Guutip naakkinnissusia ullumikkut malinniaruk

„Guutilli assaanut tunniutiinnarniarta nallittuissusia angeqimmat.“ — 2 SAMUEL 24:14.

1. Guutip naakkinnissusia Davidip qanoq qisuariarfigisimavaa?

KUNNGI Davidip misilittakkani naapertorlugit nalunngilaa Jehova inunnit naakkinninnerusoq. Guutip aqqutigeqqusaasa pitsaanerunerat tatigalugu Davidip ilisarerusuppai taassumalu sallusuissutaa malillugu ingerlarusulluni. (1 Israelikkut oqaluttuarisaanerat 21:13; Tussiaat 25:4, 5) Illit Daviditut misigivit?

2. Sualuttumik ajortuliortoqarnerani qanoq iliuuseqarnissaq pillugu Jesus qanoq unnersuussiva, Matîuse 18:15-17 naapertorlugu?

² Bibeli aqqutigalugu Guutip eqqarsariaasianik paasisaqarsinnaavugut, aamma allanit ajortuliorfigineqarutta qanoq iliortariaqarnitsinnik. Jesusip apustilini, kingorna kristumiutut nakkutilliisunngortut, oqarfigisimavai: ’Qatannguppilli ajortuliorfigippatit, orniguk kisimiitillusilu oqaanniaruk. Tusarumappatit qatanngutit utertissavat.’ Ajortuliaq eqqartorneqartoq tassaannaanngilaq inuit minnerusutigut isumaqatigiinnginnerat, tassaavorli sualuttumik ajortuliaq soorlu peqquserlunneq imaluunniit mamarliineq. Jesus oqarpoq taamaaliorneq iluaqutaanngippat taava eqqunngitsuliorfigineqartup orneqqissagaa ilisimannittunik ilaqarluni, taakku unioqqutitsisoqarsimaneranik uppernarsaasuussammata. Kingornali qanoq ilioriarfissaqanngila? Naamik, ’taakkua tusarumanngippagit ilagiinnut oqaatiguuk; ilagiilli tusarumanngippagit Guutimik nalusutut ilanngaaserisutullu isumaqarfigissavat’. — Matîuse 18:15-17.

3. Jesus oqarmat ajortuliortoq peqqissiminngitsoq ’Guutimik nalusutut ilanngaaserisutullu’ isigineqassasoq qanoq paasisariaqarpa?

³ Apustilit namminneq juutiugamik nalunngilluinnarpaat ajortuliortup ’Guutimik nalusutut ilanngaaserisutullu’ isumaqarfigineqarnissaa qanoq isumaqartoq. Juutit inuiaannik allanik, Guutimik nalusunik, atassuteqarfiginnikkumanngivissimapput,  nunaqqatiminnillu Romamiunut akileraaruserisunik, ’ilanngaaserisunik’, narruginnillutik. * (Juánase 4:9; apustilit suliáinik agdlagkat 10:28) Tassa Jesusip ajoqersukkat siunnersorpai ajortuliortutut ilagiinnit anisitaasoq ilagiunnaaqqullugu. Tamannali qanoq ililluni Jesusip ilaatigut akileraaruserisunik najuisarsimaneranut naapertuuppa?

4. Jesusip oqaasii Matîuse 18:17-imiittut eqqarsaatigalugit qanoq ililluni ilanngaaserisut ajortuliortullu ilagisinnaasarpai?

