Inuiaqatigiinnut tamanut oqaatsit minguitsut

„Kingorna inuiaqatigiit allanngortissavakka minguitsunik oqaaseqalersillugit, tamakkerlutik Jehovap aqqa torlorfigisinnaaqqullugu isumaqatigiillutillu kiffartuutissallugu.“ — SEFANJA 3:9, NV.

1, 2. (a) Ullumikkut Jehova Sefanja 3:9 eqquutillugu qanoq iliorpa? (b) Zefaniasip siulittuutaata uatsinnut attuumassuteqarnera paasiniarlugu apeqqutit suut akissutissittariaqarpavut?

NALITSINNI Jehova Guutip suliaq tupinnangaartoq uagut isigitilluta naammassiartorpaa. Inuit inuiaqatigiinnit tamanit pisut ataasiussuseqalersippai, qangali pruffiiti Zefanias aqqutigalugu siulittuisimanermisut, oqaatsinik nutaanik ilinniartinnerisigut. — Sefanja 3:9.

² Oqaatsit minguitsut taakku suunuku? Sooq pisariaqarpat? Ilinniarniarlugillu uagut qanoq iliortariaqarpugut?

Oqalussinnaassutsimik tunissut

3. (a) Piginnaassutsimik tupinnartumik sumik Adam pilerneqarpa? (b) Oqaatsit suut atorlugit Adam oqalussimava?

³ Piginnaassuseq tamanna, oqalussinnaassuseq, Guutimit tunissutaavoq, inunnik uumasunit immikkoortitsisoq. Inuk siulleq, Adam, pinngortitaasimavoq qarasalik sianissuseqartumik eqqarsarsinnaassusilimmik. Toqqusaamini nipip pinngortarfeqarami oqaqarlunilu qarloqarami oqaasiliorsinnaavoq, aamma tunngaviusunik oqaatsinik atorsinnaasaminik oqaatsinillu nutaanik pinngortitsissinnaassutsimik tunineqarpoq. Adamip Jehovap imminut oqaatigisai  paasisinnaavai, namminerlu eqqarsaatini oqaatigisinnaallugit. (1 Moses 1:28-30; 2:16, 17, 19-23) Oqaatsit Adamimut tunniunneqartut qularnanngitsumik tassaapput kingusinnerusukkut hebræerit oqaasiisut ilisimaneqalersut. Inuit oqaluttuarisaaneranni ukiuni 1757-ini siullerni inuit tamarmik qularnanngitsumik oqaatsit taakkuinnaat atorsimavaat. — 1 Moses 11:1.

4. Nimrodip nalaani pisimasut suut inuit oqaasiannut sunniuteqarpat?

⁴ Nimrodilli nalaani Jehova guutiitsut pilersaarutaannik akerliliilluni akuliussimavoq, Sinearillu narsarsuani qaqiffiliarsualiorniarlutik isumaqatigiittut oqaasii paatsiveerutsillugit. (1 Moses 11:3-9) Jehovap inuit siornatigut ataatsimut oqaatsiminnik eqqaamasaat tamaasa peersimagunarpai, taavalu nutaanik assigiinngitsunik oqaaseqalersillugit. Oqaatsinik nutaanik atorsinnaasaminnik tunineqaannanngillat, oqaasilerinermilli, tassa grammatikimik nutaamik tunineqarput. Oqaatsit Jehovap Babelimi pilersissimasai aallaavigalugit ukiut ingerlaneranni oqaatsit nutaat allat pileriartuaarsimapput, ullumikkullu, oqaatsinik ilisimatuut naapertussagaanni, silarsuarmi tamarmi oqaatsit 3000-t missaanniittut atuupput.

