Inuusuttut aperipput:

Inuusuttuaraalluni naartuleraanni qanoq iliortariaqarpa?

Inuusuttuaqqat naartulertarnerat naartuersittarnerallu sumi tamaani ajornartorsiutaavoq. Atuartartutta inuusuttut ilaat kristumiuupput katinnissartik sioqqullugu silatusaarlutik kinguaassiuutitigut atoqateqarsimanngitsut, aammattaarli millionilikkuutaanik allanik allatorluinnaq inooriaaseqartunik Napasuliaq Alapernaarsuiffik atuartartoqarpoq. Taamaattumik ilanngutassiaq manna anaananut inuusuttunut tamanut ikiuutissatut allataavoq, aammalu suli katinnani kinguaassiuutitigut atoqateqartarnerup kingunerinik nuanninngitsunik eqqaasitsisuulluni.

„NAARTULERPUNGA 15-inik ukioqarlunga,“ Ann oqaluttuarpoq. „Qanoq iliornissara nalulluinnarsimavara — naartuersissanerlunga, meerassara meerarsianngortissanerlugu, imaluunniit?“ Ukiumi tamatumani niviarsiaqqat inuusuttuaqqat Amerikamiut naartulersut millioninit amerlanerusut Ann ilaannaraat.

Alianaraluartumik ilaatigut pinngitsaalineqarnermik kingunerisaanik niviarsiaqqat inuusuttuaqqat naartulertarput, amerlanertigulli katissimanngitsut akornanni nammineq kajumissutsimik atoqatigiittarneq inuusuttuaqqat naartulertarnerannut pissutaasarpoq. * Sunaluunniilli pissutaagaluarpat, niviarsiaraq inuusuttuaraq katissimanani naartulersoq oqimaatsunik aalajangigassaqarpoq: Katissava? Meerartaassani meerarsianngortissavaa? Naartuersinneq aaqqiissutissaava? Naartulerneq inuit marluk piliarimmassuk meeqqap ataataata akisussaaffeqaqataanissaa naleqqutiinnarpoq. (Ungaluligaq takuuk.) Amerlanertigulli niviarsiaraq kisimiilluni oqimaatsunik tamakkuninnga aalajangiiniartariaqartarpoq, immaqa angajoqqaani ikiortigalugit. Aalajangigaalu taassuma meerassaatalu timikkut, misigissutsikkut anersaakkullu ineriartornissaanut qaqugumut sunniuteqassapput.

’Katissaagut?’

Amerlasuut qularnanngitsumik isumaqassapput meeqqap ataataanut katiinnarnissaq pitsaanerpaassasoq, niviarsiaqqap ilaqutaasalu tusaamanerlugaalernissaraluannut illersuutaassammat, meerarlu angajoqqaaminit marluusunit perorsarneqassalluni. Katinnerli tamatigut aaqqiissutissaanngilaq. Siullermik, kukkuneq Guutip isaani aaqqinneqarsinnaavoq aatsaat isumataarnikkut. * (Jesaja 1:16, 18) Aappassaanik, katipallaannarnikkut  niviarsiaqqap ajornartorsiutai artornarsisinneqaannassapput. Nukappiaraq niviarsiararlu suli ’inuusuttuunerup aallaqqaataaniikkamik’, aappariinnermik ingerlatsilluarnissaminnut immaqa suli inuusuppallaarput. (1 Korintumiut 7:36, NV) Amerlasuutigut ataataasoq tassaasanngilaq kristumiu ilumoortoq taamaattumillu niviarsissamut kristumiuusumut uiunissaminut naleqqunnani. — 1 Korintumiut 7:39.

Dr. Arthur Elster aamma oqarsimavoq: „Angutit inuusuttuaqqat ataatanngujaarpallaartut maangaannaq atuarfimmit anigajupput, taamaattumillu suliffissarsinissaat ajornarnerusarluni.“ Aningaasanillu ajornartorsiuteqarpallaarnerup aappariinneq aserorsinnaavaa. Misissuinerit naapertussagaanni, katittut 50-75 procentii naartulerneq pissutigalugu katittarput!

Katinneq asuliinnaanngilaq, tuaviuussassaanani. (Eprîarit 13:4) Immaqa eqqarsarluaqqissaareernikkut isumaqatigiittoqarsinnaavoq katinnissaq silatusaarnerunngitsoq, pitsaanerussasorlu niviarsiaqqap angerlarsimaffimmini angajoqqaaminit ikiorneqarluni meeraq perorsarpagu, aappariinnermi ajornartorsiorfiusumi perorsarnissaanut taarsiullugu.

