Inuusuttut aperipput:

Sooq anersaapilunnut tungasut ingalassimasariaqarpakka?

„AATAGA qanitarisorujussuusimavara,“ niviarsiaraq inuusuttoq oqaluttuarpoq. „Toqummat aliasuutigisimaqaara. Attaveqarfigeqqissinnaanerlugu paaserusussimaqaara.“ Taamaattumik anersaapilunnut tunngasut misiligartalersimavai.

Nalunaarusiami qanittukkut saqqummersumi allassimavoq Tysklandimi meeqqat inuusuttullu ikinnerpaamik 200.000-it anersaapilunnut tunngasut assigiinngitsut misigisaqarfigisarsimagaat. Japanimi meeqqat atuarfianni atuartoqarpoq nuannariinnarlugu anersaarsiortartunik, taakku ilaasa allat eqqarsaataannik nuussisarneq sungiusarsimavaat, allallu kimitsinikkut sinittutut pissuseqalersitsineq, aammalu allat anersaapilunnik anisitsineq. Nigeriami meeqqat minnerit atuarfianni angakkuarniartartut ullumikkut takornartaanngillat. Ajoraluartumik aamma inuusuttut kristumiunit perorsarneqarsimasut ilaat, immaqa nalullugu, anersaanut tunngasunik pinnguaateqartarsimapput.

Sooq inuusuttut anersaapilunnut tunngasut taama alutoritigaat? Aamma sooq tamakkuninnga sammisaqarneq ulorianartuua?

Sooq ilaasa soqutigilersaraat

Anersaapilussiornermut tunngasunut ilaapput ullorissat najoqqutaralugit siulittuiniarneq, ilisiinneq, angakkuarniarneq, eqqumiitsumik tupinnartuliorneq assigisaannillu ikiorteqarluni anersaarsiorneq. Sooq inuusuttut taama amerlatigisut tamakkuninnga taama paasisaqarusutsigaat? Dirk tamakkuninnga paasisaqarusussimavoq ataatani toqoreersimasoq attaveqarfigerusoqigamiuk. Qularutiginngivissimavaa ’tarnikkut piginnaassutsini’ ineriartortissinnaagunigit tamanna ajornarnavianngitsoq. Taamaattumik eqqarsaqqissaarneq pinillu attornagit aalatitsiniarneq sammilerpai. Dirk oqaluttuarpoq taamatut eqqarsaqqissaarnerup anersaat silarsuaata killinganiitilersimagaani.

Inuusuttut allat siunissaq siooragaat. Qanoq ilillutik karakteriginnerulersinnaanerlutik imaluunniit katissinnaanissartik qanoq ilimanartiginersoq paaserusuppaat, anersaallu silarsuaannit ikiorneqarsinnaanissartik naatsorsuutigalugu. Isumakuluutiginarnerpaavoq Satanisiorneq. Sunaana upperisarsiornermi amiilaarnartumi tamatumani kajungernartuusoq? „Pissaaneqalerniarlunga taamaaliorpunga,“ Canadamiu inuusuttoq Satanisiortartoq nassuiaavoq. „Allanik ajoqusiinissannut pissaaneqalersippaanga.“

Ilisimatuulli amerlanerit isumaqarput inuusuttut alapernaaginnarlutik anersaapilunnut tunngasunik sammisaqalersartut. „Alapernaannermik,“ niviarsiaraq anersaapilunnut tunngasunik sammisaqartartoq nassuerpoq. Niviarsiaraq alla oqarpoq: „Aallaqqaammut uppererpianngilakka, misigisimavungali tamakku tamarmik suunersut paasisariaqarlugit.“ Taamaattumillu ikinngutimi ilaata anersaalereqatigiinnermut qaaqqusissutaa akueraa.

Alapernaannermit aqunneqarlutik inuusuttut ilaat salliligaq Ouija-mik taaguutilik atorlugu misiligaasarsimapput imaluunniit immiartorfiup pusingasup aalaneri misissuataartarsimallugu. Aammattaaq krystalkuglit, nallukattat tarokit, issartut, tiit pilutaat, ullorissallu najoqqutaralugit siulittuiniarnermut atuakkat anersaapilussiormut pulanerunissamut pissutaasinnaapput. Ilaasa allaat akissarsiutigalugu siulittuiniartartut angakkulluunniit  ornittalertarpaat. Taamatulli akissarsiutillit amerlasuut peqquserluttuusut paasineqartarpoq. Soorlu Alexander angakkuliarsimavoq karakterinik pitsaanerusunik angusinissaminut ikiorneqarnissani neriuutigalugu. Karakteriili pitsaanerulinngillat. Aningaasaajaannarpoq, angakkumut peqquserluttumut ikingummillu taasamut, angakkumut innersuussisumut aningaasaajarluni.

