 10; Títuse 1:6, 7) Ilagiinni kiffartortussat utoqqaanertassallu toqqarneqaraangamik  isornaatsuunertik attattuartariaqarpaat, imaappoq isornaateqassanatik ilitsersorneqarnermillu pisariaqartitsissanatik iluanngitsumik pissusilersorsimasutut imaluunniit ajoqersuinerlussimasutut ilumoortumik pasillerneqaraluarunik. ’Qatanngutaaqqusersunit’ allanilluunniit ilumuunngitsumik unnerluutigineqaruni qatanngut assuarineqassanngilaq. Kiffartortoq tunuartinneqarsinnaavoq taamaallaat pasilliut soqutaanngivissuunngiippat Biibilillu ileqqoreqqussaanik tunngavilersorneqarsinnaappat. (2 Korintumiut 11:26; 1 Timûtiuse 5:19) Ilagiinni toqqagaasimasoq aammattaaq ’ilaginngisatsinnit allaat unnersiutigisaassavoq; mitaatigisaalerluni Diaavulup nigaanut napiteqinavoq’. Angut siornatigut ilungersunartumik unioqqutitsisimappat kiffartortussatut toqqarneqarsinnaavoq aatsaat pissusilersornerata isornaatit nungutilluinnarsimappagit ajunngitsuinnarmillu oqaatigisassanngorsimappagu.

6. Ataatsimik nulialik qanoq paasisariaqarpa?

⁶ Ataatsimik nulialik. (1 Timûtiuse 3:2, 12; Títuse 1:6) Imaanngilaq nuliallit kisimik ilagiinni kiffartortunngorsinnaasut utoqqaanertanngorlutilluunniit. Angulli katissimaguni, ataasiinnarmik inuusumik nuliaqartariaqarpoq ilumoorfigisaminik. (Eprîarit 13:4) Anguterpassuit kristumiuunngitsut ukiut hundredelillit nalaani inuusut nuliarpassuallillu assigissanngilai.

7. (a) Angutip ukiui utoqqaanertanngornissamut piukkunnassusianut aalajangiisuuppat? (b) Qanoq ililluni inoqutiminik paarsilluarsinnaava?

⁷ Inoqutiminik paarsilluartoq; qitornai tamatigut titsiillutik naalattut. (1 Timûtiuse 3:4, 5, 12; Títuse 1:6) Ilaatigut isumaqartoqartarpoq utoqqaanertat ikinnerpaamik 30-inik ukioqassasut, Bibelili ukiukinnerpaaffissamik killiliinngilaq. Ukiui apeqqutaatinnagit angut taamaattoq anersaakkut utoqqaanertatut pissusilersortariaqarpoq. Ilagiinni kiffartortut utoqqaanertallu ima inerissimatigisariaqarput allaat meeraqarsinnaallutik. Angut nulialik piukkunnarnavianngilaq angerlarsimaffimmi naalagarsiortitsisuuguni avataanilu aatsaat Guutip pissusiinik atuisaruni. Bibeli malillugu inoqutiminik paarsilluartuunermigut ataqqisaalersimasuusariaqarpoq, inoqutimilu anersaakkut ilisimasaqarluartuunissat ilungersuutigisariaqarlugu. Nalinginnaasumik ilimagineqartarpoq utoqqaanertap qitornai ukiukinnerusut perorsarluagaasut ’uppertuullutillu’; imaappoq Guutimut tunniulluinnarnissaq siunertaralugu siuariartortuussallutik imaluunniit Jehovap nalunaajaasuisut kuisereersimasariaqarlutik. Angut meeqqaminik uppernikkut ineriartortitsisinnaanngippat ilimananngilaq allani ineriartortitsisinnaassasoq.

