Inuunermik naassaanngitsumik ilassinneriaannaasut ujarsigik

„Uppertunngorput, tamarmik inuunermik naassaanngitsumik ilassinneriaannaasut.“ — APUSTILIT SULIÁINIK AGDLAGKAT 13:48, NV.

1. Jehova susinnaavaa?

JEHOVA Guutip inuit uummataat atuarsinnaavai. Tamanna pruffiiti Samuel Isajip ernerisa ilaannik Israelikkunnut kunngiusussamik taniisussanngormat pisimasumit takuneqarsinnaavoq. Samuelip Eliab takuleramiuk, oqarpoq: „’Tassa tanna [Jehovap] tanitassanngortitaa maannakkut [Jehovap] saaniippoq.’ Jehovalli Samuel oqarfigaa: ’Isikkua angissusialuunniit aalajangiisuutissanngilatit uanga taanna qinigarinnginnakku; inuit pingaartitaat uanga pingaartitarinngilakka. Inuimmi isiminnut saqqumisuinnaat isigisarpaat, Jehovalli inuup uummataa isigisarpaa.’“ Taava Samuel peqquneqarpoq David tanissagaa, taannaammat ’Jehovap uummammi iluarisaa’. — 1 Samuel 13:13, 14; 16:4-13.

2. Uummammi assersuutaasumi suna aallaaveqarpa, tamannalu pillugu Bibelimi qanoq allassimasoqarpa?

² Inuk kinaluunniit aalajangersimarpaluttumik naalagaaniarpaluttumik pissuseqartarpoq. Pissuseq aalajangersimasunik uummammit assersuutaasumit aallaaveqartunik iliorajussuseqartarpoq. (Matîuse 12:34, 35; 15:18-20) Inuit ’uummatimikkut sorsulerisut’ pillugit atuarpugut. (Tussiaat 55:21) Paasitinneqarpugut ’puffajasoq ajortorpassuarnik iliortartoq’ aammalu ’inuk ikinnguteqaraluarluni ajutoorsinnaasartoq, ikinngutaasoqartartorli qatanngummit tatiginarnerusunik’. (Ussatit 29:22; 18:24) Qujanartumik inuppassuaqarpoq qanga Pisidiami Antiochiamiutut ittunik. Taakkua Jehovap annannissamik aaqqissuussinera tusaramikku „tipaatsulerput, Jehovallu oqaasia unnersiutigaat, uppertunngorlutillu, tamarmik inuunermik naassaanngitsumik ilassinneriaannaasut.“ — apustilit suliáinik agdlagkat 13:44-48, NV.

Uppertut ’minguitsumik uummatillit’

3, 4. (a) Minguitsumik uummatillit kikkuuppat? (b) Qanoq ilillutik Guuti takussavaat?

³ Uppertut taakku Antiochiameersut kristumiutut kuisipput. Taakkua ilaat aalajaattuartut Jesusip oqaatsimini pivai: ’Pilluarput minguitsumik uummatillit, Guuti takussagamikku.’ (Matîuse 5:8) Kikkuuppalli ’minguitsumik uummatillit’? Qanorlu ilillutik ’Guuti takussagamikku’?

