Qinnutit suut Guutip tusartarpai?

„SILARSUARMIUT takorloorsinnaanngilaat qinunerup pissaaneranik pissuteqarsinnaasut qanoq amerlatiginersut.“ Taalliortoq tuluk Alfred Tennyson 1800-kkunni inuusimasoq taama oqarsimavoq. Inuppassuilli asuliinnaq peqqissuseq, pilluarneq, eqqissineq pisuussuserlu qinnutigisimavaat. Taamaattumik ilaat isumaqarput inuit qinugaangata Guuti tusarneq ajortoq. Bibelimili ’qinnutitsinnik tusartartoq’-mik taaneqarpoq. — Tussiaat 65:3.

Tamanna pissutigalugu ilaat immaqa aperiumassapput: ’Qinnutinik tusartartoq’ kinaava? Qinnutit tusarneqassappata suut naammassisariaqarpat? Qanoq ililluni qinusariaqarpa? Kikkullu qinnutaat akineqartarpat?

Qinnutiminnik tusarneqarsimasut ilaat

Inuit pinngortitsineqarneranniilli qinuneq ileqqorineqartuarsimavoq. Siuaasatta siulliit Adamikkut ernerisa ilaat, Abel, Guutimut akuerineqarsinnaasumik pilliuteqarami, qularnanngitsumik qinullunilu unnersiutiginnissimassaaq. — 1 Moses 4:1-5.

Ukiuni 800-kkunni ukiunik naatsorsuisarnitta aallartinnerata siornagut Guutip pruffiitia Jonas aalisakkamit iineqarami, „imarmiorsuup iluanit [Jehovamut] Guutiminut qinuvoq“. Qinnutaa tusarneqarpa? Aap, ’Jehovap peqqummani imarmiorsuup Jonas nunamut oriarpaa’. Jonasip taava suliassani naammassivaa Nineveliarlunilu. — Jona 2:1, 2, 10; 3:1-5.

Israelitoqqami akeqqaminit avatangerneqarami David ima torlulavoq: „[Jehova], tusaruk qinnutiga, tusaaniannga torlulaffigisaraangakkit, akinnga unneqqarissutsinni iluarsutsinnilu.“ (Tussiaat 143:1) Davidip aniguinissamik qinnutaa aamma akineqarpoq, akeraasami toqunniaraluarlugu iluatsinngitsuuippaat. Taamaattumik oqarsinnaasimavoq: „[Jehova] qanippoq torlorfigisiminut tamanut, tamanut ilumoorlutik imminut torlorfiginnittunut.“ — Tussiaat 145:18.

 Naammassisariaqakkat

Soorlu paasereeripput, Guutip kiffaasa qanga inuusimasut qinnutaat akineqartarsimapput. Qinusarnerat soorunami ileqqulersuutaannaasimanngilaq. Guuti ateqanngitsoq qinnuiginngilaat. Upperlutik Jehova, ’nunarsuarmi tamarmi qutsinnerussaartoq’, qinnuigisarpaat. (Tussiaat 83:18) Qinnutivut Guutimit akuerineqarsinnaassappata naammassisassat suut naammassineqaqqaartariaqarpat?

Jehova kisiat qinnuigiuk. Guutigisat ilumuunngitsut, uumassuseqanngitsut, oqalussinnanngitsut tusarsinnaanngitsulluunniit, malugissuseqanngitsut aalasinnaassuseqanngitsullu qinnuigalugit iluaqutaanngilaq — aap, Bibelimut naleqqutinngilaq. (Tussiaat 115:5-7; 1 Juánase 5:21) Guutigisat uumassuseqanngitsut tamakku pisinnaanngisaannik Jehova iliuuseqarluni akuliuttarpoq imminut kiffaasut asannittullu ikiorniarlugit. Ukiut hundredelippassuit matuma siorna pruffiitit Ba’alisiortut ilaasa guutertik qinnuigaat innermik qilammingaanniit nakkaatitseqqullugu. Naalli ullaamiit unnussuarmut torlorfigineqaraluarluni Ba’al akineq saperpoq. Tamatuma kingorna Eliasip Jehova qinnuigaa, taassumalu akilluni qilammit inneq nakkaatippaa pilliutissamik pillivimmiittumik nungullugu ikuallatsitsisumik. — 1 Kunnginik allakkat kapitali 18.

