Bibeli naapertorlugu arnap inissisimaffia

„Una arnamik taaneqassaaq angummit tigusaagami.“ — 1 MOSES 2:23.

1, 2. (a) Inuit ilaasa arnat Bibelimi qanoq isigineqarnerartarpaat? (b) Suut imminnut naleqqiutissallugit naleqquppa, qinerlerfissiamilu qanoq allassimasoqarpa?

ARNAT Bibelimi qanoq isigineqarpat? Tamanna pillugu isummat assigiinngillat. Atuakkat ilaanni ima oqaatigineqarpoq: „Isuma paqumisuppaluttoq, tassa arnat Bibelimi nikagineqartut, naapitassaagajuppoq.“ Inuit ilaat isumaqarput Bibelip hebræerisoortaani grækerisoortaanilu arnat ammut isigineqarpallaartut. Tamannali ilumoorpa?

² Ilumoortoq paasiumagaanni siullermik misissortariaqarpoq Bibelip allanneqarnerata nalaani inuiaat Jehovamik pallorfiginninngitsut akornanni arnat qanoq pineqartarsimanersut. Itsaq atugartuussuseqarfiusut ilaanni arnanik guutipilussiorfiginniffiusuni arnat qitornigajussutsimut ilisarnaatitut ataqqineqartarsimapput. Malunnarpoq Babylonimi Egyptenimilu assut ataqqisaasimasut. Nunanili tamaniunngitsoq taamaassimavoq. Assyriami angutip nualiani allasiorsimappat parnaarussinnaasarsimavaa toqussinnaasarsimalluguluunniit. Angerlarsimaffiup avataani kiinnaminut assiaqutaqartussaasimavoq. Grækenlandimi Romamilu arnat pisuut kisimik, ilaatigut kunngikkormiut ilaat qujanarniartut imaluunniit akimarnit atortittartui, ilinniagaqarsinnaasarsimapput kiffaanngissuseqartitaanerullutillu. Taamaattumik nutaannguallannarpoq The New International Dictionary of New Testament Theology-mi allassimasoq atuarlugu: „Nunat kangilliit (upperisarsiornikkut) silarsuaata ilaanut akerliusumik, [arnaq Allakkat Epriiarisuut-ni] inuttut namminersortutut angutillu angerfigeqatigisaatut nersugaavoq.“ Tamanna ersarissumik saqqummerpoq Allakkat Epriiarisuut atuagartaasa kingullersaanni, tassani Jehovap pruffiitiata angutip nulia ’angerfigeqatigisaanik’ taavaa imalu nangilluni: „Inuusuttuunerminillu nuliarisaminut ilumuunngitsuliortoqassanngilaq.“ — Malakia 2:14, 15.

Angummut tulluartutut pinngortitaasoq

3. ataanilu ilanngussaq. (a) Jehovap Adam pinngortereeramiuk sunik suliassippaa? (b) Eva pinngortinneqanngikkallarmat Adam qanoq oqaatigineqarsinnaava, aamma tamanna ’Adamimut kingullermut’, Jesusimut, tunngava?

³ Bibeli naapertorlugu Jehovap Adam „issumit“ pinngortippaa Edenillu naatsiivianut pisillugu, paarissammagu naggorissassammagulu. Guutip nersutit nujuartat timmissallu qilaap ataaniittut tamaasa Adamimukaappai misissoqqissaarlugillu atsersorniassammagit. Suliamik tamatuminnga suliaqarnini tamaat Adam kisimiippoq. Tamanna tikillugu Jehovap imminut suliassiissutigisai tamakkiisumik naammassisinnaavai. Amigaateqanngilluinnarpoq. * ’Imminut tulluartumik ikiorteqanngilaq.’ — 1 Moses 2:7, 15, 19, 20.

4, 5. (a) Qanga Adamip kisimiinnera iluarunnaarpa, Jehovalu qanoq iliorpa? (b) Suliassaq annertooq suna Jehovap Adamimut Evamullu suliassiissutigaa, tamatumanilu marluullutik suna pisariaqartissavaat?

