’Akisuumik pisiarineqarpusi’
’Akisuumik pisiarineqarpusi’
’Akisuumik pisiarineqarpusi; taamaattumik Guuti timissigut naalannartissiuk.’ — 1 KORINTUMIUT 6:20.
1, 2. (a) Qanoq ililluni ’toqumit aniguiffissaq’ pilersinneqarsimava? (b) Kristusip pilliutaa qanoq ililluni inatsisitigut atorsinnaatitaalerpa, qanorlu ililluni qangalu tamanna siumut assersuutigineqarsimava?
„GUUTI Guutiuvoq annatsitsisartoq,“ tussiaasiortoq oqarsimavoq. „[Jehovami] Guutitsinni toqumit aniguiffissaqarpoq.“ (Tussiaat 68:21) ’Aniguiffissaq’ tamanna Jesus Kristusip pilliutaatigut pilersinneqarpoq. Pilliulli tamanna inatsisitigut atorsinnaatitaassappat Kristus nammineq Guutimut sassartariaqarpoq.
2 Tamanna siumut assersuutigineqarpoq palasiunerup ullormi saammaannartitsivimmi Illernarnerpaamut isertarneratigut. (3 Moses 16:12-15) Kisianni soorlu apustili Paulus allassimasoq: ’Kristus palasiunertut tikiukkami . . . savaasat norraallu aavinik pinnani, namminerli aamminik isissuteqarluni illernartuummut iserpoq ataasiarluni utertitsissummillu naassaanngitsumik pissarsiaqarluni. Kristusimi illernartuummut assannik sanasimasumut piviusup tarraanut isinngilaq, kisianni qilammut iserpoq Guutip kiinaata saanut pilluta sassartarumalluni.’ — Eprîarit 9:11, 12, 24.
Aap kimia
3. (a) Jehovamik pallorfiginnittut aak qanoq isigaat, sooq? (b) Sukkut paasineqarsinnaava aak inatsisit tungaannit isigalugu ajortinik saammanneqaataasinnaasoq?
3 Kristusip aava annannissatsinnut qanoq pingaaruteqarpa? Noap nalaanilli Guutimik pallorfiginnittut ilumoortut aak illernartutut isigisimavaat. (1 Moses 9:4-6) Aak uumassutinut ima attuumassuteqartigimmat Bibelimi oqaatigineqarpoq ’pinngortitap uumassutaa [imaluunniit tarninga] aammiittoq’. (3 Moses 17:11) Taamaattumik Mosesip inatsisaani piumasarineqarpoq uumasut pilliutit aavi Jehovap kiinaata saani kuineqartassasut. Aammattaaq aak pilliiviup nassuusartaanut tagiunneqartarsimavoq. Ersarippoq pilliutip saammaannartitsissutitaa aammiimmat. (3 Moses 8:15; 9:9) ’Suut tamangajammik inatsisit naapertorlugit aammik minguersarneqartarput, ajortillu isumakkeerneqartarinngillat kisianni aammik kuisilluni.’ — Eprîarit 9:22.
4. (a) Aammik atuinermik Guutip killilersuinera sumik siunertaqarpa? (b) Jesusip toqunera qanoq ililluni immikkut ittuua?
4 Taamaattumik tupinnarpallaanngilaq aammik atuinerlunneq sunaluunniit Mosesip inatsisaasa atuunnerata nalaani toqumik pillarneqarnermik kinguneqartarsimammat! (3 Moses 17:10) Naluneqanngilaq sunaluunniit qaqutigoortoq imaluunniit atorneqarnissaminut annertuumik killilersugaasoq nalimigut qaffakkiartortarmat. Aammik atuineq pillugu Jehovap sukangasumik nakkutilliineratigut aap nalissaqanngitsuusutut nalinginnaanngitsumillu naleqartuusutut isigineqarnissaa qulakkeerneqarpoq. (apustilit suliáinik agdlagkat 15:29; Eprîarit 10:29) Kristusip aavanik siunertaasoq qutsingaartoq tamatuminnga pissuteqarluinnarpoq. Taamaattumillu Kristus toqutaavoq aammi kuissutigilluinnagaanik. Tassa paasivarput Kristusip inuttut timini pilliutigiinnarsimanngikkaa, aammattaarli tarnini kuisimagaa, inuttut naammalluinnartutut inuunini pilliutigisimagaa! (Jesaja 53:12) Naammalluinnanngitsuunnginnini pissutigalugu Kristusip inuusinnaatitaanini annaasimannginnamiuk, aava kuisaq ima naleqartigaaq inuiaat ajortaannik saammaassissutissatut Guutimut sassaanneqarsinnaasimalluni.