Taamaallaat Jesus Kristus aqqutigalugu Guuti qinnuigiuk. Jehova Guutip ernitui, Jesus Kristus, nunamut aallartippaa utertitsissutissatut kiffartuussisinnaaqqullugu inuiaallu ajortimit toqumillu uterteqqullugit. (Juánase 3:16, 36; Rûmamiut 5:12; 6:23) Pilliummik tamatuminnga ilassinnittut taamani qinunermikkut Guuti nutaamik qanilliartorfigissavaat. Guutip kiffaasa qanga inuusimasut, soorlu assersuutigalugu tussiaasiortup Davidip, toqqaannartumik Jehova qinnuigisarpaat. (Tussiaat 4:2; 17:1; 55:2; 102:2) Maannakkulli Jesus aqqutigalugu qinusariaqalerput, taanna oqarmat: „Allakkut Ataatamut pisoqarsinnaanngilaq, uakkut kisianni. Sumik atikkut qinugussi taamaaliorumaarpunga.“ (Juánase 14:6, 14) Bibelimi allassimanngivippoq Guuti allakkut qinnuigineqassasoq.

Jesusip aqqani Guuti qinnuigineqartariaqartoq paasereerutsigu, taamaaliornitsigut aatsaat qinnutivut akineqassapput. Aammali allat pissutigalugit qinnutit amerlanersaat Guutimit akineqarneq ajorput.

Sooq Guuti tusanngitsoq

Guutip qinnutivut tusarnavianngilai qinutilluta timikkut aalajangersimasumik pissusilersuuteqarnerput pissutigiinnarlugu. Bibelimi allassimanngilaq qinutilluta timikkut aalajangersimasumik pissusilersuuteqartariaqartugut. Seeqqumiarneq tassaasinnaagaluarpoq Guutimut maniguussusermik ersiut. Aammattaarli nikorfalluta, nerrivimmi issiatilluta, siniffitsinni innangalluta imaluunniit ulluinnarni suliassaqartilluta qinusinnaavugut. (Daniel 6:10, 11; Mákorse 11:25) Jehovap aamma nipaqanngitsumik qinnutigisat akisarpai. Nehemiasip Jerusalemip qarmai aserornikut qarmaqqikkiortorusullugit Persiamiut kunngiannut oqanngitsiarnermini ’qilaap Guutianut qinuvoq’, Jehovallu qinnut tamanna akivaa. (Nehemja 2:1-6) Timikkulli pissusilersuuteqarneq pingaaruteqanngippat, sooq Guutip qinnutit taama amerlatigisut akissanngilai?

Guutiitsup qinnutaa Jehovap nuannarinngilaa. Aap, „tusaajumanngitsup inatsisinillu maleruaajumanngitsup qinnutaa allaat maajunnartuuvoq“. (Ussatit 28:9) Pruffiiti Esajas aqqutigalugu Guutip innuttani naalatseriitsut oqarfigai: „Qinuniarlusi assasi isaakkaluarussigit isikka matussavakka, qanorluunniit qinutigigaluarussi tusassanngilassi assasi aammik ulikkaarmata.“ (Jesaja 1:15) Guutiitsut qinnutaat soorunami akineqassanngillat, immaqa Kristus aqqutigalugu Guuti qinnuigineqaraluarpalluunniit.

Guutip ilumoortuusaarniartunit qinnutit tusarneq ajorpai. ’Qinusaraangavit,’ Jesus oqarpoq, ’ilumoortuusaarniartutut issanngilatit; taakku qinujumallaaraat naalagiartarfinni illullu akornisa katinnerini qeqarlutik inunnut malugeqqullutik. Ilumut oqarfigaassi: Akissarsiassaraluartik pereerpaat.’ Jesus nangilluni oqarpoq: ’Illilli qinusaraangavit,  ininnguannut iserit matualu matullugu, Ataatallu isertortumiittoq qinnuiguuk. Taava Ataatavit isertortumut isigisup akilissavaatit.’ (Matîuse 6:5, 6) Tamatumuuna Jesus isumaqanngilaq inuit takkuanni qinuneq eqqunngitsuusoq, namminermi allat takkuanni nipituumik qinusarpoq. (Matîuse 14:19) Uparuarpaali allanit takuneqarniaannarluni, tusarneqarniaannarluni nersorneqarniaannarlunilu qinuneq eqqunngitsuusoq.