⁴ Piffissarli sivisungaatsiartoq ingerlareersorlu Jehova nalunaarpoq ’inuk kisimiimmat iluanngitsoq’, taamaattumillu Adamimut tulluartumik, suliassariumaagassaanik ikiuisussamik, pinngortitsinialerpoq. Adam ilisimajunnaarsippaa, najungasuisa ilaannik tigusilluni tamatuminngalu arnaq pinngortillugu. Taamaattumik  arnaq tassaavoq ’Adamip saarngata ilaa uiniatalu ilaa’. Adam ’ikiortissaminik’ imaluunniit ’imminut tulluartumik’ maanna ilaqalerpoq. „Guutillu pilluaqquai oqarfigalugit: ’Kinguaassiorlusi amerliartoritsi nuna tamakkerlugu ilissinnullu naalatsigitillugu; naalagaagitsilu aalisakkanut immimiittunut timmissanullu qilaap ataaniittunut nersutinullu nunami aalasunut tamanut.’“ — 1 Moses 1:25, 28; 2:18, 21-23.

⁵ Malugiuk oqaatigineqarmat angut arnarlu marluullutik taamatut suliassinneqartut. Amerliartorlutik nunarsuaq tamakkiinnassanngilaat. Aammattaaq imminnut naalatsigitissavaat pinngortitallu imminnit atsinnerusut eqqortumik naalagaaffigissallugit. Tamatumani silassorissutsikkut anersaakkullu piginnaassutsit pisariaqarput, piginnaassutsillu taakku Guutip piumasaanut naapertuuttumik ineriartortinnissaannut angut arnarlu periarfissaqarput.

Arnap inissisimaffia pissusissamisoortoq

6. (a) Angutit arnallu timikkut nakuussusiat Bibelimi qanoq oqaatigineqarpa? (b) Assersuutip suup immaqa arnat Jehovap aaqqissuussaanik akuerinninnissaannik ikiorsinnaavai?

⁶ Soorunami aamma nunamut naalatsigitissagaanni timikkut nakuussuseqarnissaq pisariaqarpoq. Ilisimangaassutsimigut Jehovap Adam siulliullugu pinngortissimavaa, taavalu Eva. Eva ’angummit pivoq’, ’angut pillugu’, timikkullu angummit sanngiinnerulluni. (1 Timûtiuse 2:13; 1 Korintumiut 11:8, 9; naleqqiuguk Pîtrusimut agdlagkat sujugdlît 3:7.) Tamanna pissutsit piviusut, arnat qaffassarnissaannik pingaartitsisut arnallu allat amerlasuut akueriuminaatsitaasa, ilagaat. Sooq Jehovap taamatut aaqqissuussisimanera paasiniarlugu misilittuugunikku taamaalillutillu inissisimaffissartik Guutimeersoq akuerisuugunikku pilluarnerungaalissagaluarput. Arnaq Guutip aaqqissuussaanik naammagittaalliutiginnittoq assersuunneqarsinnaavoq qupaloraarsummut, portusuumut meriarluni Guutip imminut tunniussaanut asseqanngitsunut qujaniarluni qarlornissaminut taarsiullugu, naajatut nukittutiginnginnini pillugu ulluminut pilluni kamassimaartumut.

7. Sooq Adam Evamut meerarilerumaagassaminnullu qullersaanissaminut piukkunnarpa, tamannalu Evamut ajoqutaassava?

⁷ Eva pinngortinneqanngikkallarmat Adam qularnanngitsumik inuunermi annertuumik misilittagaqalersimavoq. Piffissami tamatumani najoqqutassanik, kingorna Guutip oqaaseqartitaatut nuliaminut ingerlateqqitassaanik, Jehovap tunisimavaa. Taamaattumik paasinarpoq Guutimik pallorfiginninnermut attuumassuteqartuni Guutillu imminnut suliassiissutaani tamani  siuttuusussaammat. Meerartaarunik ilaqutariinnut qullersanngussaaq. Tamannali nuliaanut ajoqutaanavianngilaq. Akerlianilli nulianut iluaqutaassaaq, meeqqanut oqartussaassutsiminik Guutimeersumik atuigaangami uini kaammattortigisassagamiuk.