5. Qanoq ililluta paasisinnaavarput oqaatsit minguitsut ilinniarnissaat qanoq paasisariaqarnersoq?

⁵ Ima paasisariaqassava inuit oqaatsinik minguitsunik ilinniarniartut inunnguutsiminnik oqaatsitik taamaatissagaat oqaatsillu Guutip aallaqqaataani Adamimut tunniussimasai ilinnialissallugit? Pissutsit siulittuutip oqaatigineqaqqaarnerani atuuttut misissorutsigik tamanna paasissavarput.

Oqaatsinik minguitsunik pisariaqartitsineq

6-8. (a) Siulittuut Sefanja 3:9-miittoq oqaatigineqanngikkallarmat Judakkut upperisarsiornerup tungaatigut qanoq pissuseqalersimappat? (b) Inuiaqatigiit Judakkut eqqaanniittut qanoq pissuseqarsimappat?

⁶ Judakkut naalagaaffianni Manasse siulliulluni kunngiusimavoq, taassumalu kingorna Amon, Ba’alimut pilliiviliortiterlunilu, eqquiniartarlunilu anersaalerinermik siuarsaasoq, kunngiuvoq. (2 Kunnginik allakkat 21:1-6; 2 Israelikkut kinguaariit oqaluttuarisaanerat 33:21-23) Naggataatigut Amonip ernerata kingoraartaatalu Josiasip nalaani Jehovap pruffiitini Zefanias aallartippaa nunamut eqqartuussinissaminik mianersoqquseqqullugu. — Sefanja 1:1, 2.

⁷ Naak Judakkut namminneq oqaluttuarisaanerminnit allakkanillu isumassarsiarititaasunit nalunngikkaluarlugu Jehova Guutiusoq ilumoortoq, taamaattoq Ba’alisiortut ileqqulersuutaat kanngunartut peqataaffigisarpaat. Seqinermut, qaammammut ullorissallu ilaannut tassa nersutaasanngorlugit assilineqartartunut pallorfiginnittarput, taamaalillutillu Guutip inatsisai unioqqutilluinnarlugit. (5 Moses 4:19; 2 Kunnginik allakkat 23:5) Allaat upperisarsiornerit assigiinngitsut akuleriissillugit ingerlataraat soorlulusooq upperisarsiornerit tamarmik assigiimmik siunertaqartut, tassami Jehova ilumoorfigiumallugu uppernarsaajutigalutik guutipiluk Malkam ilumoorfigiumallugu uppernarsaapput. Ima eqqarsarput: „Pilluarnartumik perluutaasumilluunniit [Jehova] iliornavianngilaq!“ (Sefanja 1:4-6, 12) Inuiaallu Judakkut eqqaanni najugaqartut tamarmik Jehova taassumalu innuttai assortorsimavaat. Taamaattumik taakkununngattaaq Jehovap eqqartuussutini naammassissavai. — Sefanja 2:4-15.

⁸ Pissutsit tamakku tunngavigalugit Jehova ima siulittuivoq: „Kingorna inuiaqatigiit allanngortissavakka minguitsunik oqaaseqalersillugit, tamakkerlutik Jehova torlorfigisinnaaqqullugu isumaqatigiillutillu kiffartuutissallugu.“ (Sefanja 3:9, NV) Oqaatsit nutaat minguitsullu tamakku suuppat?

9. (a) Sooq oqaatsit minguitsut tassaannaanngillat hebræerit oqaasii imaluunniit Guutip oqaasii allassimasut? (b) Oqaatsit minguitsut suuppat, tamakkuninngalu ilinniarsimasunut qanoq sunniuteqarpat?

