Bibeli Guutimeersuua?

JEHOVA GUUTI killeqanngitsumik pissaaneqarpoq oqartussaassuseqarlunilu taamaammallu nammineq kissaatigisani periaaseralugu inuit pinngortissimasani attaveqarfigisinnaallugit. Oqaatsit allanneqarsimasut atorlugit attaveqarnissi qinersimaguniuk taava oqariartuunni piffissap sinneranut aamma atatittariaqassavaa. Bibeli taama pisimava?

Ukiut 1500-t missingisa Kristusip inunngornerata siornagut Bibelip allanneqarnera aallartimmat allakkat upperisarsiornermut tunngasut allarpassuit nassaassaasimapput. Tamakkuli tamarmik piffissap ingerlanerani atorneeruttarsimapput peeruttarsimallutillu. Ilaat itsarnisarsiuunit assaanikkut nassaarineqarsimapput maannalu kulturimut tunngassuteqartutut katersugaasivinni saqqummersinneqarlutik. Akerlianilli Bibelip immikkoortuisa ilaat ukiut tuusintillit pingasut matuma siornagut allanneqarsimasut puiorneqanngisaannarsimapput, assilillugillu allaqqinneqarneri ullumikkumut allaat piullutik. Tamanna maluginiarnartuuvoq, ingammik oqaluttuarisaanerup ingerlanerani Bibelimut akeqqersimaartarsimanerit eqqarsaatigissagaanni. Atuakkat allat taama akerlilersorneqanngisaannarlutillu uumissorneqanngisaannarsimapput. Qangaanerusoq Bibelimik atuartut siaruarterisulluunniit allaat pillarneqartarsimapput akiliisitaallutik, parnaarussaallutik, anniartitaallutik allaallu amerlasuut toqutaasarsimallutik.

Atuakkap taama atoruminaatsorsiortitaatiginini qanoq ililluni aningorsinnaavaa? Bibelip tamanna nammineq ima akivaa: ’Jehovap oqaasia naassaanngitsumik atavoq.’ (1 Pîtruse 1:25) Bibelip saassussinernit tamakkunannga tamanit aniguisinnaasimanera uppernarsaaqataavoq tassaasoq Guutip oqaasia illernartoq.

Tunngavissaqarluartumillu eqqarsassagutta ilimagisariaqarparput Guutip inunnut oqariartuutaa nunarsuarmi inunnit tamanit pissarsiarineqarsinnaassasoq. Bibelimi kikkunnit tamanit pissarsiarineqarsinnaava? Tamanna qularutissaanngilluinnarpoq! Oqaluttuarisaanermi atuakkat allat Bibelimit siammarsimanerulinngisaannarsimapput. Bibelit naqinneqarsimasut 3.000.000.000-inik amerlassuseqarnissaat naatsorsuutigineqartarpoq. Aammattaaq atuakkat allat Bibelitut oqaatsinut taama amerlatigisunut  nutserneqarsimanngisaannarput. Bibeli tamakkerlugu imaluunniit immikkoortuisa ilaat maanna oqaatsini assigiinngitsuni 1900-init amerlanerusuni atuarneqarsinnaanngorsimavoq. Tamanna, Amerikami Bibelimik naqiterisartut naliliinera malillugu, isumaqarpoq nunarsuup inuisa 98 procentiisa Bibeli pissarsiarisinnaanngorsimagaat. Ujarlerfissiap The New Encyclopædia Britannicap Bibeli eqqartoramiuk una nassuiaatitut ilannguppaa: „Atuakkat ataatsimoortut qularnanngitsumik inuiaat oqaluttuarisaanerannut sunniuteqarnerpaasimasut.“ Taamaattumik sakkortuallaassanngilaq Bibeli tassaanerassagaanni atuakkat pingaarnersaat.

Bibelip imarisamigut aallaqqaataanit naggataanut ataqatigiilluinnarnera immini uppernarsaasuuvoq ilumut Guutimit isumassarsiarititaasimaneranut. Piviusorsiortumik ilimagineqarsinnaava inuit assigiinngitsut 40-t missaanniittut allagaasa ukiullu 1600-t ingerlanerini suliarineqarsimasut tamarmik ataqatigiilluinnarnissaat ataatsimoorussamillu eqqartugaqarnissaat? Naamik, taamaattoqarsinnaanera ilimagineqarsinnaanngilaq nalaatsornerinnaq imaluunniit inuit aaqqissuussinerat tunngavigissagaanni. Biibililli atuagartai 66-iusut taamaapput. Taamaallaat inunnit sianissuseqarnerungaartoq sivisoorsuarmillu uumasimasoq taama maluginiarnartigisumik suliaqarsinnaavoq.

