Bibeli qanoq oqarpa?

Naartuersinneq innuttaasut amerliartuinnarnerannik ajornartorsiummut aaqqiissutissaava?

INNUTTAASUT amerlassusiannik nunami tamarmi killilersimaarinninniarnerugaluarpat imaluunniit ilaqutariinni ataasiakkaani meerartaarnaveersaarnerugaluarpat, itsaq ullumikkullu naartunermik kipititsisarneq, naartumik katatsitsisarneq, nalinginnaasuuvoq.

Aviisimi Canadameersumi ima qulequtaqarpoq: „Kinami naartuiinerit 53 millionit annikilliungaarnermik kinguneqarput.“ Kisitsit annertoqisoq tamanna Kinami peqqinnissaqarnermut ministeriaqarfik naapertorlugu 1979-imiit 1984-imeersuuvoq. Ukiut tallimat ingerlaneranni Kinami naartuiinerit amerlassusiat tamanna Canadap inuisa amerlassusiata marloriaatigaa!

Japanimi missiliuunneqarpoq naartusut ukiut tamaasa 2,1 millioniusut 30 procentii naartuersittartut. Naartut peerneqartut tamakku, meeqqat suli inunngornatik toqunneqartut tamakku, ujaqqamik, plasticimik gipsinillu ilusilersukkanik eqqaassutissiorneqartarput, ilusilersukkallu tamakku buddhistit naalaffiiniittarput.

Naartuersissinnaatitaaneq naluneqanngitsutut Danmarkimi ukiuni arlaqartuni atuussimavoq. Sverigemi 1946-miilli naartuersinnissaq akuerisaasimavoq „nakorsaatitigut, inuttut atugarisatigut, inuttut pissutsikkut timikkullu kingornuttakkatigut pissutissaqarpat imaluunniit naartoq ajoquteqarpat“. Soorlu nunani allani arlaqartuni taama ittoq arnat danskit svenskillu naartuersinneq inuttut atugarisatigut akuerineqarsinnaasutut ilaqutariillu amerlassusiannik killiliissutitut nalinginnaalluinnartutut isigaat.

Itsaq nalinginnaasumik atorneqarsimavoq

Naartuiisarneq innuttaasut amerliartornerannik killilersimaarinnissutitut aammattaaq Athenitoqqami nalinginnaasumik atorneqarsimavoq. Oqaluttuarisaanermik ilisimatooq Will Durant Verdens Kulturhistorie-mi ima allassimavoq: „Nammineq piumassutsimik meerartaassanik killilersimaarinninneq ulluinnarni atuussimavoq, naartunaveersaatinik atuinikkut, naartuersinnikkut imaluunniit meeqqanik toqutsisarnikkut.“ — Atuagaq 6, qupp. 26.

Aammattaaq Romamiut naalagaaffissuanni naartuiisarneq atorneqarluartuusimavoq. Suut pissutigalugit? Will Durant allappoq: „Arnat atoqatigiinnermut piukkunnartoorpalaarnissatik anaanaanissaminnit pingaartinnerusimavaat; inuttut kiffaanngissuseqarnissamik kissaat naggueqatigiit pillugit piumasaqaammut nalinginnaasumik akerliulluinnarsorinarpoq. . . . Katittut amerlanersaat naartuersinnikkut, meeqqamik toqutsinikkut, coitus interruptus aamma naartunaveersaarnikkut ilaqutariit amerlassusiannik killilersimaarinnittarsimasorinarput.“ (Atuagaq 8,  qupp. 33) Ullumikkut naartuersittartut amerliartuinnarnerat tamatumunnga assingusumik pissuteqannginnerpa?

Kristumiut siulliit isiginninnerat

Tamatumunnga akerliulluinnartumik kristumiut siulliit naartuersinneq isigaat. Durant allappoq: „Naartunermik kipititsineq meeqqamillu toqutsineq, inuiaqatigiit juutiunngitsut akornanni innuttaasut amerliartornerannik killilersimaarinnittut, inuarnertut kristumiunit isigineqarsimapput.“ (Atuagaq 9, qupp. 258) Tassa naartuiinikkut meeqqanik killilersimaarinninneq grækerit romamiullu nalaanni innuttaasut akornanni atuagaagaluaqisoq, kristumiut ileqqussatigut sukannersumik najoqqutaminnik, inuunerup illernassusianik tunngaveqartumik, aalajangiusimannilluinnarsimapput. Israelitoqqap nalaanisut meeqqat Pinngortitsisup pilluaqqussutaasut isigineqarsimapput. Tussiaasiortoq allassimavoq: „Ernerit tassaapput [Jehovap] tunissutai, arnap timaata iluani inerittoq tassaavoq taassuma akissarsiarititaa.“ — Tussiaat 127:3.