⁴ Lúkarse 15:1-imi ima allassimavoq: ’Ilanngaaserisulli ajortuliortullu tamarmik taassumunnga palliguttarput tusarumallugu.’ Ilanngaaserisut ajortuliortulli tamavimmik ornigutinngikkaluarpaat, kisianni amerlasuut taamaaliorput. (Naleqqiuguk Lúkarse 4:40.) Pineqartut tassaapput ajortuliaminnik isumakkeerfigineqarusuttut tamarmik. Taakkua ilaasa Johannes Kuisisup allamik isumataarnissamik tusarliussaa ajunngitsumik qisuariarfigisimavaat. (Lúkarse 3:12; 7:29) Jesusillu taakkununnga oqaluussiffiginninnera unnersuussutaanut Matîuse 18:17-imi eqqartorneqartumut akerliunngilaq. Malugeriaruk ’ilanngaaserisut ajortuliortullu amerlasuut Jesus tusarnaarlugu malinnittut’. (Mákorse 2:15, NV??) Taakku tassaanngillat inuunerluttuaannartut ikiorneqarusunngitsut. Jesusip oqaluussinera tusarnaarpaat, tamatumalu uummataat killippaa. Ilaat allanngorniartillutik immaqa unioqqutitsisaraluartut, ’paarsisup ajunngitsup’, Jesus Kristusip, oqaluussiffigalugit Ataatani qilammiusoq naakkinnittoq malinniartarpaa. — Juánase 10:14.

Isumakkeerfiginninneq kristumiut pisussaaffiat

5. Guuti isumakkeerfiginninneq pillugu qanoq isumaqarpa?

⁵ Ataatatta qilammiusup isumakkeerfiginnikkumassusia pillugu ima kajumissinartumik qularunnaarsinneqarpugut: ’Ajortivut anngiiaatigigutsigik, taanna ilumoorlunilu iluartuuvoq, ajortitsinnik isumakkeerfigaluta iluaatsunillu sunik tamanik piiaaffigaluta.’ ’Tamakkuninnga ilissinnut allappunga ajortulioqqunasi; ajortuliortoqaraluarpallu ataatami illersuisoqarpugut, Jesus Kristusimik iluartuusumik.’ (1 Juánase 1:9; 2:1) Ilaasortaajunnaarsitaq aamma isumakkeerfigineqarsinnaava?

6. Ilaasortaajunnaarsitaq qanoq ililluni isumakkeerfigineqarsinnaallunilu ilannguteqqissinnaava?

⁶ Aap! Ajortuliorsimalluni allamik isumataarumanngitsoq ilaasortaajunnaarsitaagaangat, utoqqaanertat ilagiinnut sinniisuusut paasitittarpaat allamik isumataarsinnaanissaanik Guutimillu isumakkeerfigineqarsinnaanissaanik. Ilaasortaajunnaarsitap rigssalimi ataatsimiinnerit najuuffigisinnaavai tassanilu unnersuussutit Bibelimeersut allamik isumataarnissaminut ikiuutaasinnaasut tusarnaarlugit. (Naleqqiuguk 1 Korintumiut 14:23-25.) Piffissangaatsiaap kingorna taanna ilagiinnut ilannguteqqinniarsinnaavoq. Ilannguteqqinniarnera pillugu utoqqaanertat ilaasortaajunnaarsitaq naapeqatigigunikku, paasiniassavaat taanna ilumut allamik isumataarsimanersoq inuunerlukkunnaarsimanersorlu. (Matîuse 18:18) Taamaappat, ilaasortaajunnaarsitaq ilagiinnut ilannguteqqissinnaavoq 2 Korintumiut 2:5-8-mi allaaserineqartoq naapertorlugu. Ukiuni arlalinni ilaasortaajunnaaqqasimasoq ilungersortumik suliniuteqartariaqarpoq siumukarniarluni. Aammalu Bibelimik ilisimasaqaleqqinnissaminik tamatuminngalu pingaartitsileqqinnissaminik ikiorneqarnissaminik annertuumik pisariaqartitsivoq, kristumiutut anersaakkut nukittuunngussaguni.

Jehovamut saagit

7, 8. Guutip innuttaminut nunagisaminnit qimaatitaasimasunut atatillugu qanoq ililluni maligassaava?

