Tamanut utertitsissut angeqataasoq

’Inuup ernera tikiutinngilaq kiffartorfigeqqulluni, kisianni kiffartussalluni inuuninilu akissatut tunniutissallugu amerlasuut utertinneqaatissaannik.’ — MATÎUSE 20:28.

1, 2. (a) Sooq oqartoqarsinnaava utertitsissut Guutimit inuiannut tunissutaasoq annerpaaq? (b) Utertitsissummik misissuineq qanoq ililluta iluaqutissarsiffigisinnaavarput?

UTERTITSISSUT Guutimit inuiannut tunissutaavoq annerpaaq. ’Utertitsitsissutikkut ajortitsinnik isumakkeerfigineqarsinnaavugut’. (Evfisumiut 1:7) Utertitsissut qilammi nunamiluunniit paratiisiusumi inuunermik naassaanngitsumik neriuummut tunngaviuvoq. (Lúkarse 23:43, NV); Juánase 3:16) Aammattaaq utertitsissut tunngavigalugu kristumiut maanna Guutimut minguitsumik attaveqarsinnaalereerput. — sarĸúmersitat 7:14, 15.

² Taamaattumik utertitsissut tassaanngilaq eqqarsaataannaq timitaqanngitsoq. Najoqqutassat Guutimeersut malillugit inatsisitigut tunngaviligaavoq ajunngitsorsiassanillu tigussaasunik nassataqarluni. Ilumoorpoq utertitsissummik ajoqersuut ’paasineq ajornakusoortunik’  ilaqarmat. (2 Pîtruse 3:16, NV) Utertitsissummilli aaqqissuussamik misissueqqissaarnissaq asuliinnaassanngilaq, utertitsissut Guutip inunnik asanningaassusianut ersiutaammat. Utertitsissutip isumaa paasigaanni, Guutip ’pisuussusiata ilisimaneratalu ilisarsineratalu’ killisissaanngitsut pingaarnersaasa ilaat paasineqarsinnaapput. — Rûmamiut 5:8; 11:33.

Apeqqutit aalajangigassat

3. Utertitsissutissamik akiliinissaq qanoq ililluni pisariaqalersimava, aamma sooq inuiaat ajortuliornerat Guutip naammagiinnarsinnaasimanngilaa?

³ Utertitsissut pisariaqalersimavoq inuk siulleq, Adam, ajortuliormat taamaalillunilu nappaatit, anniaatit aliasuutillu kinguaaminut kingornussaritillugit. (Rûmamiut 8:20) Kingornussaminnik naammalluinnanngitsuunertik pissutigalugu Adamip kinguaavi tamarmik tassaalerput ’kamannermut qitornat’ toqusariaqartut. (Evfisumiut 2:3; 5 Moses 32:5) Guuti najoqqutaqanngitsutut naakkiginninnermik misigissutsimit aqunneqartinngilaq imaaliallaannarlu inuiaat isumakkeerfiginagit. Nammineq oqaasiini ersersinneqarpoq ’ajortip akissarsiarititaa tassaasoq toqu’. (Rûmamiut 6:23) Guutip imaaliallaannaq inuit ajortiliussusiannik isumakkeerfigigaluarunigit, najoqqutassiani naapertuilluartut sumiginnassagaluarpai taamalu atorunnaarsillugit. (Job 40:8) Kisianni ’naapertuilluarneq iluarnerlu Guutip issiavissaarsuata tunngavigai’. (Tussiaat 89:15) Guutip naapertuilluassutsi sukkulluunniit sanioqqukkaluarpagu inatsisaassuseq anneruliinnassagaluarpoq — aammalu qilammi nunamilu Kisimi Oqartussaanera sanngiilliartulissagaluarluni. — Naleqqiuguk Nalunaajaasup oqaasii 8:11.

