Inussiarnernermik ilumoorlunilu tunniusimanermik maligassat

„Naapertuilluassusermik ilumoorlunilu tunniusimanermik noqqaassutiginnittup inuuneq, naapertuilluassuseq nersornaallu pissarsiarissavai.“ — USSATIT 21:21, NV.

1. Inussiarnerneq asanninnerlu Guutip anersaavata inerititarimmagit sooq pissusissamisoorpa?

JEHOVA tassaavoq „Guuti nallittuisoq, saammaasoq, kamajasuunngitsoq, [ilumoorluni tunniusimangaartoq, NV] unneqqaringaartorlu“. (2 Moses 34:6, 7) Nuanningaartunik tamakkuninnga pissuseqarmat, tupinnanngilaq inussiarnerneq piviusoq asanninnerlu anersaavata inerititaanut ilaammata. — Galâsiamiut 5:22, 23.

2. Sooq ilimagisinnaavarput Guutip anersaavanit siulersorneqartut piviusumik inussiarnerlutillu ilumoorlutik tunniusimassasut?

² Tassa imaappoq, Jehovap anersaavanik siulersortittut inussiarnernermik piviusumik asanninnermillu ersersitsissapputtaaq, aap, inunnut allanut attaveqarnerminni tamakku ersarissumik pissuserissavaat. Apustili Paulusip maligassiaa maliitigalugu ilaatigut ’inussiarnerlutik’ Guutip kiffaasut malunnartinniarsinnaapput. (2 Korintumiut 6:3-10, NV; Evfisumiut 4:32) Asannissuseq, misiginneqataassuseq, isumakkeerfiginnissinnaassuseq aalajaassuserlu ersersitaat Jehovap pissusiinut assinguvoq, taanna ’ilumoorluni tunniusimangaarmat’. (Tussiaat 86:15, NV) Pissutsit tamakku qanoq ilillutik iliuuseqarnikkut imaluunniit pissutsit assingusut aqqutigalugit ersertarnerannut assersuutit taassuma oqaasiani, Bibelimiittut, misissoriartigik.

Namminissarsiunngissuseq inoroorsaassuserlu

3. Abraham sukkut maligassiuisimava, tamatumunngalu atatillugu Paulus qanoq kajumissaariva?

³ Upperluartoq Abraham (Abram), ’Jehovap ikinngutaanik’ aamma ’uppertunut tamanut  ataataasumik’ taaneqarsimasoq, piviusumik inussiarnersuusimavoq. (Jâko 2:23, NV; Rûmamiut 4:11) Eqqarlini, ilaatigut jornguni Lot, ilagalugit Guutip inassutaa naalallugu Urimit Kaldæamiittumit aallarsimavoq Kana’anip nunaanukarluni. Naak Abraham ilaqutariinnut qullersaagaluarluni Lotimillu angajulliugaluarluni, namminissarsiorani nuna ivigarinneq Lotimut pitippaa, sinneralu nammineq pillugu. (1 Moses 13:5-18) Inussiarnissuseq tamanna malissinnaavarput, soorlu assersuutigalugu, allat iluanaarnissaat uagut iluanaarnissatsinnit salliutittarlugu. Namminissarsiorneq taama ittoq Paulusip siunnersuutaanut naapertuuppoq: ’Namminissaminik piniartoqanngikkili, aapparmili iluaqutissaanik.’ Paulus nammineq ’tamarmik nuannarisassaannik iliorniartarsimavoq tamatigut imminut iluaqutaasoq piniarnagu, kisianni amerlasuunut iluaqutaasoq piniarlugu annaqqullugit’. — 1 Korintumiut 10:24, 33.

4. Abraham Saralu inoroorsaassutsimikkut inussiarnisaarnerminnut sumik akissarsisinneqarpat?

⁴ Aammattaaq peqqusersuilluni ajunngitsumillu isumaqarluni inoroorsaarnikkut inussiarnissuseq ersersinnaavoq. Abraham nulialu Sara ullut arlaanni angalasunut takornartanut pingasunut inoroorsaarfiginnissimapput. Kimigiiserfigalugit Abrahamip ingitippai qasuersaaqqullugit, nulianilu marluullutik nerisassiuutipallallugit. Takornartat taakku sunaaffa tassa inngilit Jehovameersut; aappaalu neriorsuutilisarpoq Sarap utoqqalilersup qitornaqanngitsullu ernertaarnissaanik — inoroorsaarnerannut akissarsiaq angisooq! — 1 Moses 18:1-15.

