Qanigisatit sallusuissutip ernganik tunikkit

„IMERTUT nillertutut imerusuttup imigaatut ippoq nunamit ungasissumit tusarluarneq,“ Salomon taama allassimavoq. (Ussatit 25:25) Paratiisissami naassaanngitsumik inuunissaq pillugu illit tusarliussat tarnimut qasusumut inuummarissinassaaq! Taamaalillunilu qarnit „puilasuussaaq inuunartoq“. — Ussatit 10:11; Jesaja 52:7.

Erngup nuna masatsertarpaa naasullu naatittarlugit. Ulinnersuarli ajunaarnersuaqartitsisinnaavoq. Imeq nillataartoq inuummarissinarpoq, kinali persersorsuarmi nataqqornartumiluunniit pitoraatsikkusuppa? Qanermit anisut imermut assersuunneqarsimapput, taamaattumik ajoqersuinerput mississoqqissaartariaqarparput. (1 Timûtiuse 4:16) Ingammik qanigisatsinnut oqaluussigaangatta „erngup“ tamatuma qanoq sunniuteqarnera eqqumaffigisariaqarparput.

Qanigisatsinnut oqaluussigaangatta

Bibelimi atuarparput qanoq ililluni Rahabip iliuuseqarneratigut ilaqutai annattut, Korneliusilu qanoq ililluni qanigisaminut oqaluussisoq. (Josva 2:13; 6:23; apustilit suliáinik agdlagkat  10:24, 30-33) Andreasip qatanngunni Peter ikiorpaa Jesusimut ajoqersuganngortillugu. (Juánase 1:40-42) Ullumikkuttaaq Jehovap nalunaajaasorpassuisa qanigisatik sallusuissummik Bibelimeersumik oqaluussiffigisarpaat. Ussatit 11:25 neriorsuivoq: „Allanik imeruersaasoq nammineq imeruersarneqarumaarpoq.“

Arnap Europamiittup angajoqqaani qatanngutinilu Filippineriniittut upperisartaaminik tusarterusussimavai. Taanna oqaluttuarpoq: „Allannerit tamaviisa oqaluussiffigisarpakka. Aamma suli kuisinnanga atuakkanik nassippakka aperalugillu Jehovap nalunaajaasuinik pulaarneqarusunnersut.“ Nuannaarutigeqisaanik pulaarneqarnissartik soqutigaat, ullumikkullu ilaqutai arfineq-pingasut Jehovamut kiffaapput. Oqaluussisartut ilaasa qanigisaminnik Napasuliaq Alapernaarsuiffik-mik Vågn op!-imillu pisartagassaannik tunissuteqarnertik angusaqarfigilluarsimavaat.

Taavami ilaquttat soqutiginninnermik ersersitsinngippata? Tamanna Jesusip ilaanni misigisimavaa, allassimagamimi: ’Qatanngutaasaluunniimmi upperfiginngilaat.’ Kingusinnerusukkulli oqaluttuarineqarpoq ’tamarmik’ qasusuillutik apustilit qinoqatigigaat. (Juánase 7:5; apustilit suliáinik agdlagkat 1:14) Suup allatut isumaqalersissimavai? Jesusip qilaliartinnani ikiorsimagunarpai. Qanoq ililluni? Aap, tassa affarmik qatanngumminut Jakobimut saqqummernermigut uppersuseqalernissaannik ikiorsimavai. (1 Korintumiut 15:7) Taamaattumik qanigisavit ikiorniarnerat soraarutinngisaannaruk. Jehovap nalunaajaasuisa naammagittarlutik piffissaallualernissaanut utaqqisarnermikkut qanigisatik uppinngitsut sallusuissummik oqaluttuussinnaasarsimavaat.

Qanigisatsinnik ’inuunerup ernganik’ tunisiniarutta imaanngilaq oqaaserpassuarnik ipitissagivut. Aappariit Jugoslaviamiut oqarput: „Oqaluussivallaartoornissaq navianartuaannarpoq.“ Angalalluni nakkutilliisoq oqarpoq: „Qatanngutit ilaat ingasaassisoortarput ilungersornermillu paatsoortumik nittaasarlutik.“ Ludwigip Bibelimik atuaqqissaartalernermi nalaa eqqaamavaa: „Tiimit arlallit atasuinnarmik anaanaga oqaluussiffigisarpara Bibelimiillu ilikkakkannik tamangajannik nassuiaattarlugu, oqqannerillu nassatarigajuppaat, ingammik ataatagalu.“

