Arnat eqiasuillutik ’Naalakkami sulingaartut’
Arnat eqiasuillutik ’Naalakkami sulingaartut’
’Tryfænalu Tryfosalu Naalakkami sulisuusut inuulluarlit.’ — RÛMAMIUT 16:12.
1. Qanoq ililluni Jesusip nunami kiffartornera arnanut pilluaqqussutaava?
JESUSIP nunami kiffartornera arnanut juutiusunut pilluaqqussutaavoq. Suliaq aallartitaa arnanut ammikkut qanorluunniit qalipaatilinnut tuppallersaataallunilu neriulersitsisuullunilu nutaamik ataqqinarsaataavoq. Juutit upperisaminni kingornussarsiaat ’Guutip oqaasiinik atorunnaarsitsisut’ maleruanngilai. (Matîuse 15:6) Ileqqut kingornussarsiat tamakku ilarpassui arnat pisinnaatitaaffiinik tunngaviusunik Guutimeersunillu asissuisuupput.
Jesusip arnanut isiginninnera
2. Sooq Jesusip nalimini arnanut isiginninnera taassuma nalaani allanngortitsisuulluinnartuua?
2 Jesusip arnanut isiginninera juutit upperisarsiornikkut pisortaasa arnanut isiginninnerannit allaaneroqaaq. The Encyclopedia Judaica-mi allaatigineqarpoq taaneqartut kingulliit arnanik ’piumatuutut, alapernaatsutut, eqiasuttutut sinngatuutullu’ isiginnittuusut. Angutip arnamik oqaloqateqarnissaa nuannarisaanngilaq, aammalu „aqqusinermi arnamik oqaloqateqarnissaq allakkanik ilisimasumut kanngunarsaataasimavoq“. (Jerusalem in the Time of Jesus Joachim Jeremiasimit; naleqqiuguk Juánase 4:27.) Juutit upperisarsiornikkut pisortaasa arnanik narruginninnerat oqaatigisassartaqaraluaqaaq, qulaanili eqqaaneqartut naammapput Jesusip itsaq arnanut isiginninnerata allanngortitsilluinnartuuneranut takussutissatut.
3. Jesusip kiffartornerata nalaaneersut suut ersersippaat anersaakkut ajoqersuutinik itisuunik arnat ajoqersornissaannut Jesus piumassuseqarsimasoq?
3 Angutit arnanut asannittumik aammali minguitsumik qanoq ilillutik attaveqarsinnaanerannut Jesusip naammalluinnartumik maligassippaatigut. Arnat oqaloqatigiinnartarsimanngilai, aammattaarli anersaakkut ajoqersuutinik itisuunik ilinniartittarsimavai. Arnamummi, allaat Samariamiuusumut, Messiasiunini siullermeerluni ammasumik eqqaasimavaa. (Juánase 4:7, 25, 26) Marthamut Mariamullu pisimasup ersarissumik ersersippaa, juutit upperisarsiornikkut pisortaasa isumaata akerlianik, Jesus isumaqartoq arnaq anersaakkut ilisimasani annertusisikkumallugit igaffimmi suliassaminik qimatsigallarnissaminut pisinnaatitaasoq. Pisumi tamatumani Mariap ’ajunnginneq qinerpaa’ anersaamut tunngasut salliutinnerisigut. (Lúkarse 10:38-42) Qaammatialuilli qaangiuttut qatanngutertik angut toqummat Martha, Mariaanngitsoq, Ajoqersuisumik naapitserusuttorujussuusimavoq. Makinnissamik neriuut pillugu anersaakkut itisuumik Jesusip Marthamik oqaloqatiginninnera atuarlugu nuannersorujussuuvoq. (Juánase 11:20-27) Ilumut Martha immikkut pisinnaatitaaffeqartitaasimavoq.
Arnat Jesusimik isumaginnittut
4, 5. Jesusip Galiliiami kiffartornerani apustilit saniatigut kikkut malinnaappat, qanorlu Jesusimik isumassuippat?
4 Jesusip oqaluussiartorluni angalanermini arnat ikiuerusunnerat aammattaaq ilassisarsimavaa. Markusip iivangkiiliulersaarutimini eqqartorpai ’arnat . . . Jesusimik malittarinnittut kiffartorfigalugulu Galiliiamiikkallarmat’. (Mákorse 15:40, 41) Arnat taakku kikkuuppat qanorlu ilillutik Jesus kiffartorfigaat, imaluunniit isumagaat? Tamakkernagit aqqisigut ilisimavavut, ilaallu Lukasip eqqartorpai nassuiarlugulu qanoq ilillutik Jesusimik isumassuisimasut.