5. Gajus qanoq ililluni inussiarnisaartarsimava, uagullu tamatumunnga assingusumik qanoq iliuuseqarsinnaavugut?

⁵ Uaguttaaq, kristumiutut, inoroorsaarnitsigut inussiarnissusermik ersersitsisinnaavugut. (Rûmamiut 12:13; 1 Timûtiuse 3:1, 2) Soorlu assersuutigalugu, angalallutik nakkutilliisut inoroorsaarfigisarpavut. Taamaalilluta Gajus, ukiuni hundredelinni siullerni kristumiut ilaat, assigaarput. Taanna ’ilumoorluni iliuuseqartarsimavoq’ qatanngutit angalasut, allaat ilaat ilisarisimanngisani, inoroorsaarfigisarlugit. (3 Juánase 5-8) Uagulli inussiarnersumik pulaaqqusakkavut ilisarisimasavuunerusarput. Tassaasinnaavoq qatanngut arnaq nikallungarpasissoq. Immaqa uia uppinngitsuuvoq imaluunniit anisitaasimalluni. Taamaattumik pissutissaqarpugut inussiarnernermik ersersitsiviginissaanut, anersaakkut kajumissinartumik katerisimaaqataanissaanik ilaquttavullu ilagalugit nereqatiginissaanik ilaannikkut qaaqqusarneratigut. Nereqatigiinneq akisuujusariaqanngilaq, taamaakkaluartorli qatanngummut taamaattumut inussiarnernermik ersersitsinertik ilaquttatta tamarmik nuannaarutigissavaat. (Takuuk Ussatit 15:17.) Pulaartullu puiussanngilaa qujamasunnerminik ersersitsinissani, oqaatsimigut imaluunniit inussiarnersumik allagaqalaarnermigut.

6. Lydia qanoq ililluni inussiarnisaarsimava, allallu inussiarnisaarnerannut qujamasunnermik ersersitsinissaq sooq pingaaruteqarpa?

⁶ Lydiap Guutimik mianerinnittup kuisereerlunilu ’qinnuigaatigut oqarluni: „Jehovamut ilumoortuusorigussinga illunnut iseritsi tassaniittuarlusilu.“ Inangaalerpaatigullu,’ Lukas oqaluttuarpoq. (apustilit suliáinik agdlagkat 16:14, 15, 40) Lydiap inussiarnisaarnera qularnanngitsumik pingaartinneqaqaaq. Pingaartitsinermilli ersersitsivigineqannginneq nikallornarsinnaasorujussuuvoq. Qatanngut arnaq 80-inik ukiulik timikkut nukissaqarpallaaranilu pigisaqarpallaanngitsoq qaaqqusisimavoq nerisassiornerminilu annertuumik suliaqarsimalluni. Pakatsissutigeqisaanilli angut inuusuttoq takkutinngitsoorpoq, allaat sunnguamilluunniit nalunaarnani. Qatanngutillu arnat marluk arnamut inuusuttumut, imminnut immikkut ittumik nerisassiorsimasumut, qaaqquneqarnerminni takkutinngitsoorsimapput. „Ajuallattorujussuuvunga,“ qaaqqusisimagaluartoq oqaluttuarpoq, „tassami arlaannaataluunniit qaaqqusaanini puiorsimanngikkaluarpaa. . . . Isumaqarpunga aggersinnaannginnertik nalunaarutigisimasinnaagaluaraat, arlaannaalluunniilli sianinngilaq taamaalillunilu inussiarnissutsimik takutitsinani.“ Illit taamatut pisoqarnerani Guutip anersaavata inerititaata inussiarnernermik taaguutillip pingaartitsinerunermik ersersitsinissannut killissimassagaluarpaatit?

Ataqqinninneq — akineqarnerlu

7. Jakobip ernerisa ataatamik kissaatigisaa naapertorlugu iliuuseqarsimanerat ilumoorluni tunniusimanermut tunngasumik qanoq ilinniarfigaarput?