4. Satanip pikitsitsineratigut apeqqutit akerleriissutaasut suut pilerpat?

⁴ Aammattaaq Guutip apeqqutit akerleriissutaasut allat, apeqqutit pissutsinit atoruminaatsunit inuit atuligaannit pingaarnerungaartut, Satanip pikitsitsineratigut pilersut aalajangertariaqarsimavai. Jehova sallutuutut naalakkatullu naalliutsitsisutut pinngortitaminik ilisimassummik kiffaanngissutsimillu erliguussisutut Satanip pasilleramik Guutip aqqa ajunngitsoq taaqutserpaa. (1 Moses 3:1-5) Guutilu siunertaminik — inunnik naapertuilluartunik nunarsuup ulikkaarnissaanik — naammassinninniarnerani akornusertutut pineratigut Satanip Guuti pissaaneqanngitsutut saqqummiuppaa. (1 Moses 1:28; Jesaja 55:10, 11) Aammattaaq Guutip kiffai ilumoortut Satanip sapiiserluni mamarlerpai, oqarluni namminissarsiortumik pissuteqarlutik Guuti kiffartuukkaat. Satan pingaakujulluni oqarpoq arlaannaalluunniit tatineqaleruni Guutimut ilumoortuaannarnavianngitsoq. — Job 1:9-11.

5. Satanip unammillernera sooq Guutip tusaanngitsuusaaginnarsinnaasimanngilaa?

⁵ Unammillerluni apeqqusiinerit tamakku Guutip tusaanngitsuusaaginnarsinnaasimanngilai. Akineqanngikkunik Guutip naalagaassusiata tatigineqarneranik tunngavianillu ajoqusiissapput. (Ussatit 14:28) Inatsisit aaqqissugaanerlu atorunnaarsinneqaraluarpata, qilammi nunamilu tamarmi uivernersuaqalissannginnerpa? Taamaattumik nammineq naapertuilluassutsilu pillugit Guutip kisimi oqartussaanini aalajangersartariaqarpaa. Kiffani aalajaatsut imminut ilumoorluinnarnerminnik takutitsinissamut periarfissinnissaannik akiitsugaqarfigai. Taamaattumik apeqqutip akerleriissutaasup malunnarluartup ataasiaataasumik najoqqutassaasumillu aalajangerneqarnissaanik periarfissiisumik pissutsit inuiaat ajortiliusut atugaat isumagisariaqalerpai. Kingorna Israelimut oqarsimavoq: „Uangaana kisima pinerluttuliassinnik piiaasunga, uanga, uanga imminut pillunga.“ — Jesaja 43:25.

Utertitsissut — matusisoq

6. Oqariaatsit suut atorlugit Bibelimi eqqartorneqarpa qanoq ililluni Guutip inuiaat annaakkumaarai?

⁶ Tussiaat 92:6-imi atuarpugut: „Ilami angingaarmata naammassisatit, [Jehova], eqqarsaatitillu siunersissaanatik!“ Taamaattumik Guutip inuiannut iliuuserisimasai paasissagutsigik nammineq qanoq iliuuseqartariaqarpugut. (Naleqqiuguk Tussiaat 36:6, 7.) Qujanaqaarli paasisaqarnerunissatsinnik Bibelip ikiormatigut, oqariaatsit assigiinngitsut Guutip suliaanik misinnangaartunik sammivinnit assigiitsunit eqqartuillutillu paasissutissiisut atornerisigut. Utertitsissut Bibelimi eqqartorneqarpoq akiliutitut utertitsissutaasutut, saammaanneqaatitut,  isumaqatigiissitsissutsitut aammalu pilliummik saammaanneqaatissamik pilersitsisutut. (Tussiaat 49:9; Daniel 9:24; Galâsiamiut 3:13; Kulorsamiut 1:20; Eprîarit 2:17) Oqaaserli utertitsissummik nassuiaasoq pitsaanerpaaq tassaavoq Matîuse 20:28-mi Jesusip nammineq atugaa: ’Soorlu inuup ernera tikiutinngitsoq kiffartorfigeqqulluni, kisianni kiffartussalluni inuuninilu akissatut tunniutissallugu amerlasuut utertinneqaatissaannik [grækerisut: lyʹtron].’

