Ataatsimeersuarneq „Kiffaanngissutsip ikinngutai“ najuuffigiuk

Ulluni pingasuni nuannerunaqisumik Bibelimik ilinniartitsineqartussaavoq. Taamaattumik ataatsimeersuarnerup ulluisa siulliat nalunaaqutaq 10.20 nipilersuummik aallartippat najuunniarna. Aallaqqaasiutigalugu oqalugiaat „Kiffaanngissutsip inatsisaanut naammalluinnartunut sooq itsuartariaqarpa?“ aammalu ullaap tungaani naggasiutigalugu oqalugiaat „Kiffaanngissuserput Guutip siunertaa naapertorlugu atortigu“, ataatsimeersuarnerup qulequtaanik samminnittoq, tusarnaarniarigit.

Ullormi siullermi ualikkut kristumiut kajumissaarneqassapput Guutimut kiffatut suliaminnik naammassinninnissaannik. „Aallussilluarpugut — sulianik toqungasunik imaluunniit Jehovamut kiffartornermik?“ aamma „Inuiaat kiffaanngissuseqartut, Guutimulli akisussaaffeqartut“ tassaapput oqalugiaatigineqartussat ilaat. Isiginnaagassiakkut itsaq pisimasuutitakkut kajumissaarneqassaagut kiffaanngissutsitta Jehovamut kiffartornitsinni atornissaanut. Pisimasut Ezrap suleqataasalu Guutip naalaffia naammassiartorlugu ukiumi 468-imi u.n.a.s. Babylonimit Jerusalemimut uternerminni naapittagaat isiginnaagassiami tunngavigineqarput.

Ullup aappaani oqalugiaatit malitsigiit pingasut „Ilaqutariinni kiffaanngissuseq akisussaafittalik“-mik ataatsimut qulequtaqartut saqqummiunneqassapput. Oqalugiaat imminut killisiornartoq „Jehovamik kiffartuussinissamut kiffaanngissuseqartuaannartigit“ saqqummiunneqareerpat kristumiutut tunniulluinnarneq kuisinnerlu pillugit oqalugiartoqassaaq. Oqalugiaat „Aappariinneq pilluarnermut aqqutaava?“ amerlasuut qilanaarissavaat. Ullup aappaa kiffaanngissutsip ikinngutaanut qularnanngitsumik nuannaarutaaqisumik naggaserneqassaaq.

Ullut pingajuanni ullaap tungaa oqalugiaatit malitsigiit „Inunnik aalisartutut kiffartorta“-mik qulequtaqartut saqqummiunneqassapput. Tassani Jesusip qassutinik aalisakkanillu assersuusiaa sammineqassaaq tamatumalu eqquunnerani uagut qanoq peqataanersugut nassuiarneqassalluni. Ullaap tungaani naggataarutaassapput oqalugiaatit pingaartut „’Naggatissap nalaani’ eqqumajuaannarit“ aamma „’Annikilliornartumi’ kina aniguissava?“. Ualikkut tamanut ammasumik oqalugiaat „Guutip silarsuassaani nutaami kiffaanngissuseq piviusoq“ tusanngitsoorniaqinagu. Naggataarutaasumik oqalugiaat qiimmannartoq pitinnagu Napasuliaq Alapernaarsuiffik sammineqassaaq. Atuagassiaq sammineqartussaq nassarniariuk.

Kalaallit Nunaanni ataatsimeersuarneq pissaaq Nuummi augustip 3-aniit 5-iat ilanngullugu. Tikilluaqqusaangaarputit.