⁷ Inussiarnernerup ilumoorlunilu tunniusimanerup  inunnik allanik eqqortumillu kissaataannik ataqqinnilersissavaatigut. Assersuutigalugu: Upperluartup Jakobip ernini Josef qinnuigisimavaa toquguni Egyptenimi iliverneqartinnginnermigut ilumoorluni tunniusimanermik ilumoorfiginninnermillu ersersitsivigeqqulluni. Tamanna naammassineqassappat Jakobip timaa ungasissorujussuarmukaanneqassaaq, taamaattorli Jakobip qatanngutaasalu ’ataatamik piumasaa naammassillugu Kana’animukaappaat Makpelallu narsaataata qaarusuttaanut iliverpaat, narsaammut Abrahamip ilivissarsiaralugu Efronimit Hetikkuusumit pisiarisimasaanut’. (1 Moses 47:29; 49:29-31; 50:12, 13) Assersuutip tamatuma ersersinnginnerpaa ilumoorluni tunniusimanermik ersersitsisariaqartugut qanigisatta kristumiuusut iliverneqarnissamut tunngatillugu kissaatigisaasa, Bibelimut naapertuuppata, ataqqinerisigut?

8. Rahabimik oqaluttuaq akisinissamut tunngasumik qanoq ilinniarfigaarput?

⁸ Allanit inussiarnisaarfigineqarlutalu ilumoorfigineqaraangatta qujamasunnermik ersersitsinissarput akisiniarnissarpullu pissusissamisoortutut isigisariaqarpavut. Arnap atortittartup Rahabip israelikkut alapernaarsuiartortitaat toqqortinnerisigut ilumoornermik ersersitsivigisimavai. Israelikkut arnaq taanna ilumoorfigalugu akivaat illoqarfik Jeriko aserorneqarmat inoqutaalu asattuunneqartinnerisigut. (Josva 2:1-21; 6:20-23) Tamatumuuna takusinnaavarput inussiarnerneq inussiarnernermik ilumoorfiginninnerlu ilumoorfiginninnermik akisariaqarivut.

9. Sooq pissusissamisoorsinnaava allanut ilumoorluni tunniusimanermik ersersitsivigeqqunissaq?

⁹ Ilaannikkulli eqqortumik iliorluni ilumoorluni tunniusimanermik ersersitsivigeqqusoqarsinnaavoq. Jonatan, Israelip kunngiata siulliup Saulip ernera, taamaaliorsimavoq. Jonatanip ikinngunni nukarliunerusoq, David, qinnuigisimavaa imminut inoqutiminullu ilumoorluni tunniusimanermik ersersitseqqullugu. (1 Samuel 20:14, 15; 2 Samuel 9:3-7) Saulip Gibeonikkunnik eqqunngitsuliorfiginnissimanera pillugu David kingusinnerusukkut akiniaagami ’nammineq Jonatanillu uppernarsaaqatigiissimanertik’ eqqaamavaa, Jonatanillu ernerata Mefibosjetip asattuunneratigut ilumoorluni tunniusimanini ersersillugu. (2 Samuel 21:7, 8) Taama ilumoortigaluta iliuuseqartarpugut, aap tamatigut aappimik isumaqartittarparput? (Jâko 5:12) Ilagiinnilu utoqqaanertaagutta uppeqativut ilumoorluta tunniusimanitsinnik pisariaqartitsisut asanninnermik taama ittumik ersersitsivigisarpavut?

