Bibeli qanoq oqarpa?

Imminorneq – makinnissamik neriuutissaqarpa?

IMMINORTUMIK tusagaq ajuumminangaartoq ilaquttanut ikinngutinullu isumakkut nalornisoornartuuvoq — soorlu misiginneqataaneq kamannerlu, aliasunneq imminullu pisuutinneq. Apeqqutaalerporlu: Imminut toquttumut neriuutissaqarpa? *

Toquneq nammineq pisuussutigisaq illersorneqarsinnaananilu pinngitsuutinneqarsinnaanngilaq, eqqaamaniartiguli apustili Paulusip ’iluaatsunut’ allaat neriuut tupinnangaartoq eqqartoraa. Romamiut eqqartuussiviannut oqarpoq: ’Guuti neriuffigaara . . . toqusut makikkumaarmata, iluartullu iluaatsullu.’ — apustilit suliáinik agdlagkat 24:15.

Taamaattoq upperisarsiornermik ilisimatoorpassuit ’iluaatsut’ makinnissaannut imminorsimasut peqataasinnaanerannik eqqarsaat qangarsuarli tunuartissimavaat. Suna pillugu?

Upperisarsiornermik ilisimatuut makinnissamik neriuut ajattorpaat

1500-kkunni William Tyndalep Bibelimik nutsikkami siulequtaani nassuiaatip ilaa eqqartorpaa: „Toqusimasut tarnaannik qilammi, anniarfimmi eqqiarfimmiluunniit inissiineq Kristusip Paulusillu makinnissamut uppernarsaatinik tunngavilersuutaannik aserorterineruvoq.“ Aap, ukiut hundredelippassuit matuma siorna palaseqatigiit Bibelimik tunngaveqanngitsumik isummersimapput tarnip toqusuitsup toqunermi timi qimallugu ingerlaannaq qilammut, anniarfimmut, eqqiarfimmut limbusimulluunniit pisartoq. Eqqarsaat tamanna Bibelip makinnissamik ajoqersuutaanut ersarissumut akerliulluinnarpoq. Soorlu palasi baptistiusoq Charles Andrews aperisimasoq: „Tarneq qilammi pilluarnartumut isereersimappat (imaluunniit anniarfimmi ikumallualereersimappat), sooq iliuuseqaqqissaagut?“ Oqaatsinilu ilavai: „Ukiuni hundrelinni arlalinni kristumiut eqqarsaatit akerleriit tamakku paatsiveerusimassutigisimavaat.“

Upperisamut ilisimatusaatit tamakkua tammarsaataasut aamma kinguneraat ilageeqarfiup „Augustusip nalaaniit [354-430 u.n.a.k.] imminortarnermik ajortuliatut isiginnilernera,“ Arthur Droge atuagassiami Bible Review-imi 1989-imi decemberimi allassimavoq, nangillunilu: „Ajortuliaq tunussinertut allasiornertullu isumakkiigassaanngitsoq.“

Imminorneq ’ajortuliamik isumakkiigassaanngitsumik’ inuup anniarfiup innerani pillagaassutigisassaanik taassagaanni, toqumik eqqartuussummik ingassattajaartumik kinguneqartussaaneraanerussaaq. Katuullit aviisianni National Catholic Reporter-imi misiutigineqanngilaq: „Ilagiinni ajoqersuisuunerit pingaarnerusut ilaasa marluk imminortarneq kamaatigeqaat. Augustinip imminortarneq ’iliuutsimik maajunnartumik assuarnartumillu’ taavaa, Thomasilu Aquinomeersoq isumaqarpoq Guutimut ilagiinnullu ajortuliaasoq toqunartoq [isumakiigassaanngisoq] — kisianni palasit tamakkeratik tamanna isumaqatigaat.“

Qujanartumik isummat taama ingasatsigisut ingalassinnaavavut ilumoortut Bibelimeersut marluk akuerigutsigik. Ilumoortoq siulleq tassa Bibelimi allassimasoq ’tarneq ajortuliortoq toqussasoq’. (Hesekiel 18:4, NV) Aappaa tassa tarninut (inunnut) toqoreersunut neriuutissaqartoq ’iluartullu iluaatsullu makiffissaanni’ inooqqilersinnaanissamik.  (apustilit suliáinik agdlagkat 24:15) Imminorsimasummi qanoq siunissaqassanersut ilimagisinnaavarput?

’Iluaatsoq’ makikkumaarpoq

Jesusip pinerluttoq toqutassaatinneqartoq oqarfigisimavaa: ’Paratiisimeeqatigiumaarparma.’ Angut taanna ’iluaappoq’ — imminorniartuunani isumatsassimasoq, inatsisinilli unioqqutitsisuulluni — isertuarnanilu pinerlussimanini nassuerutigalugu. (Lúkarse 23:39-43) Qilammi Jesus ilagalugu naalakkersuinissaminik neriugisaqanngilaq. Aap, tillittup taassuma paratiisissami alianaatsumi nunamiittumi Jehova Guutip naalagaaffiata naalakkersuinerata ataani inooqqinnissani kissaatigaa. — Matîuse 6:9, 10; sarĸúmersitat 21:1-4.

