Piffissamik eqqorluaasuuit?

AMERIKAMI kujallermi ilagiinni nakkutilliisoq kristumiu ajunngitsorpassuarnik pissuseqarpoq. Ikinngutaasali qaninnerit quiasaarlutik Harmagedonimik taasarpaat. Sooq? „Nalunngilarput takkutissasoq,“ oqartarput, „Guutilli kisimi nalunngilaa qaqugu!“

Aap, piffissamik eqqorluaasuunerput — imaluunniit taamaannginnerput — isigineqarnitsinnut sunniuteqartaqaaq. Kunngip silatuup Salomonip imatut assersuusiorpaa: „Niviukkap toqungasup tarnusiortup tarnusiaa tippatsissinnaavaa, taamatullu aamma sianiilliulaarneq ilisimassutsimit ataqqisaanermillu annerusumik malunniuttarpoq.“ (Nalunaajaasup oqaasii 10:1) Kristumiu ajunngitsorpassuarnik pissuseqarsinnaavoq, kisianni piffissamik nakkutilliilluanngitsuunerata ataqqinassusia tusaamasaalluassusialu aserortarpai.

„Inuit piffissamik eqqorluaasartut tatigaakka,“ nakkutilliisoq oqarpoq. „Taakkua suleqatigiumaneruvakka.“ Niuernerup iluanissaaq pingaartinneqartuupput. „Piffissaq eqqorlugu sulilertarit; ataatsimiinnernut piffissaq eqqorluarlugu aggertarit; nalunaarsuutit kingusinaarunnagit tunniuttakkit,“ taama atuagaq Emily Posts Etiquette (Emily Postip pissuserissaarnissamik ileqqussiai) siunnersuivoq. Atuakkami The New Etiquette-mi (1987) (Pissuserissaarnissamik ileqqussiat nutaat), allassimavoq ’inortuineq soqqusaatsuliornerusoq’. Atuakkiortullu nangipput: „Aammattaaq naalagiarnernut inortuisarneq naleqqutinngitsuuvoq.“

Allat piffissamik eqqorluaasuunerat piffissaminnillu pilersaarusiorluartarnerat tamatta pingaartittarparput. Apustili Paulusi taamaassimagunarami kristumiut Kolossæmiittut ima allaffigisimavai: ’Anersaakkut najorpassi tipaatsullunga peqqissaarnersi . . . malugigakku.’ (Kulorsamiut 2:5) Uaguttaaq Jehovap piffissat aalajangersarsimasani eqquutitissagai naatsorsuutigaarput. — Tussiaat 40:17; 70:5 .

 ’Guuti malinniarsiuk’

Jehova piffissamik eqqorluaasuujuaannarpoq. Piffissamik soqutiginnittuunera pinngortitaani tamani ersippoq. Silaannarsuarmit killeqanngitsumit uumassusilinnut minnerpaanut suut tamarmik nalunaaquttamit ersinngitsumit aqunneqartutut ipput. Assersuutigalugu immami naasut ilaat ataaseq sølilje-mik taaneqartoq Japanip eqqaani naasartoq ukiumut ataaseriarluni oktoberimi, ualikkut nalunaaquttaq pingasut missaani qaammatip nuisanissaata sisamararterutaata siullianni pingajuanniluunniit kinguaassiutiminik kaanngartitsisarpoq. Upernaakkut aalisagaaqqap grunionimik taaguutillip suaminik anitsinissani Californiap sineriaani uliguttornermit minuttialuit qaangiunnissaannut missingersortarpaa.

Aamma Jehovap neriorsuutimi naammassinissaannut eqqorluaasuuvoq. Soorlu 2 Moses 12:41-mi atuarsinnaagipput: „Ullormi Egyptenimut pinermik kingornagut ukiut 430-t qaangiuffianni [Jehovap] katersarpassui sakkulersorsimasut tamakkerlutik Egyptenimit anipput.“ Taamaalilluni Jehovap ukiut hundredellit arlallit tamatuma siornagut Abrahamimut neriorsuutigisimasani eqquutitissimaavaa. — 2 Moses 15:13-16; Galâsiamiut 3:17.

Jehovap ernini, Messias, pruffiitip Danielip ukiut 500-t sinnerlugit sioqqullugu siulittutigisimasaatut piffissaq eqqorlugu silarsuarmut aallartippaa, tassani ’nalliuffissaagut Kristusip iluaatsut toqussutigisinnaaniassammagit’. (Rûmamiut 5:6; Daniel 9:25) Aaqqissuussinerup maanna atuuttup naggatissaa pillugu Bibelip nalunaarpaa Jehovap ’ullussaq’ nalunngikkaa. (Matîuse 24:36) Kingusinaarnavianngilaq. Taamaattumik Jehovap eqqorluaaneq pillugu maligassiaa malissallugu pingaaruteqarpoq. — Evfisumiut 5:1.