8. Ilaqutariinni ittuusup utoqqaanertanngortinnani suna ilinniaqqaartariaqarpaa?

⁸ Ilaqutariinni ittuusup utoqqaanertatut kiffartulinnginnermini ilagiinnilu anersaakkut nakkutilliilinnginnermini inoqutiminik aqutsisinnaaneq ilinniaqqaartariaqarpaa. ’Namminermi inoqutiminik paarsineq nalusup qanoq ililluni Guutip ilagiissai paaqqissavai?’ (1 Timûtiuse 3:5) Takorloorneqarsinnaavormi uppinngitsumik taamaammallu assortuisumik nuliaqartoq. (Matîuse 10:36; Lúkarse 12:52) Qitornaasaluunniit arlaat ilungersunartumik  unioqqutitsisimasinnaavoq, naak sinneri anersaakkut peqqissuugaluartut. Ataataasulli ilimagineqarsinnaasut tamaasa iliuuserisimappagit, pingaartumillu inoqutimi sinneri anersaakkut ilisimasaqarluartuutillugit, taava imaattariaqanngilaq ilagiinni kiffartortutut utoqqaanertatulluunniit piukkunnaateqanngitsoq, oqaaqqissaarinera ajunngitsoq inoqutimi ilaanit ataatsimit malinneqanngimmat.

9. Ilagiinni kiffartortut utoqqaanertallu sooq imigassamik atuinerminni ingasaassinaveersaartuussappat?

⁹ Viinnimut uerinngitsoq; viinnisorajuttuunngitsoq. (1 Timûtiuse 3:3, 8; Títuse 1:7) Ilagiinni kiffartortunut utoqqaanertanulluunniit ilaasoq imigassamik atuinermini ingasaassinaveersaartuussaaq. Imigassamik pinngitsoorsinnaannginnerup kingunerisinnaavai eqqarsaatinik misigissutsinilluunniit aqutsisinnaajunnaarneq aammalu saqitsaassinerit paanninnerillu. ’Viinisorpallaartuussanngilaq’, imerajuttuuniniluunniit ingasaassisartuuniniluunniit nalunngisaassutigissanagu. (Ussatit 23:20, 21, 29-35) Nakkutilliisumit pulaarneqarneq aalakoornikkut takussunarsarneqassappat alianassaqaaq! Qatanngut imigassartorniarpat tamanna ataatsimiinnernut, oqaluussinermut illernartumilluunniit kiffartornerup ilaanut attuumasuteqassanngilaq. — 3 Moses 10:8-11; Hesekiel 44:21.

10. Sooq aningaaseritooq assuarnartumilluunniit akissarsiniartoq utoqqaanertatut imaluunniit ilagiinni kiffartortutut piukkunaateqanngila?

¹⁰ Aningaaserituunngitsoq; assuarnartumik akissarsinianngitsoq. (1 Timûtiuse 3:3, 8; Títuse 1:7) Aningaaserituut anersaakkut navianartorsiorput, ’piumatuullu’ Guutip naalagaaffia kingornussarissanngilaat. Angutit taamaattut utoqqaanertatut imaluunniit ilagiinni kiffartortutut taamaammat piukkunnaateqanngillat. (1 Korintumiut 6:9, 10; 1 Timûtiuse 6:9, 10) Grækerit oqaasiat ’assuarnartoq’ isumaqarpoq ’kanngunartoq’, ’akissaq’-lu tassaavoq iluaqut imaluunniit iluanaarut sunaluunniit. (Filípimiut 1:21; 3:4-8) Angutip Guutip ’savaataanut’ assuarnartuliorsinnaanissaanik ersiutaasoqaraluarpat, taanna soorunami ilagiinni akisussaaffeqarsinnaanavianngilaq. (Hesekiel 34:7-10; apustilit suliait 20:33-35; Jûtarse 16) Kiffartuutilinngortitsinermi mianersornissap pisariaqassusia paasinarpoq, kiffartuutilik pigisanik paarseqquneqarsinnaammat taamalu tillinnissamut usserneqarsinnaalermat. — Juánase 12:4-6.