’Ilisimassummik puilasuugit’

Allassimavoq „sianisuup oqaasii ilisimasaqarluarnermik pissarsisitsisarput, sianiitsulli qarnanit sianiitsuussuseq aniasarpoq“ aamma „iluartoq oqalulersinnani eqqarsaqqaartarpoq“. (Ussatit 15:2, 28) Tassa oqalunnerput inuummarissinassappat ineriartornassappallu ilisimassut naliliisinnaanerlu aammalu sianissuseq pisariaqarput. Taamaattumik qanoq oqalunnerput aammalu qanoq innikkut qanorlu oqaatiginerlugit sianigisariaqarparput.

Assersuutigalugu, imerusuttup kiattumi imeq nillertoq pingaartissavaa. (Matîuse 10:42) Soorunamili kialuunniit qattaq imermik ulikkaartoq niaquanut kuinavianngilaa! Angalalluni nakkutilliisoq siuliani taaneqareersoq oqarpoq: „Killeqartumik oqaluussinikkut qanigisaminnik alapernaalersitsisut, ajunnginnerpaamik angusaqartarput.“ Qanigisarlu akerliusoq „imerusulerpat“ apersulerlunilu, Bibelimut tunngasumik nuannersumik oqaloqatigiinneq kingunerigajuttarpaa.

Oqaluussisartoq Tyrkiamiu Huriyemik atilik atuagassianik Bibelilersaarutinik uimi uppinngitsup soqutigisinnaasaanik quppeqqatitsisarnermigut angusaqarluarsimavoq. Meeqqanilu Bibelimik oqaluttuanik atuffattarpai, uinilu tusarnaaraangat taassuma aamma iluaqutigisinnaasanik nassuiaasarluni. Ilaannikkut aperiinnartarpoq: „Ullumi Bibelimik atuaqqissaarninni imatut imatullu ilikkarpunga. Illit qanoq isumaqarpit?“ Aammattaaq qanoq ileqqoqarnissani eqqumaffigiuaannarpaa, oqaluttuarlunilu: „Tatituniartuaannarit kamassaarinnittullu soqutiginngitsuusaartakkit. Mamiatsannaveersaartarit. Sunik tamanik ilisimannittutut pissusilersornaveersaartarit. Maniguuttuugit tunuarsimaniartuullutillu.“ Naggataatigut uiata sallusuissut ilassivaa, ullumikkullu piffissaq tamaat kiffartortuuvoq.

Marijanip ilaquttani arlallit sallusuissummik ilassinninnissaannik ikiorsimavai. „Pinngitsaaliiniarnak piffissaq eqqortoq utaqqisaruk,“ siunnersuutaa taama nipeqarpoq. „Sallusuissut pillugu oqaloqatiginnikkumanngippata tamanna ataqqisariaqarparput. Naammagittarlutalu asannittariaqarpugut.“ Ingammik ilaquttat sallusuissummut akerliuppata Nalunaajaasup oqaasii 3:7 atorluarneqassaaq. Tassani allassimavoq ’nipangersimaffissaqartoq  oqaluffissaqarlunilu’. Naammagittarluta oqaluttut kipitinnaveersaarlugit tusarnaarusuttariaqarpavut, allallu isumaat ataqqillugit. „Qanigisat oqaluunnerini kamalernissamut pissutissaqanngilaq,“ Petar akerliusupilussuusimasoq kingusinnerusukkulli isummaminik allanngortitsisimasoq erseqqissaavoq.

Ileqqorissuunikkut oqaluussigit

Uiusup uppinngitsuusup nuliani ukiorpassuarni ajornartorsiortittuarsimavaa ilaatigullu illumiit anisillugu parnaaruttarlugu. Ilaanni kamangaarami atuagaq nuliami inissinngitsoorsimasaa alittorsimavaa. Suup isumaa allanngortissimavaa? Nassuiaavoq: „Imminut aperinngitsoorsinnaasimanngilanga sooq nuliara taama anusinngujuitsigisoq Jehovalu tatigiuaannaraa. Ajorisassannik nassaarfigisinnaasimanngilara, illumik isumaginnilluarmat nuliaalluarlunilu meeqqanullu anaanaalluarluni.“ Ullut ilaanni minutit tallimat oqalugiaatissaminut paasissutissanik ujarlerpoq, taamaattumillu nuliata Vågn op!-it marluk tunniuppai. Piumavallaarnani misissorpai tupaallaatigisaminillu aqerluusaliornermut tunngasut atorsinnaasani nassaaralugit. Tamatuma atuagassianut soqutiginnilersippaa. Ullumikkut ilaqutariit ataasiussuseqarlutik Jehova pallorfigaat.