⁹ Hebræerit oqaasii eqqarsaatigineqarpat? Naamik, Judami najugaqartut oqaatsit taakku taamanikkut atoreerpaat, kisianni oqaasii iliuusiilu erseqqissumik Guutip isaani minguitsuunatillu assuarnaatsuunngillat. Oqaatsit minguitsut tassaannaanngillattaaq Guutip oqaasii allassimasut. Tamakkuttaaq taamanikkut pigaat. Pisariaqartitaalli tassaavoq Guuti pillugu taassumalu siunertai pillugit sallusuissummik eqqortumik paasisaqarnissartik, Guutillu kisimi anersaani ikiortigalugu tamatuminnga ikiorsinnaavai. Oqaatsit taakku minguitsut  ilikkarunikkik eqqarsariaatsimikkut, oqaloriaatsimikkut iliuutsimikkullu tamatigut takutissavaat Jehova Guutisut ilumoortutuatut akuerigitsik. (Sefanja 2:3) Taassuminnga tunaarinnissapput taassumalu kisimi oqartussaallunilu naalagaassusia tapersersorluinnassallugu. Ingammik tamatsinnut ullumikkut inuusunut tamakku tamarmik soqutiginaateqarput. Sooq?

Minguitsunik oqaaseqalersinneqartut

10. Qagugu siulittuut Sefanja 3:9-miittoq eqquuttussaasimava?

¹⁰ Siulittuut piffissami aalajangersimasumi eqquutissasoq, Sefanja 3:9-mit paasineqarsinnaavoq: „Kingorna inuiaqatigiit allanngortissavakka minguitsunik [oqaaseqalersillugit, NV].“ Qaqugumitaava? Versi 8-mi oqaatigineqarpoq Jehovap ’uumitsannini kamanninilu innertut ittut taakkununnga kuerarumallugit’ inuiaat ’katersorunigit’ nunami makitajuitsut minguitsunik nutaanillu oqaaseqalersissagai.

11. (a) Siornatigut Sefanja 3:9 qanoq marloriarluni eqquussimava? (b) Ullumikkut eqquunnera qanoq ililluni allaanerua?

¹¹ Kunngip Josiasip nalaani, Jehovap Babylonimiut sakkutuui aqqutigalugit eqqartuussummik naammassinninnera sioqqullugu, inuppassuit eqqunngitsumik guutisiorneq qimappaat Jehovamillu pallorfiginninnermut ilanngullutik. (2 Israelikkut kinguaariit oqaluttuarisaanerat 34:3-33) Ukiunilu hundredelinni siullerni Romamiut Jerusalemimik piuneerussinerat sioqqullugu, inuit tuusintillit Guuti taassumalu siunertai pillugit sallusuissut ilinniarsimavaat taassuminngalu pallorfiginninnermi ataasiussuseqalersimallutik. Jesus Kristusip oqaasiinit tamanit Jehovallu siunertaanik naammassinnilluni iliuusiinit tamanit sallusuissutip oqaasii taamanikkut pisuunngorsarneqaqaat. Aatsaalli uagut nalitsinni Sefanjap siulittuutaa nunarsuaq tamakkerlugu naammassineqalerpoq. Maanna naalagaaffiit tamarmik Guutip Ajugaqanngitsup ullussarsuani sorsunnissamut Harmagedonimut katersorneqarput. (sarĸúmersitat 16:14, 16) Naalagaaffinnik katersortitsineq tamanna 1914-mi Guutip Naalagaaffiata pilersinneqarneraniit aallartinneqarsimavoq. Taamanikkumiillu manna tikillugu Jehovap inuiaqatigiit silarsuarmi tamaneersut nutaanik minguitsunillu oqaaseqalernissaannik siulittuut piviusunngortissimavaa. Oqaatsit taakku ilinniarnissaat pingaaruteqartorujussuuvoq, aatsaammi oqaatsit minguitsut pigiliulluinnarutsigik annikilliornartumi angisuumi nalliuttussami annaqataajumaarpugut. — Joel 2:32.

12. (a) Jesaja kapitali 6-imi takusaq oqaatsinillu minguitsunik siulittuut qanoq imminnut attuumassuteqarpat? (b) Iluarisaanik Jehova kiffartorfigiuaannassagunikku sooq tanitat sinneri ikiorneqartariaqarsimappat?