⁴ Minguitsumik uummatillit tassaapput inuit ilorpiamikkut minguitsuusut. Tunniussimanerata, kipisanerata, pingaartitsinerata pissutaatalu minguinneq malunnaatigaat. (1 Timûtiuse 1:5) Guuti takuaat, ima paasillugu Guutip assuarnaatsut iluaqutissaannik iliuuserisai takuaat. (Naleqqiukkit 2 Moses 33:20; Job 19:26; 42:5.) Grækerit oqaasiat maani ’takussagamikku’-mik nutserneqarsimasoq aamma isumaqarpoq „isumakkut takuaa, paasivaa, ilisaraa“. Jehovap kinaassusia Jesusip kinaassutsimigut assigilluinnarmagu ’minguitsumik uummatillit’ kinaassuseq tamanna ilisimasaqarluarfigilissavaat. Kristus taassumalu ajortit matoorneqaatissaannik pilliutaa upperigamikku, ajortiminnik  isumakkeerfigineqarput taamaalillutillu Guuti akuerineqarsinnaasumik kiffartuussinnaalerlugu. (Juánase 14:7-9; Evfisumiut 1:7) Tanitat qilammi inuunissamut makitinneqarunik immikkut pisinnaatitaaffittut annertuutut Guuti Kristusilu takuillugit takusinnaalissavaat. (2 Korintumiut 1:21, 22; 1 Juánase 3:2) Eqqortumilli ilisimasaqarneq ilumoortumillu pallorfiginninneq aqqutigalugu minguitsumik uummatillit tamarmik Guuti ’takusinnaassavaat’. (Tussiaat 24:3, 4; 1 Juánase 3:6; 3 Juánase 11) Qilammi nunamiluunniit paratiisiusumi inuunermik naassaanngitsumik ilassinneriaannaapput. — Lúkarse 23:43; 1 Korintumiut 15:50-57; 1 Pîtruse 1:3-5.

5. Uppissuseqalissagaanni Jesus Kristusimullu ilumoortumik ajoqersuganngussagaanni suna pisariaqarpa?

⁵ Inuunermik naassaanngitsumik ilassinneriaannaanngitsut uppernermik pigisaqalernavianngillat. Taakkua uppissuseqanngillat. (2 Tásalûníkamiut 3:2) Aammattaaq inuk Jesus Kristusimut ilumoortumik ajoqersuganngorsinnaanngilaq Jehovamit, inuit uummataannik atuarsinnaasumit, kajungersinneqanngikkuni. Jehovamillu ilinniartinneqarnissaminut piumassuseqartariaqarpoq. (Juánase 6:41-47) Jehovap nalunaajaasuili illumiit illumut oqaluussigaangamik soorunami inunnik siumut nalileereertanngillat. Taakku inuit uummataannik atuaasinnaanngillat Guutili asannittoq aalajangiisussanngortittarlugu.

6. (a) Illumiit illumut oqaluussinermi inuit ataasiakkaat atassuteqarfigineqartarnerat qanoq allaatigineqarsimava? (b) Inuunermik naassaanngitsumik ilassinneriaannaasunik nassaarniarnerminni Jehovap nalunaajaasui qanoq ilillutik ikiorneqarpat?

⁶ Bibelimik ilisimatooq naleqqulluartumik oqarsimavoq: „[Palusip] tamanut ammasumik illumiillu illumut sallusuissut oqaluussissutigisarsimavaa. Oqaluttarfimmiinnaanngitsoq inuilli ataasiakkaarlugit atassuteqarfigalugit Kristus oqaluussissutigisarsimavaa. Tarnit angussagaanni inuit ataasiakkaarlugit atassuteqarfigisarnerat amerlanertigut periaatsinit allanit kinguneqarluarnerungaartarpoq.“ (August Van Ryn) Naqitikkat Håndbog for den teokratiske skole, Lad os ræsonnere ud fra Skrifterne (kalaallisuunngortitaanngitsut) taavalu Naalagaaffimmik Kiffartuuteqarneq ikiortigalugit Jehovap nalunaajaasui oqalugiarnermut sapinngisaminnillu inuit atassuteqarfigilluarlugit  oqaluussinermut pikkorissartarput. Oqaluussinermut tunngasumik ataatsimiinnerni takutitsinerit teokratiimillu ilinniarfimmi ilitsersorneqarneq aamma ikiuutaasarput. Ilinniarfimmi najuuttut qanoq ilillutik aallarniinerit pitsaasut atorneqarsinnaanerat Bibelillu eqqortumik atorneqarsinnaanera ilinniartarpaat. Eqqarsaatit tunngaveqarluartumik ataqatigiinnerat, pissutiginiakkat uppernartut, assersuusiorneq, naggasiinerillu sunniuteqarluartut pillugit ilinniartarput. Takoriartigu ilitsersuut Bibelimeersoq ikiortigalugu Guutip kiffaasa qanoq ilillutik inuunermik naassaanngitsumik ilassinneriaannaasut kinguneqarluarnerusumik ujarsinnaagaat.