7, 8. (a) Oqaatsit grækerisuut hebræerisuullu akiliummut utertitsissummut atorneqartut sumik ilinniarfigisinnaavavut? (b) Assersuusiorlutit nassuiaruk sooq akiliutip utertitsissutissap utertitassani naligisariaqaraa.

⁷ Akiliut utertitsissut sunaava? Oqaatsip grækerisuup lyʹtron-ip tunngavigaa oqaluut isumaqartoq „iperarpaa“. Aningaasanut sorsunnermi tigusat iperagaatinniarlugit akiliutigineqartunut oqaaseq taanna atorneqarsimavoq. Allakkat Epriiarisuut-ni oqaatsip utertitsissummut atorneqartup koʹfær-ip tunngavigaa oqaluut isumaqartoq „matuaa“ imaluunniit „matussutissippaa“. Assersuutigalugu, Guuti Noamut oqarsimavoq umiarsuaq usserummik ’ussissassagaa’, imaluunniit nutsiinnavissagaanni „qallissagaa“ imaluunniit „matussagaa“ (kafarʹ). (1 Moses 6:14) Tassa tamanna tunuliaqutarissagaanni saammaassineq imaluunniit ajortinik utertitsissutitut akiliineq tassaavoq ajortit matoorneqarnerat. — Tussiaat 32:1.

⁸ Theological Dictionary of the New Testament-imi oqaatigineqarpoq oqaluummi koʹfær-imi ’tamatigut pineqartoq angeqataasoq’, angeqataasumik nalilik. Assersuutigalugu, angerutsip illerfiata matua (kappoʹræth) angerutsip illerfiata ilusianut naleqquttumik iluseqartariaqarsimavoq. Taamatuttaaq Guutip naapertuilluassusiata piumasaraa saammaanneqassagaanni imaluunniit ajortuliaq matuneqassappat ’inuuneq naleqartinneqassasoq inuunermik, isi isimik, kigut kigummik, assak assammik isigallu isikkamik’. (5 Moses 19:21) Ilaannikkut naapertuilluassuseq eqqortinniarneqartarpoq eqqartuussaasup inatsisit naapertorluinnarlugit pillarneqarnissaanut taarsiullugu angeqataasumik akiliinikkut. Assersuusioriarta. Mosesimik allakkat aappaat 21:28-32-mi eqqartorneqarpoq ussik inummik nassummigaalluni toqutsisoq. Piginnittup nalunngikkaluarlugu ussik nassummigaagajuttuusoq, nakkutigilluarsimanngikkuniuk toqutaasup inuuneranut nammineq inuunini akiliutigisussaasimavaa! Piginnittorli ilaannakuusumik pisooqataappat, eqqartuussisunit toqqagaasunit piumaffigineqarsinnaavoq koʹfær-imik, tassa ’utertitsissummik’ imaluunniit akiliummik, ajortuliaminut matussutaasumik, akiliinissaanik.

9. Isarelikkut angajulliliaannik pisimasup qanoq ililluni ersersippaa akiliut utertitsissutissaq naatsorsoqqissaarneqartussaasoq?

⁹ Oqaaseq hebræerisooq alla utertitsinermut atatillugu atorneqartoq tassa oqaluut padhahʹ, isumaqartoq „akiliullugu aniguisippaa“. Mosesimik allakkat sisamaat 3:39-51-imi eqqartorneqarpoq aniguisitsinermut akiliut qanoq eqqorluartigisussaasoq. Israelikkut angajulliliaat Guutip pigisarisimavai, ukiumi 1513-imi u.n.a.s. poorskimi toqutaanissaraluannit annaassimagamigit. Taamaattumik piumasarisinnaasimagaluarpaa Israelikkut angajulliliaasa tamarmik naalaffimmi kiffartuutissagaanni. Tamatumunngali taarsiullugu piumasaraa angajulliliat aniguisinneqarnerannut akiliuteqartoqassasoq (pidhjomʹ, padhahʹ-p taggisaa). Ima peqqusivoq: „Taava uannut . . . tunniunneqarlit Levikkut Israelikkunni angajullilianut tamanut taarsiullugit.“ Taarsiissutissarli naatsorsoqqissaarneqassaaq. Naggueqatigiit Levikkut kisinneqarput; angutit 22.000-it. Taava Israelikkut angajulliliaat kisinneqarput; angutit 22.273-it. Angajulliliat Levikkunnit amerlanerussutaat 273-it tamaasa immikkut sekelinik tallimanik ’utertitsissummik’ akiliunneqarpata aatsaat angajulliliat naalaffimmi kiffartornissaraluaminnit aniugisinneqarsinnaapput imaluunniit pinngitsoortinneqarsinnaapput.

