Guutip naakkinnissusia malinniassaviuk?
Guutip naakkinnissusia malinniassaviuk?
’Taamaattumik Guuti qitornatut asanartutut malinniarsiuk.’ — Evfisumiut 5:1.
1. Inuit allat malinniarnissaat eqqarsaatigalugu sooq mianersortariaqarpugut?
INUIT amerlanersaasa allat malinniartarpaat, ajunngitsumik ajortumilluunniit. Aap, tamatta ilagisartakkatsinnit sunnertittarpugut. Ussatit 13:20-mi Guutimit isumassarsisitaalluni allattoq ima mianersoqqusivoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ Taamaattumik Guutip oqaasiani pissutissaqarluartumik imattaaq allassimavoq: ’Ajortoq pinnagu ajunngitsoq maliguk. Ajunngitsuliortoq Guutimit pivoq.’ — 3 Juánase 11.
2. Kina malinniartariaqarparput, qanorlu ililluta?
2 Anguterpassuit arnarpassuillu maligassaalluartut Bibelimi eqqartorneqarput. (1 Korintumiut 4:16; 11:1; Filípimiut 3:17) Soorunalimi pingaarnerpaatillugu Guuti malinniartariaqarparput. Paulusip pissutsit iliuutsillu aalajangersimasut ingalattariaqakkavut uparuariarlugit, Evfisumiunut agdlagkat 4:32-mi kajumissaarpaatigut ’isumassuigajoqqulluta isumakkeerfigeqatigeeqqullutalu’. Taava allassimaffik allaaserisami matumani pineqartoq tulliuvoq: ’Taamaattumik Guuti qitornatut asanartutut malinniarsiuk, asannillusilu saqigitsi.’ — Evfisumiut 4:31–5:2.
3, 4. Guuti imminnut qanoq oqaatigaa, sunalu pillugu naapertuilluassusiata isumaa eqqarsaatigeqqissaartariaqarparput?
3 Kisianni Guutimi malinniartariaqagarput sunarpiaava? Soorlu Guutip Mosesimut nammineq kinaassutsiminik oqaatiginninneratigut paasineqarsinnaasoq, kinaassusia ilioriaasiilu tamatigoortorujussuupput: „Uanga tassa [Jehova], Guuti nallittuisoq, saammaasoq, kamajasuunngitsoq, isumassuingaartoq unneqqaringaartorlu; asannittoq tusindilinnut, ajortulianik unioqqutitsinernillu isumakkiisoq; kisianni pisuusumik pillaanngitsoorneq ajortoq. Siuaasat ajortuliaat pillarlugit pillaatigisannik qitorngaat, erngutaat erngutaqqiutaallu eqqorneqartittarpakka.“ — 2 Moses 34:6, 7.
4 Jehovap ’innarluissut naapertuilluarnerlu nuannarimmagit’, kinaassutsimigut pissusia tamanna ilisarilluartariaqarparput malinniarsinnaaniarlutigu. (Tussiaat 33:5; 37:28) Taanna inuiaat Pinngortitsisoraat, qulliusumik Eqqartuussisoralugu Inatsisiliortoralugulu, taamaattumillu inuit tamaasa naapertuilluarfigisarpai. (Jesaja 33:22) Innuttaminut Israelikkunnut kingusinnerusukkullu kristumiut ilagiissaannut naapertuilluarnermik piumasarisaminik atortitsisarnera tamatumunnga ersiutaalluarpoq.
Naapertuilluarnerup Guutimeersup qanoq atorneqarnera
5, 6. Guutip naapertuilluassusia Israelikkunnut qanoq ersersimava?