Aallarniinerit eqqarsaatissarsinartut

7. Jesusip qaqqami oqaluutsiminut aallarniinera qanoq ilinniarfigisinnaavarput?

⁷ Illumiit illumut oqaluussinermut piareersarnermi Jesusip soqutiginnilersitsisinnaasunik aallarniisarnermigut maligassiaa ilinniutigineqarsinnaavoq. Qaqqami oqaluutsiminik aallarniinermini Jesusip oqaaseq „pilluarput“ qulingiluariarluni atorpaa. Assersuutigalugu, oqarpoq: ’Pilluarput [anersaakkut ittunik pisariaqartitsinerminnik miserratiginninngitsut, NV] qilammiup naalagaaffia pigigamikku. . . . Pilluarput qanilaartut, nuna pigissagamikku.’ (Matîuse 5:3-12) Oqaaseqatigiit paasiuminarlutillu ersaripput. Aallarniutaata tusarnaartut soqutiginnilersippai tusarnaarusulersillugit, kinami pilluarusunnginnerpa?

8. Oqaloqatigiissutissaq aalajangersimasoq atorlugu illumiit illumut oqaluussinermi qanoq aallarniisariaqarpa?

⁸ Sunaluunniit oqaloqatigiissutigisassarigaluarutsigu illumiit illumut oqaluussinermi inussiarnersumik isumalluarpaluttumillu aallarniisariaqarpugut. Tupannartumik aallarniisassangilagut soorlu assersuutigalugu oqarluta: „Avataarsuanit tusagassaqartippakkit.“ Tusagassaq nuannersoq qilammingaanneeraluarpoq, taamali aallarniinerup pulaarfigisaq qularnanngitsumik eqqarsartilissavaa oqaluussisartoq upperissanerlugu sukkanerpaamilluunniit qimagutsinniassanerlugu.

Guutip oqaasia eqqortumik atortarparput

9. (a) Qanoq ililluta oqaluussinermi allassimaffiit innersuussutigisariaqarpavut, atuartariaqarpavut atortariaqarlugillu? (b) Jesusip apeqqutinik atuisarsimaneranut assersuummik taasigit.

⁹ Oqaluussigaangatta ataatsimiinnernilu suliassinneqarsimagaangatta allassimaffiit iserfigilluartariaqarpavut, ersarissumik atuartariaqarlugit atorneqarnerannullu pissutaasoq nassuiaqqissaartariaqarlugu. Iluaqutaasinnaavortaaq pulaarfigisaq eqqarsaatinik aalajangersimasunik Bibelimeersunik isumaliutiginnilissutigisaanik apeqquteqarfigissallugu. Tamatumunngattaaq atatillugu Jesusip periaasii ilinniarfigisinnaavavut. Ilaanni inatsisinik ilisimasut ilaata aperaa: ’Ajoqersuisoq, qanoq iliussaanga inuuneq naassaanngitsoq kingornussariumallugu?’ Jesus nammineq taava aperaaq: ’Inatsisini qanoq allassimava? Qanoq ittut atuarpigit? Qularnanngitsumik Jesusip nalunngilaa angutip tamanna akisinnaagaa. Angullu eqqortumik akivoq: ’„[Jehova] Guutit asassavat uummatikkut iluunngarlutit tarnikkullu iluunngarlutit nukisillu tamakkerlugit isumakkullu iluunngarlutit; tullillu ilittut asassavat“.’ Akissutaa pillugu Jesusip nersorpaa oqaloqatigiinnermillu tamanna kinguneqarpoq. — Lúkarse 10:25-37.