⁷ Utoqqaanertat namminneerlutik ilaasortaajunnaarsitaq  atassuteqarfigisinnaavaat? Aap, taamaaliorsinnaapput. Bibelimi takutinneqarpoq naakkinninneq pillaanngitsoornerinnarmi ersertanngitsoq, aammali suliniuteqarnikkut erserajuttartoq. Jehova nammineq tamatumuunakkut maligassaalluarpoq. Innuttani ilumuunngitsut nunagisaannit persitsinnagit, uternissaminnik neriuuteqarsinnaaqqullugit siulittuutit oqaatigitippai: „Israelikkuususi Jaakup kinguaavi, manna eqqaasiuk: Ilissi kiffaraassi! . . . Piiarpakka pinnerlunnisi putsutut isillugit, ajortuliasilu aamma nuissatut isillugit. Uannut saagitsi utertikkassi!’ — Jesaja 44:21, 22.

⁸ Juutit nunamut allamut aallarussaaneranni ikiorniarlugit Jehova aamma allatigut iliuuseqarsimavoq. Pruffiitit imminut sinniisutut aallartissimavai Israelikkut kajumissaarniarlugit ’ujaqqulluni naneqqullunilu’. (Jeremia 29:1, 10-14) Hesekiel 34:16-imi savanik paarsisumut imminik assersuuppoq Israelikkullu savanut tammartunut assersuullugit: „Savat tammartut ujassavakka siammartullu katersorlugit.“ Jeremia 31:10-mittaaq Jehova imminik Israelikkunnut savanik paarsisumut assersuuppoq — savanik paarsisumut savat tammartut namminneq uternissaat utaqqillugu savat inaanniiginnartumut assersuunnani. Tammartulli ujarniarlugit aallarpoq. Malugeriaruk naak Israelikkut nunagisaminnit aallarunneqaraluartut, taakkualu amerlanersaat allamik isumataanngikkaluartut, taamaattoq Jehovap uternissaat aaqqissorpaa. Kristumiullu aaqqissuussaanerat pilersinneqarmat Malakia 3:6-imut naapertuuttumik Jehovap iliuutsini allanngortissimanngilaa.

9. Kristumiut ilagiissaanni Guutip maligassiaa qanoq maleruarneqarpa?

⁹ Tamatuma takutinnginnerpaa kristumiut ilagiivinnut ilaasortaajunnaarsitaasimasumik maannakkulli immaqa allamik isumataarsimasumik ikiuiniarluni iliuuseqarnissamut pissutissaqarsinnaasoq? Eqqaamajuk apustili Paulus unioqqutitsisumik Korinthimiittumik ilagiinnit peersitsinissamik peqqusisimasoq, kingusinnerusukkulli ilagiit kajumissaarlugit angummut taassumunnga asanninnertik uppernarsaqqullugu, allamik isumataarmat ilagiinnullu ilanngutiteqqinneqarsinnaalluni. — 1 Korintumiut 5:9-13; 2 Korintumiut 2:5-11.

10. (a) Ilaasortaajunnaarsitamik saaffiginninnermut suna pissutaasariaqarpa? (b) Sooq ilaasortaajunnaarsitamik qanigisaqartut taassuminnga atassuteqarfiginninniassanngillat?

¹⁰ Qinerlerfissiami siuliani issuaaffigisatsinni ima allassimavoq: „Ilagiinnut ilaasortaajunnarsitsinermut tunngaveqarluartumik pissutissaq tassaavoq ataatsimooqatigiit najoqqutassaasa illersorneqarnissaat: ’seernarsaatimininnguup timiusiassaq tamaat seernartittarpaa’ (1 Korintumiut 5:6). Pissutaasoq tamanna allassimaffiit Bibelimiittut atuakkanilu Bibelimut ilaanngitsuniittut amerlanersaanni takuneqarsinnaavoq. Kisianni Paulusip 2 Korintumiut 2:7-10-mi peqqussutaanut pissutaasoq tassaavoq inummik isumaginninneq, allaat ilaasortaajunnaarsitsinerup kingorna.’ (Uagut allanneri uingasunngorlugit erseqqissarpavut.) Ullumikkut ilagiinni paarsisut tamatumunnga assingusumik isumaginnittariaqarput. (apustilit suliáinik agdlagkat 20:28; 1 Pîtruse 5:2) Qanigisaasut ikinngutaasimasullu qularnanngitsumik ilaasortaajunnaarsitap uterniarnissaa neriuutigaat. Peqqussulli 1 Korintumiut 5:11-miittoq ataqqillugu ilaasortaajunnaarsitaq ilagisarumajunnaassavaat. * Uternissani soqutigineraa paaserusukkunikku ilagiinni paarsisunut toqqakkanut isumagitissavaat.