Allanut attaveqarnerput nakussatsittarpaa

10. Rut ilumoorluni tunniusimanerminut qanoq pilluaqqusaava?

¹⁰ Inussiarnernerup ilumoorlunilu tunniusimanerup nuannaarnerulersittarpaatigut ilaquttattalu iluanni avataannilu allanut attaveqarnerput nakussatsittarlugu. Moabikkuusumik Rutimik oqaluttuap tamanna ersersippaa. Taanna Boazip narsaataani Betlehemip eqqaaniittumi karrinik katersuilluni sulisarpoq, nammineq sakinilu uillarneq annikilliortoq, Rut, inuussutissaqarniassagamik. (Rut 2:14-18) Kingorna Boaz Rutimut oqarpoq: „[Ilumoorlutit tunniusimassutsit, NV] siornatigornit annerusumik allaat takutippat angutinik inuusuttunik piitsunik pisuunilluunniit qaninniagaqannginnavit.“ (Rut 3:10) Siullermik Rutip ilumoorluni tunniusimanini No’omimut ersersissimavaa. Maannalu ilumoorluni tunniusimanini ersersissimavaa Boazimut utoqqasaajusumut katinnissaminut piareersimanermigut, uigigaluaminut utoqqanngortumullu No’omimut kinguaassaqartitsilerniassammat. Rutip Boazimik Davidip aataa, Obed, ernertaaraa. Guutillu ’naammattumik akissarsisippaa’ Jesus Kristusimut siuaasanngortinneratigut. (Rut 2:12; 4:13-17; Matîuse 1:3-6; Lúkarse 3:23, 31-33) Eqqarsaatigeriassagit, Rutip ilumoorluni tunniusimanera pissutigalugu taassuma ilaqutaasalu pilluaqqusaanerata angissusia! Ullumikkuttaaq ilumoorluni tunniusimaneq angerlarsimaffinni Guutimik mianerinniffiusuni nuannaarutissiillunilu pilluaqqusaassutaallunilu ataqatigiinnermut nakussassatsissutaassaaq.

11. Filemonip asannittuliornera qanoq kinguneqarpa?

¹¹ Pissutsit ajunngitsut tamakku aammattaaq ilagiinniittunik ataqateqarnermut nakussatsissutaasarput. Kristumiu Filemonimik atilik uppeqatiminut asannissutsimigut nalunngisaasimavoq. Paulus taassumunnga ima allassimavoq: ’Guutiga qutsavigaara qinusarnikkullu eqqartortaannarlutit,  Naalakkamut Jesusimut iluartunullu tamanut asannissutsit uppersutsillu tusaamagakku, . . . Tipaatsuutigingaarlugulumi asannissutsit tuppalliutigingaarparput, iluartut uummataat tumannguersarneqarmata ilikkut, qatannguterput-aa.’ (Fîlimût 4-7) Bibelimi oqaluttuarineqanngilaq qanoq ililluni Filemonip iluartut uummataat tumannguersartarsimagai. Uppeqatimili tanitaasut nakussatsissutigalugulu uppernikkut ineriartuutigisaannik asanninnermik ersersitsivisarsimassavai, tamatumalu imminnut suli ataqatigiinnerulersissimassavai. Ullumikkuttaaq kristumiut tunniusimanermik qamannga pisumik ersersitsivigeqatigiikkaangata taama pisoqartarpoq.

12. Onesifusip asannittuliornera qanoq sunniuteqarpa?

¹² Aammattaaq Onesiforus iluaqutaasumik asannissuseqarsimavoq. ’Onesiforusikkut Naalakkap nallittorligit,’ Paulus allassimavoq, ’taassuma qassiinik tumannguersartarmanga qilersugaasungalu kanngusuutiginanga; Romamulli pigami ujaqqissaarpaanga nanillungalu. Naalakkap tuniliuk ullussami issumani Jehovamit nallittorneqartillugu; Efesusimilu qanoq atsigisumik kiffartorsimasoq illit ilisimalluarpat.’ (2 Timûtiuse 1:16-18) Uppeqativut tunniusimanermik ersersitsiviginiarlugit suliniuteqarutta nuannaarutissarsissaagut, ilagiillu kristumiut iluanni qatanngutigiittut asaqatigiinnermut allisaataassaaq.

13, 14. Filippimi ilagiit sukkut maligassiuippat, ilagiillu inussiarnernerannut tukkornerannullu Paulus qanoq qisuariarpa?

¹³ Ilagiinniittut tamarmik inussiarnernermik piviusumik ilumoorlunilu tunniusimanermik uppeqatiminnut ersersitsisarpata ataqatigiinneq nukittunerulissaaq. Ataqatigiinnerup taama ittup Paulus Filippimi ilagiinnut atassuteqarluartissimavaa. Ilagiinnut taakkununnga allagaqarneranut pissutaasut ilagaat taakkua inussiarnissusiannut atortussatigullu ikiuisimanerannut qujamasunnerminik ersersitserusunnera. ’Taamani iivangkiiliup pileqqaarnerani Makedoniamit aallarama,’ Paulus allappoq, ’ilagiit allat tunniussallu tigusallu naatsorsorlugit agguarfiginngikkaannga, ilissi kisissi. Thessalonikamiitillunga allaat ajorsaatigisannik ataasiarnasi pajuttarpassinga. . . . Tamanimmi peqarpunga sinnilinnik allaat. Pajugutersi Epafroditusimit pigakku peqangaalerpunga, tipi naamajuminartoq, pilliut nuannarisaq Guutip iluarisaa.’ — Filípimiut 4:15-18.