11. Sooq ’uppilerlaannguaq’ kiffartuuteqarnissamut toqqarneqartariaqanngila?

¹¹ Uppilerlaannguussanngilaq; misilinneqaqqaassaaq. (1 Timûtiuse 3:6, 10) Kuisillaaq akisussaaffeqarnissamini aalajaassutsi uppernaarsassallugu suli piffissaqarsimanngikkallarpoq. Immaqa aliasuttunut misiginneqataanermik imaluunniit uppeqatini ikiorumallugit ilisimassusermik amigaateqarpoq, immaqalu allaat allat nikagisarlugit. Angut ilagiinni kiffartortutut ingammillu utoqqaanertatut  toqqarneqartussanngortitaannginnermi-ni ’misilinneqaqqaartariaqarpoq’ siuneqassuseqarninilu tatiginassuseqarninilu takutittariaqarlugu. Qanoq sivisuutigisumik misilinneqartariaqarnersoq aalajangersimasumik malittarisassiuunneqarsinnaanngilaq, inuillu assigiinngitsut qanoq sukkatigisumik anersaakkut ineriartortarnerat assigiinngilaq. Utoqqaanertalli tuaviortariaqanngillat, ’ilisimatuunialerluni Diaavulutut eqqartuunneqaqqunani’, (NV). Siullermik Jesusitut qanilaarnini takutittariaqarpaa. — Filípimiut 2:5-8.

Ilagiinni kiffartortut piukkunnaatigisariaqagaat

12. Ilagiinni kiffartortunut tunngatillugit piumasaqaatit taakkua kisimik naammassissavaat?

¹² Ilagiinni kiffartortunut tunngatillugit piumasaqaatit ilaat pingaartillugit taaneqarsimapput, utoqqaanertattaarli piumasaqaatinut taakkununnga naleqquttumik inooriaaseqanngikkunik kiffartornissamuttaaq piukkunnassuseqassanngillat. Illit angutitut kristumiuusutut piumasaqaatit taaneqartut piukkunnassuseqarfigaagit?

13. Titsiissuseq qanoq paasisariaqarpa?

¹³ Titsiitsoq. (1 Timûtiuse 3:8) Qatanngut ilagiinni kiffartortutut piukkunnassutsiminik takutitserusuttoq akisussaaffeqarnermut soqutigitsaatsuussanngilaq. Ataqqinarpalussuseqartumik allanit tatigineqassutigilikkaminik pissusilersortuusariaqarpoq. Quiasaarneq ilaaneeriarluni inissaminiittarsinnaavoq, sualuppallaamilli qiimasaartuuneq kiffartortuunissamut piukkunnassutaanngilaq.

14. (a) Marlunnik oqaqannginneq qanoq paasisariaqarpa? (b) Ilarasuuteqannginnermut suna aalajangiisuua?

¹⁴ Marlunnik oqaqanngitsoq; sumik ilerasuutigisaqanngitsoq. (1 Timûtiuse 3:8, 9) Ilagiinni kiffartortut (utoqqaanertallu) peqqusersuitsuusariaqarput, mamarliigajuttuunatik tunussisuussanatillu. Marlunnik oqaqanngitsuussapput pisuusaartutullu assigiinngitsunik oqaluttassanatik. (Ussatit 3:32; Jâko 3:17) Angutittaaq taakku sallusuissut saqqummersitaasoq malartitassaanatik ilungersuutigisariaqarpaat ’anngigisamillu uppernerup pianik piginnillutik sumik ilerasuutigisaqarnatik’. Angutip taamaattup nalunngeqatiginnissusia Guutimut nalunaajaasuusariaqarpoq peqqusersuitsuuneranut, isertukkanik mingunnartunillu suliaqartuunnginneranut. (Rûmamiut 9:1, 2; 2 Korintumiut 1:12; 4:2; 7:1) Kinaluunniit sallusuissummik Guutillu aalajangersagaanik malinninngitsoq Guutip savaataanik isumaginnissinnaanngilaq.

Utoqqaanertat piukkunnaatigisariaqagaat

15. Kikkut piukkunnaataat maanna sammissavarput, qatanngutillu angutit taakku sumik immikkut akisussaaffeqarpat?

¹⁵ Piukkunnassusermut piumasaqaatit ilaat pingaartumik utoqqaanertanut atuupput, paarsisutullu ajoqersuisuttullu sulinerannut tunngassuteqarnerullutik. Illit angutitut kristumiuusutut piumasaqaatinut naleqquttumik inooriaaseqarpit?

16. (a) Qanoq ililluni ileqqutigut mianersortoqarsinnaava? (b) Utoqqaanertaq qanoq ililluni imminut naalakkersinnaava?