5 Lukas ima allappoq: ’Pivorlu kingorna illorpallit nunaqarfinnguillu aqqutigai oqaluussillunilu Guutillu naalagaaffianik iivangkiiliu oqaluussissutigalugu; taakkulu aqqaneq-marluk ilagai, arnallu ajortunik anersaaliugaluit nappaatiliugaluillu katsorsakkani ilagai, uku: Maria Magdalenemik taasaq, taassumannga anersaapiluit arfineq-marluk anisimasut. Johannalu Kuzap, Herodasip illuani annerup, nulia Susannalu allallu amerlasuut; taakkua pigisaminnik kiffartorfigisarpaat.’ (Lúkarse 8:1-3) Arnat taakkua imminik malinninnissaat pitillu atorlugit apustilimilu pisariaqartitaminnik ikiuunnissaat akuersaarsimavaa.
6. (a) Jesusip Jerusalemimi angalanerani kingullermi kikkut malinnaappat? (b) Jesus toqunissani tikillugu kikkunnit najorneqarpa, taakkualu ilaasa suna akissarsiaraat? (c) Juutit upperisarsiorneranni ileqquusoq eqqarsaatigalugu Juánase 20:11-18-imi oqaluttuarineqartumi suna malugisariaqartuua?
6 Jesus toqutaammat ’arnat qassiit tassaniipput asianit isiginnaartut, Jesus Galiliiamit malikkamikku kiffartorfigisarlugu. Taakkua ilagaat Maria Magdalene Marialu Jakobillu Josesillu arnaat’. (Matîuse 27:55, 56) Taamaalillutik arnarpassuit aalajaatsut Jesusip toqutaanerani najuussimapput. Aammattaaq malugisariaqarpoq Jesusip makinneranik takunnittut siulliit arnaammata. (Matîuse 28:1-10) Tamanna immini juutit ileqquinut akerliulluinnarpoq, juutimmi upperisarsiorneranni arnat eqqartuussinermi uppernarsaasussatut atorsinnaanngillat. Tamanna eqqarsaatigiitigalugu Juánase 20:11-18 atuariaruk, takorlooriarullu Maria Magdalene Naalakkap makissimasup saqqummerfigimmani, atermigut taammani ilumullu uummarsimanerminik ajoqersukkaminut oqaluttuarnermini uppernarsaasutut atormani qanoq sakkortutigisumik misigisimassasoq!
Arnat kristumiut aalajaatsut Piinsip ulluata kingorna
7, 8. (a) Qanoq ililluta nalunngilarput Piinsip ulluani anersaaq illernartoq kuineqarmat arnanik najuuttoqarsimasoq? (b) Kristumiussutsip siuaruarterneqaqqqaalerneranut arnat kristumiut qanoq ikiuutaasimappat?
7 Jesusip qilaliarnerata kingorna arnarpaaluit Guutimik mianerinnittut Jerusalemimi inimi qullermi apustilinut aalajaatsunut katersuuteqataasimapput. (apustilit suliáinik agdlagkat 1:12-14) Aammattaaq Piinsip ulluani anersaaq illernartoq kuineqarmat arnanik najuuttoqarsimavoq. Qanoq ililluta tamanna nalunngilarput? Aap, taamani qanoq pisoqarsimaneranik Peter nassuiaagami Joel 3:1-3 issuarpaa, tassanilu ersarissumik eqqartorneqarput ’paniit’, ’inussiaatit arnat’, imaluunnit ’kiffat arnat’. (apustilit suliáinik agdlagkat 2:1, 4, 14-18) Tassa aallaqqaataaniilli arnat kristumiut anersaakkut kinguaassiarititaasut tanitaasullu ilagiinnut kristumiunut ilaasimapput.
8 Aammattaaq kristumiussutsip siaruarterneqarnerani pingaaruteqartumik, qalliuniartuunatilli, arnat suleqataasimapput. Maria, Markusip anaanaa Barnabasillu qanigisaa, qularnanngitsumik angisuumik illoqarsimavoq Jerusalemimi ilagiinnut atukkiuttakkaminik. (apustilit suliáinik agdlagkat 12:12) Aammattaaq allaat kristumiut malersugaaqqilernerata nalaani illumi atukkiunnissaanut piumassuseqarsimavoq. (apustilit suliáinik agdlagkat 12:1-5) Filipittaaq tusagassamik nuannersumik oqaluussissutiginnittartup panii sisamat pruffiitisut kristumiutut immikkut pisinnaatitaaffeqarsimapput. — apustilit suliáinik agdlagkat 21:9; 1 Korintumiut 12:4, 10.
