Bibeli tassaava Guutip uatsinnut oqaasia?

ULLUMIKKUT inunnit qanoq amerlatigisunit Bibeli Guutip uatsinnut oqaasiatut illernartutut isigineqarpa? Nalitsinni qularfioqisumi amerlasuunit Bibeli pisoqalisimasutut, soqutaanngitsutut illernanngilluinnartutullu isigineqarpoq. Kristumiuuneraqatigiit upperisarsiornikkut siulersuisuisa allaat Bibeli oqaluttualiatoqqanik oqaluttualianillu upperniutinut tunngasunik ulikkaarnerarpaat. ’Bibelip oqaluttuarisaanermik saqqummiussinera paasisimasaqarluartut tapersersorsinnaaneraat’ apeqquserpaat. — The Interpreter’s Dictionary of the Bible, atuagaq 2, qup. 61.

Bibelimik ilisimatusartut nuimasut Bibelip Guutip oqaasiatut taaneqartussaaneranik qularutiginnilersitsipput. Ataatsip oqaatigisimavaa „Bibeli ’Guutip oqaasia’tut nipeqartutut taaneqassappat taaguutaa eqqortoq tassaasariaqartoq Israelip oqaasia imaluunniit kristumiut siulliit siulersortaasa ilaasa oqaasii’’. (The Bible in the Modern World James Barrimit) Illit qanoq isumaqarpit? Ilumut Bibeli tassaava Guutip uatsinnut oqaasia illernartoq?

Kia Bibeli allappaa?

Mosesimik allakkat siulliit, tassaasuttaaq Bibelimi allakkat siullersaat, Mosesimit, hebræeriusumit ukiut 3500-it missaanniittut matuma siornagut inuusimasumit, allanneqarsimanerarneqartarput. Bibelimi allassimasut malillugit angutit 40-t missaat innuttaaqatigiit iluanni tamalaaneersut Allakkat Illernartut, naggataagut allakkanik imaluunniit immikkoortunik 66-inik imaqalersut, sinnerisa allanneqarnerannut peqataasimapput. Angutilli taakku Bibelimik atuakkiortuusutut imminnut naatsorsuutinngillat. Ilaat ima oqarsimavoq: ’Allakkat tamarmik Guutip anersaarneranik ilaqarput.’ (2 Timûtiuse 3:16) Allap Bibelimik allaqataasut ima allaatigai: ’Anersaap illernartup pisimmatik inuit Guutimit oqalupput.’ — 2 Pîtruse 1:21.

Tassa Bibelimik allattut tassaanerusimassapput allatsit Guutimit siulersorneqartut. Bibelimi ersersinneqarpoq paasissutissat Guutip tunniussai allattup nammineq oqaaseqatigiittut ilusilersortarsinnaasimagai. (Habakkuk 2:2) Taamaammallumi allariaatsit assigiinngitsorpassuit Bibelimi siumugassaapput. Bibelilli allanneqarnera Guutip tamatigut siulersorsimavaa.

Allattulli Guutimit isumassarsisitaallutik allassimanerarnerat immini Bibelip Pinngortitsisumit inunnut oqariartuutaaneranut uppernarsaataanngilaq. Kisianni Guutip Bibelimik atuakkiortuunera atuakkiortuunnginneraluunniit uppernarsiniaraanni peqqissaartumik paqumisussuseqanngitsumillu misissuisariaqarpoq. Bibelip Guutimeersuuneranut uppernarsaatissanik Bibeli nammineq imaqarpa? Qularuteqanngilluinnarluni oqartoqarsinnaava Bibeli tassaasoq Guutip oqaasia illernartoq? (wD 1/6 91)