8. Aaqqissuussaq suna Guutip Bibelimi allanneqartissimavaa?

⁸ Guutip aaqqissuussaa naapertorlugu Adam Guutimut akisussaassuseqarpoq; Eva uimi siulersuinerata ataaniippoq, meeqqat angajoqqaaminnut naalattussaassuseqarput, uumasullu inuit oqartussaanerata ataaniipput. Angut arnarlu tamarmik immikkut naammassisassaminnik suliassaqarput, pilluarnartumillu naammassisaqarfiulluartumillu inuusinnaallutik. Taamaalillutik ’tamatigut ippinnanngitsumik torersumillu iliortassallutik’. — 1 Korintumiut 11:3; 14:33, 40, NV.

Arnaq inissisimaffivianik ajortip arsaarpaa

9, 10. Angutip arnallu ajortuliornerat taakkununnga qanoq kinguneqarpa, arnarpassuarnullu sumik nassataqarsimava?

⁹ Ajorti naammalluinnanngissuserlu paratiisimi siullermi atuutilermata pissutsit torersut tamakku atorunnaarput. (Rûmamiut 7:14-20) Uiusoq pikitsitsisoq nulialu naalanngitsoq erloqinartunik atugaqalerput. (1 Moses 3:16-19) Taamanimiilli anguterpassuit qullersatut inissisimaffimminnik atornerluisarsimapput, nuliaasumut naalliuutaaqisumik.

¹⁰ Taamatut pinissaa Jehovap siumut ilisimareerpaa taamaattumillu Evamut oqarluni: „Uiit pilerissuseqarfigissavat, taannali ilinnut naalagaassaaq.“ (1 Moses 3:16) Angutit pissaanertik atornerlussimavaat qullersatullu inissisimaffitsik eqqunngitsumik atorsimallugu. Tamanna angutip ajortiliussusianik arnallu naammalluinnanngissusianik pissuteqarpoq, ilaannikkummi arnap naalliuutaanut pissutaasartoq tassaavoq uimi oqartussaassusianik arsaarinneriaraluartarnera.

11. Arnarpassuit qanoq oqaatigineqarsinnaappat, arnallu ataataanerit nalaanneersut atuakkiortup qanoq allaatigai?

¹¹ Bibelimili najoqqutassiat maleruarneqaraangata arnarpassuit nalerisimaarlutik pilluarlutillu inuusarput. Ataataanerit nalaanni aammattaaq taamaassimavoq. Atuakkiortup Laure Aynardip atuakkami La Bible au Feminin-imi (Bibeli arnat isaannit) piffissaq tamanna ima eqqaavaa: „Oqaluttuani tamakkunani tamani ingammik malugisariaqartoq tassa, arnat pingaartumik inissisimaffeqarsimanerat, ataataanerpaat  isaanni ataqqisaasimanerat, nakimanatik sulissutigisassanik aallarniisinnaassuseqarsimanerat kiffaanngissuserlu inuunerminni atorsimasaat.“

Arnat Mosesip inatsisaasa ataanni

12, 13. (a) Mosesip inatsisaasa atuunneranni arnat qanoq inissisimaffeqarpat? (b) Mosesip inatsisaasa atuunneranni arnat anersaakkut qanoq atugaqarsimappat?

¹² Inatsisit Jehovap Mosesimut tunniussai malillugit angutip nuliani asasussaavaa. (5 Moses 13:6) Atoqatigiinnermi nuliami pingaartitassaanera ataqqisussaavaa, arnarlu kinaluunniit atoqatigiinnikkut atornerlunneqartussaanngilaq. (3 Moses 18:8-19) Allasiorsimasutut, qitornaminnik qatanngutiminnilluunniit atoqatiginnissimasutut imaluunniit uumasumik atoqateqarsimasutut pisuutitaagunik angutit arnallu Mosesip inatsisaasa ataanni naligiimmik pineqartarput. (3 Moses 18:6, 23; 20:10-12) Inassutit tallimaanni piumasarineqarpoq ataatamik anaanamillu ataqqinninnissaq. — 2 Moses 20:12.

