„Soorlu Satan assammillugu“

Ikiaroortarneq sunik kinguneqarsinnaava? Charles qanoq pisimasoq tusariassagit. 15-inik ukioqartoq aleqaata ikiaroornartunik misiliitippaa. Ukiuni 15-ini tulliuttuni marihuana, kokaini, heroinilu assigiinngitsutigut akullugit atortarpai. Arlaleriarluni pillarneqartarpoq tillinneq sakkulersorlunilu ujajaaneq pissutigalugit. Ikiaroortarnini pissutigalugu AIDS-imik tunillatsissimavoq. Annilaaqaaq. Soriarsinnaanani timini nukittooq nungujartortoq isigaa. Oqaluttuaa atuarniaruk imminut aperalutit: ’Imminut akilersinnaava?’

„TIMI aserorneqartarpoq. Ikiaroortaraannilu sorpassuit arajutsinartarput — ’sunnertisimaarnissaq’ anguniaannarlugu. Paniga pinnguaqatigisinnaanngilara. Arsaqatigisinnaanngilara, arpaqatigisinnaanaguluunniit. Ernerma naalungiarsuunerminiit pisulernissaanut siumukarnissaanullu allanut ineriartornera malinnaaffigisimanngilara. Nuliara qiteqatigisinnaanngilara, qitissinnaajunnaarama. Timersuutit amerlanersaat sammisinnaanngilakka, timima malugisinnaassuseerunnera pissutigiinnarnagu aammattaarli robotitut arriitsigilersimagama.

Assakka aqussinnaanngilakka. Qangatut unngiarsinnaajunnaarpunga, kakkivissanni umikka naalisarsinnaanagit imminnullu nujaajarsinnaananga. Aammattaaq atisalersorsinnaajunnaarsimavunga. Ilullera allaat attasersinnaanngilara. Ikiorteqarnanga perusuersartarfiliarsinnaanngilanga. Ilaannikkut allaat nujaq issiutiga peersinnaasanngilara, assakka artorakkit. Nerisassiorsinnaajunnaarpunga. Virusimik nappaammik tunillatsisimagama iigalersuillunga natilersuillungalu suliara suliarisinnaajunnaarpara.

Tamarmik utaqqisariaqartarpaannga. Naalungiarsuttut ippunga. Qarasara sulisinnaarpianngilaq. Puigutoqaanga. Arnap angerlarsimaffitsinni napparsimasunik paarsisup atia eqqaaniarsuaartarpara. Nuliama assigiinngitsut uteqattaartarpai — uangali puigoqqittarpakka. Ajorsiartuinnarpungalu.

Ulloq naallugu sekundit tamaasa timera tamaat anniartarpunga — aniaatit allaat angutip nukittuup qissatigisinnaasai. Iisartakkat nipaallisaatit aqajaqqumi putusoortitsisarput. Taamaattumik iisikulasinnaanngilanga. Aqajaqqumi putusoorneq pissutigalugu quersoraangama aammik qisertarpunga aattarlungalu. Kileraluaruma mianersortariaqarpunga allat tunillanngitsoorniarlugit. Amera saattuararsuuvoq. Ernera pinnguaqatigisinnaajunnaarpara.

Isumaqaraluarpunga ajugaasimallunga. Ukiut 15-t ikiaroortareersimallunga isumaqaraluarpunga aniguisimallunga. Maannali AIDS-imik nappaateqalersimavunga. Qaqugu toqunissara naluara.

Taamatut inooriaaseqalerusulluni Jehovamik qimatsisoqarpat, tamatuminnga oqaluttuussigik. Ikiaroorneq tassaavoq soorlu Satan assammillugu, ikiaroornartummi sakkugimmagit!“ (gD 8/11 90)

Sallusuissut Guutip oqaasianeersoq ilikkaramiuk Charlesip ikiaroortarnini qimassimavaa Jehovamullu nalunaajaasunngorpoq kuisimasoq. Napparsimmavimmi nakorsat, napparsimasunik paarsisut napparsimasoqatinilu oqaluussiffigiuartarsimavai. Kuisinnermili ukiut pingasut affarlu kingorna Charles toquvoq, 37-nik ukioqarluni. Tassa januarip ulluisa 27-ianni, 1990.