11, 12. Ilaasortaajunnaarsitat qanoq ittut allaat utoqqaanertanit saaffigineqassanngillat, qanorli ittut immaqa saaffigissallugit?

¹¹ Ilaasortaajunnaarsitalli ilaqarput aamma allaat utoqqaanertanit atassuteqarfigineqarnissaminnut tulluanngitsunik. Assersuutigalugu taaneqarsinnaapput tunussisut ’ajoqersukkat imminnut malinnaatikkumallugit mumingasunik oqaluttut’. Taakku tassaapput ’ajoqersuisooqqusersut immikkoorniaqatigiinnik aserornartunik aggiussiniartut oqaatsinillu salloqittaaniutinik ilagiit iluaqutissarsiffiginiarlugit’. (apustilit suliáinik agdlagkat 20:30; 2 Pîtruse 2:1, 3) Aammalu Bibeli tunngavigalugu pissutissaqanngilagut ilaasortaajunnaarsitat puffassimaartut imaluunniit suliamikkut ileqqulersuutinillu kristumiorpalunngitsunik  siuarsaasut naapinniarnissaannut. — 2 Tásalûníkamiut 2:3; 1 Timûtiuse 4:1; 2 Juánase 9-11; Jûtarse 4, 11.

¹² Ilaasortaajunnaarsitaasulli amerlasuut taamaanngillat. Ilaata immaqa sualuttumik ajortuliorsimanini ilaasortaajunnaarsitsinermut pissutaasoq soraarussimavaa. Alla immaqa pujortartalersimavoq imerpallaartalersimallunilunniit, allalli taamaalioqqullugit kaammattorneq ajorlugit. Eqqaamajuk Guutip Israelikkunnut nunaminnit anisitaasunut sinniisunik aallartitsisimasoq uternissaannik kajumissaarniarlugit, allaat suli Guutimut saannianngikkallarmatali. Paulusip imaluunniit ilagiinni Korinthimiittumi utoqqaanertat namminneerlutik angut ilaasortaajunnaarsitaq atassuteqarfigisimaneraat Bibelimi allassimanngilaq. Taannali allamik isumataarmat inuunerlussimanini soraarullugu, Paulusip ilagiit peqquai taassuminnga ilanngutititseqqeqqullugit.

13, 14. (a) Suna pillugu isumaqartoqarsinnaava ilaasortaajunnaarsitat ilaat naakkinnittumik saaffigineqarnissamut ajunngitsumik qisuariassasut? (b) Utoqqaanertaqatigiit qanoq ilillutik taamatut saaffiginnissappat?