„Piffissani aalajangersimasuni“

Jehovap kiffami piffissamik nakkutilliilluartuunissaannik ilimasuffigiuarsimavai, ingammik imminut pallorfiginninneranni. Israelikkut „ullut tamaasa“ pilliuteqartartussaasimapput. Jehovap ima peqqusimavai: „Piffissani aalajangersimasuni sassaassiffigisassavassinga pilliutinik uanga nerisassannik.“ Aammattaaq ataatsimiinnernut najoqqutassiaq imaattoq Mosesimut tunniussimavaa: „Inuit tamarmik ilinnut katersuuttassapput toqqup naapeqatigiittarfiup isaariaata killingani.“ — 3 Moses 23:37; 4 Moses 10:3; 28:2.

Oqaluttuarisaanermi kingusinnerusukkut juutit ’tipigissaatilliiffiup’ nalaani qinusimasut oqaatigineqarput. (Lukas 1:10) ’Qinusarfik nalunaaquttap akunnerisa arfineq-sisamaat’ juutinit allanillu maleruarneqarsimavoq. (apustilit suliait 3:1; 10:3, 4, 30) Kristumiuttaaq ataatsimiittarneri pillugit Paulus ima allappoq: „Tamatigut ippinnaatsumik torersumillu ilioritsi.“ — 1 Korintumiut 14:40, NV.

Tamakku tamarmik Israelikkut kristumiullu siulliit qanoq pisussaaffigilerpaat? Isumaqatigiissutitik piffissamik eqqorluaallutik naammassisassagaat, pingaartumik pallorfiginnernermut atatillugu. Pissutissaqanngilaq isumaqassalluni Jehovap kiffani ullumikkut minnerusumik ilimasuffigissagai.

Sooq ilaasa ajornakusoortittaraat

Nunarsuup immikkoortuini assigiinngitsuni piffissamik isiginneriaaseq assigiinngitsorujussuuvoq. Ajoqersuiartortitaq oqaluttuarpoq illoqarfeeqqami Amerikami kujallermiittumi, kristumiut ataatsimiinnerata aallartinnerani, erinarsuutip aallarniutissap normua taagaangamiuk ilaannikkut nuliani kisimi tusarnaartuusartoq. Erinarsuullu naggasiutissaq tikikkaangamiuk inuit 70-t najuussinnaasartut. Akerlianik nunami Europap kitaaniittumi inuit 1000-it missaaniittut ima aperineqarsimapput: „Arfineq-marlunut neriartoqquneqaruvit, 5-10 minutit tikillugit sioqqutillutit aggissavit, 5-10 minutit tikillugit inortuissavit imaluunniit nalunaaqutaq eqqorluarlugu aggissavit?“ Amerlanersaat akisimapput: „Pissuserissaarnerussaaq qaaqqusisumut ataqqinninneq takutissallugu piffissaq eqqorluarlugu takkunnikkut.“

Piffissamilli eqqorluaaneq inuit sumi najugaqarnertik naapertorlugu iluarinerusaannut apeqqutaaginnanngilaq. Ileqquliutiinnagassavoq, soorlu eqqiluinneq, torersuuneq pissuserinnerlu ileqquliutiinnagassaasut. Soorunami taamaattunik ileqqoqarneq inunnguuserinngilarput; sungiusagassaapput. Meeraanermiit piffissamik eqqorluaanermik ilinniartitaasimagaanni nuannaarutigisariaqarpoq. Amerlasuulli peroriartorsimapput piffissamik eqqorluaanermik  pingaartitsiffiunngitsumi annikitsuinnarmillu suliassatik allat peqatigalugit pilersaarusiortariaqartarsimallugit. Aatsaat kristumiut ilagiivinut ilanngukkamik oqaluussisalerlutillu piffissamik eqqorluaanissaq pisariaqartilersimavaat. Imaassinnaavoq meeraanerminniilli inortuisarneq ileqqoriinnagartik aaqqissallugu ajornakusoortikkaat. Taamaakkaluartoq Jehova Guutimut tullermullu asanninnerisa, allannguinissaannut kajungilersissinnaavaat. Kisianni sooq taamatut allannguineqassava?

