Sallusuissut tamaat paasiuk!

„ATEQ taanna Bibelimi takusimanngisaannarpara,” Francisco pilerpoq. Jehovap nalunaajaasuisa ilaannik oqaloqateqarmi ateq Jehova taaneqarpoq. Franciscollu Bibelimini — Portugalimiusuumi 1969-imi Almeida-nutsikkami — ateq Guutimeersoq taanna ataatsimilluunniit nassaarisinnaanngilaa. Franciscop, Brasiliami najugallip, katuuliusutut oqaluffimmi sapaatikkut naalagiarnerit najuuffigisarpai Bibelilu angerlarsimaffimmini atuarajullugu. Taamaattorli aqqip Jehovap saqqummiunneqarnerata soqutiginnilersippaa.

Guuti kinaava?

Sapaatip-akunnera qaangiummat oqaluussisartup Francisco pulaaramiuk Almeida-nutsigaq nutaannginnerusoq nassarpaa. Nutsikkani taakkunani marlunni Tussiaat 83:18 sanilliuppaat. Sumik paasisaqarpat? 1966-imi nutsikkami allassimaffik imaappoq: ”Illit, kisivit JEHOVA-mik ateqartutit, nunarsuup qulaani Qutsinnerpaavutit!” 1969-imili nutsikkami ”JEHOVA” taarserlugu allassimavoq ”NAALAGAQ”. ”Soorlu takusinnaagit tassani allanngortitsisoqarsimavoq,” oqaluussisartoq oqarpoq oqarlunilu: „’Naalagaq’ atiunngilaq, ilaa?” „Aap,” Francisco akivoq mamiatsappasillunilu nangilluni: ”Qanoq ilillutik taamaaliorsinnaappat?”

Tamanna Guutip aqqa pillugu apeqqummut misissueqqinnermut aallaaviusimavoq. Soorlu, Franciscop ujarlerfissiaq The Catholic Encyclopedia (1910) naapertorlugu paasivaa Jehova tassaavoq „Testamentitoqqami Guutip nammineq aqqa”. Paasisaasalu ilagaat Testamentitoqqami, epriiarisuinnangajak allataasumi, ateq taanna 7000-ingajariarluni allanneqarsimasoq. Nutserisoq kinaluunniit ateq Jehova ”Naalagaq”-mut, taaguutaannaasumut, allanngortissallugu pisussaaffeqanngilaq. Franciscop ateq Jehova pillugu sallusuissut paaserusuppaa. Tamannalu paasisimasaqarluartumik ilinniartitsisoqarluni Bibelimi paasiniaaqqissaarnermigut paasivaa.

Jesus sumi inissisimava?

Silamiut upperisarsiornerisa sallusuissut mumisissimavaat eqqunngitsumillu issuaavigisimallugu. Jehovap Nalunaajaasui illumiit illumut oqaluussigaangamik inuit qanorpiaq upperisaqarnerannik tusarnissaminnut periarfissaqartarput. Soorunami sumiinneq apeqqutaalluni allanngorarsinnaapput, isumalli aalajangersimasut naammattuugassaagajupput. Soorlu aperigaanni: ’Guuti kinaava?’ amerlasuut akisarput: ’Jesus.’ Isumaqarput Jesus tassaasoq Guuti ajugaqanngitsoq. Isumali tamanna ilumoorpa?

 Manna eqqarsaatigeriaruk: Jesus Ataataminut qinnummini oqarpoq: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Malugiuk Jesus imminut pinnani Ataatanili qilammiusoq ’kisimi ilumut Guutiusumik’ taagaa. Taamaattumik Jesusip ajoqersugai ilumoorput oqaramik: ’Ilumut Guutip erneraatit.’ Jesusilu nammineq oqarpoq: ’Guutip erneraanga.’ Tassa ilumoortoq unaavoq: Jesus tassaanngilaq Guuti ajugaqanngitsoq, tassaallunili Jehova Guutip ernera. — Matîuse 14:33; Juánase 10:36.