¹³ Ukiuni kingullerni arlalitsigut utoqqaanertat ilaasortaajunnaarsitanik naapitsisimapput. Naleqqulluaraangat ilaasortaajunnaarsitaq oqarfigisarpaat ilannguteqqinniarluni qanoq iliorsinnaasoq. Ilaasortaajunnaarsitat ilaat allamik isumataaramik ilanngutseqqinneqarsimapput. Misilittakkat nuannersut taamaattut takutippaat ilaasortaajunnarsitat imaluunniit namminneq tunuarsimasut ilaasa kingusinnerusukkut ilagiinni paarsisut naakkinnillutik saaffiginninnerat ajunngitsumik qisuariarfigisaraat. Utoqqaanertat tamatumunnga atatillugu qanoq iliorsinnaappat? Utoqqaanertaqatigiit ukiumut ataasiarlutik misissortariaqarpaat ilagiit oqaluussiffigisaanni taamaattunik inoqarnersoq. * Ukioq ataaseq sinnerlugu ilaasortaajunnaaqqasimasut utoqqaanertat tamatumani soqutigissavaat. Pissutsit naapertorlugit — naleqqulluarpat — utoqqaanertat marluk (ajunnginneruvoq ilaasortaajunnaarsitsimaneq pillugu ilisimannittut) ilaasortaajunnaarsitaq pulaarfigissavaat. Saqqumisumilli isornartorsiuisimasoq navianartumillu isumalik imaluunniit ikiorneqarusunngitsoq atassuteqarfigissanngilaat. — Rûmamiut 16:17, 18; 1 Timûtiuse 1:20; 2 Timûtiuse 2:16-18.

¹⁴ Utoqqaanertat marluk taakkua ilaasortaajunnaarsitaq sianerfigalugu pulaalaarnissamik isumaqatigiissuteqarfigisinnaavaat, imaluunniit tulluarpat alakkalaaginnarsinnaallugu. Pulaarnerminni sukannersumik ilasseraanngitsumilluunniit iliornissaminnut pissutissaqanngillat, qamanngali pisumik naakkinnittumik isumassuinertik takutittariaqarlugu. Pisimasut eqqartoqqinnagit allassimaffiit soorlu Jesaja 1:18 taavalu 55:6, 7 aamma Jâko 5:20 oqaloqatigiissutigisinnaavaat. Ilaasortaajunnaarsitaq Guutip ilagiivinut uterumappat, qanoq iliortariaqarnissaanik inussiarnersumik nassiuaassinnaavaat — assersuutigalugu, Bibelimik Vagttårnillu Peqatigiiffiata naqitigaanik atuartalernissaanik rigssalimilu ataatsimiinnernut najuuttalernissaanik.

15. Utoqqaanertat ilaasortaajunnaarsitaq saaffigigunikku suna eqqaamasariaqarpaat?

¹⁵ Utoqqaanertat ilisimassuseq naliliisinnaassuserlu pisariaqartissavaat allamik isumataarnermik takussutissaqarnersoq pulaaqqittariaqarnerlutillu paasiniarlugu. Soorunami eqqaamasariaqarpaat ilaasortaajunnaarsitat ilaasa ’allamik isumataarnissaat ajornaqisoq’. (Eprîarit 6:4-6; 2 Pîtruse 2:20-22) Pulaareerunik naatsumik ilagiit oqaluussinermut tunngasumik ataatsimiittartui pulaarsimanerminnik oqaluuttuutissavaat, taavalu utoqqaanertaqatigiit tullianik ataatsimiikkunik tamatuminnga paasitinneqassapput. Taamaalillutik utoqqaanertat naakkinnillutik Guuti malissimassavaat: „’Uannut saanniarniaritsi, taava uanga ilissinnut saassaanga,’ oqarpoq [Jehova].“

 Allatigut naakkinnittumik ikiuineq

16, 17. Ilaasortaajunnaarsitap qanigisai kristumiuusut qanoq isigisariaqarpavut?

¹⁶ Taavami nakkutilliisuunngikkutta taamaattumillu ilaasortaajunnaarsitat atassuteqarfigineqarnissaannik suliasinneqassanata? Qanoq ililluta aaqqissugaq tamanna tapersersorlugulu Jehova malinniarsinnaavarput?

