Bibelip nalaani inuusuttut Guutimut kiffartortut

BIBELIP oqaluttuarai inuusuttutsialassuit amerlasuut Guutimik kiffartuussinermik pingaartitsisut taamaattumillu pilluaqqusaalluartut. Inuusuttuugaluaruit utoqqaagaluaruilluunniit maligassaalluartut Bibelimeersut taakku kajumissaatigilluassavatit.

Josef inussiatut Egyptenimut tunisaagami 17-iinnarnik ukioqarpoq. Nunami tassani, ilaquttaminut ilisarisimasaminullu ungasissumi, assuarnaassutsi uppernarsisissimavaa. Potifarip nuliata innaanniaraluarmani, oqarpoq: „Qanoq taama kanngunartigisumik iliussaanga Guutimut ajortuliorlunga?“ Allaallu Faraomut, taamanikkut kunngit pissaaneqarnersaannut, sassarami Faraop sinnattuinik nassuiaasinnaanerminut Guutip ataqqinaatissinnissaanut periarfissaq Josefip atorpaa, taamaattumillu akissarsisinneqarluarpoq. Egyptenimiunik Josefillu nammineq ilaqutaanik kaannersuarmi toqunissaraluinit Guutip annaassinerminut Josef atorpaa, ataataatalu, Jakobip, inoqutaasalu Egyptenimukartinneranni atorlugu. — 1 Moses 37:2; 39:7-9; 41:15, 16, 32.

Moses inuusuttullu allat aalajaatsut

Faraop paniata Moses nammineq meeqqamisut pivaa, Mosesilli anaanaata ataataatalu Guutimik ilumoortumik ajoqersorsinnaasimavaat. Bibelimi oqaatigineqarpoq Moses, inersimasunngorami, ’Faraop paniata erneranik taaqqujunnaartoq, Guutillu innuttai perlussioqatigissallugit nuannaarnermit naajasumit ajortip pianit iluarinerugaa’. Guutip Moses atorlugu innuttani Egyptenimit anisippai, Inatsisinik Sinajimi tigusisoraa Bibelillu ilaanik allattoralugu. Illit, qanorluunniit ukioqaraluaruit, Mosesitulli Guuti kiffartuunniarlugu aalajangersimavit? — Eprîarit 11:23-29; 2 Moses 2:1-10.

Bibelimi oqaluttuarineqarpoq meeqqat inuit sinneri ilagalugit Guutip inatsisaanik atuffassisoqartillugu tusarnaartut. (5 Moses 31:10-13) Nehemiasip nalaani ’ullaannguamiit ullup qiteqqunneranut angutit arnallu  paasinnissinnaasullu allat tamarmik inatsisinit atuffassineq’ tusarnaarsimavaat. (Nehemja 8:1-8) Naak immaqa tamaasa paasinngikkaluarlugit, Jehova Guutimut asanninnisartik, pallorfiginninnissartik naalannissartillu meeraaqqat paasisinnaavaat. Illit, qanorluunniit ukioqaraluaruit, ataatsimiinnerni ataatsimeersuarnernilu Guutip oqaasianik eqqartuisoqartillugu tusarnaartarpit? Guuti naalassallugu qanoq pingaartigisoq ilikkarsimaviuk, soorlu Israelikkut inuusuttortaat taamaassimasut?

David, Josias Jeremiasilu

Guutip David, qatanngutiminit arfineq-pingasunit nukarlersaasoq, kiffartuussinissamut immikkut ittumut qinerpaa, taannalu pillugu oqarpoq: ’David Isajip ernera nassaaraara, angut uummamma iluarisaa, taassuma peqqusakka tamaasa naammassissavai.’ Guutip inuttaminut ’paarsisussatut’ qinerpaa, Davidillu kiffartuussineq tamanna ukiorpassuarni suliaraa, taamaalilluni Jehovamut asanninnini uppernarsarlugu. Tussiaatit 70-it sinnerlugit allappai Jesus Kristusimullu siuaasanngorluni. Guutip aqqutai, qanorluunniit ukioqaraluaruit, pingaartippigit, piumasaanillu iliortarpit, soorlu David taamaaliortarsimasoq? — apustilit suliáinik agdlagkat 13:22; Tussiaat 78:70, 71; 1 Samuel 16:10, 11; Lúkarse 3:23, 31.

Arfineq-pingasuinnarnik ukioqarluni Josias kunnginngorpoq. 15-it missaannik ukioqarluni — ’suli inuusuttuaraalluni — siuaasami Davidip Guutia sammiviginialerpaa’. Suli 20-liinani eqqunngitsumik guutisiorneq nungusalerpaa. Kingusinnerusukkut naalaffik iluarsaatilerpaa, nunamilu pallorfiginninneq ilumoortoq atuutilerseqqillugu. Atuarpugut: „Josias inuutillugu [Israelimiittut Jehova] siuaasamik Guutiat tununngilaat.“ Josiasitut inuit tamarmik kunnginngorsinnaanngillat, kisianni qassinilluunnit ukioqaraluarutta Guuti kiffartuussinnaavarput guutipilussiornerlu ingalassimaniarlugu. — 2 Israelikkut kinguaariit oqaluttuarisaanerat 34:3, 8, 33.