10. Oqaloqatigiissutissanut atukkanut atatillugu suna eqqarsaatigisariaqarparput, pulaarfigisarlu aperigaangatsigu suna pinngitsoorniartariaqarparput?

¹⁰ Illumiit illumut oqaluussinermi oqaluuserisap tunngavigisaa ersersinneqarnerusariaqarpoq allassimaffiillu atorneqartut isumaat nassuiarluarneqartariaqarluni. Pulaarfigisap uummataa oqaluussisartup killinniagarigamiuk, apeqqutinik peqqusiileqissutigilersinnaasaanik aperinaveersaartariaqarpaa. Guutip oqaasia atoraangatsigu ’alianaatsunik tarajorsimasunillu oqaaseqartaannartariaqarpugut’. — Kulorsamiut 4:6.

11. Jesusip Satanimit usserneqarami iliuusaa eqqarsaatigalugu, qanoq ililluta Bibeli ikiortigalugu isummat kukkusut naqqissinnaavavut?

¹¹ Ingammik inuit pulaaqqinnerini isumaat  kukkusut naqqissallugit pisariaqarsinnaasarpoq tamakkulu pillugit Bibelimi qanoq allassimasoqarnersoq takutinneqartariaqarluni. Jesus tamatumunnga assingussumik iliuuseqarsimavoq Satan avoqqaarigamiuk, taassuma oqarfigimmani: ’Guutip ernerippatit samunga [naalaffiup kaarfanit, imminorniarlutillusooq] nakkaagit, allassimammat: „Inngilini peqqussavai pillutit, taakkualu kissumiassavaatsit, isikkatit ujaqqamut kalluteqqunagit.“’ Satanip tassani Tussiaat 91:11, 12 issuaaffigaa, allassimaffimmili tamatumani inuunermik, Guutimit tunissutaasumik, navianartorsiortitsineq akuersorneqanngilluinnarpoq. Jesusip nalunngilaa Jehova usserlugu imminut navianartorsiortinneq eqqunngitsuliornerusoq, taamaattumillu Satan oqarfigaa: ’Aamma allassimavoq: „[Jehova] Guutit ussissanngilat.“’ (Matîuse 4:5-7) Satanip soorunami sallusuissut ujartugarinngilaa. Inuilli silatusaartut anersaakkut siumukarnissaminnut akornutaasinnaasunik kukkusumik isumaqaraangata, Guutip oqaasianik kiffaasut takutinniartarpaat tamanna pillugu Bibelimi qanoq allassimasoqarnersoq. Taamaaliorneq ’oqaatsimik sallusuissutip pianik tunioraalluarnermut’ ilaavoq, tassaallunilu teokratiimik ilinniarfimmi ilinniakkat pingaarnersaasa ilaat. — 2 Timûtiuse 2:15.

Qularpasinnak oqalugit

12, 13. Oqaluussinermi sooq qularunnaarsitsisumik uppernartumillu oqalussinnaasariaqarpugut?

¹² Oqaluussisartutut kristumiuusutut qularpasinnata, imaluunniit nakimaatsumik, oqaluttariaqarpugut. Assersuutigalugu, Paulusip suleqatini Timoteus kajumissaarpaa ’ilinniakkani imminut uppernarsakkat aalajangerfigeqqullugit’. (2 Timûtiuse 3:14) Korinthimi Paulus ’sapaatiusaraangat naalagiartarfimmi Juutit Grækerillu nakimajunnaarsillugit oqaluttarpoq’. (apustilit suliáinik agdlagkat 18:1-4) Efesusimi ’oqaluttarpoq Guutip naalagaaffiata piinik nakimajunnaarsitsilluni’. (apustilit suliáinik agdlagkat 19:8) Romamilu Paulus illumi parnaarusaagami, inuit qaaqqullugit nalunaajaanermigut ’nakimassutissaajarpai’, ilaallu uppertunngorput. — apustilit suliáinik agdlagkat 28:23, 24.

