„Toqussavakkit!“

Pinngitsaaliilluni arneriniarniartoq kristumiut angerlarsimaffiannut isertoq

ASSAAT peqqarniitsut toqqusassivaannga. Nillianiaraluarpunga.

„Tassa! Nillianak, taava sussanngilakkit,“ oqarpoq qungatsikkullu tigoruloornerullunga.

Upperinngilarali naalannagulu. Nillianiarsariinnarpunga. Kiinaatigut qitsuarpara, isaruai katatsippakka kigutaasalu qarnanit nusullugit. Aalajangersimaniarsarigaanga isaata killingagut itisuumik qitsuppara. Assaasa qanera qanillimmassuk sapinngisara tamaat kiivara. Atasuinnarmik nilliavunga.

Immaqa upperiuminaakkaluarpoq, kisianni annilaanganngilanga — aatsaat kingorna annilaangalerpunga. Kamappunga! Taannapalaaq isumaqassanngilaq uagutsinnut iseriarluni pinngitsaalillunga arneriffigisinnaallunga, maani allamiluunniit!

Misiliininili unitsinngilaa. Qiterut qanittumiittoq tiguvaa assakkalu tunumut qilerlugit — peersinnaasarakku arlaleriarluni taamaaliorpoq. Taliminik toqqusasseqqaatigalunga kigutaasani isarussanilu natermiittut tiguniarsarai. Tassanngaannaq iperartippunga. Sunilluunniit tigusinnaasannik milluulerpara paatsiveqanngitsumillu silanngajaartutut nillialerlunga.

Pinngitsaaliilluni arneriniaq uissuummerpaseqaluni unikaallappoq aperalunilu: „Suvit-una?“ Taamaannerani qimaavunga anguaangali, sinittarfimmullu pinngitsaalillunga iserteriarlunga siniffimmut igippaanga. Assakka qilersoqqeriarlugit iluatsitsilluni atisama ilai peerpai. Pikittorujussuuvunga tamaviaarlungalu peersinniarpara. Oqalunnipalaava pinngitsaalillungalu iliuuseritinniagapalaava maajugeqaakka!

Assakka qilerussaaqqipakka, ajappara matumullu silarlermut arpallunga. Tigummivia tiguara, kisianni qipigigalu, tununnit tiguaanga natermullu igillunga. Savissuaq eqqanniittoq tiguara niuisigullu kaperiarlugu. „Naammaleqaaq!“ suaarpoq. „Toqussavakkit!“ Niaqqukkut tillualerpaanga, ilisimajunnaarpungalu.

Kingorna paasivara mianersornerusariaqarsimagaluarlunga. Angerlarsimaffiup avataani pissutsit navianarsinnaasut perulluliorumatuullu naammattoornaveersaartarsimavakka. Sumunnassagaangamaluunniit uiga, aamma kristumiuusoq, tamatigut ingiaqatigisarpara. Taamatut pinerluttartut ininnaarisinnaasaat qanillinaveersaartarpakka, torersumillu atisalersortuaannarlunga. Takorloorsimanngisaannarparali pinngitsaaliilluni arneriniap ima iluanngitsuliortiginissaa allaat angerlarsimaffinni saassullunga.

Pinerlunniaq sanaartorfimmi illutta saninnguaniittumi sulisuuvoq. Sanaartorfimmi maskiinat sarfaqartinniarlugit ledningimik illutsinnut sulisitsisoq siaarsisimavoq. Ilaanneeriarlunilu sarfap aqqutaa artorsinneqartarpoq, taava sulisut ilaata sikringi naqqup ataaniittoq taarseriartortarpaa. Tamanna sanaartortitsisumut iluaqutaavoq, kisianni akuerisimagatsigu silatusaarpallaarsimanngilagut.

Nalunanngitsumik sillimannginninni saassutissallunga pilersaarutigisimavaa. Annilaarnermik tikkuunnarnissara tupannermillu akerliliinanga peqqusaanik iliornissara naatsorsuutigisimagunarpaa. Aammami saassummanga tupattorujussuuvunga, kisianni ilaguutiinnanngilanga. Uninngilangalu qanoq iliornissara eqqarsaatiginiarlugu.  Ingerlaannaq nillialerpunga qitsualerlugu isimmittalerlugu kimmalerlugulu. Taamaaliornerami iliuuserisinnaasanni pitsaanerpaavoq, taamammi sakkortutigisumik akiuunnera tupaallaatigaa. Imminut uannulluunniit iluamik aqutsisinnaanngitsoq nalunnginnakku, aallaqqaammulli isumakkut nakuussutigaara. Akiuunnissannik aalajangiusimanninninnik pissatsisippaanga ajugaanissannullu neriuutissaqartinnerullunga.