Utertitsissut angeqataasoq

10. Sooq uumasunik pilliutit inuiaat ajortaannik matusisinnaasimanngillat?

¹⁰ Eqqartorneqareersutigut paasisinnaavarput utertitsissutissaq utertitassamisut imaluunnit matusassamisut atsigisariaqartoq. Uumasut angutit uppertut Abelip nalaani kingornalu inuusimasut pilliutigisarsimasaat imminni inuit ajortaannut matussutaasinnaasimanngillat, inuit uumasunit qutsinnerummata.  (Tussiaat 8:5-9) Taamaattumik Paulus allassinnaasimavoq ’ussigit savaasallu aavisa ajortit piiarneq saperluinnaraat’. Pilliutit taamaattut utertitsissutissamut utaqqisamut assersuutaannaasimapput. — Eprîarit 10:1-4.

11, 12. (a) Sooq inuiaat ajortiliunerat matussutissinniarlugu inuit milliardilikkuutaat pilliutitut toqunissaat pisariaqarsimanngila? (b) Kina kisimi ’akiliutitut utertitsissutitut angeqataasutut’ atorsinnaasimava, toqualu sumik siunertaqarpa?

¹¹ Utertitsissutissap tamatuma Adam naligilluinnartussaavaa, Guutimmi eqqortumik iliorluni Adamimik toqumut pillaanera inuiaat tamarmik pillagaanerannik kinguneqarpoq. ’Adamimi tamarmik toqupput,’ Korintumiunut allakkat siulliit 15:22-mi oqaatigineqarpoq. Tassa pisariaqanngilaq Adamip kinguaavi tamaviisa pillugit inuit milliardilikkuutaat pilliutitut toqunissaat. ’Inukkut ataasiusukkut [Adamikkut] ajorti silarsuarmut tikiuppoq ajortikkullu toqu tikiulluni,’ (Rûmamiut 5:12) ’Toqu inukkut pinngormat’, inuiaat utertinneqaatissaat aammattaaq ’inukkut’ pisariaqarpoq. — 1 Korintumiut 15:21.

¹² Inuk utertitsissutissaq tassaasariaqarpoq inuk uiniusoq aalillu naammalluinnartoq — inuk Adamip naligilluinnagaa. (Rûmamiut 5:14) Pinngortitaq anersaajusoq imaluunniit ’Guutip ernerisa’ ilaat naapertuilluassutsip oqimaalutaaviinik oqimaaqatigiissitsisinnaanngilaq. Taamaallaat inuk naammalluinnartoq, inuk Adamimut toqumik pillaammik eqqorneqanngitsoq, ’utertitsissummik angeqataasumik’, utertitsissummik Adamip naligilluinnagaanik, pilersitsisinnaavoq. (1 Timûtiuse 2:6, NV) * ’Adamip kingulliup’ nammineq kajumissutsimigut inuunermi pilliutigineratigut ’inuup siulliup Adamip’ ajortuliaa akiliilluni utertitsissinnaasimavaa. — 1 Korintumiut 15:45; Rûmamiut 6:23.

13, 14. (a) Adamip Evallu utertitsissut iluaqutigissavaat? Nassuiaruk. (b) Utertitsissut qanoq ililluni Adamip kinguaavinut iluaqutaava? Assersuusiorit.