Paulusip arnanut isiginninnera
9. Korintumiunut allakkamini siullerni Paulus arnat kristumiut pillugit qanoq unnersuussiva, najoqqutassamillu Guutimeersumik sumik arnat ataqqinninnissaannik kajumissaarpai?
9 Paulus arlaleriarluni arnanik tatiginninngitsutut imaluunniit uumissuisutut (misogyni) pasillerneqartarsimavoq. Ilumoorpoq arnat ilagiinni kristumiuni eqqortumik inissisimaffimminnik attassinissaannik erseqqissaasoq tassaammat Paulus. Pissutsini nalinginnaasuni ilagiit ataatsimiinnerini arnat ilinniartitsisussaanngillat. (1 Korintumiut 14:33-35) Ilagiit ataatsimiinneranni angummik kristumiumik najuuttoqanngippat imaluunniit anersaap illernartup sunniineratigut pruffiitisut arnaq oqalugiassaguni niaqoquteqartariaqarpoq. Tamanna tassaavoq „oqartussaassutsimut ilisarnaat“, qullersaqarnermik Guutip aaqqissuussaanik akuerinninnermut takussutissaq. — 1 Korintumiut 11:3-6, 10.
10. Inuit ilaasa Paulus qanoq pasillerpaat, sukkulli ersersinneqarpa pasilliineq tamanna kukkusuusoq?
10 Ilagiit ataatsimiinnerini suut tamarmik „ippinnanngitsumik torersumillu“ ingerlasarsinnaaniassammata kristumiut siulliit Guutip aqutsineratigut najoqqutassianik tamakkuninnga eqqaasinnissaat Paulusip qularnanngitsumik pisariaqartutut isigisimavaa. (1 Korintumiut 14:40, NV) Tamannali ima paasisariaqarpa inuit ilaasa oqartarnerattut Paulus arnanik iluarinninngitsoq? Naagga, taamaanngilaq. Paulusiunnginnerpa Romamiunut allakkami kapitaliisa naggataanni arnanik kristumiunik qulingiluanik asannittumik inuulluaqqusisoq? Føbemik, Priskamik (Priskilla), Tryfænamik Tryfosamillu pingaartitsingaarnini ersersinnginnerpaa, oqannginnerpalu arnat kingulliit taaneqartut eqiasuillutik ’Naalakkami sulingaartut’? (Rûmamiut 16:1-4, 6, 12, 13, 15) Aammattaaq Paulusiuvoq isumassarsisinneqarluni ima allattoq: ’Tamassi Kristusimut kuisimasusi Kristus atisimavarsi. Naami juutillu griikerillu, naami inussiallu inussiaanngitsullu, naami angutillu arnallu, tamassi ataasiugassi Kristus Jesusimi.’ (Galâsiamiut 3:27, 28) Paulusip qatanngutiminik arnanik kristumiunik pingaartitsisuusimanera ersarippoq, ilaatigut Lydiamik, piffissami misilinneqarfiusumi maligassaasumik inoroorsaarsimasumik. — apustilit suliáinik agdlagkat 16:12-15, 40; Filípimiut 4:2, 3.
Ullumikkut arnat eqiasuitsut
11, 12. (a) Tussiaat 68:12 ullumikkut qanoq eqquussimava? (b) Qatannguterpassuavut arnat pissutsinik qanoq ittunik atugaqarpat, uagutsinnillu asanninnermik ersersitsivigineqarnissartik qinnunneqarnissartillu sooq atorfissaqartippaat?
11 Ullumikkuttaaq ilagiinni kristumiuni arnarpassuaqarpoq eqiasuillutik ’Naalakkami sulingaartunik’. Kisitsisitigummi nalunaarsuutitigut ersersinneqarpoq ’arnat ajugaanermik nalunaariartortut amerlaqisut’, aap nalunaajaasorpassuit ullumikkut naggatissap nalaani Jehovap atugaasa amerlanersaat arnaapput. (Tussiaat 68:12) Arnat kristumiut eqiasuitsut taakku tusaamasaallualersimapput, nuliaasutut, anaanaasutut, illumi ningiuusutut immaqalu angerlarsimaffiup avataani suliffeqaatigalutik kristumiutut oqaluussisartutut naammassisassaminnik ilungersuussisaramik.