Oqaluttuarisaanermik eqqartuinerinnaanngitsoq

Bibelittaaq oqaluttuarisaanermik allaatiginninnera asseqanngilluinnartuuvoq. Guutimilli oqariartuut oqaluttuarisaanermi paasissutissaniinnaq imalik uagutsinnut killeqartumik pingaaruteqassaaq. Unnersuunneqarnissamik ilisimassusermillu atoriaannaasumik pisariaqartitsivugut, tamakkulu Bibelimi nassaassaapput. Assersuutigalugu, kajumissaarpaatigut ’asanninneq, nuannaarneq, eqqissineq, kamaginninneq, inussiarnerneq, ajunngissuseq, upperneq, saamaneq imminullu naalakkersorsinnaaneq’ pigiliunniaqqullugit — pissutsit tamakku Bibelimi sukumiisumik allaaserineqarput. (Galâsiamiut 5:22, 23 NV; Kulorsamiut 3:12, 14) Bibelip eqiasuitsuunissaq, minguitsuunissaq, katissimasamut ilumoorfiginninnissaq kiisalu inoqatinut ataqqinninnissaq asanninnissarlu inassutigai. Ilaqutariit inuiaqatigiillu iluanni ileqqussatigut siunnersuuterpassuarnik imaqarpoq.

Misilittakkat takutippaat Bibelip unnersuussutai asseqanngitsumik iluaqutaasut. Bibelip  ilisimaatsussutsimit upperisapalaanillu inussiaajunnaarsippaatigut. (Juánase 8:32) Ilisimassuseq atoriaannaasoq imarisaa nalissaqanngilaq Guutillu ilisimassusianik malunnaateqarluinnarluni.

’Guutip oqaasiata uumanera killinnartorsuuneralu’ Bibelip inunnik allanngortitsisinnaanerata uppernarsarpaa. (Eprîarit 4:12) Inuit millionilikkaat ileqqutik ajoqutaasut ullumikkut ajugaaffigisimavaat Bibelip najoqqutassiai pigiliukkamikkik. — Evfisumiut 4:22.

Najoqqutassiat tamakku sumiginnarneqaraangata qanoq pisoqartarpa? Aliasunneq naalliungaarnerlu, sorsunnerit, piitsuuneq, kinguaassiuutitigut nappaatit kiisalu angerlarsimaffiit avissaartitersimasut pilersarput. Taama pisoqarnissaa ilimagineqaannarsinnaavoq, Bibelimimmi ajattuinerup assigaa Guutip, inunnik pinngortitsisuusup qanorlu pisariaqartitaqarnerinik ilisimannittup, unnersuussutaanik ajattuineq.

Bibelimissaaq, inuit pisinnaasaat akimorlugu, siunissami qanoq pisoqarnissaa siulittuutigineqarpoq. Silarsuarmi pissaanilissuit saqqummernissaat, Babylonip nalaaniit nalerput tikillugu, Bibelimi siulittuutigineqarsimapput. (Daniel kapitalit 2, 7 aamma 8) Ullumikkuttaaq, ukiut hundredellit 20-ssaanni, silarsuarmi pissusiusussat Bibelimi ukiut 2000-t matuma siornagut eqqorluinnartumik allanneqarsimapput. (Matîuse kapitalit 24 aamma 25; Mákorse kapitali 13; Lúkarse kapitali 21; 2 Timûtiuse 3:1 5; 2 Pîtruse 3:3, 4; sarĸúmersitat 6:1-8) Bibelip siulittuutaasa amerlasuut eqquunnerisa qularunnaarsippaatigut siunissaq nuanningaartoq pillugu eqqartugai ilumoortuusut.

Akisussaaffipput

Pisimasut ilumoortut tamakkua tamarmik Guutip inunnik ilumut attaveqarsimaneranut takussutissaapput. Guutip oqariartuunni inuit naammalluinnanngitsuusut aqqutigalugit ingerlateqqissimammagu eqqarsartariaqanngilagut Bibeli taamaalilluni uppernannginnerulersoq, nammineq qarni inngililluunniit aqqutigalugit imaluunniit tupinnartuliornikkut qilammi allanneqartillugu inunnut ingerlateqqissimanngimmagu.

