Eqqissineq isumannaassuserlu pillugit Bibeli qanoq oqarpa?

Silarsuarmi eqqissinissap isumannaassusissallu anguneqalernerat ataasiussuseqarneruleriartornerlu inuppassuit upperaat. Neriuutigaat ilungersornerit tamakkua silarsuaq pitsaanerusunngortissagaat. Bibelilli uparuarpaa aammattaaq takussaanngitsunik sunniisoqartoq.

Eqqissinermik isumannaassutsimillu apeqqut kristumiut soqutigeqaat ukiuni hundredelinni siullerni Paulusip isumassarsisitaalluni ilagiinnut kristumiuusunut allagai pissutigalugit, soorlu 1 Tásalûníkamiut 5:3-mi atuarsinnaagipput: ’Oqarpata: „Eqqissinarpoq, siooranartoqanngilaq!“ taava perlussap tassanngaannaq tikikkumaarpai, soorlu nallisarnerit ernisulersoq tikittaraat; aniguinavianngillallu.’ Allassimaffik tamanna pissutigalugu pingaaruteqartunik apeqqutissaqalerpoq.

Eqqissineq isumannaassuserlu — sumut aallarniutaassappat?

Paulusip oqaasiisa siuliini eqqartorneqartut ataqatigisaat atuarutsigik malunnarpoq ’eqqissinarpoq, siooranartoqanngilaq’-mik oqartut tassaanngitsut kristumiut eqqumalluartut, tassaasulli inuit susoqavinneranut eqqumanngitsut. Nalullugu navianartorsiorput neriulluarnissamut pissutissaqarsorigamik. Akerlianilli Paulus kristumiut pillugit ima allassimavoq: ’Kisianni qaquguluunniit qanoq ilisukkulluunniit piumaartumik allaffigisariaqanngilassi, qatanngutivut.’ (1 Tásalûníkamiut 5:1) Aap, Guutip piffissamik pilersaarutaa eqqumaffigisariaqarparput. Sooq? Paulus oqarmat perlussaq, ’Jehovap ullussaa’-nik taaneqartoq, tassanngaannartumik nalliukkumaartoq, ’soorlu tillittoq unnuakkut pisartoq’. — 1 Tásalûníkamiut 5:2.

Eqqissinermik isumannaassutsimillu siulittuut tamanna sumik imaqarpa? Malunnarpoq tassaannaanavianngitsoq oqaloqatigiissutigineqartoq. Eqqissineq sorsunneqartuarneratulli sivisutigisumik oqaloqatigiissutigineqarsimavoq. Paulusip oqaasiisa tikkuarsimassavaat piffissaq inuiaqatigiit eqqissinermik immikkut ittumik pilersitsisorinarfiat. Angusorisaalli tassaassapput oqaatsit kimeqanngitsut. Eqqissineq isumannaassuserlu qalliinnarsiortut tassanngaannaq suujunnaarnissamik naggatissaqartut soorunami tassaasinnaanngillat eqqissineq imaluunniit isumannaassuseq piviusut.

Jesusittaaq suujunnarnissaq tamanna oqaatigisimavaa. ’Naalliunnartoqangaarfissaq silarsuaqaleqqaarneranit mannalu tikillugu naleqanngisaannartoq kingornaluunniit naleqassanngitsoq’-mik taavaa. Ukiut hundredellit arlallit tamatuma siornagut pruffiiti Danielip piumaartussaq tamanna aamma eqqartorsimavaa ’ullut annikilliornartut inuiaqaleqqaarneranit ullut makku tikillugit nalisineqanngitsut’-tut allaatigalugu. — Matîuse 24:21; Daniel 12:1.

Erloqingaarfissaq tamanna qanorluunniit taaneqaraluarpat, siulittuutit takutippaat Satanip aaqqissuussaa nunamiittoq peerneqarluinnartussaasoq. Eqqissinermik isumannaassutsimillu nalunaarutissat siulittuutigineqartut Guutip tapersersugarinngilai, akerlerluinnaanillu kinguneqassapput! — Naleqqiuguk Sefanja 3:8.