5 Guutip Israelikkut innuttamisut toqqaramigit, aperai ’oqaatsini naalalluarumaneraat angerutsinilu aalajangiukkumanerlugu’. Innuttaasa, Sinajip Qaqqaani katersorsimasut, ataatsimoorlutik akivaat: „[Jehovap] oqaasii tamaasa malillugit iliorumavugut.“ (2 Moses 19:3-8) Neriorsuut ilungersornartoq! Taamaalillutik Guutimut tunniulluinnarmata, inngilit aqqutigalugit Israelikkut inatsisinik 600-t missaannik naammassisariaqagaannik tunivai. Taavali inatsisinik naalakkumanngitsoqarpat? Guutip inatsisaanik paasisaqarluartoq ima nassuiaavoq: ’Oqaasermi inngilitigut oqaaserisaq aalajangermat, pinerlunnerillu naalannginnerillu tamarmik eqqorsimasumik akilerneqarmata.’ — Eprîarit 2:2.
6 Aap, Israelikkuusoq naalakkumanngitsoq ’eqqortumik akilerneqartarsimavoq’, inuit naapertuilluarnermik najoqqutassiaannit naammalluanngitsunit pinnani, Pinngortitsisulli najoqqutassiaa naapertorlugu. Guutip unioqqutitsinernut assigiinngitsunut pillaatissat assigiinngitsut aalajangersimavai. Pillaatissaq sukkannernerpaaq tassaavoq ’piiagaanissaq’, tassa toqutaanissaq. Ingasattumik unioqqutitsisoqaraangat, soorlu guutipilussiornermi, allasiornermi, qitornanik uumasunilluunniit atoqateqarnermi, angutit anguteqatiminnik arnalluunniit arnaqatiminnik atoqateqartarneranni, meeqqanik pilliutiginninnermi, inuarnermi aammillu atornerluinermi, pillaat tamanna atortussaavoq. (3 Moses 17:14; 18:6-17, 21-29) Israelikkuusorli kinaluunniit ’piiagaasinnaavoq’ piaaraluni allamillu isumataarnani Guutip inatsisaasa ilaat unioqqutikkunigit. (4 Moses 4:15, 18; 15:30, 31) Aalajangersakkat naapertuilluartut Guutimeersut tamakku atortitaagaangata qularnanngitsumik unioqqutitsisut kinguaavinut sunniuteqartarpoq.
7. Naapertuilluassutsimik atuineq Guutip innuttaanut itsaq inuusimasunut sumik nassataqarsimava?
7 Pillaatissat taamaattut Guutip inatsisaanik unioqqutitsinerup ilungersornassusia erseqqissarpaat. Assersuutigalugu angut inuusuttoq imerajuttunngorlunilu nerrersoorsuanngorpat, eqqartuussisunut sassartitaassaaq. Paasineqarpat naalasseriillunilu anneruniarumatuusoq, angajoqqaat eqqartuussutip naammassineqarnissaanut peqataasariaqarput. (5 Moses 21:18-21) Angajoqqaat akornatsinniittut takorloorsinnaagunarpaat taamaaliorneq qanoq artornartigisimassanersoq. Guutilli ilisimavaa pallorfiginnittut ilumoortut akornanni guutiitsuussuseq siaruassanngippat tamanna pisariaqartoq. (Hesekiel 33:17-19) Pillaammik tamatuminnga aaqqissuussisoq ima allaatigineqarpoq: „Naapertuilluartuupput aqqutigisai tamarmik. Guutiuvoq aalajaatsoq, peqqusersuitsoq; iluartuuvoq naapertuilluartuullunilu.“ — 5 Moses 32:4.
8. Guutip naapertuilluassusia ilagiinnut kristumiunut qanoq erserpa?
8 Ukiut hundredellit arlallit tamatuma kingorna Guutip Israelikkut ajattorlugit kristumiut ilagiissaat toqqarpai. Jehovali allanngorsimanngilaq. Naapertuilluassutsi aalajangiusimajuaannarpaa eqqartorneqarlunilu ’innertut nungutitsisutut’. (Eprîarit 12:29; Lúkarse 18:7, 8) Taamaattumik Jehovap suli ilagiit tamaasa Guutimik mianerinninnermik eqqaamasassiorneqarnissaannik aaqqissuussiffigai, kristumiut tunniulluinnarsimasut unioqqutitsiuaannartut ilagiinnut ilaasortaajunnaarsitaassammata.
