Nappaatit toqulu ungasinngitsukkut peerutissapput!

KIALUUNNIIT napparsimalernissani toqunissaniluunniit kissaatiginngilaa. Inuit atugarisaasigut nakorsaatitigullu professori oqarpoq: „Sivisunerusumik inoorusussuseq tamanna inuiaat tamarmik malunnaatigigunarpaat; inuiaat oqaluttuarisaaneratigut tamatigut inuiaqatigiinnilu tamangajanni tamanna malunnartuarsimavoq. Imminut atatinniarnermut tunngaviusumut attuumassuteqarpoq. . . . Ponce de Leon anguterpassuit inuunerminnik sivisunerulersitsiniarlutik inuunerminnik atuisimasut tusaamasaanerpaartaannaraat. Nakorsaatitigut ilisimatuussutsikkut tamaviaarutit tamangajammik nappaatit toqullu akiorniarnerisigut inuunerup sivisunerpaamik atatinniarnissaanut atorneqartarput.“

Toqu ima pissusissamisuunngilluinnartigisutut isigaarput ikinngutitsinnik qanigisatsinnillu toqusoqaraangat aliasunnerput ingerlaannaq millisinniarsarisarlutigu. Atuakkami Funeral Customs the World Over-imi ima allasimavoq: „Inuit atugartuunngorsagaannginnerpaanit atugartuunngorsagaanerpaanut iluanni immmikkooqatigiinnik inoqanngilaq, kiffaanngissuseqarluinnarnerminni periarfissaqarnerminnilu, toqusortamik timaannik persuarsiortumik ilisinngitsoorneq imaluunniit peersinngitsoorneq ajortunik. . . . Inuiaat tamarmik amigaateqartutut misiginerat tassuuna matoorneqartarpoq. Ilisineq ’eqqortutut’ isigineqaannarpoq, taamaaliunngitsoornerlu ingammik qanigisariinnikkut, misigissutsikkut, inooqatigiinnikkut, misilittagaqaqatigiinnikkut allatigulluunniit attuumassuteqartut ’eqqunngitsuliornertut’, sumiginnaanertut pissusissamisuunngitsutut, isumakkeerfigeqqussutigisariaqakkatut imaluunniit kanngusuutigisariaqakkatut, isigisarpaat. . . . [Inuk] pinngortitaavoq toqusortaminik persuarsiortumik ilisisartoq.“

Nappaatit toqullu aallaaviat

Taamaattumik nappaatit toqullu ullut ilaanni peerneqarnissaannik eqqarsaat ilalernartuuvoq. Kisianni taama neriuuteqarnissamut tunngavissaqarpa? Aap, neriuutimmi tamakku sianisuumik, tutsiviginartumik kukkujuitsumillu tunngaveqarput, tassa Pinngortitsisup oqaasianik isumassarsiarititaasumik, Bibelimik.

Atuakkap tamatuma inuit pissutsinik alianartunik atugaqarnerannut suna pissutaasoq erseqqissumik nassuiarpaa. Allaatigaa inuk siulleq, Adam, Guutimit pinngortitaasimasoq angerlarsimaffimmullu paratiisiusumut Kangia-Qiterlermiittumut inissitaasimalluni. Adam pinngortitaavoq naammalluinnartoq; nappaatit toqulu naluai. Erniinnaq aamma naammalluinnartuusumik nuliartaarpoq, marluullutillu nunami inuunissaq naassaanngitsoq qilanaarisinnaavaat. — 1 Moses 2:15-17, 21-24.

Pissutsilli eqqissinartut atuunnerat sivisuallaanngilaq. Namminissarsiorluni Adamip Guutimut attaveqarunnaarnissani qinerpaa, sulerulunneq, assoroornartulerineq, nappaatit toqulu atuagassarilerlugit. (1 Moses 3:17-19) Adamip kinguaavisa inuuneq aamma taama alianartigisoq Adamip nammineq qinersimasaa kingornussaraat. Rûmamiut 5:12-imi ima nassuiarneqarpoq: ’Taamaattumik soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ Rûmamiut 8:22 ima ilanngussivoq: ’Ilisimavugummi pinngortitat tamarmik  suli tamassa anersaameqatigiillutik erloqeqatigiissut.’

Nunami qilammiluunniit?

Bibelilli neriorsoqqissaarpaatigut Guutip qanittukkut inuiaat naalattut peqqissutsimut pilluarnermullu Adamip Evallu asuliinnartissimasaannut utertissagai. sarĸúmersitat 21:3, 4-mi ima allassimavoq: ’Guutip nammineq najorumaarpai; qulliillu tamaasa isaannit aallarterumaarpai, toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq, siulliit peermata.’ Pruffiitip itsaq inuusimasup aamma siulittuutigaa piffissaq imaattussaq: „Nunatsinni ima oqartoqassanngilaq: ’Napparsimavunga!’“ — Jesaja 33:24.