¹⁴ Paulusip qinnutimini Filippimiut eqqaamasarsimammagit tupinnarpallaanngilaq. Oqarpoq: ’Guutiga qutsavigisaraara eqqartortaraangassi, qinusarnikka tamakkerlugit tipaatsuinnarlunga tamassi qinnuttarassi, ullormit siullermit mannalu tikillugu iivangkiiliukkut peqatigiinnersi pillugu.’ (Filípimiut 1:3-5) Naalagaaffimmik oqaluussissutiginninnermut iluaqutaasumik ilagiit taamatut asannittumik tukkortumillu tunisiuaannaraluarunilluunniit piitsunngornavianngillat. Filipimiut sapinngisaminnik tamatuma tungaatigut iliuuseqareersullu Paulusip neriorsoqqissaarpai: ’Guutima pisuussutsi missiliorlugu ajorsaatissinnik tamanik tuniumaarpaasi naalannarluni Kristus Jesusimi.’ (Filípimiut 4:19) Aap, inussiarnernerput tukkornerpullu Guutip akisarpai. Taanna ima oqarpoq: ’Ilisimagassi kinaluunniit kiffaasoq kiffaanngitsorluunniit sumik ajunngitsulioruni tamanna Jehovamit pissaqaatigiumaaraa.’ — Evfisumiut 6:8.

Arnat inussiarnernermik ersersitsisarsimasut

15, 16. (a) Tabitap inussiarnersuusimanera qanoq ililluni eqqaamaneqarpa, toqummallu qanoq pisoqarpa? (b) Ullumikkut arnat kristumiut qanoq ilillutik ’ajunngitsuliungaartarpat’?

¹⁵ Ajoqersugaq Dorkas (Tabita) Joppemeersoq ilumoorluni tunniusimanermik arajutsineqanngitsumik ersersitsisarsimavoq. ’Taanna ajunngitsuliungaartarpoq piitsullu tuningaartarlugit,’ napparsimalerlunilu toqummat ajoqersukkat Peter Lyddamiittoq nalunaarfigaat. ’Tassungalu pimmat inimut qullermut pisippaat; uillarnerillu tamarmik avatangerpaat qiallutik annorassallu qallersaatillu Tabitap najorallarmatik sanaavi taassumunnga nittarlugit.’ Takorlooriaruk: Uillarnerit aliasuttut apustili tikillugu oqaluttuuppaat Tabita qanoq isumassuisuusimatigisoq, atisallu sanaarisimasai inussiarnerneranut asanninneranullu takussutissatut nittarterlugit. Peterip isersimasut tamaasa aneqquai, qinuniarlunilu seeqqummerpoq, toqungasumullu saalluni. Taava oqarpoq: ’Tabita, makigit.’ Taava susoqarpa? Oqaluttuaq nangippoq: ’Taava uippoq, Peterilu takugamiuk ingippoq. Taassumali assaasigut  tigullugu makitippaa, iluartullu uillarnerillu qaaqquai, taakkununngalu uummarsimasoq sassartippaa.’ (apustilit suliáinik agdlagkat 9:36-41) Guutip pilluaqqusinera angingaarmat!