5. (a) Kristusip qilammut suna nassarpaa, sooq? (b) Sukkut paasineqarsinnaava Kristusip pilliutaa Guutip ilassigaa?
5 Kristusip aavini qilammut nassarsinnaasimanngilaa. (1 Korintumiut 15:50) Aamminut sinniisaasoq nassarsimavaa: inuttut inuunerminik naammalluinnartumik pilliutimi inatsisitigut nalinga. Inuuneq tamanna inuiaat ajortaannik utertitsissutissatut pissusissaq eqqorlugu Guutip saavanut sassaassinnaasimavaa. Pilliummik tamatuminnga Jehovap ilassinninnera ukiumi 33-mi piinsip ulluani uppernarsarneqarpoq, anersaaq illernartoq Jesusip ajoqersugaanut 120-nit amerlanerusunut Jerusalemimi kuineqarmat. (apustilit suliáinik agdlagkat 2:1-4) Iluamik oqaatigissagaanni, inuiaat utertitsitani Jesusip pigilerpai. (Galâsiamiut 3:13; 4:5; 2 Pîtruse 2:1) Tamatuma kingunerisaanik inuiaat utertitsissummik iluaqutiginnissinnaalerput.
Utertitsissutip pilluaqqussutissartai siulliit
6. Inuiaat pilliutip utertitsissutip nalinganik iluaqutiginnissinnaaqqullugit Guuti qanoq aaqqissuussisimava?
6 Imaanngilarli inuiaat timikkut ingerlaannaq naammalluinnartunngortinneqassasut, tassami inuttut ajortilittut pissuseq ajugaaffigineqartinnagu tamanna ajornarpoq. (Rûmamiut 7:18-24) Taamaattumik apeqqutaalerpoq qanoq ililluni qaqugulu ajorti ajugaaffigineqassanersoq? Tamatumunnga atatillugu Guuti siullermik 144.000-it qilammi Kristus Jesus ilagalugu ’kunngiullutillu palasiusut Guutimut, nunamut kunngiulernissaannik’ aaqqissuussivoq. (sarĸúmersitat 5:9, 10; 7:4; 14:1-3) Taakku aqqutigalugit utertitsissutip pilluaqqussutissartaanik ukiut 1000-it ingerlaneranni inuiaat iluaqutiginnikkiartuaassapput. — 1 Korintumiut 15:24-26; sarĸúmersitat 21:3, 4.
7. (a) Angerusisaaq suua, kikkut angeqataappat, sumillu siunertaqarpa? (b) Angerusisaap atuutilersinnaanissaanut sooq inuup inuuneranik pilliuteqartoqartariaqarsimava, tamatumunngalu atatillugu Kristusip aava qanoq pingaaruteqartigaa?
7 Tamatuma pinnginnerani kunngiullutillu palasiusussat 144.000-iusut ’inunnit immikkoortillugit pisiarineqassapput’. (sarĸúmersitat 14:4) ’Angerusisaaq’, anersaakkut Israelimut Guutip pianut ilaasut palasitut kunngitullu sulinissaannik Guutip taakkuninnga isumaqatigiissutaa, ikiortigalugu tamanna naammassineqassaaq. (Jeremia 31:31-34; Galâsiamiut 6:16; Eprîarit 8:6-13; 1 Pîtruse 2:9) Qanorli ililluni Guutip inuillu naammalluinnanngitsut akornanni angerutsimik pilersitsisoqarsinnaagami? Paulus nassuiaavoq: ’Tastamanteqaraangammi tastamantimik peqqusisup toqunera nalunarunnaarsinneqassavoq, toqusoqartillugu aatsaat tastamanti aalajangersarmat, tastamantimillu peqqusisoq suli inuutillugu atussanani.’ — Eprîarit 9:16, 17.