Inuusuttorpassuarnut anersaapilussiornermik misiligaaneq aningaasaajarnermit ajornerungaartumik kinguneqartarpoq.

’Anniartitaangaarnerit’

’Ilisimasaqarnerusimagaluaruma’ oqaasiuvoq anersaapilunnut tunngasunik misiligaareerlutik peqqissimisimasut akornanni tusarsaagajuttoq, Afrikami kujallermi atuagassiaq Personality allappoq. Amerlasuut ugguarpalullutik oqartarput: „Uppertikkuminarpallaarsimassanngikkaluarama . . . Satanisiortut qimannialerakkit anniartitaasarsimaqaanga, nipinik tusaasarlunga, sinnattupiluttarlunga, siorasaarneqartarlunga saniatigullu timikkut tarnikkullu naalliutsitaasarsimallunga.“

Tysklandimi misissuinermi ilinniartitsisut peqataasut 24 procentinit ikinnerunngitsut anersaapilunnut tunngasut atuartunut aarlerinartumik sunniuteqartarnerat malugisimavaat. Atuartut ilaat matoqqasunngortarput, poqiitsunngortarlutik, annilaangaannaq inuulersarlutik, isumatsassimasunngortarlutik imminnullu allanillu ajoquseeqqajaasunngortarlutik. Dirk unnuami sininneq ajulikulasarsimavoq. Taanna oqaluttuarpoq: „Anersaapilunnik pulaffigineqarnissara annilaangagalugu sequnngernissara qunugisarpara. Nipiliulaarnerit suulluunniit ersiummissutigisarpakka.“ Angutip inuusuttup Michaelimik atillip nakorsaatit angakkumit pisani eereerlugit unnuakkut sinissaaruttarluni anersaapilunnit saassunneqartarsimavoq. Niviarsiaqqap anaanani uissuummisissimaqaa siunissami qernertunik atisaqartuaannalerniarluni (qalipaammillu taassuminnga inini qalipassallugu) illerfimmilu matoqanngitsumi sinittalerniarluni nalunaarfigigamiuk!

Kikkut anersaat silarsuaanniippat?

Bibelimi erseqqissumik oqaatigineqarpoq ’toqungasut sunnguamilluunniit ilisimasaqanngitsut’. (Nalunaajaasup oqaasii 9:5) Tassa anersaat silarsuaat asasatta toqungasut tarnaannit inigineqanngilaq.  Taavami kikkut misigisanut amiilaarnartunut tamakkununnga akisussaappat? Inngilipiluit! Bibeli naapertussagaanni inngileqarpoq naalasseriillutik Satan Diaavulumik malinnilersimasunik. (1 Pîtruse 3:19,20; sarĸúmersitat 12:9) Taakkua inunnik ajunaartitsiuaannarsimapput allaallu timikkut ajoqusiisarlutik.

Soorlu, Lúkarse 9:42-mi oqaluttuarineqarpoq angut anersaapilummik pulaffigineqarsimasoq ’anersaapiluup noqartikkaa assataralugulu’. Tassa naalliutsitsinermik nuannarisalik! apustilit suliáinik agdlagkat 19:16-imi allaatigineqarpoq angut anersaapilummik pulaffigineqarsimasoq angutinik arfineq-marlunnik anersaapilunnik anisitsiniartunik saassusserujussuartoq . Oqaluttuat assigisaasa nalitsinneersut uppernarsarpaat anersaapiluit suli taama peqqarniitsiginerat.

Inuusuttut ESP, ullorissat najoqqutaralugit siulittuiniarneq, nallukattat tarokit, imaluunniit anersaapilunnut tunngasut suulluunniit atorlugit misiligaasut, amiilaarnartunik misigisaqarsinnaanermik imminnut navianartorsiortipput. Atuagassiaq Personality allappoq: „Oqaluttuat tusakkatta tamarmik [anersaapilunnut tunngasunik sammisaqarsimasunit] pingaarnertut malunnaatigaat Satanisiortut aqqutaannut nakkaakkiartuinnarsimanerat, ileqqorissutut ittut aqqutigalugit.“ Aap, anersaapilunnut tunngasunik sammisaqarneq Satanip ingilipiluisalu atassutiqarfiginissaannut aqqutaavoq siulleq!