Inuit ilaasa ’oqaaseqanngitsukkut’ ’mianerinnilluta piitaajuitsumik saqinitsigut’ ilataarisinnanerat nuliaasup uiusullu akornanniinnaangitsoq kisianni aamma ilaqutaasut allat akornanni pisinnaavoq. (1 Pîtruse 3:1, 2) Aappariit angajoqqaamik Rumæniamiuusut upperisaat malikkunnaarmassuk ileqqulersuutigisartagaallu Bibelimik tunngaveqanngitsut malikkunnaarmatigik ilaqutaasa tamarmik sakkortuumik akerlilersulerpaat. Allaallu nuliaasoq sakiminit arnamit saassunneqarpoq toqoriarneqaraluarlunilu. „Nakkaannanngilagut kamassaarisunilluunniit sunnertinnata. Isumakuluutivut tamaasa Jehovamut tunniuttarpavut,“ Nikolic oqaluttuarpoq. Maannakkut, ukiut aqqanillit qaangiuttut, uiusup angajoqqaavi qatanngutaalu arnat marluk uiilu Jehovap nalunaajaasuisut kuisissimapput. Suup-una kimissimagaat? „Maligassiuilluarnerup kristumiutullu ileqqorissuunerup. Allatut oqaatigalugu, sallusuissut pillugu oqaluuppallaarneq ajorpavut. Iliuutsitsigulli sallusuissut takutinniarsimavarput.“

Neriukkunnaaqinak!

Ilaquttat Guuti ilumoortoq pallorfigileraangassuk assut nuannertarpoq. Akerliujuaannarpatali qanoq qisuariartariaqarpa? Pallorfiginninerup ilumoortup ilaatigut ilaqutariinnik annertuumik avissaartuutsitsisinnaanera Jesusip siulittuutigisimavaa. (Matîuse 10:34-37) Marica Jehovamut nalunaajaasunngormat ilaqutaasa tamarmik tunussimavaat. Nakkaannaranili ’nammineq upperisaqarsinnaanerat isumaqarsinnaanerallu’ akuerisimavaa. Taamatut isumaqarnerata siornatigutut Maricamut ataqqinnilerseqqippai.

Ludwigip angajoqqaani, allamilluunniit inooriaaseqaraluartut, asasariaqarlugit paasisimavaa. Allassimaffiit tulluartut eqqarsaatigisarsimaqai, soorlu makku: ’Ataatat anaanallu ataqqikkit’; ’alianaatsunik oqaaseqartaannaritsi, tarajorsimasunik’; ’piareertuinnarlusi . . . illersuutissaqarniarlusi, kisianni piuaallusi mianerinnillusilu’; ’Naalakkamulli kiffaasoq assuarisassarsiorajussanngilaq’. (Evfisumiut 6:2; Kulorsamiut 4:6; 1 Pîtruse 3:15; 2 Timûtiuse 2:24) „Angajoqqaannut sianilernerit pulaalernerillu tamaasa Jehova ilisimassummik qinnuigisarpara, arriitsunnguamillu attaveqarnerput qasukkariartorpoq inussiarnersiartuaarlunilu,“ oqaluttuarpoq.

Qaquguluunniit qanigisavit sallusuissummik uummammiuqalernissaat neriuutigiuaruk. Angut nuliaminit ukiunik 31-nik kingulliulluni Jehovap nalunaajaasuatut kuisittoq ima oqaluttuarpoq: „Kingumut qiviaraangama nassuerutigisariaqarpara nuliama naammagittarfigingaarsimagaanga. Nalunngilluarsimavaralu akulikitsunik Jehovamut qinnuttarsimagaanga.“

Qanortoq oqaatsivut imertut nillertutut inuummarissinartigalutillu tumannguernartigisarlik. Aap, ’iivangkiiliumik Guutip pilluartup naalannassusiata pianik’ allat aveqatigisakkit, aamma qanigisatit. (1 Timûtiuse 1:11; sarĸúmersitat 22:17) Taava Jesusip oqaasiisa eqquunneri misigissavatit: ’Uannut uppertup iluanit kuuit kuulerumaarput puilasuvimmik imillit.’ — Juánase 7:38. (wD 15/2 90)