Guutip oqaasiani, Bibelimi, ersarissumik takutinneqarpoq naartup inuunissaminik pisinnaatitaaffia Jehovap, „inuunerup puilaffiata“, akuerigaa. Qanoq ililluni? Siullermik, Bibelimi ersersinneqarpoq naartoq timip ilaminiinnaatut soqutaanngitsutut Guutip isiginngikkaa. Meerartaarsinnaanermik tupinnartumik nammineq pilersitaminik Guutip isumassuinera tussiaasiortumit ima allaatigineqarpoq: ’Illit [Jehova] . . . arnama timaata iluaniitillunga ulipparma. . . . Taattoqanngikkallartunga isivit isigaannga, mappersagaatinnilu allassimapput ullut tamarmik nuiartortussat.’ — Tussiaat 36:9; 139:13-16, nutsigaq 1961-imeersoq.

Aappassaanik, angut arnarluunniit naartunerup ingerlaneranik pissusissamisoortumik kipititsippat — piaarinaatsoornikkulluunniit pigaluarpat — Guutip nassuertussaatitaatissimavaa. Malugiuk Mosesip inatsisaasa inuk taamaaliortoq oqimaatsumik akisussaaffileraa: „Angutit paasut arlaata arnaq naartusoq naartuanik anitsisippagu, arnarli allakkut innarlerneqanngippat, taava angut taamaalisitsisoq eqqartuussisut akuersineratigut arnap uiata taarsiissutigeqqusaatut annertutigisumik akiliisinneqassaaq. Aqqunartoqarsimappat taava tamanna naleqartissavarsi inuuneq inuunermik.“ — 2 Moses 21:22-24.

Ajutoorneq naartumik attuisoq, allaat piaarinaatsoornikkulluunniit pigaluartoq, taama ilungersornartigisutut Jehovap isigisimaguniuk, piaaraluni naartunermik kipititsineq, soorlu naartuiineq taamaattoq, suli ilungersornanerungaartutut isigisimassavaa! Inatsimminilu Mosesimik allakkat, kapitali 21-mi, allassimasumi naartup utoqqaassusia Guutip taanngimmagu ilimagisariaqarparput naartunerup qanoq ilineraniluunniit kipititsinnernut tamanut tunngassasoq.

Innuttaasut amerliartuinnarnerannik ajornartorsiut sumik aaqqiissutissaqarpa

Taamaakkaluartorli immaqa suli isumaqartoqassaaq naartuersinneq innuttaasut amerliartornerannik killilersimaarinnissutitut atorneqaruni kinguaariinnut aggersunut ikiuutaalluassasoq. Taama isumaqartut inuussutissanik, inissanik naleqquttunik imermillu amigaateqaleriartuinnarneq tikkuarumassavaat. Tamannali silarsuup inuisa nunarsuarmi avatangiisinut oqimaaqatigiissinneqarnissaannut aaqqiissutissatuaava?

Ukiut 6000-it matuma siornagut Jehova Guutip oqaatigaa Nunarsuarmi inunnut tunngatillugu suna siunertarigini. Inuit siulliit Jehovap ima peqquai: „Kinguaassiorlusi amerliartoritsi nuna tamakkerlugu ilissinnullu naalatsigitillugu.“ (1 Moses 1:28) Malugiuk Guutip ersarissumik piumasarimmagu nunarsuup ulikkaarneqarnissaa, imaanngitsoq nunarsuup sinnilimmik inoqalernissaa. Pinngortitsisup piffissanngorpat isumagissavaa nunarsuarmi inuit amerlassusiata oqimaaqatigiilluinnalernissaa, tamatumalu kingunerissavaa inuit naammattumik amerlassuseqalernissaat, silaannaap naasullu imminnut sunniuteqartarnerata oqimaaqatigeeqqilernissaat nerisassanillu naammattunik pilersuilernissaq. — Jesaja 65:17-25.

Pissusissamisoorpoq ilimagissallugu inuit kinguaassiorsinnaassusiannik pinngortitsisup tamatuma atorneqarnera aaqqissuussinnaassagaa oqimaaqatigiilluinnalersillugu. Inuit amerliartornerannik killilersimaarinninniarluni naartuiinissaq pisariaqarunnaassaaq. Jehovap ernermi Jesus Kristusip naalagaaffia aqqutigalugu nunarsuup tulluartumik ulikkaarnissaa isumagissavaa — inuiannik naalattunik nunarsuarmi tarmarmi paratiisiusumi inuusussanik. — Jesaja 55:8-11; sarĸúmersitat 21:1-5. (gD 8/4 88)

[Qupp. 10-mi issuagaq]

„Naartunermik kipititsineq meeqqamillu toqutsineq . . . inuarnertut kristumiunit isigineqarsimapput.“

[Qupp. 9-mi ungalusaq]

„Naartoq arfinilinnik qaammateqaleraangami takusaqarsinnaalersarpoq, tusaasinnaalersarluni, malugisinnaalersarluni, naamasinnaalersarluni — aap, allaat ilikkagaqarsinnaalersarluni.“ — Dr. T. Verny, „The Secret Life of the Unborn“-imik atuakkiortoq