Ilisimmaqqikkama biilit ingerlasut issiavianni saarlermi issiavunga. Qiterut passinnut qilerussimagaluartoq maanna qimmip qungasequtaatut qungatsinnut nermussimavoq, taannalu biilernermini sukangasumik tigummivaa. Eqqarsarluarsinnaalerama, sumiinnerlunga qanorlu illillunga tassunga pisimanerlunga eqqaariataarpara, soorlu kukuttaatip ikumasup kamannermik qaartikkaanga.

Biilit aqqusinermit peersikkusukkaluarnermik aquut ajappara. Qularutiginngilara angutip silanngajaajusartup taassuma maannakkut aqqunarnissara soqutiginerulersimagaa pinngitsaalillunga arneriffiginissanninngarnit. Toqunniarpaanga kingornatigut kinaassusersisinnaannginniassagakku. Akunneq ataasingajak atasuinnarmik akiuussimagama qasoqqaqaanga, ilungersorlungali akiuunnerma aamma taanna nukeerutitikkiartorsimavaa. Qasoqaluni paatsiveqarpiarnanilu kiisami biilit unitsippai biilinillu ajattarlunga anisillunga. Biilertup allap naammattoorpaanga biiliminullu ikitillunga napparsimaviliaallunga.

Ajugaavunga! Pinngitsaalineqarlunga arneriffigineqanngilanga! Ajugaasuuvunga, pinerlineqartuunanga! Ilerasuutissarsinngilanga, imminut ataqqinera ataqqinassuseralu pigiinnarpakka. Jehova Guutimullu ajuganganngitsumut assuarnaassusera pigiinnarpara!

Tamatumuuna oqarnianngilanga ullut tulliuttut napparsimavimmiinninni nuannaarsimallunga ilorrisimaarsimallungalu. Annilaarujussuarsimavunga, sunara tamarmi annernarpoq isikkuloqaangalu. Saassunneqarninni annilaanganeq atorsimanngisara, malerujussuartut nalliuppoq. Susoqarsimasinnaaneranik eqqarsaatit siunissaqanngitsut eqqarsaatigiualerpakka. Piffissami tamatumani politiit pinerluttorsiortuisa killisiorpaannga, annilaarutigeqisannillu paasivara inupalaaq taanna sapaatit akunneri arfiniliinnaat sioqqullugit, pingitsaaliilluni arnerisimasutut parnaarussaareerluni, misiligutaasumik iperagaasimasoq!

Napparsimavimminngaaniit angerlarama ulloq taanna politeeqarfimmukarpunga saassussisoq allat politiinit sanileriissitaasimasut akornanni toqqarniarlugu. Aap, eqqartuussaatinnissaa siunertaraara. Isumaqarpunga arnanik allanik saassussisinnaanera pillugu pillagaatittariaqarlugu, aammami imminut pillunga pisassaa pitinniarlugu namminerlu inuuninnut naalagaaninnut imminut uppernarsaaffiginiarlunga. Ilisariuminartorujussuuvoq. Niaqqumigut mattuteqarpoq assaalu gipseqarluni!

Sapaatit akunnerini tulliuttuni napparsimavimmi angerlarsimaffinnilu uppeqatima  Jehova Nalunaajaasuisa ilagiivisa najukkanniitut assiliaaqqanik allakkanillu nassittarmannga tuppallersaatigeqaakka, amerlasuullu pulaarpaannga. Ilaasa oqarput usorsisimaarutigalunga. Ilaasa qanoq oqassallutik naluaat, pulaarnermikkulli isumassuinertik takutippaat. Ilaasa ’sapiitsutut’ taavaannga, anneruniajuitsuusaarnangali oqarsinnaavunga taamaattuunanga. Saassummanga aniguisinnaannginnama Bibelimik atuaqqissaartarninni ilikkakkannik iliuuseqaannarsimavunga. Kinguneqarluarporlumi.