¹³ Pingaarnerusumik, Mosesip inatsisaasa arnaq anersaakkut ineriartornissaanik annertuumik periarfissaqartissimavaat. Inatsisit atuffassissutigineqartarnerat arnat iluaqutigisarsimavaat. (Josva 8:35; Nehemja 8:2, 3) Upperisarsiornikkut nalliuttorsuit najuuffigisartussaasimavaat. (5 Moses 12:12, 18; 16:11, 14) Sabbatisiortarnernut peqataasarsimapput nasiræeritullu neriorsuisinnaasimallutik. (2 Moses 20:8; 4 Moses 6:2) Namminneq inuttut qinunikkut Jehovamut attaveqarsimapput. — 1 Samuel 1:10.

14. Arnat epriiariusut pillugit Bibelimik paasiniaaqqissaartartoq katuuliusoq qanoq oqarpa, Mosesillu inatsisaasa atuunnerata nalaani arnat inissisimaffiat qanoq oqaatigineqarsinnaava?

¹⁴ Bibelimik paasiniaaqqissaartartoq katuuliusoq Roland de Vaux arnaq epriiariusoq pillugu ima oqarpoq: „Angerlarsimaffimmi suliassat ilungersunartut suliarisussaasimavai; nersutaatit paarisarsimavai, narsaatini sulisarluni, nerisassiortarluni, meqqunik qissisarluni ilaallu ilanngullugit. Suleruluttarninili tamanna nikanarnerussutiginngilaa. Akerlianilli pingaarnerulissutigaa. . . . Allaatigisamernillu taamanikkut ilaqutariit iluanni qanimut ataqatigiinnermik takutitsillatsiartut ersersippaat nuliaq israelikkuusoq uiminit asasaasimasoq siunersiorneqartarsimallunilu,  aap, naligisatut isigineqarsimasoq. . . . Qularutissaanngilluinnarpoq tamanna pissusissamisut isigineqarsimasoq. Ajoqersuummut Mosesimik allakkat siulliit-ni saqqummiunneqartumut tamanna naapertuulluinnarpoq, tassani oqaatigineqarmat Guutip arnaq angummut ikiortissatut pinngortissimagaa, taamaattumillu attavigisussaagaa (1 Moses 2:18, 24); Ussatit kapitaliisa kingullersaanni nuliaalluartoq meeqqaminit unnersiutigineqartoq uiminillu tulluusimaarutigineqartoq eqqartorneqarpoq (Uss. 31:10-31).“ (Ancient Israel — Its Life and Institution) Qularutissaanngilluinnarpoq, Mosesip inatsisai Israelimi maleruarneqaraangata arnat ajortumik pineqartarsimanngillat.

Arnat nuimasut

15. (a) Angutip nuliatalu attaveqatigiilluarnerata qanoq ittuusariaqarneranut Sara iliuutsimigut qanoq maligassaalluarpa? (b) Sooq Rahabimik oqaluttuaq malugisariaqarpa?

¹⁵ Arnarpassuit Jehova Guutimut kiffaasut nuimasut Allakkat Epriiarisuut-ni eqqartorneqarput. Arnap Guutimik mianerinnittup qanoq ililluni uiminut naalattuusinnaaneranut tamannalu ilutigalugu aalajangiiniarnerinut ikiuussinnaaneranut Sara maligassaalluarpoq. (1 Moses 21:9-13; 1 Pîtruse 3:5, 6) Aammattaaq Rahabimik oqaluttuaq malugisariaqarpoq. Tassani ersersinneqarpoq Jehovap ammip qalipaataatigut immikkoortitsinerarneqartarnera imaluunniit arnanut sukannersuunerarneqartarnera eqqunngitsuusut. Rahab atortittartuusimavoq israelikkuunngitsoq. Uppernerali angisooq, ilaatigut inooriaatsiminik allanngortitsinermigut sulianik malitseqartoq, pissutigalugu Jehovap kiffamisut akueraa. Taamaattumik Jehovap naapertuilluartutut nalunaarutigaa. Tamatumalu saniatigut immikkut pisinnaatitaaffimmik nalissaqanngitsumik, tassa Messiasimut siuaasaanermik, akissarsisippaa. — Matîuse 1:1, 5; Eprîarit 11:31; Jâko 2:25.