Sooq piffissamik eqqorluaasariaqarneq

„Inuunerit asaviuk?“ Benjamin Franklin ilaanni aperivoq. „Taava piffissaq asiuteqinagu, piffissarmi inuuneruvoq.“ Qularnanngitsumik oqaaserisai taakkua tamatta isumaqatigaavut. Kristumiunut taamatuttaaq pingaaruteqartigisoq alla tassaavoq allat piffissaannik asiutitsiumannginneq. Ajoqersuiartortitaq oqarpoq: „Inortuisoq soorlulusooq oqartoq: „Uanga piffissara illit piffissannit pingaarneruvoq, taamaattumik uanga piareernissara illit utaqqisinnaavat.“ Piffissamik eqqorluaasuunngitsoq torinngitsuuginnarani tatigisassaanngitsuuginnaranilu kisianni aammattaaq namminissarsiortuusorinarpoq isumaalliortartuusorinarlunilu. Kristumiut ilumoortut ’saqitsaagajunnermit piunngitsumillu ataqqineqarumanermit piumanngillat, kisianni qanilaarlutik ilatik imminnit annerutinniarpaat’. — Filípimiut 2:3.

Suna tamarmi nalunaaquttamik aqunneqartumik inuunissaq inuit ilaasa immaqa kajungerinngilaat. Piffisamilli eqqorluaaneq nalunaaquttamik aqunneqarnermut tunnganngilaq. Imminut aqussinnaanermut tunngavoq — allat soqutigisaannik iluaqutissaannillu ataqqinninnikkut, ’kialuunnimmi namminissani pinnagu, kisianni allattaaq iluaqutissaat piniassavai’. — Filípimiut 2:4.

Bibelip nalaani, ullumikkutulli, imminnut naapittut ilassisarnerat nalinginnaavoq. (Matîuse 5:47; 28:9) Kisianni kristumiut ataatsimiinnerannut inortuiuaannartut asannittumik ilassinissaat ajornakusoortarpoq. Ataatsimiinnernut aggiaarnikkut asannittumik inussiarnersumillu pissuseqarnermut tapersiisoqarsinnaavoq, taava allat tikilluaqqusaasutut misigissapput. Tamannalu tamarmiullutik iluarusuutigissavaat. Aatsaat aggiaarnikkut erinarsuummut aallaqqaasiummut qinunermullu peqataalluartoqarsinnaavoq — ilagiinni ataasiussuseqarluta pallorfiginninnitta ilaa pingaarutilik. Ataatsimiinnerup ingerlanerani malinnaalluarsinnaanerussaaguttaaq ataatsimiinnerup aallartinnerani pineqartussat imaluunniit oqalugiaatissap qulequtaa atuarneqartoq tusarutsigu.

Piffissamik eqqorluaasuuguvit allat piffissartik pilersaarusiorsinnaavaat, tamatumalu kingunerissavaa naammassisaqarluarneq. Josuap sakkutuuvisalu illoqarfik Aj saassummassuk, sakkutuumi ilaat akeqqat illoqarfimmiit qimagutsinniarlugit aallartippai sakkutuumi sinneri illoqarfimmik tiguaasussatut terlinganeerissamaartillugit. Piffissami pingaarnerpaami Josua kalerriivoq. Sakkutuuvisalu ’naligaatini kivinniariarmagu tuaviinnaq nikutserlutik illoqarfimmut isaapput’ tigusaralugulu. Ataatsikkut iliuuseqarsimanngitsuuppata qanoq pisoqarsimasinnaanera takorloorsinnaaviuk? — Josva 8:6-8, 18, 19.

Ullumikkut kristumiut oqaluussisartut piffissamik nakkutiginninnissaminnut amerlasuunik pissutissaqarput. Allat ilagalugit Naalagaaffimmik oqaluussilluni peqataanermi, ataatsimeersuarnernut ataatsimiinnernullu pisassanik piareersarnermi, allaallu rigssalimi eqqiaanermi allanik suleqateqarnissaq pisariaqarpoq. Piffissamik eqqorluaasarnitsigut naammassisaqarnerusassaagut. Tamanna allaat annikitsutigut soorlu qaammatip naanerani oqaluussinermi piffissamik atorsimasamik nalunaaruteqarnermi atuuppoq. Tamarmik piffissaq eqqorlugu nalunaaruteqarpata, ilagiit silarsuarmilu qatanngutigiissutut peqatigiit suliarisimasaat eqqortut qiimmaallannartullu katersorneqarsinnaapput.

Piffissamik eqqorluaasuuneq isumaqatigiissutinik eqquutitsitsarneruvoq piffissarlu eqqorlugu takkuttarnerulluni. Isumaqatigiissutit ilaat allanit pingaarnerusarput. Soorlu katinneq piffissami aalajangikkami aallartittariaqartoq. Aapasumittaaq manniliorniaraanni piffissaq nakkutigilluartariaqarpoq. Piffissamik eqqorluaasuugaanni suliamiit suliamut arpasukaarneq — tamaasalu inortuiffigalugit —  pinngitsoorneqarsinnaavoq. Eqqissisimaneruvoq tamanillu nakkutiginnissinnaanerulluni. Ullup ingerlanissaa pilersaarusiorsimatillugu piffissarlu eqqorlugu immaqaluunniit siusinaalaarluni aallartissimagaanni naammassisaqarnarnerusarpoq.