12 Qatanngutitsialassuatta arnat tamakku ilarpassui uppinngitsunik ueqarput. Pissutsit atukkatik taamaattut ullut unnuallu ingerlaneranni tamani atortariaqarpaat. Ilaat Jehovap kiffaanut ilumoortunut piumasarisaasunik naammassinninniaatigalutik nuliaalluartuuniarlutik ukiorpassuarni ilungersorsimapput. Tamanna oqitsuusimanngilaq, naammagittarlutilli atorsimavaat neriuutigiuarlugulu kristumiutut pissuserissaarnermikkut uitik ’oqaaseqanngitsukkut ilataariumaarlugit’. Uiusut taamaattut uppertunngoraangata ilaqutariinnut tamanut nuannaarutaasaqaaq. (1 Pîtruse 3:1, 2) Ilagiinnulli ilaasortaasunit qatanngutitut tunniusimanermik ersersitsivigineqarnissartik qinnunneqarnissartillu qatanngutit arnat aalajaatsut taakku ilaannikkut pisariaqartittarpaat. Soorlu ’anersaaq piuaatsoq sallaatsorlu’ pissuseriniarsarisaat ’Guutimut erlinnaqisoq’, taamattaaq aalajaallutik assuarnaattuarnerat uagutsinnut erlinnartorujussuuvoq. — 1 Pîtruse 3:3-6.
13. Sooq oqartoqarsinnaava qatanngutivut arnat pioneriusut eqiasuillutik ’Naalakkami sulingaartut’, ilagiillu iluanni qanoq isigineqartariaqarpat?
13 Qatanngutit arnat pioneritut kiffartortut eqiasuillutik ’Naalakkami sulingaarput’. Taakkua ilarpassui oqaluussisarnermik saniatigut angerlarsimaffimminnik, uiminnik meeqqaminnillu isumaginnittariaqartarput. Atortussatigut pisariaqartitatik piumallugit ilaat ullup affaa suliffeqarput. Tamakku tamaasa naammassiniassagaanni pilersaarusiorluarneq, aalajangeriataallaqqissuseq, qasusuissuseq annertuumillu suliniuteqarnissaq pisariaqarput. Oqaluussisartut pissutsit atukkatik pissutigalugit pioneritut kiffartorsinnaanngitsut qatanngutinik arnanik taakkuninnga tapersersuisariaqarput.
14. (a) Qasusuissutsimigut maligassaalluartumik taasaqarit. (b) Arnat kristumiut allat kikkut nersualaartariaqartuuppat, sooq? Najukkassinniitunik taasaqarit.
14 Kristumiut arnat ilaat pioneritut kiffartornerminni ilungersornermik malugisarialimmik ersersitsisimapput. Grace Lounsbury Canadameersoq 1914-imi pionerinngorsimavoq. Napparsimalernini pissutigalugu 1918-imi pioneriujunnaartariaqarsimavoq, 1924-mili pionerinngoqqissimalluni. Matuma allaaserineqarnerani suli pioneriuvoq 104-nik ukioqarluni! Qatanngutit arnat 1940-kkunni Vagttårnip Bibelimik ilinniarfiani Gileadimi ajoqersuiartortitassatut ilinniartunut siullernut ilaasimasut aalajaallutik suli kiffartorput, ajoqersuiartortitatut imaluunniit Brooklynimi Betelimi, imaluunniit Vagttårnip Peqatigiiffiata immikkoortortaqarfiisa ilaanni. Arnat kristumiut tamakku tamarmik, aammalumi qatanngutit arnat Betelimi kiffartortut, imminut pilliutigiumassutsimik ersersitsipput maligassaalluarlutillu. Suliaannik pingaartitsinitsinnik oqaluttuussimanerpavut?
Angalallutik nakkutilliisut nuliaat
15, 16. Ingammik arnat kristumiut kikkut assut nersualaarneqartariaqarpat, sooq?