Nunarsuaq sumik siunissaqarpa?

Kinguaariit uagut nalitsinni inuusut nunarsuarlu tamaat isigalugu sumik siunissaqarpat? John F Kennedyugaluaq Amerikami præsidentiusimasoq Naalagaaffiit Peqatigiit generalforsamlingianut oqalugiaammini ima oqarsimavoq: ”Kinguaariit maanna inuusut inuiaat oqaluttuarisaaneranni pitsaanerpaanngortinnissaannut — imaluunniit kingullinngortinnissaannut — pissaaneqarpugut.” Ullumikkut silarsuarmi pisortat aamma taamatut isumaqarunarput. Nunarsuup ikuallalluni atomilluunniit nukinga atorlugu nungunnissaanik isuma Jehovap nalunaajaasuisa oqaluussinerminni naammatoorajuppaat. Taamatut isumaqarneq taperserniarlugu ilaasa sarĸúmersitat 21:1 innersuussutigisarpaat, ima allassimasoq: ’Qilallu nutaaq nunalu nutaaq takuakka; qilak siulleq nunalu siulleq peermata, imarlu peqarunnaarluni.’

Bibelimili oqaaseq ”nuna” inuiannut tunngatillugu atorneqarajuppoq. Assersuutigalugu Mosesip allagai siulliit 11:1-imi allassimavoq: ”Taamani nunarsuarmiut tamarmik [nuna tamarmi, NV] assigiinnik oqaaseqarput.” (Aamma takukkit 1 Kunnginik allakkat 2:1, 2; Tussiaat 96:1) sarĸúmersitat 21:1-imi ’nuna siulleq’-mik allassimasup Nunarsuaq pinngilaa, kisianni inuiaat ajortut piiarneqartussat pineqarput. Taamaalilluni nunami paratiiseqaleqqinnissaanut aqqutissaqalissaaq. (Lúkarse 23:43; 2 Tásalûníkamiut 1:6-9; sarĸúmersitat 21:4) Tamanna aamma Bibelip sinneranut naapertuuppoq, tassanimi takutinneqarpoq Nunarsuaq aserorneqanngisaannassasoq. Soorlu Tussiaat 104:5-imi naqissuserneqartoq Guutip ’nunarsuaq aalajaatsumik tunngavileraa naassaanngitsumut patajaallisillugu’. (Naleqqiuguk Nalunaajaasup oqaasii 1:4) Aap, Jehovap naassaangitsussamut ’nunarsuaq inoqartussanngorlugu pinngortippaa’. — Jesaja 45:18.

Sooq sallusuissut tamaat ujartariaqarpa?

Kukkusumik paasinninnerit ullumikkut atugaaqisut ilaannaminingui siuliani taagoreerpavut. Apeqqutit assigiinngitsut pillugit tunngaveqartumik eqqarsartoqarusukkaangat, soorlu Franciscotut, Jehovap Nalunaajaasui Bibeli tunngavigalugu sallusuissut pillugu ineriartornartumik nuannaarlutik oqaloqatiginnikkumasarput.

Sallusuissut tamaat paasinngikkaanni ajunaarnermik kinguneqarsinnaavoq. Jesus tassaannaasoq Mariap Josefillu ernerat, Nazaretimi sanasuusimasoq, Jesusip nunamiinnerani inuppassuit taamatut uppertitaanertik akueriinnarsimavaat. Taamaattumik soqutigivallaanngilaat. Ilaatigullumi ilumooraluarput. Ilumut Jesus Mariap erneraa sanasutullu sulisimalluni. (Mákorse 6:3) Jesusili pillugu sallusuissut tamannaannaava? Naamik, piviusumimmi oqaatigalugu anersaaq illernartukkut naartunngortitaasimavoq Josefilu angutisiariinnarlugu. Jesusimi allaanani Messiasiuvoq, ’kunngit kunngissaat’! (sarĸúmersitat 17:14; Lúkarse 1:32-35; apustilit suliáinik agdlagkat 2:36) Amerlasuulli Jesus pillugu sallusuissut tamaat paasisimanngilaat taamaattumillu immikkut piginnaatitaaffik asseqanngitsoq pinngitsoorlugu, tassa Jesus maani nunamiikkallarmat inuttut ilaginngitsooramikku.