¹² Tamanna naapertorlugu sorsunnersuup siulliup kinguninnguani Jehovap kiffani tanitaasut takorluukkamik alutornangaartumik Jesajap allagaani kapitali 6-imi allaatigineqartumik paasisaqalersippai. (Versit 1-4) Takorluukkap tamatuma erseqqissarpaa Jehova iluarisaanik kiffartorfigissagaanni minguitsunik qarloqarnissaq qanoq pingaaruteqartigisoq. Tamatumuuna takutinneqarpoq Jehova illernarnerpaasoq. Kiffai aamma taamatut pissuseqartariaqarput. (1 Pîtruse 1:15, 16) Kisianni tanitat sinneri ikiorneqartariaqarsimapput. Sorsunnersuup siulliup nalaani mingutsitaangaatsiarsimapput silarsuarmi pissutsit akuliuffigisimagamikkik. „Jehovamik mianerinninneq minguitsuuvoq“, inunnulli inuillu aaqqissuussinerinut qununermikkut qarlui attorneqarsimappullusooq, taamaalilluni Guutip oqaasianik oqaluussinerat nipangersinneqangajassimalluni. (Tussiaat 19:9, NV) Kristumiuuneraqatigiinnut attuumassuteqarnertik pissutigalugu suli taakkua ileqqorisaasa ilaannik mingutsitaaqqapput.

13, 14. (a) ’Sinneruttut’ qanoq ilillutik takutippaat eqqortumik isummersimallutik, Jehovallu qanoq iliorfigai? (b) Jehovap qanoq ililluni tanitat taakku minguitsunik oqaaseqalersippai?

¹³ Tanitalli sinnerisa inissisimanertik misiutiginngilaat, oqarlutillu Esajasitut: „Eqqanaq uanga, toqusussanngorpunga angutaagama minguttuunik qarlulik, nunaqqatigalugillu inuiaat minguttuunik qarlullit, maannalu isinnik takugakku kunngi, katersaarsuit [Guutiat Jehova, NV]!“ (Jesaja 6:5) Tanitat sinnerisa paasivaat inissisimanertik akuerineqarsinnaanngitsoq. Nakkaannajanatik aqqut ajortoq ingerlaffigiunnaarpaat Jehovamillu ilungersortumik oqaanneqarnertik pinaannatik ilassivaat. Palaseqatigiinnut Guutip Naalagaaffianik qarluinnarmikkut ataqqinnittunut naalagaaffiillu  peqatigiiffiannik, Folkeforbundimik, Guutip Naalagaaffianut ersiutaaneraallutik nersualaarisunut, ilanngutinngillat.

¹⁴ Kristumiut tanitaasut maniguullutik peqqissimimmata, qarlui Jehovap saammannermini minguiarpai. Jesaja 6:6, 7-imilu atuarpugut: „Kisianni serafit ilaata timmilluni ornippaanga; tigumiarpaa aamaq pilliivimmit pussugutinik tigusimasani; taanna qaninnut attuutitippaa oqarlunilu: ’Taassuma qarlunnut attuunneratigut pisuussutsinnik piiaaffigineqarputit ajortuliannillu isumakkeerfigineqarlutit!’“. Tusagassaavoq minguiarnartoq Guutip oqaasianeersoq innertut inuit ileqqutoqaannik ajoqersuutaannillu aseruisoq. Inunnut qununerat uummataannit peerneqarpoq, Jehovallu ataqqinaatissaanut qarlumik atornissaannut kajumissisinneqangaarlutik. Taamaalilluni Jehovap neriorsuutini eqquutippaa ’inuiaqatigiit minguitsunik [oqaaseqalersillugit], tamakkerlutik Jehovap aqqanik torlorfiginnequllugit’. — Sef. 3:9.

15. Suna siunertaralugu Jehovap ’sinneruttut’ minguitsunik oqaaseqalersippai qanorlu ilillutik tamanna naapertorluarlugu qisuariarpat?