¹⁷ Inuup ilagiinnut ilaasortaajunnaarsitaaqqanera imaluunniit tunuaqqanera tamaat unnersuussut manna maleruartariaqarparput: ’Ilagisassanngilasi qatanngummik taaneqartoq uersaasuuppalluunniit piumatuuppalluunniit Guutipilussiortuuppalluunniit, oqarnittuuppalluunniit imerajuttuuppalluunniit arsaarisuuppalluunniit, taama ittoq nereqatigissanngilarsiluunniit.’ (1 Korintumiut 5:11) Peqqussummilli tamatumannga Bibelimeersumit kristumioqatitsinnut ilaasortaajunnaarsitamik inoqutilinnut isiginninnerput sunnertittariaqanngilaq. Juutit qangali inuusimasut akileraaruserisunik ima iluarinninngitsigisimapput allaat taakkua ilaqutaat uumissorlugit. Taamaaliorneq Jesusip unnersuussutaanut naapertuutinngilaq. Taanna oqarpoq ajortuliortoq ikiorneqarusunngitsoq ’Guutimik nalusutut ilanngaaserisutullu’ isumaqarfigineqassasoq. Oqanngilaq ilaasortaajunnaarsitap ilaqutai kristumiuusut taama isumaqarfigineqassasut. — Matîuse 18:17.

18, 19. Ilaasortaajunnaarsitap qanigisai aalajaatsut qanoq ililluta kristumiutut isumassorsinnaallugillu naakkinnittuliorfigisinnaavavut?

¹⁸ Akerlianilli ilaasortaajunnaarsitap ilaqutai aalajaallutik kristumiuusut pingaartumik annertoqqusersortariaqarpavut. Taakkua immaqa atugarliuutigereerpaat ilaasortaajunnaarsitamik anersaakkut peqqissutsiminnut ajoqusiiniartumik najugaqateqarnertik. Ilaasortaajunnaarsitap immaqa kissaatiginngilaa uppeqatigisimasami angerlarsimaffimminnut isernissaat. Immaqaluunniit ilaqutariinni ilumoortut pulaarfigineqaraangata soqutigittaalluni najuutiinnartarpoq. Immaqattaaq ilaasortaajunnaarsitap ilaqutariit ataatsimiinnernut ataatsimeersuarnernullu najuunniarlutik ilungersorneri artornarsarniarpai. (Naleqqiuguk Matîuse 23:13.) Kristumioqatitta ilaat taamatut artorsaatillit naakkinnittuliorfigisariaqarpavut. — 2 Korintumiut 1:3, 4.

¹⁹ Qamannga pisumik naakkinninneq ilaatigut takutissinnaavarput ilumoortut ’nikallortut tuppallersarlugit’ qiimmaallannartumik oqaloqatigalugit.  (1 Tásalûníkamiut 5:14) Aamma ataatsimiinnerit siornanni kingornannilu, oqaluussigaangatta allatigulluunniit annertoqqusernissaannut periarfissaqarluarpugut. Ilaasortaajunnaarsitsineq oqaloqatigiissutigisariaqanngilarput. Oqaloqatigiissutissat kajumissinartut amerlaqaat. (Ussatit 25:11; Kulorsamiut 1:2-4) Utoqqaanertat suli ilaqutariinni kristumiuusunut anersaakkut paarsisutut pulaartassapput. Immaqali utoqqaanertaanngitsuttaaq ilaqutariit pulaarfigisinnaavaat, ilaasortaajunnaarsitaq atassuteqarfiginngikkaluarlugu. Saaffiginninnitsinni ilaasortaajunnaarsitap oqarasuaat tiguppagu matuluunniit ammarpagu oqaloqatiginiagarput apeqqutigiinnarsinnaavarput. Ilaatigullu ilaqutariinni kristumiuusut angerlarsimaffitsinnut pulaarsinnaavaatigut, kajumissinartumillu katerisimaaqatigaluta. Pingaarnerusoq tassa aalajaatsut taakku sumiginnartariaqanngilavut! Tassaapput kiffaaqativut — inuusuttut utoqqaallu — Guutillu ilagiissaanut ilaasortat asanartut. — Tussiaat 10:14.

20, 21. Ilanngutititseqqittoqarpat qanoq qisuariartariaqarpugut?