Sallusuissut tamaat ujaruk

Makedoniatoqqami illoqarfik Berøa ukiuni hundredelinni siullerni innuttami ilaasa maligassaalluartumik isumaqarnerat pillugu Bibelimik atuartartunit ilisimaneqarluarpoq. Oqaluttuaq imaappoq: ’Oqaaseq [apustilip Paulusip oqaluussissutigisaa] ilassivaat kajumigingaarlugu, ullullu tamaasa allakkat misissortarpaat tamakku taamaannersut misilikkumallugit.’ Tamanna sumik kinguneqarpa? ’Taava ilaat amerlasuut arnallu angutillu Griikerit ataqqisaasut ilaat ikinngitsut uppertunngorput.’ — apustilit suliáinik agdlagkat 17:11, 12.

 Aammali itsaq Guutip pruffiitii maligassaalluartuupput. Messiasikkut annannissaq ’siunersiutigilluarlugulu killisiutigisarsimavaat’. (1 Pîtruse 1:10) Ilungersornerallu Guutip pilluaqqusimavaa. Tassa allatut iliuusissaqanngilaq. Sallusuissut Bibelimeersoq tamaat nanissagutsigu peqqissaartumik kipisuitsumillu atuaqqissaartarneq aqqutissatuaraarput.

Immaqa eqqarsarputit: ’Suminngaanniit aallartissaanga?’ Arnaq Brasiliamiu kristumiut atuagassiaataannik atuareerluni allappoq: ”Erniinnaq paasivarput [uinilu] apeqqutissarpassuavut akineqassappata annertunerusumik ilisimasaqartariaqarluta . . . Bibelimik atuakkanillu allanik Ataatatta qilammiusup ilinniarnerunissaanut ikiuutigisinnaasannik sumi pissarsisinnaanersunga paasitilaannga.” Aqqut ajunngitsoq ingerlavigaa: Bibelimik atuarneq atuagassianillu bibelilersaarutinik ilumoortunik ikiorteqarluni atuaqqissaarneq. Aamma illit sallusuissut tamaat ilikkarusukkukku, taava qinunikkut Jehova Guuti saaffigiuk ikioqqullutillu qinnuvigalugu. Tamatumunnga atatillugu oqaatsit qiimmaallannartut uku malugikkit: ’Ilisimassutsikkulli inorsartumik ilaqarussi Guuti tamanik appisaluussinani tunisisaannartoq qinnuvigiliuk; taava tunineqarumaarpoq. Upperlunili qinuli nakimanani.’ — Jâko 1:5, 6.

Inuit millionilikkuutaat Jehovap nalunaajaasuinik Bibeli pillugu oqaloqateqartarput, sallusuissut nassaariniarlugu mississueqqissaajutigalutik. Guuti ilumoortoq erneralu Jesus Kristus pillugit eqqorluartumik ilisimasaqalerneq, tamatumunngalu naapertuuttumik inuuseqarneq, inuunermik naassaanngitsumik naleqarpoq. (Juánase 17:3) Aamma illit pilluaqqussummut tamatumunnga ilangeeqataasinnaavutit sallusuissut tamaat qasusuillutit ujarukku. (wD 15/9 90)

[Qupp. 16-mi assiliartaq]

Sallusiussut Jesusimut tunngasoq suusimava? Sanasuinnaanngitsoq, aammattaarli messiassiusoq.