¹³ Oqaluussisartorli oqariartuummik qanorluunniit qularunnaarnartigisumik saqqummiussigaluartoq, soorunami inuunermik naassaanngitsumik ilassinneriaannaasut kisimik uppissuseqalissapput. Pissutiginiakkat ersarissut nassuiaanerillu eqqorluartut periaaserissumik oqaluussisartup saqqummiukkunigit immaqa qularunnaarsillugit uppissuseqalersissavai. Qularunnaarsinniaraannili aamma suna ikiuutaasinnaava?

Eqqarsaatit tunngaveqarluartumik ataqatigiinnerat tunngaviginiakkat uppernartut

14. (a) Eqqarsaatit tunngaveqarluartumik ataqatigiissinnerat sumik ilaqarpa? (b) Tunngaviginiakkat uppernartuussappata suna pisariaqarpa?

¹⁴ Teokratiimik ilinniarfimmi piginnaassutsit ineriartortinniagassat ilaat tassaavoq paasinarsiartuaartumik  tunngaveqarluartumik nassuiaasinnaaneq. Tamanna isumaqarportaaq eqqarsaatit pingaarnerit oqaluuserisamullu attuumassuteqartut paasinartumik tulleriiaarlugit saqqummiunnissaat. Aamma pingaaruteqarpoq tunngaviginiakkat uppernartut atornissaat. Tassa tunngaveqarluartumik oqaluttariaqarpoq uppernarsaatillu atorsinnaasut saqqummiunneqartariaqarlutik. Tusarnaartuttaaq eqqarsalersinniarlugit ikiortariaqarpavut, ataatsimut aallaavilertariaqarluta oqaluuserisarlu naammattumik nassuiarlugu tamatuma atorneqarnissaa takutillugu. Tamatumunngattaaq atatillugu Bibelimi najoqqutassaqarpugut.

15. (a) Marsip Qattorngani oqalugiarami qanoq ililluni Paulusip tusarnaartut alapernaasilerpai, ataatsimullu aallaaviliilluni? (b) Paulusip oqalugiaataa qanoq ililluni tunngaveqarluartumik ataqatigiissitsinermut maligassaalluarpa?

¹⁵ Apustili Paulus taamaaliorpoq Athenitoqqami Marsip Qattorngani tusaamasaasumik oqalugiarnermini. (apustilit suliáinik agdlagkat 17:22-31) Aallarniinera alapernaatsitsilerpoq ataatsimullu aallaaviliilluni oqarmat: ’Angutit Athenimiuususi ukorsii, malugaassi tamatigut Guutissinnik mianerinnittorsuususi.’ Qularnanngitsumik tusarnaartut tamanna imminnut nersualaarutitut paasivaat. Paulusip tunisivik ’Guutip nalusap pia’ eqqartoreeramiuk, tunngaveqarluartumik qularunnaariartuaartitsisumillu nassuiaanini nangippaa. Ilisimatippai Guuti taanna nalusaat ’silarsuarmik taassumaniittunillu tamanik pinngortitsisuusoq’. Athena Grækerillu guutiliaat allat assiginagit Guuti taanna ’naalaffinni assannik sanasimasuni ineqanngilaq; inuillu assaannik sumik ajorsaateqartutut kiffartorfigineqaraanngilaq’. Apustilip taava paasitippai Guutip taassuma inuunermik tunisimagaatigut nalornillutalu taassumunnga ujaarlerusaartussanngortissimanngikkaatigut. Nangilluni Paulusip nalunaarpaa Pinngortitsisup, inuit guutipilussiortarnerat ilaginnarallarsimagaluarlugu, ’maanna inuit tamaasa tamaginni ittut allamik isumataaqqugai’. Tamanna tunngavigilluarlugu eqqarsaat manna saqqummiuppaa: ’Guutip inuit najugaat naapertuilluarluni angut taamaaqqusani toqusunillu makititani kiffaralugu eqqartuukkumaarpaa’. Paulusip ’Jesusimik makiffissamillu iivangkiiliu oqaluutigimmagu’, Athenimiut paasivaat Eqqartuussisoq taanna tassaasoq Jesus Kristus. — apustilit suliáinik agdlagkat 17:18.