15 Arnat kristumiut nersortariaqarlutillu qiimmassarneqartariaqartut tassaapput angalallutik nakkutilliisut nuliaat. Qatanngutit arnat imminnut pilliutigiumassuseqartut taakku uitik, qatanngutinik anersaakkut nakussassaaniarlutik ilagiinniit ilagiinnut, imaluunniit ilageeqatigiinniit ilageeqatigiinnut, angalagaangata angalaqataanissaminnut piareersimasarput. Ilarpassuisa angerlarsimaffimminni ilorrisimaarnissaq pinngitsoortariaqartarpaat; sapaatit-akunneri tamaasa siniffimmi allami sinittariaqartarput, tamatiguunngitsoq ilorrisimaarnartumi. Qatanngutilli neqeroorutigisinnaasaat nuannaarlutik ilassisarpaat. Anersaakkut qatanngutiminnut arnanut maligassaalluartuupput.
16 Arnat kristumiut taakku uiminnik nalissaqanngitsumik tapersersuisuupput, arnat Guutimik mianerinnittut ’Jesusimik malittarinnissimasut kiffartorfiginnissimasullu’ assigalugit. (Mákorse 15:41) Uitik ’Naalakkap suliaanik naammassisaqangaartuinnartut’ piffissami annertuumi kisimeeqatigisinnaaneq ajorpaat. (1 Korintumiut 15:58) Ilaasa, soorlu Rosa Szumigap Frankrigimeersup 1948-milu piffissani tamaat kiffartulersimasup, uitik nassatassaannik poortuissutiinnariarlugit ukiuni 30-ni 40-niluunniit angalaqatigisimavaat. Jehovamut qatanngutiminnullu angutinut arnanullu imminnut pilliutiginissaminnut piumassuseqarput. Pingaartittariaqartuupput asanninnermillu ersersitsivigisariaqartuullutik, aammalu qinnutitsinni eqqaamasariaqarpavut.
Utoqqaanertat nuliaat
17, 18. (a) Qatanngutit angutit kiffartuussinermik atorfeqartut nuliaat qanoq pissuseqartariaqarpat? (b) Utoqqaanertat nuliaat Jehovamut qatanngutiminnullu sunik pilliuteqarnissaminnut piumassuseqarpat, nuliaasullu allat uitik qanoq ikiorsinnaavaat?
17 Qatanngutit angutit utoqqaanertatut ilagiinnilu kiffartuuteqartutut toqqarneqarsinnaasut piginnaassusissaat tulleriiaarlugit Paulusip taagoramigit arnattaaq eqqaavai: ’Aammattaaq arnat titsiitsuussapput, mamarliisuunngitsut, mianersortut, tamatigullu ilumoortut.’ (1 Timûtiuse 3:11) Unnersuussut nalinginnaasoq tamanna arnanut kristumiunut tamanut tunngagaluarpoq, ataqatigisaali eqqarsaatigissagaanni ingammik kiffartornermik atorfeqartut nuliaat unnersuussummik tamatuminnga maleruaanermikkut maligassiuisariaqarput.
18 Qujanartumik angutit kristumiut nakkutilliisuusut nuliaat tuusintilikkuutaat tamatumani maligassiuisuupput. Ileqqumikkut atisamikkullu ingasaassinianngitsuupput, kristumiutut inooriaatsimik ilumoorussisuullutik, oqqatik paarisinnaallugit, tamatigullu ilumoortuunissartik ilumoorullugu ilungersuutigalugu. Aammattaaq aalajangiusimavaat pilliuteqarnissartik uimillu piffissamik imminnut atorsinnaassaraluaminnik ilagiinnut tunngassuteqartunik atuisarneranik akuerinninnissartik. Arnat kristumiut aalajaatsut taakku asanninnermik ersersitsivigisariaqarpavut qiimmassartarlugillu. Immaqa qatanngutit angutit amerlanerit ilagiinni kiffartuuteqarnermi immikkut pisinnaatitaaffinnik anguniagaqarsinnaassagaluarput tamanut iluaqutaasunik tamakkuninnga pilliuteqarnissaannik nuliaasa maniguullutik suleqatigiumasuuppatigik.
’Arnat utoqqaat’ aalajaatsut
19. Sooq ’arnat utoqqaat’ aalajaatsorpassuit ilagiiminni assut pingaartinneqarpat, qanorlu uagut taakku isigisariaqarpavut?
