Inuusuttut aperipput:

Sooq Bibeli atuassavara?

„ATUARFIMMIT soraaraangama atuakkereqqinnissara ornigineq ajorpara. Kammalaatikka ilagerusunnerusarpakka!“ Inuusuttuaraq Kenimik atilik Bibelimik atuarnissaminik kajumissaarneqarami taama akivoq.

Inuusuttuaqqatut allattut immaqa illittaaq Bibeli atuarpallaarsimanngilat. Immaqa Bibeli Guutip oqaaserigaa upperigaluarpat, immaqalu kristumiut ataatsimiinnerinut najuuttarputit. Kisianni immaqa misigaatit Bibelip ajoqersuutaa nalunngereerlugu. Immaqaluunniit ima aperivutit: ’Sooq Bibeli atuassavara? Sumut iluaqutigissavara?’

Anersaakkut pisariaqartitatit matussavai

Taama aperinissaq kukkusuunanilu ataqqinninngitsuliornerunngilaq. Akerlianilli immaqa Jesusip oqarneratut anersaakkut ittunik pisariaqartitaqarninnik misserratiginninnginninnut ersiutaavoq. (Matîuse 5:3) Alapernaanneq nalinnginnaasoq pineqaannanngilaq. The New English Bible-imi tamanna taaneqarpoq „Guutimik pisariaqartitsineq“ — Guutimik ilisarinnilluarnissamik taassumalu siunertaanik paasinninnissamik pisariaqartitsineq. Mikigallaravit angajoqqaavit immaqa ajoqersuutinik ilumoortunik tunngaviusunik Bibelimeersunik ilinniartippaatsit. Qularnanngitsumillu tusakkatit apeqqusernagit upperisimavatit. Kisianni alliartortillutit immaqa ’suut tamaasa misilinnissaannut’ pisariaqartitsinerit misigiartulerpat — paasiniarlugu oqaluttuarsiarisimasatit ilumoornersut ilumuunnginnersulluunniit. — 1 Tásalûníkamiut 5:21.

Immaqaluunniit angerlarsimaffimmi upperisarsiorfiunngitsumi alliartorsimavutit. Taamaappalli taava imaappa anersaakkut pisariaqartitaqanngitsutit? Taamaannavianngilaq. Nunami ukiorpassuarni guutiitsuususseqarfiusumi pissutsit qanoq pinersut tusariaruk. Ukiuni kingullerni nunami tamatumani inuusuttorpassuit upperisarsiorneq soqutigingaalersimavaat. Upperisarsiornermik nuannarisaqanngitsoq isumaqatissarsiortoq ima oqarsimavoq: „Inuunermi pakatsissutinut naalliuutinullu suna pissutaasoq guuteqannginneraasut nassuiarsinnaanngilaat.“ Immaqa illittaaq tamanna nassuiaatissarserusukkaluarpat? Taamaappat anersaakkut pisariaqartitsisimassaatit.

Upperisarsiornerilli tamakkeratik naammagisimaarnartumik akissutissaqartarput. Inuusuttoq Manish hindutut alliartorsimasoq millionilippassuarnik guuteqarneranik upperisaqarsimagaluarpoq. Imali oqaluttuarpoq: „Imminut apersulerpunga: ’Guute kinaava?’“ Inuusuttorpassuittaaq kristumiuuneraqatigiinni alliartorsimasut aamma naammagisimaarnartumik akissutissarsinissartik ajornartorsiutigaat. Akissutissaq sumi nanisinnaassavarput? Jesusip tamatuminnga oqaluttuuppaatigut. Oqarpoq:’ [Guutip] oqaasia sallusuissutaavoq.’ — Juánase 17:17.

Bibeli Guutip oqaasia ikiortigalugu eqqorluartumik ilisimasaqalernikkut anersaakkut pisariaqartitatit matuneqarsinnaapput. Guuti pillugu silarsuarmi pissutsit maannakkut attuutut pillugit aamma illit siunissamut neriuutigisinnaasatit pillugit apeqqutissatit Bibelimi akineqarsinnaapput. Immaqa angajoqqaatit Jehovamut nalunaajaasuummata isumaqarputit ’sallusuissut’ nalunngereerit. Kisianni Bibelip ajoqersuutaasa ’silissusiat takissusiallu itissusiallu kingissusiallu’ paasisinnaavigit, imaluunniit qarsupiittumiinnaq ilisimasaqarpit? (Evfisumiut 3:18) Kingulleq ilinnut tunngappat Bibelip peqqissaartumik atuaqqissaarneratigut ’sianigilerniartariaqarpat sunaasoq Guutip peqqusaa ajunngitsoq iluarisassarlu naammalluinnartorlu’. — Rûmamiut 12:2.