Takorlooriaruk silarsuaq napparsimaveqarnanilu iliveqarfeqanngitsoq. Takorlooriaruk inuujuaannarsinnaasutit napparsimalernissat toqunissallu siooraginagit. Aap, Guutip neriorsuutaasa tamatta qamuuna misigissutsivut attorpaat. Qanoq ililluta nalunngisinnaavarput neriorsuutit nuanningaartut tamakku nunamut, qilammuunngitsoq, tunngasut? Allassimaffiit siuliini issuarneqartut attavigisaannit tamanna paasineqarsinnaavoq. sarĸúmersitat kapitali 21-mi versit siulliit ’qilak nutaaq nunalu nutaaq’ eqqartorpaat. Tassani erseqqissumik allaatigineqarpoq Guutip inuit najorumaarai innuttariumaarlugillu. Jesajap allagaani napparsimasoqannginnissaq pillugu neriorsuut ima nanginneqarpoq: „Inuit tassani [nunatsinni] najugaqartut ajortiminnik isumakkeerfigineqarput.“

Tassa neriorsuutit qiimmatsaatiginartut inuunermut nunamiittumut tunngapput. Neriorsuutit tamakku aamma Jesusip Ataataminut qinnutaanut naleqqupput: ’Peqqusat qilammisut nunamissaaq pili.’ — Matîuse 6:10.

Sooq erniinnaq?

Neriorsuutit tamakkua siunissami ungasinngitsumi eqquunnissaannik inuit millionilikkuutaat paasinninnissaannik Jehovap nalunaajaasuisa ikiorsimavaat. Sooq tamanna taama qularinngitsigisinnaavaat? Silarsuup  matuma ulluisa kingulliit nalaanni inuunitsinnut Bibelimi uppernarsaatissarpassuaqarmat. (2 Timûtiuse 3:1-5) Jesusip ajoqersugai naggatissap qaqugu nalliunnissaanut nalunaaqqutissanik paasiniaasimapput. Akillugit Jesusip 1914-imi Sorsunnersuaq Siullermiit silarsuarmi pisartut peqqissaartumik taagorpai. * Taava ima ilanngussivoq: ’Taamattaaq tamakku tamaasa takulerussugik taanna qanillisoq ilisimassavarsi. Ilumut oqarfigaassi: eqqarleriit uku tamakku tamaasa naammassisinnagit nungussanngillat.’ Aaqqissuussaanerup matuma naggatissaa kinguaariit 1914-imi inuusut suli inuutillugit nalliutissaaq. — Matîuse 24:33, 34.

Jehova Guutip ernini Kristus Jesus nunarsuarmi alianaatsumi naalliuutinut anniaatinullu pissutaasut tamaasa peeriartoqqullugit aallartissavaa. Bibelimi ajussutsip ajugaaffigineqarnissaa ’Guutip ajugaqanngitsup ullussarsuani sorsunnissaq’-mik, Harmagedonimik, taaneqarpoq. — sarĸúmersitat 16:14, 16.

Inuppassuit Guutimik mianerinnittut silarsuarmi pissutsit sualuttut tamakku anigussavaat Kristus Jesusillu naalagaanera eqqissinartoq misigissallugu. (sarĸúmersitat 7:9, 14; 20:4) Naak qilammit naalakkersuigaluartoq nunami inuusut tamarmik naalakkersuinerup kinguneri nuanningaartut iluaqutigisinnaassavaat — Harmagedonimi sorsunnermi aniguisussat aamma inuit millionilippassuit kingorna toqusunit makititaasussat. Taava neriorsuut manna piviusunngorumaarpoq: ’Taanna [Kristus] kunngiussagami qinngarsuisut tamaasa isikkami ataannut ilitserlugit. Qinngarsuisut suujunnaarsitassat nunngutissaat tassa toqu.’ — 1 Korintumiut 15:25, 26.

Taamaattumik isumalluarluta oqarsinnaavugut nappaatit toqulu ungasinngitsukkut peerneqassasut. Tamanna eqqarsaatersuutaannaanngilaq takorluuinerinnaananilu. Tassaavoq Jehova Guutip ’sallusuitsup’ neriorsuutaa tatiginartoq. Illit neriorsuut tamanna upperissaviuk? Taamaalioruit naassaanngitsumik iluaqutigissavat! — Títuse 1:2. (wD 15/6 91)

[Quppernerup ataani ilanngussaq]

[Qupp. 6-mi assiliartaq]

Nappaatit toqulu ungasinngitsukkut peqqissutsimik inuunermillu taarserneqassapput — naassaanngitsussamut