¹³ Adamikkulli Evalu utertitsissummik tamatuminnga iluaqutiginnissinnaanngillat. Mosesip inatsisai ima najoqqutassartaqarput: „Inuartup aningaasanik utertinneqaatissaanik akiliinikkut toqutaanissaraluaminit aniguinissaa akuerineqassanngilaq.“ (4 Moses 35:31) Imaanngilaq Adam salloqittarneqarami ajortuliortoq, piaaralunili ajortuliorpoq. (1 Timûtiuse 2:14) Oqaatigineqarsinnaavoq nammineq meeqqani toqussimagai, tassami naammalluinnanngissusia meeraasa kingornuppaat, taamaalillutillu toqumik eqqartuussummik eqqorneqarlutik. Ersarippoq Adam pinngitsoorani toqusariaqarsimammat, inuttummi naammalluinnartutut Guutip inatsisaanik unioqqutitsinissani qinersimavaa. Adam utertitsissummik iluaqutiginnissinnaatinneqaraluarpat Jehovap najoqqutassiai naapertuilluartut unioqqutinneqassagaluarput. Adamilli ajortuliornermigut pisassaa pitinneqareerpat, toqumik eqqartuussut Adamip kinguaavinut tutsinneqartoq atorunnaassaaq. (Rûmamiut 5:16) Inatsisit naapertorlugit isigissagaanni, ajortip pissaanera aserorsaataasoq mannguni ilanngullugu peerneqarpoq. Utertitsisup ’toqu ooqattaarpaa inuit tamaasa pillugit’, ajortip kingunipilui Adamip kinguaavi tamaasa sinnerlugit ersukkamigit. — Eprîarit 2:9; 2 Korintumiut 5:21; 1 Pîtruse 2:24.

¹⁴ Tamanna assersuusiorluni paasinarsarneqarsinnaavoq: Takorlooriaruk suliffissuaq hundredelikkuutaanik sulisoqartoq. Suliffissuup naalagaa unneqqaserluttuusoq pisuulluni suliffissuaq akiliisinnaajunnaarpoq, matusariaqalerlunilu. Inuit hundredelikkuutaat maanna suliffeerupput taamaattumillu akiligassatik akilersinnaajunnaarlugit. Sulisut aappaat, qitornaat akiligassaqarfiilu inuup ataatsip taassuma unneqqaserlunneranit eqqorneqarput. Inulli pisooq ajunngitsuliorumasoq orniguppoq suliffissuullu akiligassai akilerlugit, ammarteqqillugulu. Taamatut inuup ataatsip akiligassaasa akilerneqarneratigut suliffissuup sulisorpassui, taakkua ilaqutaat akiligassaqarfiilu, ikiorneqarput. Suliffissuulli naalagarisimasaa ajunngitsorsiassanik nutaanik iluaqutiginneqataava? Naamik, parnaarussaavoq suliffinilu qaqugumut annaallugu! Taamatuttaaq Adamip  kisimi akiligassaata peerneqarnera kinguaavinut millionilikkuutaanut iluaqusiivoq — Adami kisiat minillugu.

Utertitsissummik kina pilersitsiva?

15. Kina inuiannut akiliummik utertitsissutissamik pilersitsisinnaasimava, sunalu pillugu?

¹⁵ Tussiaasiortoq allappoq: „Kialuunniit inoqanni akiliullugu aniguisissinnaanngilaa, kinaluunniit inoqammi utertitaassutissaanik Guutimut akiliuteqarsinnaanngilaq. Akiliutissarmi utertitsiniutissaq inummut angivallaassaqaaq naammanngilluinnassalunilu.“ The New English Bible-mi oqaatigineqarpoq utertitsissutissamik akiliinissaq ’qaqugumut kialuunniit saperluinnassagaa’. (Tussiaat 49:8, 9) Kiami utertitsissutissaq pilersissinnaasimavaa? Jehovap kisimi sava naammalluinnartoq „silamiut ajortaannik peersitsisoq“ pilersissinnaasimavaa. (Juánase 1:29, NV) Inuiaat annaanniarlugit Guuti inngilimik aallartitsinngilaq. Pigisami pitsaanerpaartaat pilliutigaa ernituani ’nuannarisani’ aallartikkamiuk. — Ussatit 8:30; Juánase 3:16.

