Jesusip inuunera ajoqersuineralu

Ajoqersugaanut najoqqutassiat qutsissut

UPPERISARSIORNIKKUT pisortat Jesus Guutip inatsisaanik unioqqutitsisutut isigaat, toqutaanissaalu allaat pilersaarutigaat. Taamaattumik Jesus qaqqami oqaluutsimini ima nangippoq: „Isumaqassanngilasi inatsisilluunniit pruffiitilluunniit atorunnaarsissallugit tikiuttunga; atorunnaarsitsiartunngilanga, naammassisitsiartorpunga.“

Guutip inatsisai Jesusip pingaarteqai, allallu taamaaliornissaannik kajumissaarlugit, oqarluni: „Inassutit tamakkua minnerit ilaannik atorunnaarsitsisoq inunnillu taama ajoqersuisoq Qilammiup Naalagaaffiani minnermik taaneqassaaq,“ tassa inuup taamaattup Naalagaaffik iserfiginavianngilaa.

Guutip inatsisai Jesusip asissunngilai, allaalli eqqarsariaaseq tamakkuninnga unioqqutitsinermik kinguneqarsinnaasoq avoqqaaraa. Inatsisit ilaat innersuussutigaa: „Inuassanngilatit.“ Nangillunilu oqarpoq: „Uangali oqarfigaassi: kinaluunniit qatanngumminut patsiseqarani [kamattuartoq, NV] eqqartuussummik pillagassaavoq.“

Tullimut kamattuarneq navianartuuvoq — inuarnermimmi kinguneqarsinnaavoq. Taamaattumik Jesusip assersuusiorluni takutippaa eqqissinissap anguniarnissaa qanoq ilungersuutigineqartariaqartigisoq. Oqarpoq: „Tunissutissat tunisivimmi pilliutigiartorukku, tassanilu eqqaaleruit qatannguppit sumik patsiseqarfigigaatit, taava tunissutissat tunisiviup saanut qimallugu qatanngutit saammarsariartoqqaarallaak, kingornalu tunissutissat pilliutigiartoruk!“

Taavalu Jesusip inatsisit arfineq-aappaat uparuarpaa, oqarluni: „Tusarpusi siulliit ima oqarfigineqarmata: ’Arnaaneqassanngilatit’.“ Allasiornermulli kukkusumik isumaqarfiginnittuarneq allaat Jesusip avoqqaaraa. „Uangali oqarfigaassi: pileritsaallugu arnamut isigisup uummammigut arnaanerereerpaa.“

Jesusip pisaa tassaanngilaq kanngunartumik eqqarsallatsiarneq, kisianni ’pileritsaallugu arnamut isigiuarneq’. Kipisuitsumik taamaalioraanni pilerissuseq, periarfissaqalerpat allasiornermik kinguneqarsinnaasoq, pilissaaq. Tamanna qanoq ililluni pinngitsoortinneqarsinnaava? Assersuusioqqilluni Jesusip piareersimaneq annertooq pisariaqarsinnaasoq oqaatigaa: „Isivit talerpilliup aserorsaaqqajarpatit, peeruk igillugulu, . . . Assavit talerpilliit aserorsaaqqajarpatsit, kipikkit igillugillu.“

Avatit ilaata ajoquteqartup peerneqarnissaa amerlanertigut akuerineqartarpoq, taamaalilluni inuuneq annaanneqarsinnaappat. Jesusilli oqaasii naapertorlugit eqqarsaatit iliuutsillu kanngunartut pinngitsoortinniarlugit suulluunniit peerneqarnissaa  pingaarneroqaaq — isitut assattulluunniit pingaartigisorinaraluarpalluunniit. Jesus nassuiaavoq, taamaaliunngitsoq Gehennamut (eqqaavissuarmut ikumasumut Jerusalemip avataannittumut), naassaanngitsumik suujunnaarsitaanermut assersuutaasumut, iginneqassasoq.

Jesusip aamma eqqartorpaa ajoqusiisut narrunarsaasullu qanoq iliorfigineqassasut. „Oqarfigaassi ajortuliorfigisissinnut akersuuteqqunasi,“ siunnersuivoq. „Kisianni kialuunniit ulussakkut talerpillikkut [isappatit] illuattaaq maniuk.“ Jesus isumaqanngilaq saassunneqaraanni imminut ilaquttanilluunniit illersuisariaqanngitsoq. Isatsinikkut timikkut ajoqusiinissaq siunertarineqartanngilaq ajuallatsitsinissarli siunertarineqartarluni. Jesusip pisaa tassaavoq toqqaannartumik isatsinikkut imaluunniit kamassaarilluni oqaaseqarnikkut paanissaq oqqannisarluunniit siunertaralugu puffassaariniartoqarpat akisinissaq kukkusuusoq.

Tullermik asanninnissamik Guutip inatsisaa Jesusip innersuussutigereeramiuk nangippoq: „Uangali oqarfigaassi: Qinngarsortisi asaniarsigik; ilissinnik innarliisut qinuginnittullu qinnussigik.“ Taamaaliornissarput pissutissaqarluarpoq, soorlu Jesusip nangilluni takutikkaa: „Qitornareqqullusi Ataatassinnut qilammiusumut; taassumami seqerni ajortunut ajunngitsunullu nueqqusarpaa.“

Ima oqaaqqissaarilluni Jesusip oqaluutsimi ilaa tamanna naggaserpaa: „Taamaattumik iluarluinnaritsi, soorlu Ataatarsi qilammiusoq iluarluinnartoq.“ Jesus isumaqanngilaq naammalluinnartuusariaqartugut, kisianni Guuti assigalugu asanninnerput annerulersissagipput qinngarsortivut allaat asalerlutigik. Jesusip oqaasii Lukasip ima issuarpai: „Nallittuigitsi, soorluttaaq Ataatarsi nallittuisoq.“ Mattæus 5:17-48; Lukas 6:36. (wD 15/10 86)

◆ Jesusip qanoq ililluni Guutip inatsisai ataqqingaarpai?

◆ Inuarnermut allasiornermullu pissutissat peerneqarnissaat pillugu Jesus qanoq unnersuussiva?

◆ Ulussat illuata maninissaa qanoq paasisariaqarpa?

◆ Qanoq ililluta Guutisut iluarluinnarsinnaavugut?