Sooq Guutip pinerluttoq taanna makitikkumaarpaa? Ajortuliarisimasaanik naakkittaalluni nassueqquniaannarlugu? Taamaannavianngilaq, Rûmamiunut agdlagkat 6:7, 23-mi allassimammat: ’Toqusormi ajortip sussariunnaarpaa,’ aammalu ’ajortimmi akissarsiarititaa tassa toqu.’ Ajortuliarisimasai naatsorsuutigineqarnavianngillat, sulili naammalluinnar-tunngoriartortinneqarsinnaanissaminut utertitsissut pisariaqartissavaa.

Upperisarsiornermik ilisimatooq Albert Barnes taamaattumik kukkusimavoq oqarami: „Ajortuliorsimasut eqqartuussaassallutik perloqqusaassallutillu makissapput. Tamanna makinnissaannut siunertaavoq, aap, pissutituaavoq.“ Guuti naapertuilluarlunilu asannittoq taama ajortigisumik iliuuseqarniarnavianngilaq! Akerlianilli nunami paratiisiusumi inuunissamut makinnissaq iluaqutigalugu pinerluttuusimasoq (’iluaatsullu’ allat) asseqanngitsumik periarfissaqarumaarput makinnermik kingorna iliuutsitik naapertorlugit eqqartuunneqarnissaminnut. — 1 Juánase 4:8-10.

Naakkinnittumik periarfissaq

Imminortoqaraangat tamatumuuna qimataasut quersaarsimasut tussiaasiortup oqaasii tuppalliutigisinnaavaat: „[Jehovap] nallittortarpai mianerinnitsini. Nalunngilaami qanoq pinngortitaasugut, eqqaamavaa pujualaannaasugut.“ (Tussiaat 103:10-14) Guutip kisimi paasilluinnarsinnaavaa isumakkut anniaatit, tarnikkut tatineqangaarneq allaallu inunnguutsimit pissutsit qanoq ittut imminornialersaartumut sunniuteqarsinnaasut. Imminornialersaarneq pillugu aviisimi National Observer-imi allassimavoq: „Inuuneq naallugu pinnani [kisianni] amerlanertigut minuttit imaluunniit nalunaaquttap-akunneri ikittut pisarpoq.“ — Takuuk Nalunaajaasup oqaasii 7:7.

Imminut toquttup iliorsimanini peqqissimissutigisinnaanngilaa. Immaqali imminortoq piffissaqarsimagaluaruni isumataarniarsimassagaluarpoq. Inuarsimasut tusaamasaanerluttut allaat allanngorsimallutik Guutimit isumakkeerfigineqartarput. — 2 Kunnginik allakkat 21:16; 2 Israelikkut kinguaariit oqaluttuarisaanerat 33:12, 13.

Jehovap ’amerlasuut utertinneqaatissaannik akissaq’ akilersimavaa taamaattumillu naakkinnittuliorsinnaalluni — allaat imminorsimasunut — makitillugit asseqanngitsumillu periarfissaqalersillugit ’allamik isumataaqqullugit Guutimullu saaqqullugit suliallu allamik isumataarnermut naapertuuttut suliareqqullugit’. — Matîuse 20:28; apustilit suliait 26:20.

Bibeli tunngavigalugu akisussaassuseqartumik inuunermik isumaqarfiginninneq

Inuuneq Guutimit tunissutaammat atornerlussanngilarput qaqugulu naassasoq nammineq aalajangissanatigu. (Jâko 1:17) Taamaattumik Bibelimi kajumissaarneqarpugut immitsinnut, tarnitut toqusuitsutut eqqarsaatiginata, pinngortitatulli erlinnartutut Guutip pigisaatut eqqarsaatigeqqulluta. Guutip asavaatigut inuunerpullu pingaartingaarlugu, makiffissarlu qilanaaralugu. — Job 14:14, 15.

Asanninnerup paasitissinnaavaatigut imminoraanni imminut artornartuerukkaluarluni, qimatat asasat ajornartorsiuterpassuarnik naammakkerneqartarmata. Isumaatsoorluni imminorsimasoq makikkumaarnersoq makissannginnersorluunniit uagut inuit aalajangersinnaanngilarput. Qanoq assuarnartigisimava? Guutip kisimi „inuit uummataat tamaasa misissuiffigeqqissaartarpai eqqarsaativullu isertugaanerpaat ilisimallugit“. (1 Israelikkut kinguaariit oqaluttuarisaanerat 28:9) Isumalluarsinnaavugulli nunarsuarmik tamarmik eqqartuussisuusoq asannittumik naapertuilluartumillu iliorumaartoq! — 1 Moses 18:25. (gD 8/9 90)

[Quppernerup ataani ilanngussaq]

[Qupp. 10-mi suminngaanneernera]

Kollektie Rijksmuseum Kröller-Müller, Otterlo