Bibelilli Guutip oqaasiatut illernartutut akuersaarneragut akisussaaffimmik tunineqarpugut. Jehovap pissutissaqarluarluni naatsorsuutigaa aalajangersimasumik Bibelimik atuartarnissarput. (Tussiaat 1:1, 2) Bibeli pissarsiaqarfigalugu atuarneqassappat isuma eqqortoq pigisariaqarpoq. Eqqqaamasariaqarpoq Bibeli atuakkatut nalinginnartut atuarneqassanngimmat aammalu isigineqassammat ’inunnut oqaaseritinnagu Guutimulli oqaaseritillugu massalu ilumut taamaappoq.’ — 1 Tásalûníkamiut 2:13.

Bibelimiittut ilaat immaqa paasiuminaassinnaapput. Eqiasuillunili atuartarnikkut paasisaqarnarnerulertarpoq Guutillu piumasaanik siunertarisaanillu tamakkiisumik takorluuisinnaassuseqalernartarluni. (Eprîarit 5:14) Immaqa suli isumaqalersimanngilatit Bibeli ilumut tassaasoq Guutip oqaasia illernartoq. Bibelilli uppernassusia pillugu oqaaseqartoqarsinnaanngilaq misissorluaqqissaaqqaarsimanngikkaanni, ilaa?

Naak nalitsinni Bibelip ilumut Guutimeersuunera qularutigineqaraluaqisoq, inuppassuit eqqarsartartut Bibeli peqqissaartumik misissorsimavaat apustilillu Paulusip oqarneratut ima oqarsinnaalersimallutik: ’Guuti sallusuitsuutitaali, naak inuit tamarmik sallutuujuneragaagaluartut’! — Rûmamiut 3:4, NV. (wD 1/6 91)

[Qupp. 4-mi takussutissaq]

(Allassimasut qanoq inissisimanersut naqitami takuneqarsinnaavoq)

Bibeli nunarsuup inuisa 98 procentiinit pissarsiarineqarsinnaavoq

Oqaluttuarisaanermi Bibelip 3.000.000.000-inik amerlassuseqarluni siammarsimanera atuakkanit allanit angoqqajarneqarsimanngilaq. The New Encyclopædia Britannicap Bibeli ima eqqartorpaa: „Atuakkat ataatsimoortut qularnanngitsumik inuiaat oqaluttuarisaanerannut sunniuteqarnerpaasimasut“

[Qupp. 4-mi assiliartat]

Bibeli ataannarsimavoq, naak upperisarsiornikkut allagaatit allat maanna katersugaasivinniinnaq nassaassaalersimagaluartut.

Qulaani: Assyriamiut Ulersuarmik oqaluttuaat

Talerpiatungaani: Ægyptenimiut guutiannut Ramut qinnutit

[Suminngaanneernera]

Taakkua ilanngunneqarput Trustees of The British Museumip inussiarnersumik akuersineragut

[Qupp. 5-mi assiliartaq]

Bibeli ukiut 1600-t ingerlaneranni inunnit assigiinngitsunit 40-t missaanniittunit allanneqarsimagaluarluni aallaqqaataanit naggataanut ataatsimoorussamik eqqartugaqarpoq. Taamaallaat inunnit sianissuseqarnerungaartoq sivisoorsuarmik uumasimasoq taama maluginiarnartigisumik suliaqarsinnaavoq.

[Qupp. -mi assiliartaq]

Silarsuarmi pissaanilissuit saqqummernissaat, Babylonip nalaaniit nalerput tikillugu, Bibelimi siulittuutigineqarsimapput. (Danieli kapitalit 2, 7 aamma 8)

Talerpiatungaani: Kaasari Augustus

[Suminngaanneernera]

Museo della Civiltà Romana, Rom

[Qupp. 6-mi assiliartaq]

Ullumikkut silarsuarmi pissutsit ukiut 2000-inngajaat matuma siorna eqqorluartumik Bibelimi siulittuutigineqarsimapput. (Matîuse 24, 25-lu; Mákorse 13; Lúkarse 21; 2 Timûtiuse 3:1-5; 2 Pîtruse 3:3, 4; sarĸúmersitat 6:1-8) Bibelimi siulittuutit eqqorluinnartumik eqquussimammata, qularutigisariaqanngilarput Guutip nunarsuarmi paratiisissamik neriorsuutaa piviusunngorumaartoq

[Suminngaanneernera]

Reuters/Bettmann Newsphotos