8, 9. Utertitsissut angerusisaarlu qanoq imminnut atassuteqarpat?
8 Taamaalilluni pilliut utertitsissut angerusisaamut Jesusip akunnermiliuttuuffigisaanut tunngaviuvoq. Paulus allassimavoq: ’Guuti ataasiuvoq, ataasiuvortaaq Guutimullu inunnullu akunnermiliuttoq, tassa inuk Kristus Jesus; taanna imminik tunniuppoq tamarmik [angeqataasumik, NV] utertitaassutissaannik, piffissakkut nalunaajaataassalluni.’ (1 Timûtiuse 2:5, 6) Tamanna ingammik 144.000-inut, angerusisaamik pilersitseqatigineqartunut, tunngavoq.
9 Uumasup aava pilliutitut kuineqarmat aatsaat Guutip Israelikkunnut angerusaa inatsisitigut atortuulersinneqarsimavoq. (Eprîarit 9:18-21) Taamatuttaaq Kristusip ’aava angerusaasoq’ kuineqarmat aatsaat angerusisaaq atuutilersinnaasimavoq. (Matîuse 26:28; Lúkarse 22:20) Kristus, palasiunerullunilu ’angerusisaamut akunnermiliuttuusoq’, aqqutigalugu Guutip angerusisaamut ilaatinneqartut suli naammalluinnanngitsuullutik inuutillugit inatsisitigut naapertuilluartutut nalunaarutiginerisigut Jesusip aavata nalinga taakkununnga atorpaa. (Eprîarit 9:15; Rûmamiut 3:24; 8:1, 2) Tamatuma kingorna angerusisaamut Guutip ilaatissinnaalerpai, qilammi kunngitut palasitullu sulisussanngortillugit. Taakku Guutimut minguitsumik attaveqartuaannarnissaannik Jesusip akunnermiliuttutut palasiunerusutullu ikiorpai. — Eprîarit 2:16; 1 Juánase 2:1, 2.
Nunami katersorneqarput
10, 11. (a) Qanoq ililluni utertitsissut kristumiunut tanitanuinnaanngitsoq allanuttaarli pingaaruteqarpa? (b) ’Amerlangaartut’ kikkuuppat, qanorlu ittumik Guutimut attaveqarpat?
10 Kristumiut tanitat kisimik utertitsissutikkut aniguisinneqarlutillu ajortiminnik isumakkeerfigineqassappat? Naamik, soorlu Kulorsamiunut allakkat 1:14, 20-mi ersersinneqartoq, Guutip suut tamaasa imminut saammaannartippai aak qisummi naalliutsitsivimmi kuineqartoq aqqutigalugu eqqissivissiornermigut. Tamatumani eqqarsaatigineqarput qilammiittut (144.000-it) nunamiittullu. Kingulliit tassaapput inuit nunami paratiisiusumi naammalluinnarlutik naassaanngitsumik inuunissaminnik neriugisallit. Ingammik 1935-miit inuit taakku katersorniarlugit annertuumik suliniartoqarsimavoq. Taakku sarĸúmersitat 7:9-17-imi ’amerlangaartutut’ Guutimit Savaaqqamillu annaanneqartutut eqqartorneqarput. Siullermilli ’annikilliornartumi angisuumi’ aniguisariaqarput ’imermillu puilasunut inuunerup piinut’ siulersortittuartariaqarlutik, tassami sarĸúmersitat 20:5-imi ersersinneqarpoq ukiut tuusintit Kristusip aqutsiffigisaasa naaneranni aatsaat inuttut naammalluinnartutut iluamik oqaatigalugu inuulivissasut. Tamatuma kingorna inuttut naammalluinnartutut naggataarutaasumik misilinneqarnerminni aniguisut naapertuilluartutut nalunaarutigineqassapput nunamilu inuuneq naassaanngitsoq angussallugu. — sarĸúmersitat 20:7, 8.