Kristumiut piffissamik nakkutilliilluartuunissaannut pissutissarpassuaqarpoq. Tamanna pingaartumik kristumioqatinut asanninnermik namminissarsiunngitsumik takutitsinissamut Guutillu aqutsineranut tunngasunik iliuuserpassuarnut ataqqinninnermik takutitsinissamut periarfissaalluarpoq.

Kisianni pisariaqassappat qanoq piffissamik eqqorluaaneq ilikkarneqarsinnaava?

’Piffissat aalajangersakkat ilisimakkit’

„Allaat ungasorsuup aallarfissani tikiffissanilu nalusanngilai.“ Aap, qaqugukkut ingerlaalernissani nalunngilaa. Uniaaluk ima allaaserineqarsimavortaaq „aasami nerisassarsiortarpoq“ ukiornissaanut piareersimaniarluni. (Jeremia 8:7; Ussatit 6:8) Eqqorluaanerup suliassanillu isumannaarisarnerup isertugartaa tassaniippoq.

Uaguttaaq ’piffissavut aalajangersakkat ilisimasariaqarpavut’. Piffissamik nakkutiginnittariaqarpugut ajornakusoortitsinatali ingasaassinatalu. Sumik suliassaqarnerput piinnarnagu aamma qaqugu suliarissaneripput paasinissaa pisariaqartipparput. Pisussanik siumut takorluuineq ileqquliuttariaqarparput, kingusinaarsinnaanerit naatsorsuutigiitigalugit, suliattalu kipitinnissaat pingaarnerusunillu suliaqalernissaq piumassuseqarfigalugu — soorlu ataatsimiigiartarneq, kristumiutut oqaluussiartortarneq imaluunniit Guutip aqutsineranut tunngasunik allanik suliaqarnermi ilaaneq.

Tamanna eqqarsaatigalugu ilaqutariit suleqatigiinnissaat pingaartuuvoq. Amerlasuutigut uiusup nuliaminut meeqqat piareersarnissaat isumagitittarpaa. Taava kisimiilluni matu orneriarlugu tunummut suaarluni: „Tuaviorniaritsi, inortueqinaagut!“ Jakob taamaattuunngilaq; aallarnissamut piffissanngormat ’qitornani nulianilu qatigattuunut ingitippai’. — 1 Moses 31:17.

Qanorli ililluni ataataasup ilaquttani ikiorsinnaavai? Pingaartumik pisassaqaraangata piffissamik piareersarfissaannik inniminniisarnissaannik, piffissaq kingullerpaaq atornagu, meeqqani ilinniartissinnaavai. Meeqqat akisussaaffimmik sianiginnittunngortillugit suliassanillu ingerlaannaq naammassinninnermik pingaartitsisunngortillugit ilinniartinneqarsinnaapput. Piffissaq eqqorlugu piareernissaq pillugu assersuutit Bibelimeersut ilaqutariinni oqaloqatigiissutigisigik. (1 Moses 19:16; 2 Moses 12:11; Lúkarse 17:31) Qularnanngitsumik angajoqqaat namminneq maligassiuinerat ajoqersuutaasarpoq pitsaanerpaaq sunniuteqarnerpaarlu.

Kristumiut nakkutilliisut maligassiuinermikkut ilagiit aamma ikiorsinnaavaat. ’Ipinnaatsuugunik’ aatsaat toqqarneqarsinnaagamik. (1 Timûtiuse 3:2) Qatanngutit angutit arnallu utoqqaanertanik tikilluaqquneqassallutik nalunngikkunikku aggiaarnerusarnissaat ilimanarpoq. Taamaattumik nakkutillisut peqqissaarluartut ilagiit ikiorniarlugit aggiaarniartassapput. Ilagiinni kiffartortut qatanngutinik tikilluaqqusiumallutik kiffartuussiumallutillu aggiaarsimasut pingaartinneqartaqaat.

Soorunami piffissamik eqqorluaassagaanni imminut naalakkersorsinnaasariaqarpoq peqqussutinillu malinneqqissaarsinnaasariaqarluni. Sakkutuutulli eqqorluaaneq angunianngilarput, kristumioqatitsinnulli asanninneq guutimillu naalakkersugaalluni aaqqissuussinermik ataqqinninneq takutinniarparput. Inuttullu pissusertaariniakkatta tamanna ilagaat. (Kulorsamiut 3:10, 12) Pingaarnerpaatillugu Ataatarput qilammiusoq, Jehova Guuti, malikkusupparput, taassuma ilinniartippaatigut ’suut tamarmik aalajangersimasumik piffissaligaasut’. — Nalunaajaasup oqaasii 3:1. (wD 15/6 90)