²⁰ Aammattaaq ilaasortaajunnaarsitamik ilagiinnut ilanngutiteqqinneqartoqaraangat naakkinnittuliornissatsinnut periarfissaqarpugut. Jesusip assersuusiaasa takutippaat ’ajortuliortoq allamik isumataaraangat’ qilammi qanoq tipaatsuutigitigineqartigisartoq. (Lúkarse 15:7, 10) Angut ilaasortaajunnaarsitaasimasoq pillugu Paulusip Korinthimiut ima allaffigisimavai: ’Isumakkeerfigissavarsi tuppallersarlugulu, aliasuppallaarnermit ajuleqqunagu. Taamaattumik oqaaqqissaarpassi asanninnermik aalajangerfigeqqullugu.’ (2 Korintumiut 2:7, 8) Ullut sapaatit-akunnerilu siulliit ilanngutititseqqinnerup kingorna silatusaarluta asannillutalu taamaaliorniarta.

²¹ Jesusip ernermik tammaraluartumik assersuusiaata pinngitsoortariaqakkatsinnik uparuuppaatigut. Ernerup angajulliup nukkami uternera nuannaarutiginagu ajuallaatigaa. Taassumatut innaveerta, allat ajortuliarisimasaat pillugit ajorisarnagit ilanngutiteqqinneqarnerallu ajuallaatiginagu. Akerlianilli ataataasutut Jehovap qisuariarneranut assingusumik qisuariarniartariaqarpugut. Ataataasoq  pilluarpoq ernini toqusimagaluartorlusooq nanineqarmat imaluunniit kingumut uummarmat. (Lúkarse 15:25-32) Taamaattumik qatannguterput ilanngutiteqqinneqartoq nangaanata oqaloqatigisassavarput assigiinngitsutigullu kajumissaarlutigu. Aap, Ataatatsitut qilammiusutut naakkinnikkumanerput ersarissumik takutittariaqarparput. — Matîuse 5:7.

22. Guuti malinniassagutsigu qanoq iliortariaqarpugut?

²² Qularutissaanngilaq, Guuterput malinniarumagutsigu taassuma inatsisai najoqqutassiaalu naapertuilluartut naapertorlugit naakkinnittuusariaqarpugut. Taanna tussiaasiortup ima allaatigaa: „Saammaallunilu naakkittartuuvoq [Jehova], kamajuilluni nallittuingaarlunilu. Tamanut ajunngisaartarpoq [Jehova], pinngortitaminut tamanut naakkittartuuvoq.“ (Tussiaat 145:8, 9) Ila, asanninnikkut maligassaalluarmat — kristumiunut ilumoortunut malinniagassaalluarmat! (wD 15/4 91)

[Quppernerup ataani ilanngussat]

Pingaartut makku malugaagit?

□ Akileraaruserisut ajortuliortullu juutinit qanoq isigineqarsimappat, Jesusillu suna pillugu taamaattut attaveqarfigisarpai?

□ Ilaasortaajunnaarsitat naakkinnilluni uternissaannik ikiorniarnissaannut Bibeli tunngavigalugu sumik pissutissaqarpa?

□ Utoqqaanertaqatigiit qanoq ilillutik taamaaliorsinnaappat, kikkunnullu?

□ Qanoq ililluta ilanngutiteqqinneqartut ilaasortaajunnaarsitallu qanigisaat naakkinnittuliorfigisariaqarpavut?

[Atuaqqissaarnermi apeqqutit]

[Qupp. 19-mi ungalusaq]

Kinaluunniit Guutip ilagiissaanut minguitsunut pilluartunut ilaasortaasimagaluarluni ilaasortaajunnaarsitaaguni imaanngilaq ilaasortanngoqqissinnaajunnaartoq. Ilaasortaajunnaarsitaq allamik isumataarsinnaavoq ilagiillu utoqqaanertaat saaffigisinnaallugit. Uternissamut aqqut ammavoq.

[Qupp. 20-mi suminngaanneernera]

Garo Nalbandian