9. Ilagiinnut ilaasortaajunnaarsitsineq sunaava, tamannalu sumik siunertaqarpa?
9 Ilagiinnut ilaasortaajunnaarsitsineq sumik siunertaqarpa? Ukiuni hundrelinni siullerni taamaaliornermik piviusumik assersuutissaqarpugut. Korinthimi kristumiup ataatami nulia kanngunartuliorfigeqatigisarsimavaa allamillu isumataarumanani. Taamaattumik apustili Paulusip ilagiinnut ilaasortaajunnaarsitaanissaa peqqussutigaa. Guutip innuttaasa minguissusiat sernissorniarlugu iliuuseq tamanna pisariaqarpoq — ’seernarsaatimininnguummi timiusiassaq tamaat seernartitarpaa’. Ilaasortaajunnaarsikkamikku inuunerlunnerata Guutimut taassumalu innuttaanut narrunarsaataanissaa pinngitsoortissimavaat. Ilaasortaajunnaarsitsinikkut perorsagaaneq pissutigalugu immaqa aalaterneqarumaarpoq silattuaqissallunilu, taassumunnga ilagiinnullu Guutimik mianerinnissamik eqqaamasassiissutaasumik. — 1 Korintumiut 5:1-13; naleqqiuguk 5 Moses 17:2, 12, 13.
10. Ilagiinnut ilaasortaajunnaarsitaasoqarpat Guutip kiffai qanoq qisuariassappat?
10 Guuti inatsivoq kristumiu kinaluunniit inuunerluttuaannarnini pissutigalugu ilaasortaajunnaarsitaasoq ’ilagisaqqunagu . . . nereqatigeqqunaguluunniit’. * Ilaasortaajunnaarsitaq taamaalilluni ilagiinnit avissaartinneqarpoq ilumoortut Guutip inatsisaanik maleruaarusuttut ilagisinnaanagit. Ilumoortut taakkua ilaat immaqa ilaasortaajunnaarsitamik eqqarleqarput inoqutiginaguli. Eqqarleriit taakkua immaqa peqqussut Guutimeersoq tamanna maleruassallugu ajornakusoortippaat. Aammami Mosesip inatsisaasa ataanni angajoqqaat juutiusut ernermik unioqqutitsisumik iluarsivissaqanngitsumik toqutassaatitsinermi peqataanissaat artornarsimassaqaaq. Guutilli peqqussutaa paatsuugassaanngilaq. Taamaattumik qularutigisinnaanngilarput ilaasortaajunnaarsitsineq naapertuilluartuusoq. — 1 Korintumiut 5:1, 6-8, 11; Títuse 3:10, 11; 2 Juánase 9-11; takuuk Vagttårnet 15. november 1981, quppernerit 18-23; 15. april 1988, quppernerit 28-31.
11. Guutip kinaassusiata pissusii assigiinngitsut ilaasortaajunnaarsitsinermut tunngatillugu qanoq takuneqarsinnaappat?
11 Eqqaamasariaqarparpulli Guutitta naapertuilluarnerinnaq ilisarnaatiginngimmagu; aamma ’isumassuingaartuulluni ajortulianik pinerlunnernillu isumakkeerfiginnittarpoq’. (4 Moses 14:18) Oqaatsimini Guutip erseqqissumik takutippaa ilaasortaajunnaarsitaq allamik isumataarsinnaasoq Guutimillu isumakkeerfigineqarniarsinnaalluni. Taava nakkutilliisut misilittagallit ilaasortaajunnaarsitaq ataatsimeeqatigisinnaavaat, qinunikkut isumaliutigeqqissaarlugu unioqqutitsisimaneq ilaasortaajunnaarsitsinermik kinguneqartoq eqqarsaatigalugu taassuma allamik isumataarneranik takussutissaqarnersoq. (Naleqqiuguk apustilit suliáinik agdlagkat 26:20.) Taamaappat taanna ilagiinnut ilanngutiteqqinneqarsinnaavoq, soorlu 2 Korintumiut 2:6-11-mi allaatigineqartoq. Ilaalli ukiorpassuarni Guutip ilagiissaanit avissaarsimapput. Taakkua utersinnaanissaannut ikiorniarlugit iliuuseqartoqarsinnaava?