¹⁶ Mianersortoq; killeerutiuitsoq. (1 Timûtiuse 3:2; Títuse 1:8) Uttoqqaanertap killissani suunersut ilisimasariaqarpai ileqqupiluillu ingalassimaniassallugit. Misilinneqaraangami uppititaaqqunagu Guutimit ikiorneqassaaq, tussiaasiortutut ima qinuppat: „Siooqqatigisannit annaannga annikilliuutinnillu aniguisillunga.’ (Tussiaat 25:17) Nakkutilliisup Guutip anersaava qinnutigisariaqarpaattaaq inerititaanillu pigisaqalerluni, soorlu imminut naalakkersinnaaneq. (Lúkarse 11:13; Galâsiamiut 5:22, 23) Utoqqaanertaq eqqarsaamminik, oqaatsiminik iliuutsiminillu aqutsisinnaasoq, ilagiinni anersaakkut siunnersuisilluni ingasattajaarnernik pinngitsuuisinnaavoq.

17. Isumakkut piitaajuissuseq qanoq paasisariaqarpa?

¹⁷ Piitaajuitsoq. (1 Timûtiuse 3:2) Utoqqaanertaq sianisuujusariaqarpoq, periaaserissuuluni eqqarsaatiginneqqissaartuullunilu, aalajangersimasumik siunertarisaqarluni kiisalu oqaatsimigut ileqqulersornermigullu sianisuujusariaqarluni. Naammagittartumik allanngujaatsumillu pissusilersornera Guutip ilisimassusianik ajoqersuummillu peqqissinartumik Jehovap oqaasianiittumik, eqiasuilluni atuaqqissaartariaqagaani, sunnerneqarsimanermik ersersitsivoq. — Rûmamiut 12:3; Títuse 2:1.

18. Utoqqaanertaq ippinnaannersoq qanoq takuneqarsinnaava?

 ¹⁸ Ippinnaatsoq. (1 Timûtiuse 3:2) Grækerit oqaasiat uani Timûtiusimullu agdlagkat sujugdlît 2:9-mi issuarneqartoq ’ippinnaatsoq’-mik nutserneqarsinnaavortaaq ’peqqissaartoq’-mik. Taamaammat utoqqaanertaq maligassaasumik ippinnaatsumillu inooriaaseqartariaqarpoq. Assersuutigalugu piffissamik eqqorluaasuusariaqarpoq. Ukiuni hundredelinni siullerni kristumiut nalunaarsuutinik allattuivallaartarsimagunanngillat, ullumikkullu nakutilliisoq naatsorsuuserisutut allaffimmiutulluunniit ilinniarsimasuusariaqanngilaq. Ilagiinni kiffartortut immaqa tassunga atatillugu pisariaqarnerit suliarisinnaassavaat. Grækerilli ’ippinnaatsoq’ pillugu oqaasiat ileqqorissaarnermut tunngatinneqarsinnaavoq, angullu naalasseriitsoq ileqqorluttorlu utoqqaanertanngornissamut piukkunnassuseqanngilaq. — 1 Tásalûníkamiut 5:14; 2 Tásalûníkamiut 3:6-12; Títuse 1:10.

19. Utoqqaanertap inoroorsaartuunini qanoq ililluni takutissinnaavaa?

¹⁹ Illusisitsisartoq. (1 Timûtiuse 3:2; Títuse 1:8) Utoqqaanertaq ’illusisitsisarpoq’. (Rûmamiut 12:13; Eprîarit 13:2) Grækerit ’illusisitsisartoq’ pillugu oqaasiat isumaqavippoq ’takornartanik asannittoq’. Taamaammat utoqqaanertap inoroorsaartup nutaat kristumiut ataatsimiinnerinut takkukkaangata tikilluaqqusarpai aammalu pissakinnerusut pisuujunerusunut naligitillugit ilassiortarlugit. Kristumiut suliaannik siuarsaallutik angalasartut inoroorsaarfigisarpai angalaqqinnissaannullu ikiortarlugit ’Guutimi ileqqorisariaqartoq naapertorlugu’. (3 Juánase 5-8) Aap, utoqqaanertap uppeqatini inoroorsaarfigisarpai, pisariaqartitsinerat namminerlu pisinnaanini naapertorlugu. — Jâko 2:14-17.