16. Teokratiimik ilinniarfik Paulusillu Marsip Qattorngani oqaluugiaataa qanoq ililluta oqaluussinitsinni iluaqutigisinnaavavut?

¹⁶ Tamaani Marsip Qattorngani Paulus illumiit illumut oqaluussinngikkaluarpoq. Oqalugiaataali teokratiimillu ilinniarfimmi ilinniartinneqarnerput tunngavigalugit, Jehovamut nalunaajaasuusugut oqaluussinermik pitsaanerulersitsinissatsinnut ilinniartinneqarluarsinnaavugut. Aap, tamakkua tamarmik oqaluussisartutut angusaqarluarnerunissatsinnut ikiortarpaatigut, soorluttaaq Paulusip tunngaveqarluartumik tunngaviginiakkallu uppernartut atorlugit qanga Athenimiut uppertunngornissaannut ikiorsimagai. — apustilit suliáinik agdlagkat 17:32-34.

Assersuutit ilikkarnartut atukkit

17. Oqaluussinermi assersuutit qanoq ittut atortariaqarpavut?

¹⁷ Teokratiimik ilinniarfiup aammattaaq Guutip kiffai illumiit illumut oqaluussinermi oqaluusseriaatsinilu allani assersuusiorluarsinnaanissaannik ikiortarpai. Pingaarutillit erseqqissarniarnerini assersuutit paasiuminartut naleqqulluartullu iluaqutaasarput. Pissutsit tusarnaartut ilisimasaat aallaavigalugit assersuussiorsinnaavugut, assersuutitigullu nassuiarniakkavut ilumut paasineraat qulakkeerniartarlugu. Jesusip assersuusiaasigut piumasarisat tamakku tamarmik naammassineqarput.

18. Assersuutigalugu qanoq ililluta Matîuse 13:45, 46 oqaluussinermi atorsinnaavarput?

¹⁸ Assersuutigalugu, Jesusip assersuusiaa manna eqqarsaatigeriaruk: ’Aamma qilammiup naalagaaffiata inuk niuertuusoq pitsaanernik sapanngarissorsiortoq assigaa; sapanngarissorlu ataaseq akisoorsuaq takugamiuk pigisani  tamaasa tuniartorpai taanna pisiaralugu.’ (Matîuse 13:45, 46) Sapanngat naleqartorujussuupput uillunilu uumasunilu qituttuni allani nassaassaallutik. Sapanngalli ilaannaat aalajangersimasut kusanartunik taaneqarput. Assersuusiami niuertoq immikkoortitsisinnaassuseqarpoq sapanngap tamatuma nalilernissaanut, pisiarerusungaaramiullu pigisani allat tamaasa akigeriaannaallugit. Immaqa pulaaqqiinermi imaluunniit Bibelimik ilinniaqqissaarnermi assersuusiaq tamanna atorsinnaavarput takutinniarlugu inuk Guutip naalagaaffianik pingaartitsisoq niuertutut taassumatut iliuuseqarumassasoq. Inuup taamaattup inuunermini Naalagaaffik siulliutissavaa, paasillugu pilliutinit tamanit naleqarnerusoq.