Naapertuilluassuseq naakkinnissuserlu oqimaaqatigiimmik
12, 13. Guuti malinniassagaanni sooq naapertuilluassusiata maleruarnissaa naammanngila?
12 Siuliani Guutip pissusiisa 2 Moses 34:6, 7-mi eqqartorneqartut ilaat, naapertuilluassuseq, pingaarnerusutigut sammivarput. Guutimilli malinninniartut naapertuilluassuseq kisiat pingaartissanngilaat. Sooq? Naalaffik Salomonip sanasimasaa assilillugu naalaffiusaliussagutta, sukarsuit ilaata ataasiinnaap misissornissaa naammassava? (1 Kunnginik allakkat 7:15-22) Naamik, taamaaliornerinnatsigut naalaffiup sananeqarsimaneranik aaqqissuussaaneranillu paasisaqarluarnavianngilagut. Taamaapportaaq Guuti malinniassagutsigu. Naapertuilluassusia kisiat pinnagu pissusii allattaaq malinniartariaqarpavut. Assersuutigalugumi aamma allassimavoq taanna ’Guutiusoq nallittuisoq, saammaasoq, kamajasuunngitsoq, isumassuingaartoq unneqqaringaartorlu, asannittoq tusindilinnut, ajortulianik unioqqutitsinernillu isumakkiisoq’.
13 Naakkinnissuseq isumakkeerfiginnikkumassuserlu Guutimi pissusiupput tunngaviusut, soorlu Israelikkunnut iliuuseqarsimaneranit takuneqarsinnaasoq. Unioqqutitseqattaarnerat pillugu pillaraluarlugit naapertuilluassutsip Guutiata naakkinningaassusia isumakkeerfiginnikkumassusialu erseqqipput. „Ilinniartippai Moses aqqutigisaminik, Israelikkullu suliaminik. [Jehova] naakkinnillunilu saammaasuuvoq, kamakkumaarnertulluni nallittuingaarlunilu. Unnerluutiginnittanngilaq soraajuitsumik, kamassimajuaannarnanilu.“ (Tussiaat 103:7-9; 106:43-46) Aap, Guutip ukiuni hundredelinni qaangiuttuni iliuuserisimasai misissoraanni paasineqassaaq oqaatsit taakku ilumoortut. — Tussiaat 86:15; 145:8, 9; Mika 7:18, 19.
14. Jesusip qanoq ililluni takutippaa Guutip naapertuilluassusia malinniartarlugu?
14 Jesus Kristus tassaammat ’[Guutip] naalannaassusiata akisunnera qanoq-issusiatalu ersinnera’, ilimagisinnaavarput assingusumik naakkinnissuseqartoq isumakkeerfiginnissinnaassuseqarlunilu. (Eprîarit 1:3) Allanut iliuusaata tamanna uppernarsarpaa. (Matîuse 20:30-34) Oqaatsimigullu naakkinnissuseq pingaartittarpaa, soorlu Lúkarse kapitali 15-imit takuneqarsinnaasoq. Kapitalimi tamatumani assersuusiat pingasut takutilluarpaat Jesusip Jehova malinniartaraa, assersuusiallu taakku uatsinnut pingaaqisumik unnersuussuteqarput.
Tammaraluartunik isumaaluginninneq
15, 16. Suna pillugu Jesusip assersuusiat Lúkarse kapitali 15-imiittut oqaatigai?
15 Assersuusiat taakkua takutippaat Guutip naakkinnilluni ajortuliortut soqutigigai, tulluartunillu maleruagassaqartippaatigut. Pissutsit assersuusianut tunuliaqutaasut eqqarsaatigeqqissaarniartigik: ’Ilanngaaserisulli ajortuliortullu tamarmik [Jesusimut] palliguttarput tusarumallugu. Farisiiarillu allakkanillu ilisimasut oqalorujulerput oqarlutik: „Uuma ajortuliortut ilassivai nereqatigalugillu.“’ — Lúkarse 15:1, 2.