„Savimmi ipittumi tungusunnitsuut“

Taamaattumik Guutip Israelip inuttaanut inatsisaasa anersaapilussiornerit suulluunnit inerteqqutigai, ima oqarami: „Ilissi akornassinni . . . naasaanik nassuiaasartoqassanani, pisussanik eqquiniartartoqassanani, siulittuisartoqassanani angakkuartartoqassananiluunniit. Serrasoqartassanngilaq, timaajagarsiortunik anersaanillu siulittuisartunik siunersiuisoqartassanani toqoreersunillu apersuisoqartassanani.“ — 5 Moses 18:10, 11.

Ukiuni hundredelinni siullerni kristumiunngortut anersaapilussiornermut tunngasut tamaasa attaveqarfigiunnaarsimavaat anersaapilunnullu tunngasinnaasut tamaasa suujunnaarsissimallugit. (apustilit suliáinik agdlagkat 19:19) Inuusuttut ullumikkut Jehovamut ikinngutaajumasut anersaapilunnut tunngasut suulluunniit aamma ingalassimaniartariaqarpaat. Tamakkununga ilaapput filmit, atuakkat, titartakkat, assilissallu anersaapilussiornermik ilaqartinniakkat. Aammattaaq nipilersukkat qanoq ittut tusarnaartarnissaat eqqumaffigisariaqarpoq. Soorlu heavy metalimik nipilersukkat Satanisiornermut tunngasortaqartuartarput.

Tibetimiut imatut ussateqarput: „Savimmi ipittumi tungusunnitsuummik tuniniarneqaruvit, aluttortinnagu marloriarlutit eqqarsaqqaarallaat.“ Savimmi ipittumi tungusunnitsuut aluttorniaraanni oqaq annaaneqarsinnaavoq! Taamatupajaaq anersaalerineq ippoq. Qanorluunniit alapernaatsigigaluaraanni, paasilluartariaqarpoq qanoq navianarluinnaqqissaartigisoq. Anersaarsioqatigiinnermut peqataanissamut isiginnaarnissamulluunniit qaaqqusissutit tamaasa naaggaakkit. Soqutaarpasinngivissutut ittut soorlu ’immiartorfiup anersaavanik’ apersuineq anersaapilulerinermut pulatitaanermik kinguneqarsinnaavoq. Immaqa alapernaatsorujussuuvutit. Kisianni neqi mikiarsimasoq neriumassaviuk mikiartorneq pissutigalugu napparsimalluni qanoq innersoq paaserusuinnarlugu?

Eqqartoriikkatta Dirkip anersaapilunnut tunngasut qimassinnaasimavai. Vagttårnip Peqatigiiffiata nakitertitai ikiortigalugit Bibelimik atuaqqissaartarnikkut ataatami toqunganera pillugu paasisaqarsimavoq, toqungasullu makinnissaannik neriuut ilikkarlugu. (Tussiaat 146:4; Juánase 5:28,29) Ilisarsissutip tamatuma anersaat silarsuaannut attaveqarusunneq kipitippaa. (Naleqqiuguk Juánase 8:32.) Ullumikkut Dirk qanoq ingerlava? Jehovap Nalunaajaasuinut ilanngussimavoq allamillu atorfeqarani Vagttårnip Peqatigiiffiata naqiteriviisa ilaanni sulilluni.

Aap, Bibelip „anersaakkut pisariaqartitavut“ tunniuttarpai, tamannalu anersaapilunnut tunngasunut ulorianartunut paasisaqarusulluni alapernaannermut nakkaannarnermit ajunnginnerungaarpoq. — Matîuse 5:3. (gD 8/3 90)

[Qupp. 15-mi assiliartaq]

Pinngussat ajoqutaarpasinngitsut aqqutigalugit anersaapilunnut tunngasut akuliuffineqarsinnaapput, soorlu una salliligaq Ouija-mik taaguutilik atorlugu imaluunniit ’immiartorfiup anersaavanik’ apersuinikkut