Naartuersinneq Bibelimi qanoq oqaatigineqarpa

Niviarsiaraq inuusuttuaraq oqarsimavoq: „Inuuninni angorusutakka amerlaqaat, meeqqamullu inissaqanngilaq.“ Taamaattumik amerlasuut naartuersinnissartik qinertarpaat. * Eqqortuuali pilersaarutini ’meeqqamut inissaqannginnera’ pissutigiinnarlugu naartuersinnikkut meeqqamik toqutsinissaq?

Mosesimik allakkat aappaat 21:22-24-mi Bibelimi meerassaq suli erniunngitsoq pillugu allassimasoq malugeriaruk: „Angutit paasut arlaata arnaq naartusoq sakallugu naartuanik anitsisippagu, arnarli allakkut innarlerneqanngippat, taava angut taamaalisitsisoq eqqartuussisut akuersineratigut arnap uiata taarsiissutigeqqusaatut annertutigisumik akiliisinneqassaaq. Aqqunartoqarsimappat [anaanaasumik imaluunniit meerassamik] taava tamanna  naleqartissavarsi inuuneq inuunermik.“ Aap, meerassap suli inunngunngitsup toquneranut pisuusoq inuartutut naatsorsuussaasimavoq!

Nakorsat ilaat oqartarput naartoq kinaassuseqanngitsuusoq. Guutili allatut oqarpoq. Naartoq kinaassusilittut, inuttut uumasutut isigaa! (Tussiaat 139:16) Meerassamik suli erniunngitsumik toqutsisoqarsinnaanerpa Guutimullu, ’tamanik inuunermik tunisisumut’, ajunngitsumik attaveqartuaannarluni? — apustilit suliáinik agdlagkat 17:25.

Atuakkami Growing Into Love-mi naartuersinneq pillugu allassimasoqarpoq: „Naartunerup nassatai naartumik katatsinerup killilertarpai, naartuersinnerli misigissutsikkut annertuumik nanertisimanermik nassataqartarpoq. . . . Inuusuttuaqqap . . . immaqa naartoq naartutuinnaq takorloortarpaa . . . Inatsisitigulli nassuiaatissarpassuaqaraluartoq ilumigut puiortanngilaa naartorileraluakkani inuulersinnaagaluartoq.“

Tamanna inuusuttuaqqap Lindamik atillip paasilersimavaa. Ilaquttami kanngunarsagaanissaat annilaanngatigigamiuk naartuersissimavoq. Tamatumali kingorna qanoq misigisimava? „Qissaserpunga tamarmalu sajuttuinnanngorlunga; qanoq iliorsimanera aatsaat paasilerpara. Meerassara, inuk alla, toqussimavara!“ Ullumikkut Lindap naartuersinneq qanoq isigaa? „Inuuninni kukkussutima annersaraat.“

’Meeraq pilersorluarsinnaanngilara’

Anaanat katissimanngitsut ilaasa meerartaatik meerarsianngortittarpaat. Taakkua ilarpassui Heatheritut, atuagassiami Seventeen-imi issuarneqartutut, misigipput: „Ilaannikkut taama imminut ajornartorsiutigisareertigalunga, taava qanoq ilillunga meeraaraq isumagisinnaassavara? Meeqqat nuannareqaakka, naalungiarsuillu asaqaakka, nalunngilarali nammineq meerara pilersorluarsinnaanaviarnagu.“

Ilumoorpoq meerarsianngortitsineq naartuersinnikkut meeqqamik toqutsinermit pitsaanerummat. Anaanamullu inuusuttuaqqamut misilittagaqanngitsumut kisimiilluni meeqqamik perorsaanissaq mersernarsinnaasorujussuuvoq. Soorlu anaanaq aappaqanngitsoq Vågn op!-imut oqarsimasoq: „Akisussaaffigiligaq annertoorujussuuvoq, akisussaaffik kiserliortutut misiginaqisoq artornaqalunilu, aammalu annertuunik pilliuteqarnartoq.“ Eqqaamajulli angajoqqaat ’inoqutiminnik isumaginninnissaannik’ Guutip akisussaaffilersimammagit. (1 Timûtiuse 5:8) Amerlanertigut niviarsiaqqamut inuusuttuaqqamut pitsaanerusarpoq nammineq meeqqani perorsaruniuk.