Jehovap qinnutit tulleriiaarlugit taaguinnarneqartut tusarneq ajorpai. Jesus oqarsimavoq: ’Qinusaraangassili oqaatsisi Guutimik nalusutut amerlanaassanngilasi, taakku amerlasuunik oqaaseqaraangamik tusarneqassasorisarmata. Taamaattumik taakkunatut iliussanngilasi, Ataatassi ajorsaatisi ilisimammagit qinnuiginngikkallartilluni.’ (Matîuse 6:7, 8) Kangiamiut amerlasuut isumaqarput qinunermi kaavittuliaq (ulamertoq qinnutinik allassimasunik imalik) kaajallatsikkaangamikku, qinnutit uteqqinneqartartut. Allat millionilikkuutaat qinunermi ujammit atortarpaat imaluunniit atuakkamit qinnutinik imalimmit atuffassisarlutik. Guutimilli tusarneqarniartut qinugaangamik uteqqattaariinnartussaanngillat. Jesusip ajoqersuussinera imaattoq malugisariaqarpaat:

’Ima qinussaasi’

Jesusip nangilluni ajoqersukkani ilinniartippai qinnummik najoqqutassaasumik taaneqartartumik. (Matîuse 6:9-13) Ima oqarpoq: ’Taamaattumik ima qinussaasi: „Ataatarput qilammiusutit, aqqit illernarsili.“’ Guutip „Ataatarput“-mik taaneqarneratigut takutinneqarpoq aamma allat taassumunnga qanittumik attaveqartut ilaqutariiusutullu taassuminnga pallorfiginnittuusut. Guutip aqqata, Jehovap, illernarsisinneqarnissaa pingaartorujussuuvoq. Qanorli ililluni illernarsisissavaa? Guutiitsut piuneerukkunigit aterminik kanngunarsaaneq tamaat piissavaa. — Hesekiel 38:23.

Tamatuma kingorna Jesus nangippoq: „Naalagaaffiit tikiulli; peqqusat qilammisut nunamissaaq pili.“ Guutip naalakkersuinerata, ernermi naalagaaffianit Messiasikkoortumit ingerlanneqartup, erniinnaq Guutip kisimi oqartussaaneranik assortuisut ajugaaffigissavai nunarsuarmillu piissallugit. (Daniel 2:44) Guutilli peqqusaata qilammisut nunami pinissaa qinnutigigatsigu qanoq paasisariaqarpa? Tassaavoq Jehovap nunarsuarmik siunertarisaata naammassinissaanik assortuisuisalu peernissaanik qinnut. — sarĸúmersitat 16:14-16; 19:11-21.

Tassami Jesusip najoqqutassaasumik qinnutaani Guutip siunertaa aqqatalu illernarsisinneqarnera siulliullugit eqqartorneqarput. Taava nangippoq: ’Inuutissatsinnik ullumi tunisigut.’ Jehova qinnuigineqarmat pisariaqartitat ’ullumi’ pissarsiareqqullugit, takuneqarsinnaavoq qinusup upperigaa taassuma pallorfiginnitsimi ulluinnarni pisariaqartitaat isumagisinnaagai. Taanna namminissarsiorluni pisuunngornissamik qinnutaanngilaq.

Jesus ilanngussivoq: ’Akiitsukkatsinnillu isumakkeerfigitigut, soorlu uaguttaaq akiitsortivut isumakkeerfigigivut.’ (Lúkarse 11:4-mi takutinneqarpoq ’akiitsukkat’ tamakku tassaasut ’ajortit’.) Uatsinnut ajortuliortut isumakkeerfigigutsigik aatsaat Guutimit isumakkeerfigineqarsinnaavugut. (Matîuse 6:14, 15) Apustili Paulus naleqqulluartumik ima allassimavoq: ’Soorlu [Jehovap, NV] isumakkeerfigigaasi, taamaattaaq ilissi pigitsi.’ — Kulorsamiut 3:13.

Qinnut najoqqutassaasoq taanna naggaserlugu Jesus oqarpoq: ’Ussernartumut pisinnata; ajortumilli annaatsigut.’ Jehovap inuit ajortumik ’ussertanngilai’. (Jâko 1:13) Ussiinerit ajortumit, Satan Diaavulumit, pisarput. Jehovalli akuersineratigut pisoqartarnera ilaatigut Bibelimi eqqartorneqartarpoq, soorlumi taanna tamatuminnga pisoqartitsisuusoq. (Rut 1:20, 21; Nalunaajaasup oqaasii 7:13) Qinnut: ’Ussernartumut pisinnata,“ akillugu Jehovap kiffani aalajaatsut qimattanngilai, naak usserneqarnerat akuerisaraluarlugu. ’Guuti ilumoorpoq; taassuma artukkassinnik ussersinnavianngilaasi, kisianni aniguinissaq ussernartumut aappiullugu pinngortissavaa ilissinnut artornarunnaarsillugu.’ — 1 Korintumiut 10:13.