11 Kisianni amerlangaartut ’atisatik takisuut savaaqqap aavanik errorlugit ilaatigut qaqorsareersimavaat’. (sarĸúmersitat 7:14) Naak taakkununngaanngitsoq Kristus angerusisaami akunnermiliuttuugaluartoq, Guutip naalagaaffiata naammassisai aqqutigalugit angerusisaamik iluaqutiginnipput. Kristusili taakkununngattaaq palasiuneruvoq, taannalu aqqutigalugu utertitsissutip nalinganik Jehova atuisinnaavoq atuissallunilu, taamaalilluni maanna Guutip ikinngutaasut naapertuilluartutut nalunaarutigisinnaalerlugit. (Naleqqiuguk Jâko 2:23.) Ukiut tuusintit taakku ingerlaneranni ’aserujasup kiffaasut kiffaajunnaarsikkiartuaarneqassaapput’, naggataatigullu ’Guutip qitornaasa kiffaanngissusiata naalannaataat pigilerlugu’. — Rûmamiut 8:21.
12. Suna tunngavigalugu Guutip inuit aalajaatsut kristumiussuseq sioqqullugu inuusut sammisimavai?
12 Amerlangaartut Guutimut attaveqarnerat eqqarsaatigalugu, Guutip kiffaanit kristumiussuseq sioqqullugu inuusimasunit allaanerusumik inissisimasorinarsinnaapput. Kiffanili itsaq inuusut Guutip isumassugarisimavai siunissami utertitsissutissamik aaqqissuussinissani siunertaralugu. (Rûmamiut 3:25, 26) Ajortaannik utaqqiisaannaasumillusooq isumakkeerfigisimavai. (Tussiaat 32:1, 2) Uumasunik pilliutitigut ’ajortinik misigisaqarunnaarsilluinnarneqanngillat’, akerlianilli ’ajortinik eqqaasinneqartarput’. — Eprîarit 10:1-3.
13. Kristumiussuseq sioqqullugu Guutimut kiffaasut atugarinngisaannik uagut ullumikkut qanoq atugaqarpugut?
13 Ullumikkut kristumiut ilumoortut eqqarsaatigalugit allaalluinnarpoq. Taakku utertitsissut akilerneqareersimasoq tunngavigalugu Guutimut pallorfiginnipput! Palasiunertik aqqutigalugu ’siooranatik sassarput saammaassisup issiavissaarsuanut’. (Eprîarit 4:14-16) Guutimit saammaanneqarneq siunissami pisussatut isiginngilaat, misigisimalereerpaalli! (2 Korintumiut 5:20) Ajortiminnik isumakkeerfigilluinnarneqarsinnaapput! (Evfisumiut 1:7) Ilerasuutaarulluinnarsinnaapput. (Eprîarit 9:9; 10:22; 1 Pîtruse 3:21) Pilluaqqussutit tamakku misigileriigaat Guutip qitornaasa kiffaanngissusiata naalannaataanik, Jehovap kiffaasa siunissami misigiumaagassaannik, qilanaartuutaapput!
Guutip ilisimanerata asanninneratalu itissusiat
14, 15. Jehovap ilisimassusia asseqanngitsoq, asannissusia, naapertuilluassusialu qanoq ililluni utertitsissutikkut erserpat?