16 Pineqartut tamarmik juutiupput. Farisiiarit allakkanillu ilisimasut Inatsisit naapertorlugit naapertuilluassusertik usorsisimaarutigisarpaat, tamakku minninnguatigut allaat maleruaqqissaartuusaaramikkik. (Lúkarse 16:15) Ilanngaaserisut eqqartorneqartut tassaagunarput juutit Romamiunut akileraarutinik katersuisartut. Taakku ajorisaasarput ilaat nunaqqatiminnit akileraarutinik amerlanaarillutik katersuisaramik. (Lúkarse 19:2, 8) ’Ajortuliortunut’, soorlu inuunerluttunut allaallu atortittartunut, taakku naligititaasarput. (Lúkarse 5:27-32; Matîuse 21:32) Jesusilli upperisarsiornikkut pisortat mamiatsattut ima aperai:
17. Lúkarse kapitali 15-imi assersuusiaq siulleq sumik imaqarpa?
17 ’Kia inuup ilassi hundredelinnik savaatillup taakkua ilaat ataaseq tammaaguniuk ilai arfineq-sisamanik qulillit arfineq-sisamallu puilasuitsumut qimallugit tammartoq ujassannginnerpaa nanitserlugu? Naniguniullu tipaatsulluni ersussavaa, tikikkunilu ikinngutini sanilinilu qaaqqussavai oqarfigalugillu: „Tipaatsoqatigisinga, savaatiga tammaraluartoq nanigakku.“ Oqarfigaassi: Taamattaaq ajortuliortoq allamik isumataartoq ataaseq iluartunit arfineq–sisamanit qulilinnit arfineq-sisamanillu allamik isumataarnissamik ajorsanngitsunit qilammi tipaatsuutigineqarnerussaaq.’ Uperisarsiornikkut pisortat assersuusiaq tamanna paasilluarpaat. Savaatit savanillu paarsisut taamani takornartaanngeqaat. Savanik paarsisup isumaginnilluartup savat 99-t ivigalimmut sungiusimasaannut qimallugit sava tammartoq ujariartorpaa. Ujartuarpaa nanitserlugu, taavalu mianersorluni sava annilaarsimasoq ersullugu savaatinut utertippaa. — Lúkarse 15:4-7.
18. Lúkarse kapitali 15-imi Jesusip assersuusiaasa aappaanni nuannaarnissamut pissutaasoq suna ersersinneqarpa?
18 Jesus allamik assersuusioqqippoq: ’Arnap kialuunniit aningaasannguanik [drakme] qulinik pillup aningaasannguaq ataaseq tammaaguniuk nanerusserluni illu sanissannginnerpaa ujarleqqissaarlunilu nanitserlugu? Naniguniullu ikinngutini sanilinilu qaaqqussavai oqarlunilu: „Tipaatsoqatigisinga, aningaasannguaatiga tammaasaraluara nanigakku.“ Oqarfigaassi: Taamattaaq ajortuliortoq allamik isumataartoq ataaseq Guutip inngiliini tipaatsuutigineqarumaarpoq.’ (Lúkarse 15:8-10) Drakmep ataatsip sulisartup ullormut akissarsiaa naligingajappaa. Arnap aningaasaataa tassaasinnaavoq kingornussaq imaluunniit ujammip ilaa. Tammarmat ujaqqissaarpaa, nanigamiullu ikinngutini tipaatsoqatigalugit. Tamatuma Guuti pillugu sumik oqaluttuuppaatigut?
Qilammi tipaatsunneq — suna pillugu?
19, 20. Lúkarse kapitali 15-imi assersuusiani marlunni siullerni sunarpiaq pineqarpa, pingaartorlu suna erseqqissarneqarpa?