20. Utoqqaanertaq qanoq ililluni ajoqersuisinnaasariaqarpa?

²⁰ Ajoqersuineq sapinngitsoq. (1 Timûtiuse 3:2) Utoqqaanertap anersaamut tunngassuteqartunik ajoqersuisinnaanera immikkut ittumik silatussuseqarneranit imaluunniit silamiutut ilisimassuseqarneranit pinngilaq. (1 Korintumiut 2:1-5, 13) Tamanna sungiusartarpaa ’oqaatsip ilumoortup ajoqersuummut missiliuuttup aalajangiunneratigut ajoqersuut peqqissinartoq eqqorlugu oqaassisinnaanngoqqulluni aammattaaq assortuisut akissutissaarutissinnaaqqullugit’. (Títuse 1:9; naleqqiuguk apustilit suliait 20:18-21, 26, 27.) ’Oqaatseriitsut qanilaarluni ajoqersorniassavai.’ (2 Timûtiuse 2:23-26) Utoqqaanertaq ilagiinni tamanut ammasumik oqalugiallaqqissuunngikkaluaruniluunniit Guutip oqaasianik ima atuilluarsinnaatigisariaqarpoq uppeqatinittaaq Bibelimik atuaqqissaartut, ajoqersorsinnaassallugit ilitsersorsinnaassallugillu. (2 Korintumiut 11:6) ’Ajoqersuummik peqqissinartumik’, ilaqutariinnik inunnillu ataasiakkaanik Guutip maligassiaa malillugu inuulersitsisinnaasumik, ingerlatitseqqinissamut piukkunnaartuusariaqarpoq. — Títuse 2:1-10.

21. (a) Utoqqaanertap qanoq ililluni takutittarpaa nakuuserneq atortorinngikkini? (b) Piuaassuseq qanoq paasisariaqarpa? (c) Saqitsaagajunnginnermut suna ilaava?

²¹ Paannikkajuttuunngitsoq, piuaatsoq, saqitsaagajunngitsoq. (1 Timûtiuse 3:3; Títuse 1:7) Utoqqaanertaq eqqissinermik nuannarinnittuuvoq taamaammallu nakuuserneq imaluunniit oqaatsit kusanaatsut narrujuumminartullu atortorinagit. (Naleqqiuguk 2 Korintumiut 11:20.) (Siuliani oqaariaatsip ’viinnisorajuttuunngitsoq, paannikkajuttuunngit- soq’-ip takutippaa imigassamik atornerluineq, inunnik saassussiumatunngortitsisartoq, ingalassimagaa.) Utoqqaanertaq ’piuaatsuuvoq’ (imaluunniit ’sianisooq’) taamaammallu naalagaajumatuujunani, isornartorsiortuunani soqutaalluanngitsunillu pingaartitsivallaartuunani. (1 Korintumiut 9:12; Filípimiut 4:5; 1 Pîtruse 2:18) Utoqqaanertap saqitsaagajuttuunnginnini assortuigajuttuunnginninilu pissutigalugit assortuunnerit ingalassimaniartarpai ’kamakkumaarnertuullunilu’. — Títuse 3:2; Jâko 1:19, 20.

22. Utoqqaanertap usorsitsaartuunnginnera qanoq paasisariaqarpa?

²² Usorsitsaartuunngitsoq. (Títuse 1:7) Tamanna isumaqarpoq ’imminut nuannarisuunngitsoq’. (Naleqqiuguk 2 Pîtruse 2:10.) Utoqqaanertaq annerussiumatuujussanngilaq namminerli piginnaassutsini maniguuttumik isigissallugit. Allanit tamanit pikkorinnerusutut imminut isiginngilaq, maniguullunili utoqqaanertaqatini akisussaaffimmik nammaqatigalugit  ’siunnersuisullu amerlasuut’ iluatinnartuutillugit. — 4 Moses 11:26-29; Ussatit 11:14; Rûmamiut 12:3, 16.

23. (a) Oqariaaseq ’ajunngitsunik iluarinnittoq’ nassuiaruk. (b) Iluartuuneq qanoq paasisariaqarpa?