16. Abigajilimik oqaluttuakkut suna erserpa, iliuusialu sooq eqqortuua.

¹⁶ Abigajilimik oqaluttuami ersersinneqarpoq Jehovap piumasarinngikkaa nuliaasup uini qanorluunniit peqqusippat naalattassagaa. Taassuma uia pisuujuvoq uumasuuterpassuaqarlunilu savanik savaasanillu. Kisianni „kamajaqalunilu inupiluuvoq“. Abigajillu uimi maligassiuinerlunnera malinngilaa. Ersersippaa silatuujulluni, sianisuujulluni, maniguuttuulluni eqqarsariallaqqissuullunilu, inoqutiminullu ajunaarnersuarmik kinguneqartumik pisoqarnissaralua akornuserlugu. Taamaattumik Jehovamit pilluaqquneqangaarpoq. — 1 Samuel 25:2-42.

17. (a) Israelimi arnat ilaat sumik immikkut annertuumik pisinnaatitaaffeqarsimappat? (b) Arnat kristumiut kiffartornerminni immikkut pisinnaatitaaffeqartut Miriamimik oqaluttuaq qanoq ilinniutigisinnaavaat?

¹⁷ Eqqartuussisoqarnerup nalaani allaat arnat, ilaatigut Debora, pruffiitiusarsimapput. (Eqqartuussisunik allakkat, kapitali 4 aamma 5) Jerusalemip aserorneqarnera sioqqutitsiarlugu Hulda Judami pruffiitiusimavoq. (2 Kunnginik allakkat 22:14-20) Aammattaaq Miriamip qanoq pisimanera malugisariaqarpoq. Taanna Pruffiititut Jehovap aallartitaatut eqqartorneqarpoq, immikkulli pisinnaatitaaffini tamanna piffissap ilaani pingaakujuutigilersimannguatsiarpaa. Oqartussaassuseq aqqaluminut Mosesimut Israelikkunnik siulersuisuusumut Jehovap tunniussaa akueriumanngilaa, taamaattumillu pillarneqarluni. Ilumoorlunili peqqissimisimagunarpoq atorfimminullu ikkuteqqinneqarluni. — 2 Moses 15:20, 21; 4 Moses 12:1-15; Mika 6:4.

Arnat juutillu upperisarsiornerat

18, 19. Juutit upperisarsiorneranni arnat qanoq isigineqalerpat, sooq taama isigineqalerpat?

¹⁸ Soorlu takoreeripput Mosesip inatsisai arnap pisinnaatitaaffiinik sernissuisuupput, inatsisillu maleruarneqaraangata arnat nalerisimaarnartumik inuusinnaasarsimapput. Piffissalli ingerlanerani, ingammik 607-mi u.n.s. Jerusalemip aserorneqarnerata kingorna, juutit upperisarsiornerat, Jehovap inatsisaanik allatanik pinnani oqaatsitigut kingornussarsianik tunngaveqarnerusoq, atuutilerpoq. Ukiut hundredellit sisamassaannit, ukiunik naatsorsuisalernitta siornagut, juutit upperisarsiornerminni grækerit isumaliutersuutaat atortorujussuanngorpaat, grækerillu isumalioqqissaartartuisa arnat pisinnaatitaaffii annerusutigut pingaartitarinngilaat. Taamaattumillu juutit upperisarsiornerata atuutilernerani arnat ataqqisaanerat milleqaaq. Ukiut hundrederillit pingajussaannit ukiunik naatsoruisalernitta siornagut angutit arnallu juutit naalagiartarfiini immikkoortiterneqalerput, arnallu Toramik (Mosesip inatsisaanik) atuartut iluarineqarunnaarput. Encyclopaedia Judica-mi manna misiutigineqanngilaq: „Tamatuma kingunerisaanik arnat ikittuinnaat ilinniagaqarsimapput.“ Pingaarnerusumik  nukappiaqqat ilinniagaqartinneqartarsimapput.