 Aqqut eqqortoq

Aqqutissannik kukkusumik ilitsersuunneqarnikuuit? Pakatsinarsinnaavoq paasilerlugu nukiit piffissarlu aqqusinikkut kukkusukkut atulussinnarsimallugit. Inuusuttorpassuit tammartajaarlutik ingerlapput! Bibelimi allasimavoq: „Inuup ingerlavini eqqortuusorisaraluarpaguluunniit taamaattoq toqumik isuliffeqaannarsinnaavoq.“ — Ussatit 14:12.

Assersuutigalugu, ileqqussat kinguaassiuutinut tunngasut taaneqarsinnaapput. Niviarsiaraq 14-inik ukiulik ima oqarpoq: „Eqqortoqanngilaq eqqunngitsoqarnaniluunniit. Taamaallaalli isummat assigiinngitsorpassuupput.“ Kinguaassiuutitigut kajumissuseqarneq sakkortusaqaaq, ingammik inuusuttuunermi. Kajumissuserli tamanna aqunngikkaanni ’toqqup aqqutaanut’ ingerlatitsisinnaavoq. Ukiut tamaasa inuusuttuaqqat Amerikamiut 2,5 millionit kinguaassiuutitigut nappaatinik tunillatsittarput. Niviarpassuit aappaqaratik anaananngortarput — imaluunniit meerassatik naartuersinnikkut toqutsittarlugit! Aammalu naartulinngikkaluarluni kinguaassiuutitigullu napparsimalinngikkaluarluni katissimanngisamik atoqateqarneq Guutimit iluarisaannginnermik kinguneqassaaq. — 1 Tásalûníkamiut 4:3.

Sooq taava ’toqup aqqutaani’ nalorninartumik angalajumassavit? Bibeli aqqutigalugu erseqqissumik paatsuugassaanngitsumillu unnersuunneqartarpugut. Allassimavoq: „Inuusuttulli kajungerisaat qimarratiginiakkit.“ (2 Timûtiuse 2:22) Tassa ’avativut toqulersissavavut’ — ileqqorissumik aappariinnermi kinguaassiuutitigut atoqatigiinnissamik kissaat pissusissamisoortoq eqqarsaatiginagu, kinguaassiuutitigulli ileqqorlunneq eqqarsaatigalugu. (Kulorsamiut 3:5) Bibeli atuaqqissaartaraanni taamaaliornissaq sapernannginnerussaaq. Atuaqqissaarnitsigut eqqunngitsuliornissamit qimaanissamut nakussatsinneqartarpugut — aammaattaaq ussernartorsiornaraluarpalluunniit. Bibelip oqaasiisa „paasisakitsoq paasisimasaqalersittarpaat inuusuttullu ilisimasaqalersittarlugit isumatussuseqalersittarlugillu“ nakkarfissat kanngunartumik iliuuseqartitsisinnaasut ingalassimasinnaaqqullugit. — Ussatit 1:4.

Nukappissap Danimik atillip Bibelimik atuaqqissaarnini iluaqutigisimavaa. Taassuma nassuerutigaa inuusuttuaqqat tamalikattut nuannisartuaannarsorinaraluarlutik taamaattoq nalunngikkini ’ilaat katissimanatik meerartaarsimasut kinguaassiuutitigut nappaatinik tunillatsissimasut allarpassuarnillu ajornartorsiuteqalersartut.“ Aperaaq: „Bibeli atuaqqissaanngikkaluarukku qanormitaava uanga inooriaaseqassagaluarpunga?“ Bibelip oqaasiisa aamma illit ’toqup aqqutaanit’ annaassinnaavaatsit.

Guutimut qanillinerussaatit.

Ullumikkut inuusuttorpassuit oqartarput Guutimut upperlutik, ikittuinnaalli Guuti kinaassusilittut isigiuaannartarpaat. Atuagassiami Adolescence-imi ilanngutassiami allassimavoq inuusuttut „Guuti pillugu isumaat eqqarsaataannaavallaartoq timitaqanngitsoq“. Upperisarsiortorpassuit Guuti ungasissutut eqqarsaataannaasutullu ilersissimavaat aqqata isertorneratigut. Qanoq ilillutit aqqatigulluunniit nalusat qanillingaartutut misigisinnaassaviuk?

Bibelimili ersersinneqarpoq Guutip aqqa tassaasoq Jehova, aterlu taanna Bibelimi 7000-it sinnerlugit allassimavoq! (Tussiaat 83:18) Guutip ajugaqanngitsup aqqa nalunngikkukku qaninnerusumik attaveqalerfigisinnaavat. Kisianni Bibelimik qarsupittumik ilisimanninneq naammanngilaq. Israelikkut kinguaariit oqaluttuarisaanerat siulleq 28:9-imi allassimavoq „Naalagaq ujarunni nanitikkumaarpoq“. Tassa Guuti ilisarilerumagaanni Bibelip oqaasiinik misissueqqissaarnissaq pisariaqarpoq.