Sunniilluartumik naggasiigit

19. Illumiit illumut oqaluussinermi naggasiineq sumik siunertaqarpa?

¹⁹ Teokratiimik ilinniarfimmi ilinniarneqartarportaaq oqalugiaatip naggasernerata oqaluuserisamut toqqaannartumik atassuteqarnissaa tusarnaartullu qanoq iliortariaqarnerannik takutitsillunilu kajumissaarinissaa. Illumiit illumut oqaluussisarnermi pulaarfigisaq paasitinneqarluartariaqarpoq qanoq iliortariaqarneranik kissaateqarnerput, assersuutigalugu atuagassianik Bibelilersaarutaasunik tigusinissaa imaluunniit kingorna pulaarfigineqaqqinnissaminut ilassinninnissaa.

20. Matîuse 7:24-27 qanoq ililluni naggasiinermik sunniuteqarluartumik maligassaalluarpa?

²⁰ Jesusip qaqqami oqaluusaata naggaserneqarnera maligassaalluarpoq. Assersuut paasiuminartoq ikiortigalugu Jesusip takutippaa oqaatsimi maleruarneqarnissaat silatusaarnerussasoq. Naggasiilluni oqarpoq: ’Taamaattumik kinaluunniit oqaatsinnik tamakkuninnga tusartoq malinnittorlu assersuussavara angummut sianisuumut qaarsumi illuliortumut. Siallersorsuanngormat kuussuaqalermallu, anorersuillu pitorarlutik sakammanni illu uppinngilaq, qaarsumut tunngavilerneqarami. Kinaluunniilli oqaatsinnik tamakkuninnga tusartoq malinninngitsorlu assersuunneqassaaq angummut sianiitsumut sioqqani illuliortumut. Siallersorsuanngormat kuussuaqalermallu anorersuillu pitorarlutik sakammanni illu uppippoq upperujussuarluni.’ (Matîuse 7:24-27) Guutip kiffaasa pulaakkat iliuuseqarnissaat anguniarlugu ilungersortariaqarnerannut assersuut pitsak.

21. Eqqartukkatta suna takutippaa, sunali puiussanngilarput?

²¹ Eqqartukkatta takutippaat teokratiimik ilinniarfiup amerlasuut oqaatsimik kiffartuuteqartutut piukkunnartunngornissaannik qanoq ikiorsinnaagai. Puigussanngilarpulli piginnaassuserput Guutimit pimmat. (2 Korintumiut 3:4-6) Oqaluussisartutullu qanorluunniit piukkunaateqarluartigigaluarutta, inuit Guutip Kristus aqqutigalugu kajungersinngippagit uppertunngornissaannut kimigiiserfigisinnaanngilavut. (Juánase 14:6) Guutimmi innuttaasa anersaakkut aaqqissuussinerit tamaasa Jehovameersut atortariaqarpaat inuunermik naassaanngitsumik ilassinneriaannaasut naniniarnissaannut. (wD 15/1 91)

Qanoq akissavit?

□ ’Minguitsumik uummatillit’ kikkuuppat, qanorlu ilillutik ’Guuti takussavaat’?

□ Illumiit illumut Naalagaaffimmik tusagassaq oqaluussissutigigaanni suut eqqarsaatigineqartariaqarpat?

□ Oqaluussinermi qanoq ililluta Guutip oqaasia eqqortumik atorsinnaavarput?

□ Suna ikiortigalugu qularunnaarsitsilluta tusagassaq tunngaveqarluartumik saqqummiussinnaavarput?

□ Oqaluussinermi assersuutit atortakkavut pillugit suna eqqaamasariaqarparput?

□ Oqaluussilluta sulinitsinni naggasiinerit sumik siunertaqarpat?

[Atuaqqissaarnermi apeqqutit]

[Qupp. 27-mi assiliartaq]

’Minguitsumik uummatillit Guuti takussagaat’ oqarami Jesusip suna isumagaa?

[Qupp. 29-mi assiliartaq]

Allassimaffiit iserfigilluartariaqarpavut, ersarissumik atuartariaqarlugit, paasiuminartumillu erseqqissumillu nassuiartariaqarlugit