14 Utertitsissummik aaqqissuussaaq ilumut Jehovamit tunissutaavoq nuanningaartoq! Paasiuminnaatsuunngilaq, taamaakkaluartorli ima ititigaaq allaat silassorinnerpaamit ataqqingaarneqartariaqarluni. Utertitsissutip sunniutaanik misissuinitsinni pingaarnerinnaat sammisimavavut. Taamaakkaluartorli Paulusitut nillertariaqarpugut: ’Ata, Guutip pisuussusiata ilisimaneratalu ilisarsineratalu itissusiat; eqqartuussinerisa killisissaanngissusii aqqutaasalu siunersissaanngissusii.’ (Rûmamiut 11:33) Kisimi oqartussaanini aalajangersaatigalugu Jehovap inuiannik annaassisinnaanera taamaalilluni ilisimassusianut ersiutaavoq. Utertitsissut ikiortigalugu ’Guutip naapertuilluarnera saqqummiussaavoq, Guutip Kristus saqqangiuppaa saammaaffissioqqullugu uppernikkut aavanut’. — Rûmamiut 3:21-26.
15 Kialuunniit Guuti isornartorsiorsinnaanngilaa pallorfiginnitsimi kristumiussuseq sioqqullugu inuusimasut ajortuliarisimasaannik isumakkeerfiginninnera pillugu. Aammalu inuit ilaannik naapertuilluartutut nalunaarutiginninneranik — tanitat ernermisut ’amerlangaartullu’ ikinngutimisut — Guuti isornartorsiorneqarsinnaanngilaq. (Rûmamiut 8:33) Naak imminut akisugaluaqisoq Jehova naapertuilluarluinnartumik imaluunniit unneqqarilluinnartumik iliorsimavoq, taamaalillunilu Satanip sallulluni imminik naapertuilluanngitsumik naalagaaneraanera tunuartillugu! Aammalu Guutip pinngortitaminut namminissarsiunngitsumik asanninnera ima ersaritsigaaq qularutigineqarsinnaanani. — Rûmamiut 5:8-11.
16. (a) Guutip kiffaasa assuarnaassusiannik apeqqut qanoq ililluni utertitsissutikkut akineqarpa? (b) Silarsuup nutaap naapertuilluassuseqarfiusup pilernissaanut upperinninnissamut qanoq ililluni utertitsissut tunngavissiiva?
16 Utertitsissutip pilersinneqarnerani periaasiusukkuttaaq Guutip kiffaasa assuarnaassusiannik apeqqut nalorninaallisinneqarsimavoq. Jesusip naalanneratigut akineqarsimavoq. (Ussatit 27:11; Rûmamiut 5:18, 19) Aammalu taaneqarsinnaapput kristumiut 144.000-iusut naak Satanimit akerlilersugaagaluarlutik toqumut allaat aalajaassimasut. (sarĸúmersitat 2:10) Akissarsiassaminnik, inuunermik toqujuillunilu aserujuitsumik, pinissaat utertitsissutip ajornarunnaarsissimavaa. (1 Korintumiut 15:53; Eprîarit 7:16) Tamatumuuna Guutip kiffaanik Satanip ilumuunngitsuuneraanera kanngunarsagaalluinnarpoq. Aammattaaq Guutip neriorsuutaanik upperinninnissatsinnut utertitsissutip aalajaatsumik tunngavissippaatigut. Annannissamik aaqqissuussaq utertitsissutikkut ’inatsisitigut tunngaveqartoq’ takusinnaavarput. (Eprîarit 8:6) Silarsuassap naapertuilluartup nutaap piviusunngornissaanut uppernarsaatissaqarpugut. — Eprîarit 6:16-19.
Siunertaa asuliinnaq peqinagu
17. (a) Inuit ilaasa qanoq ilillutik utertitsissummik siunertaasoq asuliinnaq pisimavaat? (b) Ileqqussatigut minguitsuunissatsinnik aalajangiusimanninnitsinnut suna nakussatsissutigisinnaavarput?