Arnaagama nalinginnaasoq tuppallersarneqarnissara pisariaqartittuarsimavara. Ullut ilaanni nikallungasaqaanga. Inuit akornanniikkusukkunnaaraluarpunga. Ilaanneeriarlunga imminut tatituutut isikkoqalersittarpunga, uimali uppernarsarsinnaavaa ilaatigut tamarma sajuttartunga eqqissinerlu sapilertartunga, isummama uummatimalu misigisapalaamik tamatuminnga iluarsartuussiniarneranni aanngaamisitsiniarnerannilu. Qaangerniarnerani iluaqutigisimanerpaasara tassaagunarpoq Jehovap ikiuineragut, sapinngisara naapertorlugu eqqortumik iliorsimanera ilisimagakku. Ullorissaaraangamalu suut tamaasa ataasiakkaanik ajunngitsortaqartissinnaasarpakka. Allassimaffiit uku atuartarnerini nuannaajallattuartarsimavunga:

„Angutip arnaq inuusuttoq angummut atortissimanngitsoq uissiaqartorlu illoqarfimmi naapillugu innaassimappagu taakku marluk illoqarfiup isaaffianukaatissavasi ujakkanillu milloorlugit toqussallugit — tassa arnaq illoqarfimmiikkaluarluni ikioqqulluni nilliasimanngimmat, angullu angutip allap nuliassaanik innaassisimammat. Taamaalillusi ajortoq akornassinnit piiassavarsi. Angulli arnamik inuusuttumik uissaqartumik illoqarfiup avataani naapitsisimappat taannalu pinngitsaalillugu arneriffigisimallugu, taava angut taamaaliortoq kisimi toqunneqassaaq. Arnaq inuusuttoq qanoq pissanngilarsi toqumik pillaateqartussamik ajortuliorsimanngimmat. Pinngitsaaliilluni arneriffiginninnerup pissuseqatigaa angutip inoqamminik saassussilluni toqutsinera. Angutimmi arnaq inuusuttoq uissaqartoq illoqarfiup avataani naapissimavaa. Arnaq nilliasimagaluarpoq, ikiortigisinnaasaanilli takkuttoqarsimanngilaq.“ — 5 Moses 22:23-27.

Oqaatsit taakku paasiuminartut nalunnginnakkit qujamasuutigisaqaara. Ilinniartissimavaanga ileqqussatigut qanoq iliortariaqarsimanersunga. Paatsiveerutinnginnissannut nalorninnginnissannullu ikiorsimavaannga. Oqaatsit taakkua pissutigalugit qanoq iliornissara nalornisiginngilluinnarsimavara. Nilliasimavunga aammalu akiuullunga. Bibelip unnersuussutaa tatigisimavara kukkujuitsuuneralu misigalugu. Uigalu Jehovamut qinukulasimavugut, nukittoriartorlungalu isumakuluuteqarunnaariartorpunga.

Arnap allap pinngitsaalineqarluni arneriffigiteriaraluarnissaa — ingammik iluatsitsisumik — kissaatiginngilara. Kisianni Uniform Crime Reports — Crime in the United States (USA-mi pinerluttuliornerit pillugit nalunaarusiaq) 1983-imeersoq qupperneq 5 naapertorlugu, minuttit arfineq marluk tamaasa USA-mi pinngitsaaliilluni arnerisoqartarpoq. Uanga Jehova tatigisimavara. Oqaasii eqqaamasimavakka nilliasimallungalu, saniatigullu akiuullunga.

Piffissap ingerlanerani pinngitsaaliilluni arnerisimasoq misiligutaasumillu iperagaasimasoq uannut saassussisoq eqqartuussisunut sassartinneqarpoq. Februarip arfineq-aappaanni ukioq manna (1986) pinerlunnernut makkununnga eqqartuussaavoq: Toqutseriaraluarsimasutut, tillinniarsimasutut, pinngitsaaliilluni arneriniaraluarsimasutut aallarussisimasutullu.

Sapiilluta Guutimut tatiginninnerput inunnut qununermik sumilluunniit annerusariaqarpoq. Tussiaatini Davidip oqaasii pigiliutsigik, tamatigullu oqaatsit taakku aalajaaffigisigik: „Guuti tunaarigakku siooranngilanga. Inuit soriarsinnaangilaannga.“ — Tussiaat 56:12. — Nassiunneqartoq. (8/8 86)

[Qupp. 26-mi ungalusaq]

Sooq aallaqqaataaniit akiuuttariaqartutit:

1. Saassussisoq immaqa tupaallalluni qimaassaaq

2. Saassussisoq immaqa susinnaajunnaarsissinnaavat, qimaallutillu

3. Saassussisoq immaqa arnererusussuseerutissaaq imaluunniit qasulluni qimaassaaq

4. Allat pasitsatsissinnaavatit, ikiorneqarlutillu

5. Ilerasuuteqassanngilatit. (Pinngitsaalineqarlutit arneriffigineqassagaluaruilluunniit imminut ataqqinerit pigiinnassavat, Guutillu isaani suli minguitsuussallutit)

6. Saassussisoq ikilerukku kingusinnerusukkut politiit saassussisumik kinaassusersiniarneranni ikiorsinnaavatit (soorlu kukippit ataani amiminia iluaqutigalugu)