Ajortumit aniguisinneqarnissarput qinnutigigaangatsigu, Jehovamik pallorfiginnittutut  aalajaatsutut Diaavulumit ajugaaffigineqaqqunata qinusarpugut. Guutimut ilumoorluta kiffaajuarutta, qinnutivut taamaattut akiumaarai tatigisinnaavarput, apustilimi Peter allassimavoq: ’[Jehovap, NV] mianerinnitsinni ussernartumit annaanneq nalussanngilai.’ (2 Pîtruse 2:9) Qinnutip najoqqutassaasup ilaa tamanna pingaartuuvoq, Satan Diiaavulu ’liivertut uiannisaartutut angalasarmat iisassarsiorluni’! — 1 Pîtruse 5:8.

Qinnutit Guutip tusartagai

Jehovap pallorfiginnitsimi aalajaatsut qinnutaat akisarpai. Sooq? Jesus Kristus kisiat aqqutigalugu qinnuigisarmanni. Ajortoq uumigisarpaat aammalu ilumoortuusaarlutik alanngaarlugillu ilikkakkaminnik qinussanatik. Jehovamut nalunaajaasut najoqqutassaasumik qinnutip oqaasii tulleriiaarlugit uteqqataaginnartanngilaat, kisianni eqqarsaatit tunngavigisai naapertorlugit uummatimikkut Guuti qinnuigisarpaat. Aammali allat pissutigalugit qinnutaat akineqartarput.

Qinnutit akineqassappata piumasarisat tunngaviusut naammassineqartariaqarput. Paulus allassimavoq: ’Guutimut orniguttup upperisassarimmagu tassaasoq, ujarlersinilu akilerumaarai.’ (Eprîarit 11:6) Tunngaviusut marluk uku malugisariaqarpavut: (1) Guuteqarneranik upperinnittut qinnutaat taavalu (2) imminik ’ujarlertut’ qinnutaat Jehovap akisarpai.

Korneliusip, juutiunngitsup Guutimik mianerinnittup ukiuni hundredelinni siullerni inuusimasup, piumasarisat tamakku naammassivai. Guuti upperalugu ilungersorluni ujarpaa. Eqqorluartumik ilisimasaqalerami Kornelius qanoq iliorpa? Uummatikkut iluunngarluni Guutimut tunniulluinnarpoq, tunniulluinnarsimaninilu ersersikkumallugu kuisilluni. Tamatuma kingorna Kornelius Guutimut qanittumik attaveqalinnguatsiarpoq, tamannalu qinnutaanut ajunngitsumik sunniuttarpoq. — apustilit suliait 10:1-44.

Kuisimanngikkallarami Korneliusip qinnutai ’pavunga pipput Guutip saani eqqaaneqarlutik’. (apustilit suliait 10:4) Jesusilli utertitsissummik pilliutaaneranut uppernini tunngavigalugu Guutimut tunniulluinnarluni kuisikkami, Kornelius Jehovamut tunniutiinnavippoq. Tamatumuuna Guuti angullu taanna Guutimik mianerinnittoq tupinnangaartumik qanittumillu attaveqaqatigiilerput — Korneliusip akornutissaqarani Guutimut qinusinnaalerneranik kinguneqartumik. (Jâko 4:8) Kristus Jesus aqqutigalugu Ataatani qilammiusoq saaffigisinnaavaa tusarneqarnissani ilimagalugu. Kristus aqqutigalugu Guutimut tunniulluinnarlutik kuisittut tamarmik tamatuminnga pisinnaatitaaffeqalertarput piumasamillu akornutissaqaratillu Guuti qinnuigisinnaalertarlugu.

Kissaatigigunarpat Guutip qinnutitit akissagai. Suli pallorfiginnittuisa ilaattut tunniulluinnarfigalugu Jehova kiffartuutilersimanngikkukku, silatusaassaatit ilungersorlutit ujarnialerukka. Korneliusip maligassiaa maleruariaruk. Taava Guutip qinnutitittaaq tusassavai. (wD 15/1 90)

[Qupp. 6-mi assiliartaq]

Korneliusip qinnutaanut atatillugit tunniulluinnarneq kuisinnerlu qanoq pingaaruteqartigaat?