17 Utertitsissut iluaqutigissagutsigu ilisimassuteqalernissarput, uppernitta ineriartortinnissaa Bibelillu najoqqutassiai malillugit inuunissarput pisariaqarput. (Juánase 3:16; 17:3) Inuilli amerlanngitsuinnaat taamaaliornissaminnut piumassuseqarput. (Matîuse 7:13, 14) Allaat kristumiut ilumoortut akornanni ’Guutip saammaanneranik asuliinnaq pinnittunik’ nassaassaqassaaq. (2 Korintumiut 6:1) Assersuutigalugu, ukiut ingerlaneranni kanngunartuliorsimaneq pissutigalugu tuusintilinnik arlalinnik ilagiinnut ilaasortaajunnaarsitsisoqartariaqartarsimavoq. Tamanna alianaqaaq — Jehovap Jesus Kristusillu taakkununnga iliuuserisimasaat eqqarsaatigalugit! Utertsitsissummik pingaartitsinerup ’ajortuliarigaluatsinnik piiaaffigineqarsimanitta’ puiunnginnissaanut tamatta kaammattortariaqarpaatigut. (2 Pîtruse 1:9) Taamaattumik Paulusip kristumioqatini ima eqqaasippai: ’Akisuumik pisiarineqarpusi; taamaattumik Guuti timissigut naalannartissiuk.’ (1 Korintumiut 6:20) Tamanna eqqaamajuarutsigu ileqqussatigut minguitsuunissatsinnut, imaluunniit kinguaassiuutitigut kanngunartuliunnginnissatsinnut, kajumississutigingaassavarput. — 1 Pîtruse 1:14-19.
18. Kristumiup annertuumik unioqqutitsisoortup qanoq ililluni utertitsissut iluaqutigisinnaavaa?
18 Arlarpummi annertuumik unioqqutitsereersimappat? Taamaappat nangaanani isumakkeerfigineqarnissamik periarfissaq utertitsissutikkut ajornarunnaarsimasoq iluaqutiginiartariaqarpaa, nakkutilliisunillu asannittumik ikiorneqarnissani ilassisariaqarlugu. (Jâko 5:14, 15) Kristumiu ilungersortumik oqaanneqaraluarluni, peqqissimilluinnaruni kanngunartuliorneq taama ittoq pissutigalugu nakkaannartariaqanngilaq. (Eprîarit 12:5) Bibelimi nuanningaartumik ima neriorsorneqarpugut: ’Ajortivut anngiiaatigigutsigik, taanna ilumoorlunilu iluartuuvoq, ajortitsinnik isumakkeerfigaluta iluaatsunillu sunik tamanik piiaaffigaluta.’ — 1 Juánase 1:9.
19. Sallusuissut ilikkanngikkallaramiuk ileqqorluutigisimasani kristumiup qanoq isigisinnaasarpaa?
19 Kristumiut ilaasa siornatigut ajortuliarisimasatik ilaannikkut eqqissiunnaarutigisarpaat. „Sallusuissut ilikkanngikkallaratsigu,“ qatanngut nikallungasoq allappoq, „nuliaralu genital herpesimik tunillatsissimavugut. Ilaannikkut misigisarpugut minguttuungaaratta Jehovap peqatigiissortaanut minguitsunut naleqqutinngilluinnarluta.“ Qularnanngivissumik ilaqarpugut siornatigut kukkussutigisimasamik kingunerinik allaat kristumiunngoreernerminni anniaatiginnittunik. (Galâsiamiut 6:7) Pissutissaqanngilluinnarporli Jehovap isaani minguttuutut misiginissamut, siornatigut ileqqorisimasat ilumoorluni peqqissimissutigereersimagaanni. ’Kristusip aavata tarnip nalunngissusia minguersarsinnaavaa suliat inuussutaanngitsut piiarlugit.’ — Eprîarit 9:14.
20. Kristumiu pisariaqanngitsumik imminut ajorinissaraluaminit qanoq ililluni utertitsissummik upperinninnerminit ikiorneqarsinnaava?