²³ Ajunngitsunik iluarinnittoq; iluartumik ileqqulik. (Títuse 1:8) Taakkuttaaq utoqqaanertanut piumasaqaataapput. ’Ajunngitsunik iluarinnittup’ Jehovap isaani ajunngitsut nuannarai; inussiarnerluni ikiuiumatuullunilu allanut iliuuseqartarpoq ajunngissusiallu pingaartitaralugu. (Lúkarse 6:35; naleqqiukkit apustilit suliait 9:36, 39; 1 Timûtiuse 5:9, 10.) Iluartumik ileqqoqarnermut ilaavoq Guutip inatsisaanik maleruaqqusaanillu malinninneq. Angut iluartumik ileqqulik aammattaaq nakerisassarsiortuunngilaq tamatigullu eqqortut, minguitsut ileqquulluartullu eqqarsaatigisarlugit. (Lúkarse 1:6; Filípimiut 4:8, 9; Jâko 2:1-9) Ajunngissuseq iluassusermit imaluunniit naapertuilluassutsimit immikkooruteqarpoq imaqarnerugami sakkortuumik iluassutsip piumasaanit; taamaattumik ajunngitsunik iluarinnittoq piumasarisaasumit annerusumik allanut iliorpoq. — Matîuse 20:4, 13-15; Rûmamiut 5:7.

24. Ilumuussuseq qanoq takuneqarsinnaava?

²⁴ Ilumoortoq. (Títuse 1:8, NV) Angut utoqqaanertaanissamut piukkunnaatilik Jehovamut unioqqutitassaanngitsumik tunniulluinnarsimasuuvoq inatsisaanillu malinnilluni, qanorluunniit assuarnaassutsi misilinneqartigigaluarpat. Jehovap suliareqqusai malillugit saqivoq, tamatumunngalu ilaavoq aalajaalluni Naalagaaffimmik oqaluussilluni kiffartuussinera. — Matîuse 24:14; Lúkarse 1:74, 75; apustilit suliait 5:29; 1 Tásalûníkamiut 2:10.

Piumasaqaatit maleruakkit

25. Piumasaqaatit tamakku kikkut sulissutigisariaqarpaat, qanorlu ililluni taamaaliortoqarsinnaava?

²⁵ Piukkunaatit amerlanersaasa matumani eqqartorneqartut piginnaassutsit Jehovap nalunaajaasuisa tamarmik sulissutigisariaqagaat attorpaat ilinniarneqarsinnaasullu atuaqqissaarluta, qinulluta ineriartornartunillu peqatigissarsiorluta iliuuseqarnitta Guutimit pilluaqquneqarnerisigut. Tamatta nukittuffeqarlutalu sanngiiffeqarpugut, ilagiinnili kiffartortut utoqqaanertallu piumasaqaatit immikkut pisinnaatitaaffimmut attuumassuteqartut sapinngisamik naleqquttumik maleruassavaat.

26. Suup angutit kristumiuusut ilagiinni atorneqarnissamut kissaateqalersittarpai?

²⁶ Jehovap nalunaajaasuisa tamarmik kissaatigisariaqarpaat ajunnginnerpaamik Guutimik kiffartuussinissartik. Taamatut isumaqarfiginninnerup angutit kristumiuusut ilagiinni akisussaaffimmik isumaginnittunngornissaq siunertaralugu pikkorissarnissamut killittarpai. Angutaavit tunniulluinnarsimasoq kuisimasorlu? Taava isattorit sapinngisallu tamaat atorlugu kiffartortunngornissamut piukkunnarsarit! (wD 1/9 90)

Qanoq akissavit?

□ Sooq maanna angutit kuisissimasut ilagiinni akisussaaffimmik tigusinissaat taama pisariaqartigaa?

□ Ilagiinni kiffartortut pigisariaqagaannik piukkunnaatinik taasigit.

□ Utoqqaanertat maleruartariaqagaannik piumasaqaatinik taasigit.

□ Sooruna utoqqaanertap inoqutiminik qanoq paarsinissani ilisimasariaqaraa?

□ Suup angutit kristumiuusut ilagiinni atorneqarnissamut kissaateqalersittarpai?

[Atuaqqissaarnermi apeqqutit]

[Qupp. 12, 13-mi assiliartaq]

Utoqqaanertat ilagiinnilu kiffartortut najoqqutassiat Bibelimeersut naapertorlugit inoqutiminni paarsilluartariaqarput