Illit taamaaliorsimavit? Assersuutigalugu, nassuiarsinnaaviuk sooq Bibelimi allassimasoq Jehova „iseqartoq“, „siuteqartoq“, „kiinaqartoq“ aamma „taleqartoq“? (1 Pîtruse 3:12; Hesekiel 20:33) Bibelimi allassimannginnerpa ’Guuti anersaajusoq’? (Juánase 4:24) Imaluunniit nalunngiliuk Guutip qanoq nalunngitsigigaatit, aamma oqaaseqanngikkaluartutilluunniit takusinnaagaa qanoq imaqartutit? (Tussiaat 139:4) Jehovammi pissusiisa  pingaarnerpaartaat: asanninneq, ilisimassuseq, naapertuilluassuseq, pissaanerlu? Nassuiarsinnaaviuk Jehovap asannissussianut ersiutaasoq pingaarnerpaaq sunaasoq? (Juánase 3:16) Guutip anersaavata Guutillu pissaanerata assigiinngissutaat nalunngiliuk? (Mika 3:8) Guutip misigissuseqarneranut aamma misigissutsimigut tamakkunuunatigut annersinneqarsinnaaneranik assersuutinik taasaqarsinnaavit? — Tussiaat 78:40.

Apeqqutinut tamakkununnga akissutissarsinissamut periarfissaq ataasiinnaavoq, tassa Bibelimik atuarneq. Nukarppiaq Lutherimik atilik oqaluttuarpoq: „Jehovap oqaasiinik atuaqqissaarnikkut kinaassusia pissusiilu ilisarileriartorpakka.“ (Job 42:5.) Jaquellap taamaaliornermigut Guuti ilisarinerulersimavaa. Bibelip atuaqqissaarneratigut paasisimavaa Jehovap oqaatsini eqqortittarai. Neriorsuigaangami neriorsuutini uniortinneq ajorpai; salluneq ajorpoq. — Títuse 1:2.

Tamaviaarnerit ajunngitsunik kinguneqarumaarpoq!

Bibelimik atuaqqissaarnermi iliuuseqarnissaq pisariaqarpoq, sunngiffittalu ilaa atortariaqartarparput. Aallartinnissaq artornarsinnaavoq, immaqalu ilaquttatta kammalaatittalu illaruaatigissavaatigut. Imminulli akilersinnaavoq. Paula Bibelimik atuaqqissaaqatigineqartalerpoq, iluaqutigaalu. Oqaluttuarpoq Jehovamut, kristumiutut qatanngutiminut ilaqutaminullu qaninnerusumik attaveqalersimalluni. Sandy oqarpoq minnikkut allaat malussarissumik „nalunngeqatiginnissuseqaleriartornissaanut“ ikiuutaasimasoq. Oqarpoq: „Allassimaffinnik najoqqutassianilluunniit eqqarsaatiginnilersarpunga fjernsynimi sunik isiginnaarnissannut aalajangernissannut ikiuutaasunik.“ Ken aallaqqaataani eqqartorneqartoq eqqaamaviuk? Taassuma Bibeli akulikinnerusumik atuartalersimavaa oqaluttuarlunilu: „Atuarnera sivitsoriartortillugu tupigusuutigiartuinnarpara paasisaqarfiginerujartuinnarlugulu.“ Massakkut Ken Jehovamut kuisissimalluni kiffanngorsimavoq.

Bibelimik peqqissaartumik atuaqqissaarneq aallartinniaruk! Noqqaassutigisassattut isiginiaruk. Angajoqaannut imalunniit ilagiinninngaaneersumut tamatuminnga ikioqqugit. Nakkaannannginnissat aalajangiusimajuk. Ilikkareersimasatit atukkit. Eqqaamallugulu: ’Inatsisinut naammalluartunut soraaranilu itsuartoq pilluarumaarpoq’ maleruaruniuk. — Jâko 1:25. (gD 8/10 90)

[Qupp. 8-mi issuagaq]

Angajoqqaavit imaluunniit ilagiinninngaaneersup Bibelimik atuartalernissannik ikiorsinnaavaatit

[Qupp. 9-mi assiliartaq]

Bibelip ajoqersutaasa ’silissusiat takissusiallu itissusiallu kingissusiallu’ paasisinnaavigit, imaluunniit qarsupittumiinnaq ilisimassuseqarpit?