19 Assersuusiat marluk taakku Jesusip, qaammatialuit tamatuma siorna ’savanik paarsisutut ajunngitsutut’ savat pillugit inuunerminik iperaasutut imminut ilisaritittup, oqaatigai isornartorsiorneqarsimagami. (Juánase 10:11-15) Assersuutinili taakkunani Jesus pingaarnerpaanngilaq. Tassami allakkanik ilisimasut farisiiarillu Guutip isumaanik iliuuserisartagaanillu ajoqersorneqartariaqarput. Taamaattumik Jesus oqarpoq ajortuliortoq allamik isumataartoq ataaseq qilammi tipaatsuutigineqassasoq. Upperisarsiortut taakkua Jehovamik pallorfiginninneraraluarput malinniarnaguli. Jesusilli naakkinnissusia Ataataata piumasaanut naleqqulluartuuvoq. — Lúkarse 18:10-14; Juánase 8:28, 29; 12:47-50; 14:7-11.
20 100-t ilaat ataaseq tipaatsuutigineqassappat, suli annerusumik pissutissaqassaaq qulit ilaat ataaseq tipaatsuutigissallugu. Arnap aningaasannguaatiminik tammaraluartumik nanisinermini tipaatsunnera takorloorsinnaavarput! Tamatumanittaaq qilak uatsinnut uparuarneqarpoq, paasitinneqaratta ’Guutip inngiliisa’ Jehova ilagalugu ’ajortuliortoq allamik isumataartoq ataaseq’ tipaatsuutigigaat. Malugiuk oqariaaseq: ’allamik isumataarpoq’. Assersuusiani tamakkunani pineqartut tassaapput ajortuliortut allamik isumataartut. Assersuusianilu tamani erseqqissarneqarpoq taamaattut allamik isumataaraangata tipaatsunnermut pissutissaqarluartoq.
21. Jesusip assersuusiai Lúkarse kapitali 15-imi sumik ilinniutigisariaqarpavut?
21 Upperisarsiornikkut pisortat tammarsimasut imminnut naammagisimaarlutik Inatsisit isumaat pinnagit oqaasertaannik maleruaaniartut arajutsivaat Guuti „nallittuisoq, saammaasoq . . . ajortulianik unioqqutitsinernillu isumakkiisoq“. (2 Moses 34:6, 7) Guutip pissusiisa ilaat tamakku periaasiilu malinniaraluarunikkik Jesusip ajortuliortunut allamik isumataartunut naakkinnissusia qujamasuutigisimassagaluarpaat. Uagut qanoq isumaqarfigaarput? Unnersuussineq tamanna uummatitsinnik ilassillugu maleruarparput? Jesusip tamatumunnga atatillugu assersuusiaasa pingajuat eqqarsaatigeriartigu.
Iliuuseqarnikkut allamik isumataarneq naakkinninnerlu
22. Lúkarse kapitali 15-imi assersuusiat pingajuat naatsumik oqaluttuareriaruk.
22 Assersuusiaq tamanna ernermik tammaraluartumik assersuummik taaneqartarpoq. Atuarutsiguli immaqa paasissavarputtaaq suna pillugu ilaasa ataatap asanninneranik oqaluttuatut isigigaat. Tassani oqaluttuarineqarpoq ilaqutariinni erneq nukarleq ataataminit kingornussarsisinneqartoq. (Naleqqiuguk 5 Moses 21:17.) Angut inuusuttoq taanna nunamut ungasissumut aallarpoq, inuunerlullunilu pisuussutini atulussinnarpai. Puulukinik paarsisunngortariaqalerpoq imalu ajorsartigilerluni allaat puulukit nerisassaat illigisalerlugit. Kiisami silattuaqilluni angerlarniarluni aalajangerpoq, ataatamini kiffartortutuinnaq suliniarniarluni. Angerlarsimaffini ornilermagu ataataa tikilluaqqusinissaminut, allaammi nuannatsitsinissaminut piareersalerpoq. Ernerup angajulliup, suliniarluni ataatamini angerlarsimaannarsimasup, nukkami taama naakkinnittuliorfigineqarnera ajuallaatigaa. Ataataasulli oqarfigaa nuannaarutigisariaqartoq erneq toqugaluartorlusooq kingumut uummarmat. — Lúkarse 15:11-32.