16. (a) Guutip ernera qanoq ililluni inuttut naammalluinnartutut erniarineqarpa? (b) Inatsisit naapertussagaanni, Jesus qanoq taaneqarsinnaava?

¹⁶ Aaqqissuussamut tamatumunnga Guutip ernerata kajumilluni peqataanermigut ’pissutsini iperarpaa’, qilammiutut inuutsimi qimanneratigut. (Filípimiut 2:7) Ernermi qilammiusup angajulliliami uumassutaa pissusialu niviarsissap juutiusup Mariap illiaanut Jehovap nuuppaa. Taava Maria anersaamit illernartumit ’ulinneqarpoq’, tamatumuuna uppernarsarneqarluni meerassaq illiaani alliartortoq illernartuussasoq, naammalluinnartuulluni ajorteqassananilu. (Lúkarse 1:35; 1 Pîtruse 2:22) Inuttut Jesus aterissavaa. Inatsisilli tungaannit isigissagaanni, ’Adam kingulleq’-mik taaneqarsinnaassaaq, Adam naligilluinnaramiuk. (1 Korintumiut 15:45, 47) Taamaattumik Jesus ’savaaqqatut assuarnaatsutut innarluitsutullu’ pilliutigitissinnaasimavoq, inuiaat ajortillit utertinneqaatissaattut. — 1 Pîtruse 1:18, 19.

17. (a) Akiliut utertitsissut kimut akilerneqartussaava, sunalu pillugu? (b) Guuti akiliummik utertitsissummik pilersitsisuullunilu tigusisuummat, akiliineq qanoq piva?

¹⁷ Utertitsissutissarli kimut akilerneqassava? Ukiuni hundredelikkuutaani kristumiuunerartut palasii oqartarsimapput Satan Diaavulumut akilerneqarsimasoq. Inuiaalli ’ajortimut kiffarsiarititaasimapput’ taamaalillutillu Satanip naalagaassusiata ataaniilersimallutik. (Rûmamiut 7:14; 1 Juánase 5:19) Eqqunngitsuliamullu pillaammik piumasarinnittoq tassaavoq Jehova, tassaanani Satan. (1 Tásalûníkamiut 4:6) Taamaattumik soorlu Tussiaat 49:8-mi erseqqissumik oqaatigineqartoq utertitsissutissaq Guutimut akilerneqartussaavoq. Jehovap utertitsissutissaq pilersippaa, Guutilli savaaraa pilliutigineqareerpat pilliutip utertitsissutissap nalinga Guutimut akiliutigineqassaaq. (Naleqqiuguk 1 Moses 22:7, 8 11-13; Eprîarit 11:17.) Tassuuna utertitsissut pingaanngitsunngortinneqanngilaq, asuli taartigiinninngortinneqarani, soorlu nammineq kaasarfimmit allap kaasarfianut aningaasanik ikisigaanni. Akiliut utertitsissut timikkut akiliinerunani inatsisitigut periaasiuneruvoq. Naak imminut akisugaluaqisoq utertitsissummik akiliuteqartoqarnissaanik piumasaqarnermigut Jehovap uppernarsarpaa najoqqutassiani naapertuilluartut aalajangiusimalluinnarini. — Jâko 1:17.

’Naammassivoq!’

18, 19. Jesusip naalliunnissaa sooq pisariaqarsimava?