¹⁵ Ullumikkut katersat Esajasitut ittut paasileramikku Jehova aperisoq Jesaja 6:8-mi eqqartorneqartutut: „Kina aallartissavara, kina oqariartortissavarput?“ nuannaarlutik akipput: „Piareersimavunga, aallartinnga.“ Tamanut ammasumik oqaluussisalernissamut peqataanissaq taakkununnga tamanut oqitsuinnaasimanngilaq, inuiattulli Guutip aqqanik atuisutut Guutimit atorneqarusupput. Taassuma anersaavata nakussatsippai, erniinnarlu amerliartulerput.

16. (a) ’Sinneruttut’ oqaluussinerat sunik ilimagineqarsimanngitsunik kinguneqarpa? (b) Amerlangaartut qanoq ilillutik takutippaat namminnertaaq oqaatsit minguitsut atorlugit oqaluttalersimallutik?

¹⁶ Ukiut ingerlaneranni erseqqissivoq oqaluussisarnerat ilimagineqarsimanngitsunik kinguneqartoq. Katersat Esajasitut ittut taakku ikiortigalugit Jehovap katersat allat oqaatsinik minguitsunik ilinniartilerpai. (Jesaja 55:5) Katersat taakkua tanitatut qilammi inuunissamik neriuutigisaqanngillat immikkulli pisinnaatitaaffittut isigaat katersanut Naalagaaffimmut atasunut ingerlaqataasinnaagamik taakkulu ataasioqatigalugit Guutip naalagaaffia pillugu oqaluussillutik kiffartoqatigisinnaagamikkik. ’Inuiaqatigiinnit immikkullu naggueqatigiissunit immikkullu inuiaasunit immikkullu oqaasilinnit tamanit’ aniartuaarsimapput massakkullu ’amerlangaartuupput’ arlalinnik millioniliullutik. Qarluminnik oqalunnerat silarsuup matuma avissaartuunnartuinut attuumassuteqanngilaq. Inuk kinaluunniit imaluunniit inuit peqatigiiffiat sunaluunniit neriuffiginngilaat. Akerlianilli ’nipituumik torlulapput oqarlutik: „Annassut Guutitta issiavissaarsuarmi issiasup savaaqqallu pigaat.“’ — sarĸúmersitat 7:9,10.

 Oqaatsit minguitsut ilinniarnissaannut piumasarisat

17. Sooq oqaatsit minguitsut ilinniarluarnissaat atornerannilu siuariartornissaq pingaaruteqarpat?

¹⁷ Qanorluunniit sivisutigisumik Jehovap peqatigiissortaanut ilaasortaasimagaluarutta, tamatta periarfissaqarluarpugut suli annermik oqaatsit minguitsut ilisimanerulernissaannut atornissaannullu pikkorinnerulernissamut. Pingaartorujussuuvoq taamaliorniarluta ilungersornissarput. Suna pillugu? Taamaaliorutta sallusuissummik asanninnerput takutissagatsigu.

18, 19. (a) Sooq aallaqqaataaniit sallusuissummik asanninnerup sakkortuup ineriartortinnissaa pingaaruteqarpa? (b) Sooq asanninnerup taamaattup pigiuarnissaa pingaaruteqarpa?

¹⁸ Asanninneq tamanna pingaaruteqartorujussuuvoq. Inuup isumaata uummataatalu ammarnissaannut peqataasinnaavoq, taamaalilluni allassimaffinnik paasinnianerulersitsilluni. Asanninnerullu tamatuma inuk Jehovamut qaninnerusumik attaveqalersissavaa taassumalu peqatigiissortaanik pingaartitsisunngortillugu. Sallusuissummik asanninnerup inuk eqqunngitsumik upperisarsiornerup kalunnerinit aniguisissinnaavaa. Inuit ilaasa Bibelimi tusagassaq soqutigaat, eqqunngitsumilli upperisarsiortut ileqqui inooriaasiallu qarsuppittoq taamaativinnagit. Sooq? Soorlu Tásalûníkamiunut agdlagkat áipait 2:10-mi nassuiarneqartoq, ’ilumoornermut [sallusuissummut] asanninnissaq annassutissaraluartik ilassinnginnamikku’. Taamaammat pingaaruteqarluinnarpoq asanninneq taamaattoq pigissallugu!