Piffissap pingaaruteqassusia

Paulusip siulittuutaasumik mianersoqqussutaa eqquunnerpa qaammatini kingullerni inuiaqatigiit silarsuarmi ataasiussuseq annerusoq qanilliartulersimammassuk tamatumalu kingunerisaanik eqqissinermik isumannaassutsimillu neriunneqalermat? Soorlu atuagassiami matumani uparuarneqarajuttartoq, 1914-imiilli siulittuuterpassuit Jesusip qilammi kunngiulluni najuunneranut atatillugu eqquunnerat takuneqarsinnaasarpoq. (Matîuse kapitalit 24 25-lu; 2 Timûtiuse 3:1-5; sarĸúmersitat 6:1-8) Jesusip eqqartorsimavaa Jehovap ullussaa, ajortut tassanngaannartumik piuneerunneqarfissaat, nalliussasoq inuit kinguaariit tamatuma aallartinneranik takunnissimasut ilaat suli inuutillugit. — Lúkarse 21:29-33.

 Apustili Paulusip aamma piffissap pingaaruteqarnera eqqartorsimavaa. Ima oqarpoq: ’Oqarpata: „Eqqissinarpoq, siooranartoqanngilaq!“ taava perlussap tassanngaannaq tikikkumaarpai.’ Paulusip oqaasiisa tamakkua ersarissumik takutippaat eqqissineq isumannaassuserlu oqallisigineqaleruttorpata annikilliornartoq angisooq nalliussasoq. Nalunarallartumik, soorlu tillittoq unnuakkut pisartoq, tamatuminnga ilimasunngeruttorfianni, neriugisatik eqqissineq isumannaassuserlu sammileruttorpatigik, suujunnaarsitaassapput. Massakkorpiaq oqaatigisinnaanngikkallarparput eqqissineq isumannaassuserlu maannakkut pisut tassaanersut Paulusip oqaasiinik eqquutitsisut imaluunniit siulittuut suli annertunerusumik eqqartorneqassanersoq, kisianni apeqqut siornagumut asseqanngitsumik oqaloqatigiissutigineqarmat kristumiut eqqumaniartuarnissaminnut mianersoqquneqarput.

Silarsuup pissaanilissuisa ’saqitsaannerat’

Pruffiitip Danielittaaq piffissap pingaaruteqassusia eqqaavaa ’ullut annakilliornartut’ oqaatigigamigit. Takutippaa pissaanilissuit marluk, tassa ’avannarliup kunngiata’ ’kujalliullu kunngiata’, imminnut akerleriissuteqarnerata sivisunaartup naalernerani annikilliornartoq nalliussasoq. (Daniel 11:5-43) Sorsunnersuup aappaata naaneraniilli pissaanilissuit taakku marluk tassaasimassapput kujalliup kunngia kapitalistiusoq avannarliullu kunngia socialistiusoq.

Danielip siulittuutigaa pissaanilissuit taakkua marluk akeqqivissimasumik unamminissaat, soorlu ukiuni 45-ni kingullerni takuneqarsinnaasimasoq, tassaassasoq ’saassussineq’ imaluunniit saqitsaanneq, tassa pissaaneqarneqqisaanneq. Saqitsaanneq tamanna qaammatini kingullerni sakkukilliartorsorinarpoq. Assersuutigalugu, Sovjetunionip nunanut allanut ministeriata siorna majimi nalunaarutigisimavaa sorsunneq nillertoq atorunnaarsimasoq. Junimi atuagassiaq Time USA-p Sovjetunionillu isumaqatigiinniarlutik ataatsimiinnerat eqqartorlugu ima allassimavoq: „Sakkussanik nakkutilliineq atomimillu sakkussianik misileraanerit pillugit isumaqatigiissutit ilaat ukiualuit matuma siorna pisimagaluarpata naammassisatut tupinnangaartutut isigineqarsimassagaluarput. Maannakkut, ataatsimut isigalugit allaat, tassaasorinarput ilimasunnernut pakatsissutit.“

Paasiumaarparput naalagaaffissuit akaareqatigiippassinnerat utaqqiisaannaassanersoq ataavartussaanersorluunniit. Unali qularisariaqanngilarput: Piffissaq Jesusip eqqartugaa ingerlangaatsiareersimavoq. Silarsuarmi pisartut takutippaat piumaartussat apustili Paulusip pruffiitillu Danielip siulittuutigisimasaat qanilliartortut. Kristumiuuneraqatigiit ilagiivisa politikkikkut ineriartorsimaneq nutaanerusoq pisooqataaffigisimavaat, tamannali eqqissinermik ataavartumik kinguneqassanngilaq. Nalunaajaatit takutippaat ineriartornerup akerlerluinnaanik inuiaqatigiinnut kinguneqassasoq. (wD 1/9 91)

[Qupp. 6-mi assiliartat]

Piffissap takutikkumaarpaa naalagaaffissuit marluk imminnut akaareqatigiinnerat qanoq sivisutigisumik atassasoq

[Suminngaanneernera]

USSR Mission to the UN