¹⁶ Tamanna tassaavoq Jesus Kristusip apustiliisa ilaata toqusunit makititsinera ilisimaneqartoq siulleq. Tabitallu inussiarnissutsimigut ilisimaneqarsimanera taamatut tupinnartuliornermut pissutaaqataavoq. Kiami ilisimavaa ajunngitsuliorumatuujusimanngitsuuguni piitsunullu tunisiumatuujusimanngitsuuguni makitinneqarsimassagaluarnersoq? Maanna nammineq uillarnerillu tupinnartuliamik tamatuminnga pilluaqquneqaannanngillat; aammattaaq Guutip nersornaatissaanut nalunaajaataalluarpoq. Aap, ’tamanna Joppemiut tamarmik tusaamavaat, amerlasuullu Naalakkamut uppertunngorput’. (apustilit suliáinik agdlagkat 9:42) Ullumikkuttaaq arnarpassuaqarpoq kristumiunik asannittunik ajunngitsuliortaqisunik. Immaqa uppeqatitik utoqqaat atisassiuuttarpaat nerisassiuuttarlugilluunniit, imaluunniit inoroorsaartaqalutik. (1 Timûtiuse 5:9, 10) Allanut tamanna nalunaajaataalluaqaaq! Tamanilli nuannaarutiginerpaavarput ’arnat amerlaqisut’ taakkua inussiarnernermik piviusumik ilumoorlunilu tunniusimanermik ersersitsisarmata Guutitta, Jehovap, nersornaatissaanut tusagassamik naunnersumik oqaluussissutiginninnermikkut. — Tussiaat 68:12.

Inussiarnernermik ilumoorlunilu tunniusimanermik ersersitsiuaannarit

17. Ussatit 21:21-mi qanoq allassimava, oqaatsillu taakkua qanoq ilillutik Guutimik mianerinnittut imminnut naleqquttunngortissinnaavaat?

¹⁷ Guutimit akuerisaajumasut tamarmik inussiarnernermik piviusumik ilumoorlunilu tunniusimanermik ersersitsisarnissartik pingaartittariaqarpaat. „Naapertuilluassusermik ilumoorlunilu tunniusimanermik noqqaassutiginnittup inuuneq, naapertuilluassuseq nersornaallu pissarsiarissavai,“ taama ussateqarpoq. (Ussatit 21:21, NV) Guutimik mianerinnittup Guutip naapertuilluassusia eqiasuilluni ujartortarpaa, tamatigullu taassuma najoqqutassiaanit siulersorneqartittarluni. (Matîuse 6:33) Asanninnini, inussiarnernini ilumoorlunilu tunniusimanini inunnut allanut tamatigut ersersittuassavaa, atortussatigut aammalu — ingammik — anersaakkut. Taamaalilluni naapertuilluassuseq nanissavaa, naapertuilluartumimmi inuunissaanik Jehovap anersaavata ikiussavaa. ’Naapertuilluarneq atisarilissavaa’, soorlu Job Guutimik mianerinnittoq taamaassimasoq. (Job 29:14) Inuup taama ittup nammineq nersornaatissani ujartortanngilaa. (Ussatit 25:27) Jehovap nersornaatissiarititaa pissavaa, immaqa inussiarnisaarnerminik akineqarluni inunnit allanit ataqqineqarnermigut. Aammalu ilumoorlutik tunniusimallutik Guutip piumasaanik iliortut inuunermik pissapput — ukiualunnguaannarniunngitsoq, naassaanngitsumilli.

18. Sooq piviusumik inussiarnerneq ilumoorlunilu tunniusimaneq tamatta pingaartittariaqarpavut?

¹⁸ Qanortoq Jehova Guutimik asannittut tamarmik piviusumik ilumoortumillu inussiarnissutsip pingaaruteqassusia, aammalu asanninnerup aalajaassutsillu ilumoorluni tunniusimanermik taaneqartup ilungersorluni noqqaassutiginissaata pingaaruteqassia, paasilissuk. Taamaaliorunik Guutip inuillu isaanni naleqangaartutut pingaangaartutullu isigineqalissapput. Ilaqutariinni ataasiakkaani kristumiullu ilagiivini tamani ataqatigiinnerat nukittunerulissaaq. Ilumoorlunilu tunniusimassutsip Guutianut, Jehovamut, nersornaataassaaq. (wD 15/7 91)

Qanoq akissavit?

□ Abraham qanoq ililluni inussiarnernermigut maligassiuisimava?

□ Akisinissamut tunngasumik Rahabimik oqaluttuaq qanoq ilinniarfigisinnaavarput?

□ Filippimi ilagiit qanoq ilillutik inussiarnernermik ersersitsisarsimappat?

□ Ullumikkut arnat kristumiut qanoq ilillutik ’ajunngitsuliungaartarpat’?

□ Piviusumik inussiarnerneq ilumoorlunilu tunniusimaneq sooq pingaartittariaqarpavut?

[Atuaqqissaarnermi apeqqutit]