¹⁹ Atuakkiamini Jerusalem in the Time of Jesus-imi J. Jeremias ima allappoq: „Suut tamaasa eqqarsaatigissagaanni upperisarsiornikkut inatsisinut naleqqiullugu arnat inissisimanerat najoqqutakkut uteqattaarneqartaqisukkut matumuuna erserluarneruvoq: ’Arnat, inussiat (juutiunngitsut) aamma meeqqat.’ . . . Aamma arnat narrugerpalullugit eqqartorneqarajuttarsimapput. . . . Taamaattumik malunnarpoq aammattaaq Jesusip nalaani juutit upperisarsiorneranni arnat ataqqisaasimanngitsut.“

Arnat aalajaatsut Messiamik utaqqisut

20, 21. (a) Naak arnat upperisarsiornikkut pisortanit narrugisaagaluartut Messias tikiuttussanngormat eqqumaniartunut kikkut ilaasimappat? (b) Suup takutippaa Elisabet Marialu Guutimik mianerinningaartuusimasut?

²⁰ Arnanik narruginninnermikkuttaaq juutit ajoqersuisuisa ’Guutip oqaasia atorunnaarsippaat maligassarsiamikkut ileqqorsiamikkut’. (Mákorse 7:13) Messiasilli tikiuffissaa qanillimmat, naak arnanik narruginninneqaraluaqisoq, arnaqarsimavoq Guutimik mianerinnittunik eqqumaniartunik. Arnat taakku ilagaat Elisabet, palasip levikkuusup Zakariasip nulia. Taanna uinilu ’iluartuupput Guutip isaani, Jehovap inassutaasigut ileqqoreqqusaasigullu assuarnaatsumik ingerlallutik’. (Lúkarse 1:5, 6) Elisabet Jehovamit iluarisaasumik iliorfigineqarpoq, Johannes Kuisisumut anaananngorami, naak qitorniuitsuusimagaluarluni utoqqaagaluarlunilu. — Lúkarse 1:7, 13.

²¹ Anersaamit illernartumit siulersorneqarluni Elisabet arnamut Guutimik mianerinnittumut allamut, qanigisaminut Mariamik atilimmut, asannittuliungaarsimavoq. Ukiup 3-p u.n.s. naalernerani inngili Gabrielip Maria nalunaarfigaa tupinnartuliornikkut naartulerumaartoq (Jesusimik). Inngilip oqarfigaa: ’Pilluarna, saammaassaasutit uumaa, Jehovap najorpaatit.’ Kinguninngua Mariap Elisabet pulaarpaa, taassumalu meerassaalu pilluaqquai, Jesus suli inuunngitsoq ’Naalakkaminik’ taallugu. Tamatuma Maria Guutimik miannerinningaarneranut ersiutaaqisumik Jehovamik unnersiutiginnilersippaa. — Lúkarse 1:28, 31, 36-55.

22. Jesusip inunngornerata kingorna arnap Guutimik mianerinnittup kia ersersippaa Messiasimik utaqqisut ilagigaanni?

²² Jesus inooreersoq Jehovamut sassaanniarlugu Mariap Jerusalemimi naalaffiliaammagu arnap Guutimik mianerinnittup allap, pruffiitip Annap utoqqalilersup, nuannaarnini ersersippaa. Taassuma Jehova qutsavigaa Messiasimillu neriorsuutigisamik ilumoorullugu utaqqisut tamaasa Jesusimik oqaluttuullugit. — Lúkarse 2:36-38.

23. Arnat aalajaatsut kristumiussuseq sioqqullugu inuusimasut apustili Paulusip qanoq eqqartorpai, apeqqutillu suut normumi tulliuttumi sammineqassappat?

²³ Piffissaq Jesusip nunami kiffartorfissaa qanillimmat suli ’arnaqarsimavoq iluartunik Guutimut neriuttunik’. (1 Pîtruse 3:5) Arnat taakku ilaat Kristusimut ajoqersuganngorput. Jesusip qanoq iliorfigisarpai? Aamma ullumikkut arnaqarpa Bibelip imminnut inissisimaffigititaanik nuannaarlutik akuersaartunik? Apeqqutit tamakku atuagassiap normuani tullermi eqqartorneqassapput. (wD 1/7 91)

[Quppernerup ataani ilanngussaq]

Apeqqutit uteqqiissutissat

□ Nunani allani arnat isigineqarnerannut akerliusumik Israelimi arnat qanoq isigineqarsimappat?