Guuti ajugaqanngitsoq Jeremiasimut oqarsimavoq: „Anaanavit timaata iluani piliarinngikkallarakkilli  qinerpakkit; anaanavit timaanit aninngikkallaravilli immikkoortillutit illernartippakkit inuiannut pruffiitissanngortillutit.“ Jeremias pruffiitiunissaminut inuusuppallaarnerarluni akerliliivoq: „Ila Naalagaq, [Jehova]-aa, oqalunnissannut sapiuppunga inuusuppallaarama.“ Jehovalli akivaa: „Ima oqaqinak: ’Inuusuppallaarpunga.’ Kisianni aallassaatit kikkunnulluunniit uanga orneqqusannut, oqaasereqqusakkalu tamaasa oqaaserissavatit.“ Jeremiasilu ukiut 40-t sinnerlugit taamaaliorpoq. Allaat tunniutiinnangajakkaluarnermini, taamaatissinnaasimanngilaq. Guutip oqaasii ’iluani soorlu innertut ikumasut, saarngini soorlu ikuallattut’. Oqaluussisariaqartutut misigilluinnarsimavoq! Qassinilluunniit ukioqaraluaruit Jeremiasitut upperneq ineritikkiartorpiuk, taassumatut Guutimik kiffartuussinermi sulissuteqaatigalutit? — Jeremia 1:4-8; 20:9.

Daniel Jesus Timoteusilu

Qularnanngitsumik Daniel tusarsimassavat. Meeqqat allat ilagalugit Babylonip kunngiata pissaaneqartup Nebukadnezarip illussaarsuanut tigusaalluni aallarunneqarami 20-t inorlugit ukioqarsimassaaq. Naak inuusukkaluarluni Guutip naalannissaa Danielip aalajangiusimavaa. Daniel ikinngutaalu nerisassanik Guutip inatsisaatigut inerteqqutaasunik, guutipilussiortut ileqqulersuutaannik mingutsissimasunik nerinikkut mingutsikkumanngillat. Ukiut 80-it sinnerlugit Daniel qulalinngisaannarpoq, assuarnaassutsili attalluangaaramiuk Guutimut qinunini unitsikkumanngilaa naak liivinut igitaanissamik kinguneqarsinnaagaluartoq. Guutimut kiffartuussinerit qinnutitillu taama pingaartigisutut isigaagit? Taamaattariaqarputit. — Daniel 1:3, 4, 8; 6:10, 16, 22.

Aqqaneq-marlunnik ukioqarluni Jesus upperisarsiornikkut ajoqersuisut akornanni nassaarineqarsimavoq taakku ’tusarnaarlugillu apersortarai. Tusartaasali tamarmik sianissusiagut akisarnerisigullu tupigingaarpaat’. Jesusitut soqutiginnitsigalutit angutit utoqqaanerusut Allakkat pillugit oqaloqatigiinnerat tusarnaassagaluarpiuk? Illit paasinninnerit  akissutitillu allanit tupigusuutigineqassagaluarpat? Jehovap Nalunaajaasuisa akornanni inuusutorpassuit ilinniaqqissaartartut, kristumiullu ataatsimiinnerini tusarnaaqqissaartarlutillu peqataasartut Bibelimik ilisimasaqarluarput — inersimasorpassuit tupaallaatigisaannik. — Lúkarse 2:42, 46, 47.

Timoteusitut, meeraanerminit ’allakkanik illernartunik’ ilinniartitaasutut, ippit? Timoteus inuusuttuaraalluni ilagiinni ikinnerpaamik marlunni ’tusaamasaalluartuusimavoq’. Apustili Paulusip Timoteus angalaqatissamisut qinersimavaa, nassatanik tigummisussatuinnaanngitsoq, aammattaarli allanik ajoqersuinermini ikiuutaasussatut. Immikkut pisinnaatitaaffimmut taama ittumut toqqagaassagaluarpit? Illittaaq ilagiinni ilaasortaaffinniinnaanngitsoq ilagiinnili allani aamma ’tusaamasaalluarpit’? — 2 Timûtiuse 3:15; apustilit suliait 16:1-4.

Siunissaq qanoq ittoq kissaatigaajuk?

Josef, Moses, David allarpassuillu assigalugit inuusuttut ullumikkut aalajaassinnaappat? Aap. Inuussuttut ilaasa nuannaarniutit kisiisa soqutigisarpaat. Allalli Guutimik peqqusaanillu ilinniarnermikkut inuusuttuunertik atorluarpaat. Taamaalillutik Bibelimi siulittuut imaattoq eqquutitippaat: „Ullormi sorsuffigisanni innuttatit kajumillutik sassarumaarput. Ullaaralaannguami kanernertut angutitavit inuusuttut ornikkumaarpaatsit.“ — Tussiaat 110:3.

Inuusuttutsialaat taamaattut ilisimassutsip tungaatigut ukiuminnut naleqqiullutik siuarsimapput, Guutimmi maannakkut ajunngitsumik inuunissaannik ikiorsinnaavai, silarsuarmilu nutaassami alianaatsumik siunissaqartillugit. — 1 Timûtiuse 4:8. (wD 1/8 90)

[Qupp. 5-mi assiliartat]

Mosesip inuusuttup Egyptenimiut pisuussutaat nakkarfiginngilai

David inuusuttuulluni allaat Jehovap uummataanit iluarisaavoq

[Qupp. 6-mi assiliartat]

Naak inuusuppallaarsorigaluarluni Jeremiasip qunusuilluni tusagassaq nuannarisaanngitsoq oqaluussissutigisarpaa

Jesusip 12-inik ukioqarluni Guutip oqaasianik paasisimasaqassutsimigut allat tupigusutsippai

[Qupp. 7-mi assiliartaq]

Israelimi Guutip oqaasia atuffassissutigineqaraangat meeqqat mikisut tusarnaartarput. Illittaaq taamaaliortarpit?