20 Aap, utertitsissummik upperinninnitta imminut ajorinermik pisariaqanngitsumik nanertortinnginnissatsinnik ikiorsinnaavaatigut. Qatanngut arnaq inuusuttoq oqaluttuarpoq: „Ukiut aqqanillit sinnerlugit imminut inertittarnermik ileqqupiluk naalliuutigisimavara. Allaat ilagiit qimangajavissimavakka, isumaqarama Jehovap kissaatiginngikkaa inuup taama maajunnartigisup ilagiissiminut akuunissaa.“ Eqqaamasariaqarparpulli naapertuilluanngissutsimut akiuuttuartilluta naapertuilluanngissutsimullu maleruutiinnanngittuartilluta Jehovap ’avaagalutalu isumakkeerfigisassammatigut’. — Tussiaat 86:5.
21. Uagutsinnik kukkuluttorfiginnittunut qisuariarnissarput utertitsissutip qanoq ililluni sunniuteqarfigisinnaavaa?
21 Inunnik allanik pissusilersorfiginninnitsinnuttaaq utertitsissut sunniuteqartariaqarpoq. Assersuutigalugu, kristumioqativit kukkuluttorfigippatit qanoq qisuariassavit? Kristusitut isumakkeerfiginninnissannut piareersimassavit? (Lúkarse 17:3, 4) Misiginneqataalluinnartuuit ’isumakkeerfiginnittarlutillu, soorlu Guutip isumakkeerfigigaatigut Kristusimi’? (Evfisumiut 4:32) Iluarinngisaqakujukkajuttuuit? Taava utertitsissummik siunertaasoq asuliinnaq pisimassavat. — Matîuse 6:15.
22, 23. (a) Utertitsissut anguniakkatsinnut inooriaatsitsinnullu qanoq sunniuteqartariaqarpa? (b) Utertitsissut eqqarsaatigalugu, kristumiut tamarmik qanoq aalajangertariaqarpat?
22 Kiisalu utertitsissummik pingaartitsinerput anguniakkatsinnut inooriaatsitsinnullu annertuumik sunniuteqartariaqarpoq. Paulus allassimavoq: ’Akisuumik pisiarineqarpusi; inunnut kiffaritinnaveeritsi.’ (1 Korintumiut 7:23) Atortorissaarutit soorlu inigisat, suliffiit, nerisassat atisassallu, inuuninni suli pingaarnerpaatippigit? Imaluunniit Naalagaaffik salliutippiuk, Guutip neriorsuisimanermisut ilinnik isumassuinissaa tunaaralugu? (Matîuse 6:25-33) Ilungersorlutit sulisitsisut sulissuppiuk, suliassalli teokratiimut tunngasut nakkutigilluarnagit? Eqqaamajuk Kristus ’pilluta imminik tunniuttoq . . . inuiannik nammineq pigisassaminik ajunngitsuliornermut ilungersorumaartunik eqqiaajumalluni’. — Títuse 2:14; 2 Korintumiut 5:15.
23 ’Guuti qujanarsili Jesus Kristusikkut’ utertitsissummik, tunissummik asseqanngitsumik, tunimmatigut! (Rûmamiut 7:25) Utertitsissutikkut siunertaasoq asuliinnaq pinngisaannartigu, tamatuminngali pingaartitsinerput inuunitsinni sutigut tamatigut ersersitsigu. Eqqarsaatitsigut, oqaatsitsigut iliuutsitsigullu Guuti naalannartittuartigu, qujamasulluta eqqaamajuaatigalugu akisuumik pisiarineqarsimasugut. (15/2 91)
Apeqqutit uteqqiissutissat
□ Sooq aak illernartutut isigineqarpa, qanorlu ililluni Kristusip aava qilammut Jehovamut sassaanneqarpa?
□ Angerusisaamik pilersitsinermut atatillugu Kristusip aava qanoq pingaaruteqarpa?
□ Utertitsissut tanitanit amerlangaartunillu qanoq iluaqutigineqarpa?
□ Qanoq ililluta ersersissinnaavarput utertitsissummik siunertaasoq asuliinnaq pinngikkipput?
[Atuaqqissaarnermi apeqqutit]
[Qupp. 18-mi assiliartaq]
Pilliutip saammaannartitsissutitaa aammiippoq