□ Adam Evalu tamarmik immikkut qanoq inissisimaffeqarpat, sooq?

□ Mosesip inatsisaasa atuunnerata nalaani arnat israelikkuusut qanoq inissisimaffeqarsimappat, anersaamullu tunngasut eqqarsaatigalugit angutinit ajornerusumik inissisimaffeqarsimappat?

□ Arnat nuimasut Allakkat Epriiarisuut-ini eqqartorneqartut ilaat qanoq ilinniarfigineqarsinnaappat?

□ Juutit upperisarsiorneranni arnanik nikaginnileruttorfimmi uppernermikkut maligassat kikkut taaneqarsinnaappat?

[Atuaqqissaarnermi apeqqutit]

[Qupp. 14-mi ungalusaq]

„ARNAQ JEHOVAMIK MAINERINNITTOQ“

„10 Nuliaalluartoq — kia taamaattoq nassaarisinnaavaa? Sapanngarissunit naleqarneruvoq. 11 Uiata tamatigorluinnaq tatigisarpaa iluanaanngitsuussananilu. 12 Uini ajunngitsuinnarmik pisarpaa, ajortumik pinngisaannarlugu inuunini tamaat. 13 Savat meqqui annoraassiassallu isumagisarpai, assamminillu sulisarpoq ilungersorluni kajumillunilu. 14 Assigaa umiarsuaq niuffagiut ungasissorsuarmit inuussutissanik aallertartoq. 15 Ullaaralaannguakkut makittarpoq inoqutini nerisassiuuttarlugit kiffanilu arnat suliassittarlugit. 16 Narsaammik pigisaqalerumagaangami taanna pigilersarpaa, iluanaarutinilu atorlugit naatsiiviliortarpoq viinnequtilimmik taannalu ikkussuiffigalugu. 17 Nakuussut qiterutigaa nukittuunillu taleqarluni. 18 Paasisimasarpaa sulinermini iluatsitsilluni; qullia unnuakkut qaminngisaannarpoq. 19 Assani qissivimmut tutsittarpai qissillu inussaminik tigullugu. 20 Assani ajorsartunut ammartarpai talinilu piitsunut isatsittarlugit. 21 Apigaluaraangat inoqutini isumakuluutigineq ajorpai tamarmik iluleriinnik atisaqarmata. 22 Nammineerluni qipissialiortarpoq, atisaqarpoq ilupaassianit savallu meqquinit aappillersakkanit sanaanik. 23 Uia inuit katisimasarfiini ilisarisimaneqarluarpoq nunamilu utoqqaanertat issiaqatigisarlugit. 24 Illuliortarpoq tuniniagassaminik qiterutinillu niuertumut nuisitassiortarluni. 25 Pissaanermik ataqqinaammillu atisaqarpoq, ullullu piumaartussat pillugit qungujussinnararaaq. 26 Qanini ammartarpaa silatuumik oqalulluni, oqaaseqartarporlu inussiarnersunik ajoqersuussutinik. 27 Illumini pisartut alaatsinaattarpai, nerisartagaalu eqiasunnikkut pissarsiaanngillat. 28 Ernerisa sassarlutik unnersiutigisarpaat, uiatalu nersualaartarpaa ima oqarluni: 29 ’Arnarpassuaqaraluarpoq pikkorissunik, illilli tamakkunannga tamanit nallernissaqanngilatit.’ 30 Takujuminassuseq ataannartussanngilaq, pinnissuserlu nunguttarpoq; arnarli [Jehovamik] mianerinnittoq tassaavoq nersortarialik. 31 Suliami inerititai inuulluutiginiarlugit; suliani pillugit nersorneqartussaavoq inuit katisimasarfiini.“ — Ussatit 31:10-31.

[Qupp. 12, 13-mi assiliartaq]

Arnat ilaqutariinni ataqqinartumik inissisimaffeqarsimapput