¹⁹ Sallusuissut ilassigutsigu, anersaakkut ineriartussagutta pingaaruteqarpoq asanninnerup tamatuma nakussatsinneqartuartarnissaa. Eqqaamajuk Jehovap sallusuissut oqaatsinut nutaanut assersuummagu. Oqaatsit nutaat ilinniarniaraangatsigik oqaatsillu amerlanerusut paasisinnaassagutsigik, eqqortumillu taasinnaassagutsigik, oqaasilerinerlu ilikkarluarsinnaassagutsigu ilaallu ilanngullugit, ilungersornissarput pisariaqartarpoq. Oqaatsinik nutaanik inunnillu taama oqaasilinnik asanninnerup siumukarnissatsinnut ikiorsinnaassavaatigut. Immaqa qaammatit arlaqanngitsunnguit qaangiunneranni oqaatsit nutaat ulluinnarpalaarnerusut ilikkarsinnaavavut, eqqortumilli atulissagutsigik ukiut arlallit peqqissaartumik ilungersortumillu ilinniarnissaat pisariaqarpoq. Oqaatsillu minguitsut ilikkarluartigerusukkutsigik taamatut ilungersortigisariaqarpugut.

20. (a) Oqaatsit minguitsut suup minguitsippai? (b) Sooq tamatta eqqumaniartuarnissarput pingaaruteqarpa?

²⁰ Ingammik maluginiartariaqarparput oqaatsit Guutip kiffaminut tunniussai, minguitsunik taaneqarmata. Imaanngitsoq immikkut ittumik grammatikeqarmata, kisianni ileqqussatigut anersaakkullu minguinnermut nalunaajaataammata. Oqaatsinut taakkununnga salluneq, peqquserlunneq mamarliinerlu ilaanngillat. Oqaatsinik minguitsunik atuisut tamarmik tamatigut ilumoortunik oqaluttariaqarput. (Sefanja 3:13; Evfisumiut 4:25) Oqalunnerisalu ersersissavaat Jehovap atoqatigiinnerup tunngaatigut najoqquttassiai qutsissutut aamma namminneq isigigitik. (Evfisumiut 5:3, 4) Bibelimilu eqqaasinneqarpugut Babylon Angisuumut, tassa eqqunngitsumik upperisarsiornerup silarsuarmi tamarmi naalagaaffissuanut, attuumassuteqartut tamarmik minguttuujusut. (sarĸúmersitat 18:2-4) Guutipiluisa assingi guutinik maajunnartunik taaneqarput. (Jeremia 50;2, NV) Taamaattumik pissusissamisoorpoq, oqaatsinik minguitsunik ilinniarniartut eqqunngitsumik upperisarsiornerup atortuinik peqarunnaarnissaat, ajoqersuutaanik tunuartitsinissaat, nalliuttorsiortarnerinut peqataasarunnaarnissaat oqariaatsinillu eqqunngitsumik upperisarsiornerup isumaanik ersersitsisunik atuiunnaarnissaat. Tamakkua tamarmik saniatigut sarĸúmersitat 16:13-16-imi paasitinneqarpugut sunniiniarneq naalagaaffinnik Guutip naalagaaffianut assortuisitsiniaalluni katersortitsisoq, minguttuujusoq inngilipilunnit isumassarsiarititaagami. Taamaattumik eqqumaniartuartariaqarpugut minguttuut tamakkua ilaannaataluunniit oqaluttarnerput sunnissanngippagu.