23. Ernermik tammaraluartumik assersuusiaq sumik ilinniutigisariaqarparput?
23 Allakkanik ilisimasut farisiiarillu ilaasa qularnanngitsumik malugaat namminneq ernermut angajullermut assersuunneqarlutik, ajortuliortullu ernermut nukarlermut assersuunneqartut. Assersuusialli isumaa paasinerpaat — uagullu paasinerparput? Assersuusiap tamatuma Ataatatta qilammiusup naakkinnittup pissusiisa ilaannik nuimanerusumik paasitippaatigut, tassa ajortuliortumut ilumoorluni allamik isumataarluni saanniartumut isumakkeerfiginnikkusussusianik. Tamatuma tusarnaartut killittariaqaraluarpai ajortuliortut peqqissimisut isumakkeerfigineqarsinnaanissaat nuannaarutigeqqullugu. Guutip isumaa taamaappoq, taassuminngalu malinninniartut aamma taama isumaqartariaqarput. — Jesaja 1:16, 17; 55:6, 7.
24, 25. Guutip kinaassusiata pissusii suut malinniartariaqarpavut?
24 Ersarippoq Guutip aqqutigeqqusai tamarmik naapertuilluartuusut. Taamaattumik Jehovamik malinninniartut naapertuilluassuseq pingaartittariaqarpaat maleruarniartariaqarlugulu. Jehovalli naapertuilluassuseq sukannersoq kisiat atunngilaa; aamma naakkinnissusia asannissusialu angeqaat. Tamanna takutippaa ilumoorlutik peqqissimisut isumakkeerfigiumagamigit. Taamaattumik Paulusip isumakkeerfiginnikkumassuseq Guutimik malinninnermut atassuteqartippaa: ’Isumakkeerfigeqatigiillusilu, soorlu Guutip isumakkeerfigigaasi Kristusimi. Taamaattumik Guuti qitornatut asanartutut malinniarsiuk, asannillusilu saqigitsi.’ — Evfisumiut 4:32–5:2.
25 Kristumiut ilumoortut qangali Jehovap naapertuilluassusia, naakkinnissusia isumakkeerfiginnikkumassusialu malinniartarpaat. Ilisarinerugutsigu tamakkunatigut malikkuminarnerussaaq. Inulli unioqqutitsiuaannarnini pissutigalugu naapertuilluartumik sakkortuumik perorsarneqartoq eqqarsaatigalugu qanoq ililluta tamanna maleruarsinnaavarput? Ilanngutassiami tulliuttumi tamanna samminerussavarput. (wD 15/4 91)
[Quppernerup ataani ilanngussat]
^ imm. 10 „Ilagiinnut ilaasortaajunnaarsitsineq, ekskommunikation, nalinginnaasumik oqaatigissagaanni tassaavoq ilaasortatut akuerisaasimagaluartut ilaasortaanerup pisinnaatitaaffiinik atuinissamut naaggaarfigineqarnerat. . . . Ilaasortaajunnaarsitsineq kristumiut siulliit nalaanni tassaalersimavoq unioqqutitsisut nerliiviliarnermut, ilagiit guutisiornerannut immaqalu katersuuttarnerinut sunulluunniit peqataaqqusaajunnaarnerat.“ — The International Standard Bible Encyclopedia.
Suut ilinniarpigit?
□ Israelikkut akornanni aammalu ilagiinni kristumiuni Guutip naapertuilluassusia qanoq ersersimava?
□ Suna pillugu Guutip naapertuilluassusia kisiat pinnagu aammali naakkinnissusia malinniartariaqarparput?
□ Lúkarse kapitali 15-imi assersuusiat pingasut sumik tunuliaqutaqarpat, sumillu ilinniutigisariaqarpavut?
[Atuaqqissaarnermi apeqqutit]
[Qupp. 12, 13-mi assiliartaq]
Narsaq er-Raha. Ungataani saamiup tunngaaniippoq Sinajip Qaqqaa.
[Suminngaanneernera]
Pictorial Archive (Near Eastern History) Est.
[Qupp. 11-mi suminngaanneernera]
Garo Nalbandian
[Qupp. 14-mi suminngaanneernera]
Garo Nalbandian