Taamaattumik Ann, aallaqqaataani eqqartorneqartoq, silatusaartumik aalajangerpoq, oqinnerpaajunngikkaluamik. „Aalajangerpunga meerassara tigummiinnarniarlugu,“ oqaluttuarpoq. „Angajoqqaama taamani ikiorpaannga sulilu ikiorlunga.“ Kisimiittuulluni anaanaalluni artornartaqaaq, kisianni ajornanngilaq, anaanaasullu inuusuttut amerlasuut suliartik tamanna ineriartuutigisarpaat. Ingammik anaanaasoq kisimiittoq qinunikkut aalajangersimappat meeqqani ’Jehovami perorsarlugulu inertertarniarlugu’. * (Evfisumiut 6:4) Angajoqqaarsiaasut immaqa meeqqap timikkut pisariaqartitaanik pilersuilluarnerusinnaagaluarput, Guutimilli ilumoortumik, Jehovamik, asannittunngornissaminut pisariaqartitaanik anersaakkut unnersuukkumassanerpaat? — 5 Moses 6:4-8.

Eqqaamajuttaaq naak immaqa anaanaasup kisimiittup meeqqani atortussatigut pitsaanerpaanik tunisinnaanngikkaluarlugu tamanit pingaarnerpaamik tunisinnaammagu, tassa asanninnermik. „Asanninnermik pigisaqarluni naatitanit nerisassiat pitsaanerupput uumissuinermik pigisaqarluni ussigup neqaanik siatamik nerisaqarnermit.“ — Ussatit 15:17.

Soorunami pisariaqanngitsumik aliasuutissarpassuit pinngitsoorneqarsinnaapput kinguaassiuutitigut kanngunartuliunngilluinnarnikkut. * Niviarsiararli inuusuttuaraq inassummik tamatuminnga unioqqutitsereersimaguni isumaqartariaqanngilaq neriuutaarulluni. Pissutsit ajornerulinnginniassammata silatusaartumik iliortariaqarpoq sapinngisaminillu pissutsit ajunngitsortaat atorluarniartariaqarlugit. Aap, Guuti, aqqummit ajortumit nigoraanni ’isumakkeerfiginnittuartartoq’, ikiortigalugulu annertoqqutigisinnaavaa. — Jesaja 55:7. (gD 8/5 90)

[Quppernerup ataani ilanngussat]

[Qupp. 24-mi ungalusaq]

Angajoqqaat inuusuttuaqqat — Nukappiaraq ataatanngoraangat

Siooranertik (soqutigisaqannginnertilluunniit) pissutigalugu nukappiaqqat niviarsiaqqamik naartulersitsigaangamik akisussaaffimminnit qimaaniartarput. Nukappiaraq oqaluttuarpoq: „Oqarfigiinnarpara: ’Aat, takujumaarpugut’.“

Qujanartumilli amerlanertigut nukappiaqqat meeqqaminnut arlaannik iliuuseqarusuttarput. Katinnissaq ilalernanngikkaangat (amerlanertigullu taamaattarpoq), amerlanerit aningaasatigut ikiuunnissaminnik neqerooruteqartarput. Allaat ulluinnarni meeqqamik paarsinermut ikiuunnissartik neqeroorutigisarpaat. Taamatulli aaqqissuussineq ilaannikkut sivisuallaanngitsumik atasarpoq, nukappiaqqap aningaasarsiakinnera aammalu naammagittarnermik piginnaassutsinillu angajoqqaat naalungiarsuuteqartut pisariaqagaannik amigaateqarluinnarnera pissutigalugit.

Imaassinnaavortaarlu nukappiaqqap niviarsiaqqamut attaveqarnerunera niviarsiaqqap angajoqqaavisa iluarinngilluinnaraat, kinguaassiuutitigut kanngunartulioqqinnerannik kinguneqarsinnaanera imaluunniit katiaarpallaarnissaat annilaanngatigigamikku. Immaqa nukappiaraq meeqqamut aalajangiisussaaqataaqqunngilaat, taamaalilluni niviarsiaqqap naartuersinneranik meerartaaminnilluunniit meerarsianngortitsineranik qanoq iliuuseqarfiginnissinnaajunnaarsillugu, taamalu nukappiaraq nammineq meeqqaminut isumaginneqataanissaanik tamanik arsaarlugu. Aammattaaq imaassinnaavoq meeqqaminut attaveqartitaasorujussuusoq, taavalu anaanaa angummut allamut katippat, angutillu taassuma meeqqaminut ataatatut inangerpani, attaveqarnerat kipitinneqariataartoq.

Taamaattumik qularutissaanngivippoq aammattaaq ataatat katissimanngitsut akisussaassuseqanngitsutut iliorsimanerminnut kingunipilutsitsisarmata. Ataataq katissimanngitsoq 16-inik ukiulik oqaluttuarpoq: „Misigissutsikkut artorsarnartaqaaq. Sunaluunniit iliuusererusunnartarpoq piffissaq utertikkusukkaluarlugu, ajornarluinnaqaarli.“ — Atuagassiaq „’Teen“ novemberi 1984.