¹⁸ Ukiumi 33-mi u.n.a.k. upernaakkut utertitsissutissap akiliutigineqarnissaanut piffissanngorpoq. Jesus Kristus sallusumik unnerluutigisaalluni tigusaavoq, pisuutitaalluni qisummullu kikiattugaalluni toqutaalluni. Anniarnermik nikanarsagaanermillu ’nillingaarluni  qullilillunilu’ Guutimut qinuvoq. (Eprîarit 5:7) Jesusip taama anniartitaatiginissaa pisariaqarsimava? Aap, Jesusip toqunini tikillugu ’ajortuillunilu minguillunilu ajortilinnit immikkoortitaanermigut’ Guutip kiffaasa assuarnaassusiat pillugu apeqqut akerleriissutaasoq tamakkiisumik akissutissippaa. — Eprîarit 7:26.

¹⁹ Aammattaaq Kristusip anniarneri inuiannut palasiunerunissaanut taassuminnga piukkunnarluinnartunngortitsipput. Tassaalernavianngilaq atorfikkaaq misigittaatsoq uungaannarlu isigisoq. ’Anniaramimi nammineq usserneqarluni usserneqartut ikiorsinnaavai.’ (Eprîarit 2:10, 18; 4:15) Jesus toqulerluni ajugaasimaarluni suaarsinnaasimavoq: ’Naammassivoq.’ (Juánase 19:30) Nammineq assuarnaassutsi uppernarsaannarsimanngilaa, aammattaarli inuiaat annannissaannut tunngaviliisimavoq aammalu, pingaarnerungaartoq: Jehovap kisimi oqartussaanera aalajangiussimavaa!

20, 21. (a) Sooq Kristus toqusunit makitinneqarpa? (b) Sooq Jesus Kristus ’anersaakkut uummartitaava’?

²⁰ Qanorli ililluni akiliut utertitsissut inuiaat ajortillit iluaqutissaannut atorneqassava? Qaqugu tamanna pissava qanorlu ililluni? Nalaatsornerinnakkut tamakku pissangillat. Kristus toqummat ullut pingajussaanni Jehovap toqusunit makitippaa. (apustilit suliáinik agdlagkat 3:15; 10:40) Iliuutsikkut pingaaruteqartukkut tamatumuunakkut, inunnit hundredelikkuutaanit takuneqartukkut, Jehovap ernini aalajaalluni kiffartorsimanera pillugu akiliinnanngilaa, aammattaarli inuiaat utertitsisissaattut suliassaanik naammassinninnissaanik periarfissillugu. — Rûmamiut 1:4; 1 Korintumiut 15:3-8.

²¹ Jesus ’anersaakkut uummartitaavoq’, nalunaarutigineqanngitsumillu periaaseqarluni nunamiutut timaa peerneqarpoq. (1 Pîtruse 3:18; Tussiaat 16:10; apustilit suliáinik agdlagkat 2:27) Taava Jesus makissimasoq anersaanngorluni ajugaasimaarluni qilaliarsinnaasimavoq. Pisumi tamatumani qilammiut qiimmattarsimassaqaat! (Naleqqiuguk Job 38:7.) Tikilluaqqusaanissanili nuannaarutiginiaannarlugu Jesus utinngilaq. Allanik suliassaqarpoq — ilaatigut inuiaat utertitsissutitut pilliutiminik iluaqutiginninnissaannik periarfissiuutissallugit. (Naleqqiuguk Juánase 5:17, 20, 21.) Ilanngutassiami tulliuttumi sammineqassaaq qanoq ililluni taamaaliortoq taamaaliorneralu inuiannut qanoq pingaaruteqartigilersoq. (wD 15/2 91)

[Quppernerup ataani ilanngussaq]

Apeqqutit uteqqiissutissat

□ Apeqqutit suut inuiaat annaanneqarnissaannit pingaarnerungaarpat?

□ Ajortinik akiliilluni ’utertitsineq’ qanoq paasisariaqarpa?

□ Kia akiliut utertitsissut pilersippaa, kimullu akilerneqarpa?

□ Sooq Kristus toqusunit makikkami anersaanngorluni makittariaqarsimava?

[Atuaqqissaarnermi apeqqutit]