21. Oqaatsit minguitsut aamma sutigut malunnarsinnaappat?

²¹ Ilinniakkavut naleqqulluartumik oqaatsinik taaneqarput, imali paasisariaqanngilaq oqaatsinik taakkuninnga atuisut Jehovap innuttaasa akornanni oqariaatsit aalajangersimasut  nalinginnaasut atornissaat ilinniaannaraat. Oqalukkaangatta, niperput, kiinnatta isikkua ussersoriartarnigullu pingaaruteqartarput. Oqalunnermi timip ilaaneratigut nalunaarutiginiakkat oqaasiinnakkut ilaatinneqarsinnaanngitsut saqqummiunneqartarput. Oqaatsit oqaatigisinnaanngisaannik tusarliussisinnaapput. Misigissutsit qanoq ittuunerannik takutitsisinnaapput, ilutsinnilu qanoq ittorpiaanitsinnik takutitsisinnaallutik. Sinnganeq, assortuiumatussuseq kammannerlu, uinngup ajortiliusup suliaanut ilaasut, ajugaaffigisimanerivut ersersissinnaavaat. Inuunitsinni Guutip anersaava sunniuteqartikkutsigu, inunnut allanut atassuteqarniartarnitsinni inerititaqarluartissavaatigut. — Galâsiamiut 5:19-23; Evfisumiut 4:31, 32.

22. Oqaatsit minguitsut ilikkarluarutsigik aalajangiisarnitsinnut qanoq sunniuteqassappat?

²² Kialuunniit oqaatsinik nutaanik ilinniarsimasup nalunngilaa oqaatsit nutaat atorlugit eqqarsartalerneq, oqaatsinit inunnguutsimit pigisanit nutsereqqaarnani, inuunermi pisimasut pingaarnerpaat ilagigaat. Taamatuttaaq — sallusuissut atuaqqissaartartillugu, ilumoorluta maleruarniartillugu akuttunngitsumillu allat sallusuissummik ilangeeqatigisartillugit — paasiartulissavarput sallusuissut naapertorlugu eqqarsartalersimalluta. Sallusuissut inuuserilersimavarput. Nutaat pisoqqanut naleqqiuttuartariaaruppavut, qanorlu iliortariaqarnissatsinnik aalajangernissatsinnut nalornisooruteqartarunnaarpugut. Minnerpaannguakkut allaat ileqqoreqqusat Bibelimeersut pissusissamisoortumik najoqqutarisalerpavut. — Ussatit 4:1-12.

23. Qanoq takuneqarsinnaava Jehovap nalunaajaasui, sunilluunniit inunnguutsimit oqaaseqaraluarlutik, oqaatsit minguitsut atorlugit oqaluttut?

²³ Ullumikkut silarsuarmi inuit oqaatsit tusintillit atorlugit oqaluttarput, oqaatsilli minguitsut oqaatsit suulluunniit atorlugit oqaatigineqarsinnaapput. Qanortoq Jehovap kiffaasa nunarsuarmi tamarmi peqatigiillutik inuiannut tamanut oqaatsit minguitsut atorluarlisigik, isumaqatigiillutik kiffartorlutik tamanullu nalunaajaallutik Jehovap, Guutitta asasatta, ataqqinnaatissaanik! (wD 1/4 91)

Qanoq akissavit?

□ Oqalussinnaassutsimik tunissut sumik ilaqarpa?

□ Oqaatsit minguitsut suuppat?

□ Sefanja 3:9-p eqquunnera kikkut misigaat?

□ Qanoq ililluta takutissinnaavarput oqaatsit minguitsut asagivut?

[Atuaqqissaarnermi apeqqutit]

[Qupp. 11-mi assiliartaq]

Oqaatsinik minguitsunik ilinniarsimasut allanik ilinniartitsipput

[Qupp. 13-mi assiliartaq]

Jehovap nalunaajaasui silarsuarmi tamarmi sunilluunniit inunnguutsiminnik oqaaseqaraluarlutik minguitsunik oqaaseqatigiipput