19 Arnanik Bibelimi eqqartorneqartunik samminninnitsinni paasivarput Jehovamut kiffartornissamut arnanut uppertunut qanoq utoqqaatigineq akornutaanngitsoq. Saramik, Elisabetimik Annamillu oqaluttuakkut tamanna erseqqissarneqarpoq. Ullumikkut arnarpassuit kristumiuusut utoqqalisut uppernermut qasusuinnermullu maligassaalluarput. Taakkuattaaq utoqqaanertanik kaammattuilluarsinnaapput qatanngutiminnik arnanik inuusunnerusunik ikiuinermikkut. Misilittagaqarluartuugamik arnanut inuusunnerusunut pitsaasunik unnersuussisinnaapput, taamaaliornissaminnullumi Bibelimi pisussaatinneqarput. (Títuse 2:3-5) Aammali ilaannikkut qatanngut arnaq utoqqaq unnersuunneqarnissaminik atorfissaqartitsisarpoq. Taamaappat utoqqaanertap taamaattumik unnersuussisup ’oqaanniassavaa anaanatut ilillugu’. Utoqqaanertat ’uillarnernik ataqqinnittuusariaqarput’, pisariaqarpallu atortussatigut ikiorneqarnissaat isumagisariaqarlugu. (1 Timûtiuse 5:1-3, 5, 9, 10) Qatanngutitta arnat utoqqaat asasatta malugisinnaasariaqarpaat atorfissaqartikkitsik pingaartikkitsillu.
Kristusip naalakkersueqatai
20. Immikkut pisinnaatitaaffimmut annertuumut sumut arnarpassuit kristumiut peqataappat, savallu allat sooq tamanna qujamasuutigisariaqarpaat?
20 Tassa Bibelimi ersarissumik paasitinneqarpugut angutaaneq arnaanerlu imaluunniit ammip qalipaataa eqqarsaatigalugit ’inuup kinaassusia Guutip atunngikkaa’. (Rûmamiut 2:10, 11; Galâsiamiut 3:28) Naalagaaffimmini ernerminut naalakkersueqataasussanik Jehovap toqqaanerani aammattaaq tamanna ersarilluarpoq. (Juánase 6:44) Savat allat amerlangaartut qujamasuutigisinnaavaat arnat aalajaatsut soorlu Jesusip anaanaa Maria, Maria Magdalene, Priskilla, Tryfæna, Tryfosa allarpassuillu kristumiuni siullerneersut maanna Naalagaaffimmi naalakkersueqataammata, pissutsinullu arnat atugaannut misigissusiinullu ilisimasaqarluarnerminnik naalagaaffik taanna pisuunngorsarlugu. Jehova taamaalilluni siumut isigisinnaassutsimik ilisimassutsimillu ersersitsisimavoq. — Rûmamiut 11:33-36.
21. Arnat eqiasuillutik ’Naalakkami sulingaartut’ ullumikkut qanoq misigiffigaavut?
21 ’Arnat taakku iivangkiiliu pillugu assorooqatini’ eqqartoramigit Paulus asannippalussusiagut pingaartitserpalussusiagullu uagut ullumikkut malissinnaavarput. (Filípimiut 4:3) Jehovap Nalunaajaasuisa tamarmik, angutit arnallu, ’arnanik ajugaanermik nalunaariartortunik amerlaqisunik’, aap, arnanik eqiasuillutik ’Naalakkami sulingaartunik’, suleqatiginnilluinnarnertik immikkut pisinnaatitaaffittut isigaat. — Tussiaat 68:12; Rûmamiut 16:12. (wD 1/7 91)
Apeqqutit uteqqiissutissat
□ Jesusip qanoq ililluni ersersippaa juutit upperisarsiornikkut pisortai arnanut paqumisunneratigut assiginagit?
□ Arnat Guutimik mianerinnittut qanoq ilillutik Jesusimik isumassuisimappat?
□ Ilagiit ataatsimiinnerini arnat peqataasarnerat pillugu Paulus qanoq unnersuussiva?
□ Qatanngutivut arnat sorliit immikkut tunniusimaffigineqarlutillu annertoqqusersorneqartariaqarpat, sooq?
□ Ullumikkut arnat eqiasuillutik ’Naalakkami sulingaartut’ qanoq misigiffigisariaqarpavut?
[Atuaqqissaarnermi apeqqutit]
[Qupp. 10, 11-mi assiliartaq]
Jesus apustiliilu arnanit isumagineqartarsimapput
[Qupp. 12-mi assiliartat]
Angalallutik nakkutilliisut utoqqaanertallu allat nuliaat Guutip suliareqqusaani naleqangaartumik suleqataapput